Mato Tan Baro tabulalak mancaliak foto Jam Gadang nan basalimuik kain saroman bandera Jerman. Foto tu tapampang di halaman muko surek kaba ‘Singgalang'. Di bawah foto tu ado pulo barita, judulnyo ‘Jam Gadang Ditutup'
Barapo kali Tan Baro manggisa matonyo, saolah-olah indak picayo jo apo nan dicaliaknyo. Tapi, samakin digisa incek mato tu, samakin jaleh bahaso jam antik nan talatak di puncak bangunan tu sabana ditutuik jo marawa. Dibacolah baritanyo bagulambek dek anak mudo tu. Ciek huruf indak tingga dek inyo mambaco, supayo tau apo panyabab bangunan paninggalan Ratu Balando nan kini jadi kabanggaan Sumatra Barat dan juo kabanggaan Indonesia. Salasai mambaco barita tu, taulah Tan Baro. Ruponyo pamarentah Kota Bukik Tinggi bainisiatif manutuik Jam Gadang beko katiko pagantian taun dari 2008 ka 2009, dek baraja dari pangalaman. Katonyo, katiko malam pagantian taun kapatang banyak urang bakaluarga nan lalok-lalok di halaman atau di palataran bangunan tu. Kalau suatu kutiko tajadi karusuahan, pamarentah di situ takuik tajadi korban urang tapijak. Nan paliang rumik bana, manuruik pamarentah Kota Wisata tu, banyak ditamukan kondom bakeh dipakai. Iko tantu sajo dek ulah urang karajo nan mustinyo dikarajokan di dalam biliak ketek. “Baa kok dilingka jo bandera Jerman Jam Gadang tu, Tan? Satau ambo, itu indak urang Jerman nan mambuek dulu doh, tapi urang Ulando,” tibo-tibo Mak Pono batanyo. “Kan ikolah masalahnyo Mak. Dek berang ka mancik, tapaso lumbuang dibaka,” jawek Tan Baro. “Nan ambo tanyo Jam Gadang baa kok dililik bandera Jerman? Bukan soal lumbuang dibaka!” Agak kareh suaro Mak Pono tadanga. Mako dicaritoanlah dek Tan Baro, apo nan baru sajo dibaconyo. Sagalo alasan nan dikamukokan dek pamarentah Kota Bukik Tinggi tu juo disampaikannyo dan itu didanga dek sakalian kawan-kawannyo nan samo minum pagi di lapau Uwo Pulin. “Oooo..., itu. Manga indak jalan ka Bukik Tinggi se diblokir katiko malam taun baru tu? Tangguang kalau hanyo Jam Gadang nan diagiah salimuik. Salimuik-i juo sakalian Benteng, Panorama sampai ka Ngarai Sianok tu, paga pulo jambatan Limpapeh. Iko karajo nan indak masuak aka manuruik ambo mah. Kalau hanyo nan tadi alasannyo, apo ndak ado caro lain? Apo ndak bisa pamarentah sinan mambuek aturan? Apo gunonyo Satpol pe-pe, atau aparat lain, kalau itu indak takamehan? Malam taun baru biasonyo juo maso panen dek urang manggaleh di sinan, apo ka dibunuah usaonyo katiko itu?” Mak Pono tabik jogi. Matonyo nampak agak sirah, sisunguiknyo manggarik. “Itu nan ambo katokan tadi, Mak. Dek berang ka mancik sikua, lumbuang nan dibaka, tapi Mamak lansuang se mamburansang,” baleh Tan Baro. “Ambo satuju Jam Gadang ditutuik, tapi indak jo marawa nan samo jo bandera Jerman tu doh. Tutuik se jo kain hitam,” sorak Kari Garejoh, manusia nan kadok beda pandapek jo kawan-kawan lain. “Apo mukasuik Kari bantuak itu?” Tanyo Uncu Labai. “Kok bandera hitam kan jaleh pulo maknanyo. Salain indak buliah dicaliak, juo bamakna sadang baduka. Hitam lambang kamatian. Saindak-indaknyo itu tando-tando kamatian pariwisata di nagari ko. Karano, Jam gadang adolah lambang kabanggaan pariwisata di Minangkabau,” kato Kari manjalehan. “Eyayai, itu samo pandapek awak mah,” semba Mak Pono baliak. “Daripado itu nan ka jadi pangka bala, ambo usul Jam Gadang tu pindahan se ka kampuang ambo atau ka kampuang Mak Pono. Baa, lai satuju?” Usul Angah Piyan. Indak ado surang juo nan mananggapi usul Angah. Kasadonyo samo-samo aniang dan samo-samo bapikia. Walau baitu, ado samacam kasimpulan, nampaknyo komunitas lapau Uwo Pulin indak satuju Jam Gadang ditutuik. Espe St.Soeleman http://www.hariansinggalang.co.id/palanta.html No virus found in this outgoing message. Checked by AVG Free Edition. Version: 7.5.516 / Virus Database: 269.20.4/1277 - Release Date: 13/02/2008 20:00 --~--~---------~--~----~------------~-------~--~----~ =============================================================== Website: http://www.rantaunet.org =============================================================== UNTUK DIPERHATIKAN: - Wajib mematuhi Peraturan Palanta RantauNet, mohon dibaca dan dipahami! Lihat di http://groups.google.com/group/RantauNet/web/peraturan-rantaunet. - Tuliskan Nama, Umur dan Lokasi anda pada setiap posting. - Hapus footer dan bagian yang tidak perlu, jika melakukan reply. - Email attachment, DILARANG!!! Tawarkan kepada yang berminat dan kirim melalui jalur pribadi. - Anggota yg posting email besar dari >200KB akan dibanned, sampai yg bersangkutan minta maaf & menyampaikan komitmen akan mengikuti peratiran yang berlaku. =============================================================== Berhenti, kirim email kosong ke: [EMAIL PROTECTED] Webmail Mailing List dan Konfigurasi teima email, lihat di: http://groups.google.com/group/RantauNet/subscribe Dengan terlebih dahul -~----------~----~----~----~------~----~------~--~---
