Mak Sjamsir... Lah basobok undang2 nan tuo-tuo dek Mak Sjamsir tu mah: Kok pitaruah lah baunyian, pasan alah baturuik'i. Lah tibo di tapeknyo tu mah panyambutan untuak Mak Sjamsir. A lai di baliak siriah di carano? Nan datang sabandiang jo nan manyambuik. Lah sabandiang galeh jo galeta. Bisuak tgl. 30 Juli ambo juo ka pulang (di Kuala Lumpur 2 hari, ka Universiti Kebangsaan Malaysia jo Pusat Manuscript Melayu, Perpustakaan Negara Malaysia), sudah tu ka Jakarta, Banduang (ado seminar di Unpad), baru taruih ka Padang, salanjuiknyo ka Buton, Sulawesi Tenggara. Tgl 23 Agust baliak ka Ulando nan indak ado babukik ko (Guguak marando sae susah mancarinyo). Ndak tabayang dek ambo dapek sambutan sarupo Mak Samsir tu doh. Nan biaso ambo turun pisawek pakai tarompa patakuih jo baju kauih pendek langan. Lapang dado tibo di nagari sandiri (dek 8 bulan dalam sataun babungkuih jo jaket taba taruih). Sudah tu ambo ambiak bus Damri ka Gambir, maota jo sitokar sambia bus jalan, sudah tu ambo cari bajai ka hotel nan tadakek. Sudah istirahat sabanta ambo jalan2 manonton pilem, ka Taman Ismail Marzuki. Ado kadai nasi ketek bukak tangah hari di muko Pasa Baru nan indak pernah absen ambo kunjungi kalau sakali sataun ka Indonesia/Jakarta. Nan punyo Apak2 nan keceknyo dari Sungai Limau, Piaman. Di sinan ambo mintak makan jo kapalo capa jo teh es (mudah2an aia nyo lai indak aia kali Ciliwuang doh [ambo pernah baco berita bahaso es balok nan dibuek di Jakarta ko kabanyakan aianyo dari aia kali Ciliwung, antah iyo antah indak, kurang joleh de kambo]; tapi lah babarapo kali ambo minun teh es Apak tu lai indak sakik paruik ambo doh). Sudah makan di situ kalua paluah buruak ambo..... Pernah ambo diajak dek kawan ka MakDonal nan di Sarinah tu (mukausik e elok: mahormati kawan nan sakali2 sobok). Ambo manggeleng. "Ka Pasa Baru.....kapalo capa", kecek ambo. Nah....kalau lah dapek kapalo capa tu.....lah tapaluah duduak sudah makan...kiamaik...kiamaik lah duya ko lai......banjir..banjir lah Jakarta ko lai...... Salam, Suryadi
B ----- Pesan Asli ---- Dari: hambociek <[EMAIL PROTECTED]> Kepada: RantauNet@googlegroups.com Terkirim: Minggu, 20 Juli, 2008 23:10:28 Topik: [EMAIL PROTECTED] FW: [EMAIL PROTECTED] BANDARA TABING - nostalgia Sakadar sato banostalgia saketek. Sasudah ambo maninggakan Kampuang Halaman salamo duo dekade, ambo Pulang Kampuang untuak partamu kali awal tahun 1985 . Indak tahu apo nan ka ambo rasokan ka manjajak kumbali Tanah Kampuang Halaman. Perasaan bimbang, anxious, tu sangat mampangaruahi ambo sajak barangkek dari San Francisco maninggakan kawan-kawan nan maantakan ambo di San Francisco Airport. Ambo tabang ka Singapura jo Singapore Airlines. Lesu, bimbang, mangana baa lah kaadaan Kampuang Halaman Kini. Sasudah penerbangan panjang, wakatu Singapore Airlines ka mandarek landing di Changi Airport, Singapore, tibo-tibo aia mato ambo mancorek bacururan ka muko jo dado, indak dapek ambo tahan, manciguik-ciguik surang mambaruik muko jo dado... Sampai airplane mandarek baranti habih, ambo mandoa, alhamdulillahi rabbilaalamiin... Apo nan manjadikan aia mato ambo mancucua balinang jo hati sadiah otomatis tanpa kontrol? Ambo duduak dakek jendela sabalah kanan. Wakatu hampia landing, di sabalah kanan tampak pamandangan nan manakjubkan mengharukan hati. Pohon-pohon karambia disabalah kanan sangat banyak, gerakannyo marato diambuih angin agak kareh basumangat mempesona. Pohon karambia jo daun-daunnyo ko malambai- lambai basamo-samo! Salamo duopuoluah tahun di Rantau Urang ambo indak panah mancaliak batang karambia. Apo lai mancaliak