Antah memang dunia nan alah samakin gaek, dakek kiamaik atau manusia nan lah banyak indak punyo parasaan, mako banyak kajadian pambantaian sasamo manusia di nagari ko. Dalam sabulan ko sajo, indak saketek tadanga kasus-kasus pambunuahan dek awak. Nan paliang sadiah tu, urang sudah dibunuah dikuduang-kuduang pulo bantuak mambantai ayam.
Indak hanyo di jawa, kasus pambunuahan manusia nan kudian dikuduang-kuduang juo tajadi di nagari awak. Tu, mah kapatang ko di kampuang Uncu Labai, surang anak mambunuah jo manguduang bapak kanduangnyo. Kajadian nan indak biaso tu sabana mambuek lapau Uwo eboh. Surek kaba ‘Singgalang' nan mambaritakannyo sampai kuyak dek diparabuik-an. Kasadonyo nio mambaco labiah daulu. “Capeklah, Din! Bak kato awak se mambaco dari tadi, mah!” Baitu Tacin mamintak surek kaba tu ka Udin Kuriak. “Tunggu sabanta. Sadang taujuang ko, ha!” Baleh Udin Kuriak. “Daripado maijo mambaconyo, rancak upahan ka kawan, Din. Dari tadi bak kato angku se mambaco koran tampak di den,” Kari Garejoh lah sato pulo baturo-turo mancaliak Udin alun juo malapehan halaman partamo surek kaba tu. Baitulah suasana lapau Uwo pagi tu. Satiok urang di dalam lapau nio mambaco barita utamonyo. Dalam barabuik sarupo itu, Uncu Labai masuak ka lapau. Sarupo biaso, satiok masuak, nan ditanyo adolah barita angek. “Nah, iko nyo mamaknyo!” Udin Kuriak lansuang se basorak. “Mamak sia?” Tanyo Uncu. Ruponyo Uncu alun tau kalau di kampuangnyo ado kajadian langka, anak mambunuah bapak kontannyo. Karano itu, Udin lansuang se maagiah tau barita tu. Tahanyak Uncu sasudah mandanga laporan Udin. Uncu nio pulo mancaliak baritanyo capek. Karano itu, surek kaba nan tadinyo baru diambiak Tacin lansuang se disemba Uncu. “Batoh, Ncu! Ambo baru mambaco, lah dirabuik pulo,” kato Tacin maraso kesal. “Sabanta nyo, Cin! Ambo nio tau, apo iyo ado kajadian tu, atau hanyo carito legenda bantuak Malin Kundang di Aie Manih,” nampaknyo Uncu alun picayo. Tapi sasudah dicaliak judul barita langkok jo foto-fotonyo, baru inyo paham dan maagiahan koran tu baliak ka tangan Tacin. “Anak durako. Nan ka dilantak azab narako iduik-iduik juolah paja tu.” Baitu Uncu manggarutok surang. “Indak bana disuruah atau disumpahi, nan paja tu ka jadi kayu api narako juo mah, Ncu. Cuma ambo mamintak, alah sakali tu mah kajadian saroman ko di nagari awak. Lah raso di Texas ambo dibueknyo,” kecek Kari Garejoh. “Dulu kajadian bantuak iko ado pulo di Padang, di dakek Banda Olo. Ado anak nan mambantai induaknyo di ateh rumah, tapi lai indak sampai main kuduang bantuak nan dibuek kamanakan Uncu tu, doh.” Tan Baro mancubo mangana-ngana kajadian maso lampau. Sudah tu, dicaritokan pulo kajadian-kajadian di Jawa nan ditontonnyo di televisi. “Antahlah, Tan Baro. Indak usahlah awak bacarito anak durako tu lai. Tagak bulu kuduak ambo dibueknyo,” Uncu indak bisa manahan diri. Espe St.Soeleman [Komunitas Lapau Uwo Pulin Harian Singgalang] No virus found in this outgoing message. Checked by AVG Free Edition. Version: 7.5.516 / Virus Database: 269.19.18/1255 - Release Date: 01/02/2008 9:59 --~--~---------~--~----~------------~-------~--~----~ =============================================================== Website: http://www.rantaunet.org =============================================================== UNTUK DIPERHATIKAN: - Mematuhi Peraturan Palanta RantauNet, lihat di http://groups.google.com/group/RantauNet/web/peraturan-rantaunet - Hapus footer dan bagian yang tidak perlu, jika melakukan reply. - Posting email besar dari >200KB akan di banned, sampai yang bersangkutan menyampaikan komitmen akan mematuhi Peraturan yang berlaku. - Email attachment, DILARANG! Tawarkan kepada yang berminat dan kirim melalui jalur pribadi. =============================================================== Berhenti, kirim email kosong ke: [EMAIL PROTECTED] Webmail Mailing List dan Konfigurasi teima email, lihat di: http://groups.google.com/group/RantauNet/subscribe Dengan terlebih dahulu mendaftarkan email anda pada Google Account di https://www.google.com/accounts/NewAccount -~----------~----~----~----~------~----~------~--~---