Assalamualaikum w.w. Ananda Benni,
Nampaknyo capek atau lambek memang tapaso juo kito malalui tahap dekonstruksi
dahulu sabalun kito dapek maadokan rekonstruksi taradok [adat jo ] budaya
Minangkabau.
Nan jadi masalah adolah apo dekonstruksi tu akan diadokan sacaro radikal
sampai ka akar-akarnyo dan dalam wakatu pendek, atau inkremental, nan
dilaksanakan sacaro batahap, terencana, dan takandali. Ambo cenderung ka nan
inkremental ko, karano dekonstruksi radikal, bisa-bisa indak dapek
dikandalikan. Tapi bahkan nan inkremental ko nampaknyo susah bana, karano ado
kalompok nan bakapantingan bana jo tatanan nan ado kini, walaupun tatanan nan
ado kini itu ikuik manyababkan Minangkabau tu taicia di balakang urang lain.
Indak manggarik saketek juo.
Tapi memang pacahnyo bisua indak bisa dipacapek. Jadi kito tunggulah bisua tu
masak dulu, inyo ka pacah surang juo. Apo nan dapek kito karajokan kini, kito
karajokan, antaro lain malalui MPKAS dan MAPPAS. Prospeknyo lumayan.
Wassalam,
Saafroedin Bahar
benni inayatullah <[EMAIL PROTECTED]> wrote:
Bapak Saaf non bosa botuah..
Masalah monyatukan urang awak iko memang susah. Tarutamo monyatukan
pemikiran. Ontah apo sobobnyeh sojak dulu urang awak lah tobiaso babeda
pondapek. Buktinyo kotiko jaman pergerakan dulu ranah minang olah monjadi
somacam laboratorium ideologi. Ado nan demokratis, ado nan sosialis, ado nan
liberalis dan ado nan sosial demokratis. Apokah iko adolah kelemahan atau
apokah iko bisa kito jadikan kolobiahan.
Masalah iko juo mainggok i desentralisasi kewenangan pemerintah pusat ke
daerah daerah. Bahkan gubernur kito molontarkan wacana untuak moapuih
pemerintahan propinsi. Dan itu artinyo monyorahkan kewenangan botua botua ko
identitas paliang ketek pemerintahan non diatur undang undang. Iko memang agak
kontradiktif jo ide Bapak non torogak mombuek tatanan bosamo ditingkek
Minangkabau. Apo indak mocom itu lo kojadiannyo nantik ?
Ide untuak monyatukan urang rantau tolobiah dulu ancak bona tih pak. Dan iko
lah kito mulai jo mombontuak MPKAS jo MAPPAS nantinyo. Karano untuak masuak ka
urusan pemerintahan kito ndak bisa kueik socaro individu dan paliang efektif
memang dalam bontuak orgnaisasi masyarakaik mode itu. Baiak sobagai kumpulan
ponokan ataupun somacam konsultan.
Awak yakin ide ide Bapak itu nantik bisa kito terapkan tapi sarupo awak
kecekan sobolumnyo baraso rekonstruksi adat jo budaya nan Bapak tawarkan sacaro
fundamental tolobiah dulu harus molalui apo nan dinamokan dekonstruksi.
Dekonstruksi adat jo budaya Minang nan tampaknyo kini olun sampai kosinan. Awak
yakin dekonstruksi ko pasti akan tojadi kotiko masyarakaik kito baliak
monerapkan pola lamo baliak ko nogori dan akhianyo akan morasokan baraso pola
lamo itu indak bisa monjawab probelamatika kehidupan masyarakaik terkini,
sohinggo masyarakaik akan molakukan surang deknstruksi taradok adat dan budaya
tun. Katiko itulah nantinyo bisa dimulai rekonstruksi sarupo nan bapak
mungkasuik..
