BATENGGANG RASO Lah sulik badan manyabuik Nan tajadi di badan diri Dikambang takuik ka kusuik Dibiakan mangganja hati
Antah dek cameh balabihan Takuik basarang di runggo dado Talampau arek ganggam tangan Bapaluah kaniang di bueknyo Sulik raso manggarik Dibao malenggang apo lai Bak mamakai baju sampik Iko nan gamang badan diri Badan biaso jalan malenggang Langkah lapeh kian kamari Kini bajalan dipamatang Banda jo tabiang suok kiri Bukan upek bukan doh sasa Apo lai berang jo banci Hanyo saketek nan mangganja Manga iko harus tajadi Kanduangkan alah tau juo Kok disabuik nasib badan Pado rancak banyak buruaknyo Baitu urang mangatokan Kato nan indak tapungkiri Kalau dipandang jo mato lahia Santano dicaliak jo mato hati Patuik manjadi buah pikia Putiah kapeh nyato di caliak Putiah hati baa kaadaan Bacarito buruak jo baiak Tagantuang dari suduik pandangan Dek sabab karano itu Patuik manjadi kiro kiro Buka hati tanyo kalbu Usah di pandang jo suduik mato Pakaikan aka sehat Usah tamakan jo parasaan Kana janji ingek I tekad Niat baiak banyak cobaan Urusan gadang kito paketek Usah nan ketek di gadang gadangkan Saribu tagah sajuta ambek Insyaallah bukan rintangan Kok kurang jaleh salamoko Usah malah raso takicuah Caliak bana balalakkan mato Usah di intai jauah jauah Denailah nyato rang pagurau Garah jo bana samo banyaknyo Bak cando ma ota dilapau Kadang tasabuik garah kudo Kok garahnyo usah disabuik Kok bananyo buliah dibandiang Usah di tanyo raso takuik Salangkah indak ka bapaliang Pantang hiduik bak baliang baliang Baputa kama arah angin Di nan lanyah kito babimbiang Di nan data samo ka tambin Caliaklah contoh ka nan sudah Carilah tuah ka nan manang Mabuak mancari banang nan salah Sio sio tanun takambang. Banyak kakok nan tabangkalai Dek ulah aral malintang Kini sadonyo lah hampia salasai Harus kah baliak kito ulang Tapuak dado tanyo salero Sabalun kaki dilangkahkan Patah kapak itu biaso Patah sumangat itu pantangan Sadangkan di lauik kanduang ndak karam Manga katabanam di kubangan Padeh lado asinnyo garam Itu tak labiah bumbu masakan Kok nak tau dituah gadiang Caliaklah dima rataknyo Buruak jo elok hampia babandiang Tingga di awak mamakaikannyo Hapuih ragu buanglah bimbang Campakkan sangsi jauah jauah Urang ndak lupo jo batu gadang Di batu ketek acok tajatuah Bukan ilak bukan doh ilah Bukan mancari pambanaran Pandangan mato acok salah Pandangan batin ka dituruikkan Galilah batang dalam dalam Nak basuo urek pitalonyo Usah mancari din an kalam Haram nan hilang ka basuo. Nan hitam alun tantu kumuah Walau takato ka jadi ceno Kadang dek putiah kito takicuah Matolah silau dibueknyo. Taserak pasan dalam gurindam Ka ganti jadi buah tutua Ka jadi suluah dalam kalam Untuang manjadi banta tidua Tapi kok tabang babaliak awah Ubek manjadi racun jo tubo Indak dicari pangka jo salah Mungkinlah takdir nan Kuaso. Indak banci indak doh dandam Dado sajo di palapang Sadangkan jo kappa lai karam Konon ba rakik batang pisang Disangko kanduang indak pamabuak Lah biaso jo galombang Tanyato paruik bana nan buruak Pantang saketek kanai goyang. 04062012.y.jambak -- . * Posting yg berasal dari Palanta RantauNet, dipublikasikan di tempat lain wajib mencantumkan sumber: ~dari Palanta R@ntauNet http://groups.google.com/group/RantauNet/~ * Isi email, menjadi tanggung jawab pengirim email. =========================================================== UNTUK DIPERHATIKAN, melanggar akan dimoderasi: - DILARANG: 1. E-mail besar dari 200KB; 2. E-mail attachment, tawarkan di sini & kirim melalui jalur pribadi; 3. One Liner. - Anggota WAJIB mematuhi peraturan serta mengirim biodata! Lihat di: http://forum.rantaunet.org/showthread.php?tid=1 - Tulis Nama, Umur & Lokasi disetiap posting - Hapus footer & seluruh bagian tdk perlu dlm melakukan reply - Untuk topik/subjek baru buat email baru, tdk mereply email lama & mengganti subjeknya. =========================================================== Berhenti, bergabung kembali, mengubah konfigurasi/setting keanggotaan di: http://groups.google.com/group/RantauNet/