Ciloteh Wisran Hadi Salam Is St Marajo 39+ www.cimbuak.net Kampuang nan jauah dimato dakek dijari
TAKACA KAMANAKAN CAWAKO Oleh : Wisran Hadi dan Yusrizal KW Mangkutak tapaso pagi tu pulang kampuang naiak bus. Tapanggie, dek karano mintuonyo sadang manganduang. Baitu bana laku Mangkutak sayang ka mintuo. Sabab, si Atang dapek palajaran dari mamaknyo dulu. Kalau nak buah, abeh an batangnyo. Langsuang naiak bus, Mangkutak duduak dakek jandela, supayo inyo dapek mancaliak-caliak pamandangan pagi sapanjang jalan. Kutiko bus baranti di Minang Plaza, naiak cewek rancak. Baunnyo roman malaikat tarampeh. Kulik aluih bak bingkuang bakubak. Badak putiah, bibie merah. Baju kausnyo sampik, lah tabudua sado nan gambuang. Nan jaleh jakun-jakun Mangkutak raun sabalik mancaliak cewek tu. Cewek tu langsuang pulo duduak dakek Mangkutak. Mangkutak langsuang pasang aksi. Maklumlah, pagi-pagi pugeh, alun minun alun makan, cewek bahenol lah duduak di sabalah awak. Bus barangkek. Lapeh dari Lubuak Buayo, bus mulai kancang. Mangkutak caliak-caliak sereang ka cewek tu. Cewek tu tampak galisah. Saroman kacang diabuih. Bus taruih juo malaju sampai ka Lubuak Aluang. Singkek curito, lah sampai bus di Sicincin. "Kaca da," gareseh si cewek ka si Atang. Tantu se Mangkutak binguang. Dapek durian runtuah. Cewek rancak, duduak di sabalah awak, pagi-pagi mintak kaca pulo. Tapi dek karano panyakik Mangkutak samo jo bujang lapuak lainnyo di kampuang, salero namuah tapi angan tak lanteh, tapaso nyo aniang sajo. Namun masin oto Mangkutak lamo-lamo angek juo. Bus taruih balari. Sampai di panurunan dakek ka aie mancua, cewek tu manggareseh baliak. "Kaca Da. Dingin." Baa ka aka lai? Lah dingin cewek ko! Mintak dikaca pulo lai! Mangkutak mangaku ka dirinyo surang bahaso inyo bukan malaikat. Cewek minta dikaca dek karano dingin, sia pulo nan kamanulak. Antah kok laki-laki sakik! Sampai di bukit berbunga, tantang pakelok an masuak Padang Panjang, si cewek mamaciak an bajunyo. Manggigie badannyo. "Dingin. Kaca Da. Dingin," kato si cewek tu manggigie. Indak ado curito lai! Langsuang Mangkutak mangarajoan apo nan dimintak dek si cewek. Nyo kaca cewek tu dek Mangkutak. Baru se tangan Mangkutak kamangaca, cewek tu langsuang tapakiak. "Kurang ajar!" kecek cewek tu tararau. Tantu se Mangkutak binguang. Tadi mintak dikaca, lah dikaca dek Mangkutak, kini Mangkutak pulo dikecek an kurang aja. "Kan yu nan mintak dikaca!" hariak Mangkutak balagak urang baru baliak dari Batawi. "Itu, kaca jendela terbuka. Angin kan terus masuk. Dingin dong! Masa kaca saja tidak mengerti sih! Itu kan kaca! Lu orang mane? Ngerti nggak bahasa Indonesia? Kaca jendela maksud gue!" kato cewek mangkatutuih. Sopir langsuang mamparantian busnyo. Nyo usia Mangkutak. Nyo suruah Mangkutak turun. "Aden nak ka Pikumbuah, manga den diturunan di Padangpanjang ko!" pakiak Mangkutak ka sopir bus. Bus tancap, Atang tabatuak-batuak dek mambauni asok knalpot. "Ampun den ciak!" kato Mangkutak kutiko basuo jo Sabai Nan Aluih bisuaknyo. "Kudian den tahu cewek tu tanyato kamanakan pak calin wali kota! Urang Lubuak Minturun! Den kiro anak Batawi!" "Itulah waang. Kalau cewek lah mangecek jo bahaso Batawi lah waang anggap cewek tu anak Jakarta. Lah buliah cewek tu waang kaca-kaca." "Malu den ciak. Den kiro paja tu mintak dikaca, tanyato inyo kadinginan dek kaco jandela oto tabukak. Urang sa busnyo mangatokan aden ko laki-laki gata. Mangaca anak gadih di tangah urang rami." "Baa, kanai batunyo?" kato Sabai galak tabarai-barai. http://www.padangekspres.co.id/content/view/4268/132/ --~--~---------~--~----~------------~-------~--~----~ =============================================================== UNTUK DIPERHATIKAN: - Wajib mematuhi Peraturan Palanta RantauNet, mohon dibaca & dipahami! Lihat di http://groups.google.com/group/RantauNet/web/peraturan-rantaunet. - Tulis Nama, Umur & Lokasi anda pada setiap posting. - Hapus footer & bagian tidak perlu, jika melakukan reply. - Email attachment, DILARANG! Tawarkan kepada yg berminat & kirim melalui jalur pribadi. - Posting email besar dari >200KB akan dibanned, sampai yg bersangkutan minta maaf & menyampaikan komitmen mengikuti peraturan yang berlaku. =============================================================== Berhenti, kirim email kosong ke: [EMAIL PROTECTED] Daftarkan email anda yg terdaftar pada Google Account di: https://www.google.com/accounts/NewAccount?hl=id Untuk dpt melakukan konfigurasi keanggotaan di: http://groups.google.com/group/RantauNet/subscribe =============================================================== -~----------~----~----~----~------~----~------~--~---