Mungkin itu dulu Pak
Salam
Ben
Saafroedin BAHAR <[EMAIL PROTECTED]> wrote:
Waalaikumsalam Ananda Benni,
Itu suatu caro nan paralu kito patimbangkan, yaitu
mendesentralisasikannyo. Pangalaman memang
manunjuakkan bahaso kito tabiaso dalam
kalompok-kalompok ketek saroman kaum,suku,jo nagari,
dan alun tabiaso dalam kalompok gadang tingkek
Minangkabau.
Caro mandesentralisasikan itu alah dirintis dek Gebu
Minang dalam mandirikan BPR, nan kini alah bajumlah 40
buah, yaitu tiok BPR didirikan dek masing-masing
kanagarian atau kecamatan. Gebu Minang hanyo
mamfasilitasi sajo.
Namun mungkin justru di situ juo latak masalah kito.
Susah bana untuk manggarakkan kito urang Minang
sabagai suatu kasatuan, untuak mangarajokan karajo
gadang, karano urang awak tabiaso dalam kalompoknyo
surang-surang [ mungkin disaratoi jo parasaan agak
curiga satu samo lain ?] Baitulah, jumlah BPR Gebu
Minang tu indak batambah banyak, tatap sajo 40 ka 40,
dari target 100, ciek tiok kacamatan . Nampaknyo alah
abih angok untuak mangambangkannyo labiah lanjuik.
Mau tak mau ambo tapaso mambandiangkan kondisi urang
awak ko jo kondisi urang Aceh, Batak, atau Papua, nan
banyak saketeknyo cukup solid pado tingkek suku bangso
mereka, sahinggo mampu mangarajokan karajo-karajo
gadang. Urang Aceh jo Papua bahkan mampu mendesakkan
format otonomi khusus untuak daerahnyo
masiang-masiang. Gubernur jo Wakia Gubernur Aceh ini
bahkan urang GAM !
Manyimpuakan saluruh wacana manganai Minangkabau nan
kito adokan dalam bulan-bulan balakangan ko, antaro
lain tantang ABS`SBK, tantang sistem kekerabatan,
tantang ranji/silsilah, lamo kalamoan timbua
partanyaan dalam hati ambo: mungkin atau indak
mungkinkah kito adokan tatanan basamo pado tingkek
Minangkabau sacaro manyaluruah sahinggo kito bisa
marupakan satu kesatuan masyarakat nan andal
['sadanciang bak basi, saciok bak ayam'] maadoki
tantangan maso kini dan peluang maso datang, atau kito
cukuik malapehkan untuang surang-surang sajo ?
Baiaknyo,kito urang Rantau -- nan iduik dalam konteks
sosial budaya Rantau nan agak babeda dari Ranah --
tanyato mulai mampu mambangun dan mandayagunokan raso
kabasamoan iko. Didukuang dek nan mudo-mudo kini alah
bagarak MPKAS, dan sabanta lain MAPPAS. Alhamdulillah.
Kalau memang alun mungkin untuk mampasatukan
Minangkabau sacaro manyaluruah, nan maliputi Ranah jo
Rantau, kito mulailah jo mampasatukan urang Rantau
talabiah dahulu, sacaro didesentralisasikan.
Tantangannyo adolah baa bantuak organisasi jo sistem
manajemennyo, sahinggo kudian indak bacarai barai dek
talongsong jauah bana pandesentralisasian tu.
Wassalam,
Saafroedin Bahar
Wassalam,
Saafroedin Bahar
---------------------------------
Food fight? Enjoy some healthy debate
in the Yahoo! Answers Food & Drink Q&A.
---------------------------------
No need to miss a message. Get email on-the-go
with Yahoo! Mail for Mobile. Get started.
--~--~---------~--~----~------------~-------~--~----~
Berhenti (unsubscribe), kirim email ke: [EMAIL PROTECTED]
Konfigurasi dan Webmail Mailing List: http://groups.google.com/group/RantauNet
Daftar dulu di: https://www.google.com/accounts/NewAccount
-~----------~----~----~----~------~----~------~--~---
