Dunsanak dipalanta, Ciloteh di palanta singgalang, satantang body angkot ceper. Mode nan gaul jadi pangka bala angkot body ceper... barati generasi mudo juo baru....
Salam Is St Marajo 39+ www.cimbuak.net Kampuang nan jauah dimato dakek dijari Tapaso, Baa Juo Lai Baa kok lah bantuak iko oto ko, Maik? Lah balantak pulo? Tanyo Angah Piyan ka si Amaik, supir angkutan kota tambangan Siteba - Pasa Raya nan singgah minum kopi pagi tu di lapau Uwo Pulin. Baa juo, lai Ngah. Tapaso ambo bukak plangnyo. Kalau indak, baurusan jo polisi beko, jawek Amaik. Baitulah kiro-kiro suasana di lapau Uwo Pulin pagi tu. Walau angkutan kota warna biru lawik tu tambangan Siteba - Pasa Raya, namun Amaik tingga di Balai Baru dan ampia satiok pagi singgah minum di lapau Uwo. Samantaro, tanyo Angah Piyan tadi dek ulah mancaliak oto nan disupiri Amaik bantuak abih balangga. Tapi, dipatuik-patuik bana, indak ado nan penyok, kacuali plang muko indak ado lai. Sasudah itu, Amaik bacarito bahaso plang oto tapaso dibukak dek ulah dilarang patugas. Lah ampia sabulan polisi di nagari ko marazia angkutan kota nan pakai plang randah. Sakalian nan basuo ditangkok, dan disuruah bukak. Indak itu se doh, merek-merek hiasan di dindiang oto sarato kaco filemnyo juo disuruah bukak. Labiah tigo juta pokok ambo untuak manceperan oto tu mah. Kini, plangnyo tapaso talatak se di rumah. Kok ka dijua, siapo pulo nan ka namuah mambali, kato Amaik. Kan lai pitih induak samang juo nan abih, mangaa pulo angku paniang? kato Tan Baro manyalo. Indak sato-sato gai induak samang mambali tu doh, Da. Kasadonyo pitih pribadi ambo. Pitih julo-julo nan ambo balian ka asesoris oto tu mah, pinteh Amaik. Hebat angku mah! Kalau indak bantuak itu oto, ndak naiak anak sikola jo mahasiswa doh, Da. Tanyolah ka Uda Kari, nan banyak jadi panumpang angkot hanyolah anak sikola jo mahasiswa. Saumpamo libur urang sikola dan kuliah, paniang kami dek mancari setoran mah. Dek ulah anak sikola jo anak-anak kuliah tu suko nan gaul-gaul, mako tantu angkot dibuek pulo gaul. Tip harus rancak bunyinyo, harus pakai tipi, stiur ketek, kaco harus galok, banyak hiasannyo, oto harum dan panampilannyo musti ceper. Kalau indak, tantu one-one panggaleh sayua se nan ka naiak, di maa takaja setoran ka induak samang. Bisa tauncang tiok hari, kecek Amaik mampajaleh mukasuiknyo. Tapi, kalau plang oto tu randah, tantu murah cilako. Tu mah bulan lapeh ado kacalakaan di Jalan Ratulangi, dari barita dalam surek kaba Singgalang' nan ambo baco itu dek ulah oto ceper, baleh Tan Baro. Itu memang lah nasibnyo nan ka balangga mah! jawek Amaik indak namuah kalah. Walau baitu, sacaro aka sehat, anak mudo nan baru babini tu bisa paham, kalau plang oto nan randah tu bisa maundang kacalakaan. Apolai, kalau manambang ka Kampuang Kalawi umpamonyo. Di situ banyak tanggul di jalan gadang. Baitu juo kalau masuak ka komplek parumahan sarupo Taruko atau Balimbiang, bisa badarak tiok sabanta plang oto dibueknyo. Kok dipikia-pikia, sabananyo iyo. Oto ceper sabana rawan kacalakaan. Tapi, dek ulah itu pulo modenyo, baa juo lai. Walau indak ado dana dari induak samang, tapaso pitih pribadi dipakai. Kini, karano indak buliah dek polisi, tapaso pulo dibukak. Dek ambo, kalau lai sakalian angkot ceper dibukak plang sarato asesorisnyo, indak masalah bana. Yo, samo-samo rongohlah oto tu dulu. Beko, kalau lah dingin lo razia, dipakai baliak, kecek Amaik manaruihan otanyo. Espe St.Soeleman --~--~---------~--~----~------------~-------~--~----~ =============================================================== Website: http://www.rantaunet.org =============================================================== UNTUK SELALU DIPERHATIKAN: - Hapus footer dan bagian yang tidak perlu, jika melakukan reply. - Posting email besar dari >200KB akan di banned, sampai yang bersangkutan menyampaikan komitmen akan mematuhi Tata Tertib yang berlaku. - Email attachment, DILARANG! Tawarkan kepada yang berminat dan kirim melalui jalur pribadi. =============================================================== Berhenti, kirim email kosong ke: [EMAIL PROTECTED] Webmail Mailing List dan Konfigurasi teima email, lihat di: http://groups.google.com/group/RantauNet/subscribe Dengan terlebih dahulu mendaftarkan email anda pada Google Account di https://www.google.com/accounts/NewAccount =============================================================== -~----------~----~----~----~------~----~------~--~---
