'Kemiskinan Masalah Besar'. Baitu judul barita surek kaba 'Singgalang' nan sadang dibaco dek Tan Baro. Agak kusuak anak mudo tu mambaco baritanyo. Karano, inyo arok, ado jalan kalua dari pamarentah untuak maapuih masalah urang bansaik tu. Maklum, rato-rato nan ado di lapau tu adolah urang musikin.
"Sarius bana nampak dek ambo, Tan!" Uncu Labai tibo-tibo manyentakkan Tan Baro nan sadang lamak mambaco. Diturunkannyo surek kaba tu sabanta, sudah tu mamandang ka konco areknyo sambia mangaruik-an kaniang. "Ah, ndak. Ruponyo pamarentah lai maakui bahaso urang bansaik sabana banyak di nagari awak. Walau baitu, nan kapalo daerah ko masih juo rapek ka rapek. Apo iyo lai bisa masalah bansaik diapuih jo rapek taruih-manaruih?" Kato Tan Baro sambia batanyo. Walau indak jaleh ka sia tanyo tu ditujukan, tapi nan ado di lapau Uwo Pulin pagi tu sabana paham, kalau lah Tan Baro nan mangecek, itu tandonyo masalahnyo agak rumik. "Di maa pulo suraunyo marubah nasib urang bansaik bisa jo rapek-rapek taruih. Buliah rapek, tapi ijan bakapanjangan. Rapek tu musti ado kaputusan nan bisa dikarajokan. Ijan bantuak rapek mancik," solang Angah Piyan. "Rapek mancik baa, Ngah?" Tanyo Kudun nan alah lamo indak mancogok di lapau Uwo. "Kan awak lah samo-samo tau baa rapek mancik tu. Lah basosoh rapek dari pagi sampai malam, dapek kaputusan manggantuangkan ganto ka lihia kuciang supayo kuciang indak mamburu mancik di lumbuang padi. Cuma, katiko tibo nan ka karajo, indak sikua juo mancik tu nan amuah malakek-an ganto ka kuciang. Kasadonyo takuik. Kasudahannyo, rapek tu cuma tingga kaputusan sajo dan indak bisa diaplikasikan kecek urang kini." Baitu Angah mampajaleh mukasuiknyo ka konco lamonyo tu. Agak tamanuang kawan-kawan Angah di lapau tu. Apo nan dikatokannyo bisa ditarimo aka. Memang, harus diakui salamo ko di nagari ko banyak rapek, banyak seminar, banyak simposium, banyak lokakarya atau saungguak lai namo jo istilah lainnyo. Malah, gubernur juo ka rapek baliak untuak masalah nan bansaik-bansaik di nagari ko. "Tapi, tunggu lu. Kecek Pak Gubernur awak, angko kamiskinan tu kini turun dari taun lapeh. Keceknyo, itu angko dari kantua statistik. Cuma ambo ragu, apo lai sabananyo? Kadang-kadang urang hebat di nagari awak ko kan main takok-takok uwok se. Karano, ambo caliak di lampu merah batambah banyak anak jalanan. Di pasa batambah pulo urang mintak sidakah. Baitu pulo rumah-rumah nan diagiah stiker khusus untuak urang bansaik indak ado nan bakurang. Ciek lai, ambo raso dek ulah musibah gampo jo musibah ombak gadang dulu tu, urang bansaik batambah. Karano, nan biaso inyo punyo rumah, kini indak lai. Ah, tapi bialah, nan taragak dek pamarentah se lah lai," kato Tan Baro bantuak mangecek surang. "Manga Tan Baro paniang pulo mamikiakannyo. Wakia rakyaik se nampak dek ambo tanang-tanang se nyo. Nan jaleh, awak indak bisa manakok-nakok jalan pikiran pamarentah. Ambo raso, apo nan dikarajokannyo pasti ado tujuannyo. Kalau memang iyo lai bisa maapuih bansaik jo rapek, ka manga awak?" kato Mak Pono pulo. "Satuju! Kalau urang bansaik saketek, tantu proyek saketek pulo. Jikok proyek saketek, tantu ujuang-ujuangnyo ketek pulo," Kari Garejoh lah tibo-tibo mangaluakan suaro dari suduik lapau. Indak aneh, kalau Kari mangecek saroman itu. Karano, inyo tamasuak oposisi di lapau Uwo. Sakalian kawannyo lah tau sipaik Kari. Cuma, kalau indak ado Kari di lapau tu, ota indak angek. Ibaraik gandang, indak ado nan maningkahnyo. Espe St.Soeleman http://www.hariansinggalang.co.id/palanta.html --~--~---------~--~----~------------~-------~--~----~ =============================================================== Website: http://www.rantaunet.org =============================================================== UNTUK SELALU DIPERHATIKAN: - Hapus footer dan bagian yang tidak perlu, jika melakukan reply. - Posting email besar dari >200KB akan di banned, sampai yang bersangkutan menyampaikan komitmen akan mematuhi Tata Tertib yang berlaku. - Email attachment, DILARANG! Tawarkan kepada yang berminat dan kirim melalui jalur pribadi. =============================================================== Berhenti, kirim email kosong ke: [EMAIL PROTECTED] Webmail Mailing List dan Konfigurasi teima email, lihat di: http://groups.google.com/group/RantauNet/subscribe Dengan terlebih dahulu mendaftarkan email anda pada Google Account di https://www.google.com/accounts/NewAccount =============================================================== -~----------~----~----~----~------~----~------~--~---