Assalamu'alaykum w.w. sabalun alek ka bamulo surek sapucuak nan balayangkan pangganti siriah dalam carano kok nan kini balain pulo, alek nan sudah balaksanakan tantu disampaikan kaba jo barito alhamdulillah, rasono, nan diniaik alah sampai, nan di ama alah pacah, sasuai jo jadwal nan disusun, pukua 2 siang (14.00 ) acara "MANGANA KAMPUANG" dimuloi, nan mangatangahkan Organ Tunggal sampai pukua 6 patang ari (18.00) dengan Penyanyi Minang ibu kota, al. : Andi Sidi Macho, Bujang 466, Dia Lestari, Alam Batuah, Gafarmael, Ferrry Baswara, Kurnia Zamzami, Rosalina, Ujang Aslimar Koto, Silvy Razak.Rio Perdana, Ajo Jangguik, Ellya Fitri, Buyung Paris,Can Pialauw Pukua .tujuah malam, dibukak baliak jo Gandang Tansa (tasa), sasudah naiak pangguang sakiro 5 minik, mako Gandang Tansa manuju pintu kaporo Halaman Balaikota Bogor, mananti tamu, sadangkan diateh pangguang tampil Group Densalo (Eti Ambo, Alkawi, Herman Sari Alam) nan ma-kolaborasikan Dendang, Saluang dan Organ dan ditambah jo panyanyi lainno Tapek pukua 8 malam, acara disiarkan langsuang oleh 5 Stasiun Radio RRI, yaitu Bogor, Jakarta, Jogya, Padang dan Bukit Tinggi, melalui peralatan radio satelit. Pembukaan acara pukua salapan ko hanyo barupo kato pambukaan sarupo siaran bagurau di udaro RRI Bogor Sudah sajo kato pambukaan salasai, langsuang dijawek alunan saluang dan dendang Singgalang dan dilanjuikkan jo Palayaran sasudah dendang saluang baranti, dimintak pulo kato sapatah dari Pemda Kota Bogor, nan dalam hal iko disampai oleh Bpk. Indra M. Rusli (assisten II, karano pak walikota sadang indak barado di Bogor), sasudah itu Sambutan dari Direktur Utama LPP RRI nan diwakili oleh Direktur Pelayanan Jasa dan Usaha dan dilanjukkan sambutan dari Walikota Padang nan diwakili oleh Engku I.C. Dt. Malako Nan Putiah katigo baliau nan mambari sambutan tu, iyo indak ado nan batele-tele doh, indak lamo-lamo maagiah sambutan, sasudah kato sambutan, mako ditampilkan Alamanda Band dengan 8 urang personil, alun tamasuak penyanyino, jadi samakin heboh lah suasana di halaman balai kota. kurisi 2500 buah iyo indak cukuk doh, sabana badaga-daga bunyi malam tu, padohal hujan rinai turun juo, sampai basah lantai (halaman) balai kota tu, namun nan panonton lai idak manggarik doh Alamanda Band miriang panyanyi Uncu Rustam Raschani, Elsa, Androy's, Feni, Fina, Dewi, Rizki dan Nina), samakin malam samakin rami, untuang pulo lai hujan rinai sabalunno tu, kalau indak, tapaso maminta bantuan Dinas Pamadam Kabakaran untuak manyemprotkan aia ka tangah lapang tu, karano banyakno ummaik, iyo ngek taraso udaro malam tu. Sasudah Alamanda tampil, mako basampaikan acara barikukno adolah Randai, nan didatangkan dari kampuang, nan banamo Randai Palito Nyalo Baru sajo disabukkan baitu, nan panonton lah balari, basigadu capek mandakek ka pangguang, malepoh di lantai, ado pulo nan baselo, pokokno sampai lupo kalau lantai tu masih basah juo. Jalan gadang nan ado antaro Balai kota jo Istana bogor ado ampek jalur, tapi malam tu, iyo ciek jalur sajo nan bisa dilaluino, karano nan tigo jalur alah panuah di oto nan tagak, banyak nan manonton di ateh atok oto tu, Tampai parkir oto iyo lai pulo di subalah Balai Kota, tapi lah panuah, biatu pulo di komplek balai kota, parkir lah panuah pulo wakatu randai main tu, umpamo di campakkan pinjaik katangah halaman balai kota tu, mungkin indak sampai jatuah ka tanah doh, karano baitu bana sasak basasakno nan manonton sasudah randai salasai, mako dikatangahkan pulo saluang jo rabab, alhamdulillah lai indak manggarik ka pulang pulo doh urang nan manonton tu, panuah juo nampak di ambo, pantun nan disampaikan tukang dendang iyo sabana santiang, salah surang tukang dendang, nan didatangkan dari kampuang (rina) , barasa dari sungayang, umuano masik ketek, tapi pantunno mambuek urang taparangah, kadang basorak, mambuek hebok malam tu tapek pukua ampek, tapaso (sabanano masih banyak juo nan mintak dtaruhkan) diparantikan, karano jadwal acara iyo sampai pukua ampek, dan ciek lai, lah wakatuno pulo sumbayang subuah Itu sakileh acara "Mangana Kampuang" kapatang tu, alahamdulillah, acara balangsuang taratik, indak ado nan manggaduah, aman lancar terkendali, kasaluruhan pengisi acara alah pulang pulo katampaik masiang-masiang, terkahir nan barangkek dari Bogor adolah rombongan randai, pado hari Sinayan pukua 12 siang sakiro itu dari ambo, maaf kalau indak pado tampaikno, dan terakhir kami maucapkan tarimokasi banyak kapado saluruah niniak mamak, alim ulama, cadiak pandai, bundo kanduang sarato nan mudo-mudo nan alah mandukuang acara ko, indak disabuk namo ciek-ciek, indak diimbaukan gala surang-surang, Allah sajo mambaleh jo pahalo, aamiiin wassalamu'alaykum w.w. ttd Masyarakat peduli Budaya Minangkabau * rasono rugi bagi nan indak tibo, sarik basuo jarang batamu * apo lai wakatu randai, batapuak kapanjangan sajo urang nan manonton
Send instant messages to your online friends http://uk.messenger.yahoo.com --~--~---------~--~----~------------~-------~--~----~ Berhenti (unsubscribe), kirim email ke: [EMAIL PROTECTED] Konfigurasi dan Webmail Mailing List: http://groups.google.com/group/RantauNet Daftar dulu di: https://www.google.com/accounts/NewAccount -~----------~----~----~----~------~----~------~--~---
