Pituah Rang Gaek : Alam takambang jadikan guru
Diulang-ulang baliek dek : Buya H.Mas'oed Abidin Urang Minangkabau pado umumnyo sangaik amuah maambiak pitunjuak jo pangajaran dari pangalaman-pangalaman hiduik urang-urang tuo nan dahulu. Pangalaman nantun bagi anak-anak cucu urang Minangkabau dipakai sabagai suri tauladan dan juo diambiak sabagai kaco parbandiangan dalam manampuah hiduik salanjuik-no. Pangalaman adolah guru nan paliang baiak. Sasuai jo pasan dari urang-tuo-tuo kito, ma ambiak contoh ka nan sudah (atau ka nan alah balalu), jo ma ambiak tuah ka nan bana (indak sajo ka nan manang, karano nan manang nan-tun alun tantu salalu bana, tapi nan bana tu salalu ka manang lambek jo laun no). Karano tu anak cucu urang Minangkabau sajak dari ketek no alah di ajari bana-bana mangarati dalam mambaco alam nan takambang nan- ko untuak ka dijadikan guru. Mambaco buku nan banamo alam takambang nantun sangaik mamaralukan bana ka-arifan. Karano halaman no laweh, indak ta muek di dalam gaduang-gaduang parpustakaan atau di dalam gudang-gudang buku doh. Tapi, kalau kito namuah mamahaminyo sacaro mandalam, dan isi-no bisa pulo dikambangkan untuak manampuah hiduik nangko, Insya Allah tantu salamaik kito jadino. Ibaraik kato urang tuo-tuo kito, "kok di punta sabalun kuku, kok nyo di rantang sa laweh alam, sungguahpun sa gadang bijo labu, bumi jo langik adi di dalam", baitulah sipaiknyo. Maknanyo, alam takambang jadi guru adalah "sunnatullah". Urang-urang tuo Minangkabau, sajak mulonya pandai bana baraja dari kajadian-kajadian alam. Maknanyo, pandai mambaco tando-tando alam, akibaik-akibaik nan ado di tangah-tangah alam, tahu di angin nan ba siru, mangarti di ombak nan badabue, alun bakilek alah ba kalam, tahu di mudharat jo manfaat. Makonyo pangajaran-pangajaran saroman nantun dibaco-baco salalu jo dikana-kana salamonyo. Labiah-labiah nan batalian jo tingkah kurenah hiduik di ateh bumi Allah nangko. Pangajaran nan sarupo tu sajalan bana jo paringatan agamo kito Islam nan mangatokan : "siiruu fil ardhi, fan-dzuruu kaifa kaana aqibatul mukadz-dzibiina" aratino, bajalanlah di muko bumi, calieklah (palajarilah) baa akibaik-akibaik nan di timpokan kapado urang-urang nan mandutokan (mukasuikno urang-urang nan mandutokan paringatan-paringatan Allah). Kepandaian sarupo itu menjadi kan kito taguah pandirian di tangah hiduik di alam dunie ko. Sakitu dahulu, Ananda Suryadi, Beko buya sambuang lai. Maaf kan buya walau hanyo sakitu baru. Wassalam Buya HMA --~--~---------~--~----~------------~-------~--~----~ =============================================================== UNTUK DIPERHATIKAN: - Wajib mematuhi Peraturan Palanta RantauNet, mohon dibaca & dipahami! Lihat di http://groups.google.com/group/RantauNet/web/peraturan-rantaunet. - Tuliskan Nama, Umur & Lokasi anda pada setiap posting. - Hapus footer & bagian yg tidak perlu, jika melakukan reply. - Email attachment, DILARANG! Tawarkan kepada yg berminat & kirim melalui jalur pribadi. - Posting email besar dari >200KB akan dibanned, sampai yg bersangkutan minta maaf & menyampaikan komitmen mengikuti peraturan yang berlaku. =============================================================== Berhenti, kirim email kosong ke: [EMAIL PROTECTED] Daftarkan email anda pada Google Account di: https://www.google.com/accounts/NewAccount?hl=id Agar dapat melakukan konfigurasi keanggotaan di: http://groups.google.com/group/RantauNet/subscribe =============================================================== -~----------~----~----~----~------~----~------~--~---