“Jan lupo mambali lampu padati!” Baitu sorak Uwo Pulin ka induak barehnyo nan baru malangkah maninggakan lapau untuak pai balanjo ka pasa raya.
Samantaro, Tan Baro, Kari Garejoh, Udin Kuriak sarato Angah Piyan nan ado di dalam lapau hanyo bisa tapana sajo. Indak biaso Uwo bapasan sarupo itu. Paliang-paliang kalau ado pasanan khusus, itu hanyo barupo makanan sarupo cindua Patimura, lamang tapai atau katupek Pitalah. Kadang-kadang Uwo juo maminta dibalikan buah apel. Hanyo itu! “Ka manuka padok, Uwo lai?” Tanyo Tan Baro. “Indak! Baa tu?” Jawek Uwo baliak batanyo ka konconyo tu. “Kalau indak, untuak apo mamasan lampu lantera bagai? Uwo sangko murah mancari lampu padati tu kini? Zaman lah samaju iko, padati pasti manjadi barang antik,” baleh Tan Baro. Uwo cuma tagalak ketek sajo mandanga. Memang, diakui apo nan dikatokan konconyo tu indak salah. Kini iyo indak ado lai urang pakai padati dan Uwo sadar, pasti indak ado pulo urang manjua onderdilnyo, tamasuak lampu lentera. Cuma, dalam pangana rang punyo lapau tu, hanyo lampu padati-lah nan bisa jadi solusi dari masalah nan sadang maancam. “Rancananyo listrik awak ko ka mati-mati-iduik pulo liak. Daripado mamakai lilin, rancaklah lampu padati awak pakai,” jawek Uwo. “Mati baa pulo? Lah rusak pulo baliak pambangkiknyo? Atau lah kariang pulo aie danau?” Angah Piyan mamotong. “Angah ko kadang-kadang lai kritis, tapi kadang-kadang tulalit. Lah sagadang-gadang tabuah larangan judul barita di surek kaba ‘Singgalang' kapatang bahaso limo hari lai listrik di nagari awak dipagiliakan. Nah, kalau memang iyo tajadi pamadaman tu, ambo sabana indak talok bakalam-kalam. Lilin maha haragonyo, dipakai lampu togok, bisa bantuak ikua pariuak isi iduang dibueknyo. Makonyo, manuruik ambo solusi paliang jitu adolah mamakai lampu padati. Ciek lai, lampu padati labiah tahan dari lampu-lampu lain. Sakancang apo pun angin, nan lampu padati indak ka padam gai tu doh. Lampu lain, tamasuak listrik awak ko ha, hujan barangin se saketek, lampu lansuang pudua,” Uwo mancubo maagiah pangaratian ka Angah Piyan sarato kawan-kawannyo nan sadang duduak minum pagi di lapau tu. Banyak nan maangguak bantuak buruang balam nio kawin. Itu tandonyo urang-urang tu bisa mangarati jo jalan pikiran Uwo. Memang harus diakui, lampu lentera jauah labiah tahan dari sagalo ancaman dan gangguan, dibandiangkan jo lampu-lampu lain sarupo satarongkeang, lampu togok, lampu dindiang, lampu sisik, lilin, tamasuak dibandiangkan jo lampu listrik. Cuma sajo, lampu padati tu cahayonyo indak tarang dan inyo bisa dipakai untuak emergensi atau darurat sajo. “Apo nan Uwo katokan tadi batua! Tapi, sampai tempong tapak tarompa dek mancarinyo kini, indak ka basuo gai di pasa raya. Ijankan itu, pabiriknyo barangkali juo indak ado lai,” kato Kari Garejoh. “Kalau indak ado, tapaso ambo buek lampu togok dari kaleang susu. Tapi, jan salahkan ambo, kalau iduang tuan-tuan kasadonyo barubah manjadi carobong asok oto fuso,” baleh Uwo. “Bisuak dietong pulo, Wo! Sadonyo awak pikiakan kini, bisa pesong awak deknyo. Antah iyo mati listrik antah indak. Kalau lah cukuik batubaronyo, ambo raso pambangkik tu jalan dan listrik iduik. Mudah-mudahan, banyak urang nan manjua batubaro ka pambangkik, sahinggo indak jadi pamadaman bagilia,” tibo-tibo Udin Kuriak maambiak jalan tangah. Espe St.Soeleman http://www.hariansinggalang.co.id/palanta.html No virus found in this outgoing message. Checked by AVG Free Edition. Version: 7.5.516 / Virus Database: 269.20.2/1270 - Release Date: 10/02/2008 12:21 --~--~---------~--~----~------------~-------~--~----~ =============================================================== Website: http://www.rantaunet.org =============================================================== UNTUK DIPERHATIKAN: - Wajib mematuhi Peraturan Palanta RantauNet, mohon dibaca dan dipahami! Lihat di http://groups.google.com/group/RantauNet/web/peraturan-rantaunet. - Tuliskan Nama, Umur dan Lokasi anda pada setiap posting. - Hapus footer dan bagian yang tidak perlu, jika melakukan reply. - Email attachment, DILARANG!!! Tawarkan kepada yang berminat dan kirim melalui jalur pribadi. - Anggota yg posting email besar dari >200KB akan dibanned, sampai yg bersangkutan minta maaf & menyampaikan komitmen akan mengikuti peratiran yang berlaku. =============================================================== Berhenti, kirim email kosong ke: [EMAIL PROTECTED] Webmail Mailing List dan Konfigurasi teima email, lihat di: http://groups.google.com/group/RantauNet/subscribe Dengan terlebih dahul -~----------~----~----~----~------~----~------~--~---
