Asok jo Api
Kecek urang tuo-tuo, mustahil ado asok kalau indak ado api. Itu takana dek Tan Baro sasudah mambaco barita utamo surek kaba ‘Singgalang' nan bajudul ‘Sekda Pasbar Mundur'. Memang harus diakui, dalam dunia pamarentahan naiak turun dalam jabatan adolah hal biaso. Cuma sajo inyo kan jadi tando tanyo urang banyak, kalau tibo-tibo se ado pajabaik nan maundurkan diri sadang manjabaik. Kalau mancaliak tuah ka nan manang, mancaliak contoh ka nan sudah-sudah, ijankan ka mundur, lah disuruah baranti pun masih banyak pajabaik nan indak namuah malapehan jabatan. Kini, tibo-tibo sajo indak angin dan indak pulo ujan tibo-tibo bantuak guruah tungga di siang hari, Pak Sekda tu maundurkan diri. Apolai kalau diubuangkan jo maso pansiunnyo cuma tingga sataun lai, tantu sacaro pikiran urang bodoh indak mungkin baliau maundurkan diri. Tapi, itulah dunia, panuah jo misteri nan kadang indak tapacahkan dek utak urang lain. Apo nan manuruik awak rancak, alun tantu elok pulo manuruik urang lain. Baitu juo sabaliaknyo. Kini, kalau dibaco di surek kaba alasan Sekda tu maundurkan diri, lantaran indak talok lai jo karajo nan baitu barek, barangkali bisa ditarimo aka. Karano, memang karajo jadi Sekda tu indak ringan. Inyo adolah pangka dari sagalo administrasi di daerah kabupaten sakaligus komandan dari sakalian pagawai di daerah itu. “Baa, Tan. Apo barita angek kini?” Uncu Labai nan baru masuak batanyo ka Tan Baro nan sadang mambaliak-baliak surek kaba ‘Singgalang'. “Ah, biaso-biaso se nyo. Cuma dari Pasaman Barat ado nan mambuek awak takajuik,” jawek Tan Baro. “Apo tu?” “Pak Sekda-nyo maundurkan diri. Katonyo indak talok lai. Lah angkek tangan apak tu,” kato Tan Baro. “Itu namonyo jentelmen, sportif. Ijan bantuak nan lain, lah maleleh paluah jo salemo, lah rarak abuak, indak sandereh lai bantuak dek karajo, tapi dipasokan juo. Karajo nan dipaso-pasokan itu indak ka rancak gai hasianyo tu doh. Apolai kalau lah ati nan mangecek-an indak talok atau batin nan lah manggeleang, mako sarancaknyo jalan bantuak itu ditampuah. Kalau prinsip ambo, karajo harus dikarajokan jo iklas sarato ati sanang. Nah, kalau ati indak sanang lai, baa ka karajo?” Uncu Labai bantuak maagiah katubah pulo ka Tan Baro. “Ambo satuju jo pandapek Uncu. Tapi ado pulo nan takana di baliak barita tu, pastilah ado nan indak beres di situ. Nyo samo jo urang main bola. Sabaleh urang di dalam tanah lapang tu harus kompak. Ijan ado surang juo nan mandongkol. Kalau ado nan bantuak itu, pasti main indak rancak. Kadang-kadang lah jo tulang kariang bagai manyipak bola,” Kari Garejoh nan hobi main bola maagiah contoh. “Iyo mah. Bak kato papatah urang tuo-tuo juo, kalau indak ado api, tantu indak mungkin ado asok. Antah kok asoknyo manyambua dari paruik bumi dan itu pasti juo ado api,” Tan Baro mangecek baliak. “Suko atie lah! Itu urusan pamarentah dan pamarentah panuah jo politik. Indak ka talok gai dek awak mamacahannyo tu doh. Nan paralu kini, harago kaparaluan iduik awak samakin naiak, gaji atau pandapatan indak barubah juo. Baa aka lai?” Uwo Pulin lah sato pulo mangecek. “Di nagari ko Wo, nan bansaik, bansaik juo. Tapi kok nan kayo batambah manggilo pitihnyo. Kan di surek kaba iko juo ambo baco, panjualan oto be-em-we naiak anam puluah anam parsen labiah. Padohal harago oto tu rato-rato di ateh samiliar. Cubolah etong, baraa banyak nolnyo samiliar tu?” Baleh Kari Garejoh. Samo tamanuang urang mandanga jawek Kari. Apo nan dikatokannyo lai bisa tamakan dek aka. Memang di nagari ko katimpangan ekonomi masyarakaik nampak bana. Espe St.Soeleman http://www.hariansinggalang.co.id/palanta.html No virus found in this outgoing message. Checked by AVG Free Edition. Version: 7.5.516 / Virus Database: 269.19.11/1244 - Release Date: 25/01/2008 19:44 --~--~---------~--~----~------------~-------~--~----~ =============================================================== Website: http://www.rantaunet.org =============================================================== UNTUK SELALU DIPERHATIKAN: - Selalu mematuhi Peraturan Palanta RantauNet lihat di http://groups.google.com/group/RantauNet/web/peraturan-palanta-rantaunet - Hapus footer dan bagian yang tidak perlu, jika melakukan reply. - Posting email besar dari >200KB akan di banned, sampai yang bersangkutan menyampaikan komitmen akan mematuhi Tata Tertib yang berlaku. - Email attachment, DILARANG! Tawarkan kepada yang berminat dan kirim melalui jalur pribadi. =============================================================== Berhenti, kirim email kosong ke: [EMAIL PROTECTED] Webmail Mailing List dan Konfigurasi teima email, lihat di: http://groups.google.com/group/RantauNet/subscribe Dengan terlebih dahulu mendaftarkan email anda pada Google Account di https://www.google.com/accounts/NewAccount -~----------~----~----~----~------~----~------~--~---