HIKMAH Mambaco gurindam bundo Nismah Ibarat urang sambah manyambah Dari sipangka tuan rumah Talewa rundiang ka tangah
Babukak carito jo kisah Takalo niat ka di agah Ota ota sambie bagarah Akhianyo pacah niat di lidah Nak halal bi halal baramah tamah Tapi dima tampeknyo ko lah Mancari akses nan mudah Tajangkau sagalo arah Sudah dipiliah jo dipilah Lah di sigi di jalajah Di sisiehkan bareh jo atah Akhianyo pilihan jatuah sudah Jl Niaga Hijau Pondok Indah Disinan rumah nan takah Sederhana tapi mewah Pilihan nan indak salah Urang kayo nan pamurah Urang tuo elok nan sa ulah Babuek bukan karano tuah Tapi samato karano Allah Walau ba umua lah 70 stangah Kadang bajalan lah ba papah Nan sumangat bapantang kalah Usah di sabuik ka manyarah Bakucindan pandai bagarah Didanga tutua jo pituah Budi baiak bahaso ramah Banyak sayang jauah marah Bak sirieh lakek jo sadah Nyaman taraso taraso di kunyah Manih tibo di lidah Ka bibie mambayang sirah Tiok tutua manganduang hikmah Tiok bahaso ba amanah Tiok kakok ba paedah Sayang jatuah kasieh tatumpah Sasuai jo janji nan batarah Nan datang Alhamdulillah Kok indak ka ateh panuah ka bawah Ba isi juo rumah satangah Katiko di data jo dicacah Banyak bajanji Insyaallah Mungkin ka ganti ilik jo ilah Samoga iko bukan fitnah Sasudah sumbayang ba jamaah Lansuang hidangan katangah Mambuek kito taparangah Ondeee mak sabanyak ko lah Kok di baco isi juadah Dari nan pakek nan bakuah Sampai nan kariang jo nan basah Langkok jo sagalo buah Dibaco laku jo ulah Disabuik parangai jo tingkah Rangkayo Mulia indak sumanggah Indak tahituang tambuah jo tambah Ibarat urang manyasah Licin piriang nyo rambah Sudah tu lansuang tarangah Taleak bantuak sajadah Sasudah makan balapeh angah Sipangka alek ba caramah Rantau net ka muko baa kolah Tatap tagak atau ka rabah Ka lua kecek ma randah randah Ma akui badan mudo matah Maraso banyak kakok nan salah Cameh badan ka kanai sumpah Mako ba iyo jo ba mulah Mamintak pitunjuak jo pituah Intinyo bamusyawarah Jan sasek jalan, sasek arah Mako disiko muloilah Sumbang saran agak sapatah Kaganti asih ,asuh jo asah Sambie mangenalkan wajah Manyabuik asa jo sikolah Dima karajo jo kuliah Mam baco kampuang jo ranah Langkok carito jo urang rumah Intinyo sumangat jan patah Samo di pasak dima nan guyah Kok condoang samo di sanggah Niat baiak jan di robah…….. Indak taraso limo jam sudah Rasonyo sabana cacah Alun pueh ota jo garah Namun kito harus bapisah Dek ma ingek parak jo sawah Nan bisuak harus di olah Mako di urak selo di bukak langkah Mamintak ijin ka tuan rumah Ditakuakan muko tangan tingadah Baharok do’a di ijabah Wabil khusus ka Bundo Nismah Panjang umua rasaki murah Kami nan datang kok banyak tingkah Sasek gawa sumbang jo salah Patuik di ateh kok ka bawah Patuik di tapi kok katangah Walau sagadang bijo zarah Ibarat urang basadakah Semoga di mato Allah Manjadi amal dan ibadah Amiiiin……Insyaallah 10092012.Y.Jambak (55) Mc/Penyiar Radio Pusako Minang 972 am.tgr acra : SALIGURI (kiSAh dibaLIak GURIndam) BALERONG (Barapak Adat LEwat coRONG) basamo Inyiak Dt.Parpatiah Guguak. -- -- . * Posting yg berasal dari Palanta RantauNet, dipublikasikan di tempat lain wajib mencantumkan sumber: ~dari Palanta R@ntauNet http://groups.google.com/group/RantauNet/~ * Isi email, menjadi tanggung jawab pengirim email. =========================================================== UNTUK DIPERHATIKAN, melanggar akan dimoderasi: - DILARANG: 1. E-mail besar dari 200KB; 2. E-mail attachment, tawarkan di sini & kirim melalui jalur pribadi; 3. One Liner. - Anggota WAJIB mematuhi peraturan serta mengirim biodata! Lihat di: http://forum.rantaunet.org/showthread.php?tid=1 - Tulis Nama, Umur & Lokasi disetiap posting - Hapus footer & seluruh bagian tdk perlu dlm melakukan reply - Untuk topik/subjek baru buat email baru, tdk mereply email lama & mengganti subjeknya. =========================================================== Berhenti, bergabung kembali, mengubah konfigurasi/setting keanggotaan di: http://groups.google.com/group/RantauNet/