pohon-pohon sakali banyak saroman itu dengan geraknyo nan manyaik hati, melambai-lambai rasonyo manyaru ambo ka maso silam ka "dunia lain" nan ambo tinggakan. Takana lagu kami maso ketek di SMP Bukittinggi maso revolusi dulu di Kampuang, "Nyiur Melambai". Maso ketek di Kampuang acok ambo acok manyanyikan dan mainkan lagu tu jo harmonika malam- malam di bulan tarang di lampok dan pondok padi di sawah sambia maunyian padi sasudah mairiak. Kini, Nyiur Melambai sabanan melambai dihadokan mato ambo di Canggi Airport, Singapore nan moderen, mambuek aia mato ambo mancoroh tanpa disadari. Baru tahu awak indak di Rantau Jauah lai. Awak lah di "dunia lain" nan salamo ko lah lamo ditinggakan! Singkek carito; sasudah ambo sampai di Jakarta, disambuik kawan- kawan lamo dari Chicago nan lah pulang duluan. Ambo lah diingekkan, kok sampai di Jakarta ambo ka basuo jo baliau-baliau nan kabatulan kapai ka Makah Umrah. Kawan-kawan lah maisaratkan ka basuo jo urang gadang-gadang tu di VIP Room. Dengan isarat tu nan ambo tarimo dari kawan-kawan, ambo lai pakaian formil, jas hitam badasi. Di Jakarta babarapo hari dan sudah tu bakunjuang ka kawan-kawan lamo dan kawan- kawan baru untuak adaptasi ambo lah di "dunia lain" dan misti manyasuaikan diri. Tibolah kawan maantakan ambo ka Airport Jakarta, wakatu alun ado Cengkareng lai; tabanglah ambo ka Tabiang. Ambo sampai di Tabiang jo jadwal pesawat nan mandarek kaduo. Ambo kalua elok-elok, turun tanggo pesawat, lai badasi bajas hitam pulo, jenjeng biola di tangan kida, maengong suok kida mancaliak menghayati keadaan lingkuangan kuliliang. Sampai di tanah landasan, ambo madok ka kiblat duduak basimpuah mancium tanah Kampuang Halaman. Sudah tu ambo maengong kuliliang mangambangkan tangan jo dado, badoa alhamdulillah lah tibo di Ranah Minang, Kampuang Kalaman nan Den Cintoi. Bajalanlah ambo lambek-lambek manjenjeng biola jo emosi nan bahagia bacampua sadiah jo duka, anxious ka mancaliak kaadaan salanjuiknyo. Lah mandakeki gedung terminal tampaklah urang banyak manunggu panumpang nan datang. Tapi dek ambo nan terakhir bajalan, hampia- hampia di terminal ambo mandapek kejutan nan indak disangko-angko. Duo anak gadih bapakaian adat, bakain kuluak batanduak, mampasambahkan Siriah jo Carano ka ambo dengan penuh ramah dan khidmatnyo. Tapancua pulo aia mato ambo. Di antaro anak gadih nan baduo ko ado saurang Ibu mamperkenalkan ambo ka duo anak gadih ko dan manyambuik ambo dengan salam dan rangkuhan, Selamat Datang Sjamsir. Kami sangat emosi. Kecek Ibu tu, "Ampek Puluah Urang tamu Uni dari Lua Nagari sadang di rumah, tapi dek mandanga Sjamsir ka mandarek, Uni tinggakan sadonyo untuak manjapuik Sjamsir." Tarimo kasih banyak Uni, kecek ambo. "Uni jo Uda pun baru tibo tadi pagi dari Jakarta jo pesawat nan partamu. Kok kami tahu, awak samo-samo sajo tadi." Sudah tu kami bajalan lambek-lambek, manuju suatu pintu ruangan. Baliau bukak pintu itu jo kunci nan ditangannyo. "Kunci ko cuma Uni nan mamacaiak, kamar ko cuma dibukak dengan izin Uni", "Silakan masuak Sjamsir," kecek baliau. Baliau tunjuakkan kurisi itu Pak Harto Harto nan biaso duduak kalau baliau kamari. Kironyo kamar tu Kamar VIP. Duduak lah ambo maengong-engong di VIP Room tu, maota sabanta balapeh angah jo aia sejuk jo jajan nan dihidangkan. Sudah tu, sedan lah manunggu di lua, kami barangkek, langsuang ka Jalan Sudirman 18, Gubernuran. Di sinan Pak Gubernur lah manunggu. Kami basalaman barangkuhan. Ambo langsuang di bawo ka kamar makan, kami batigo banostalgia pulo ka maso-maso perkenalan kami dan tanyo-batanyo tantang kawan-kawan ambo nan lah lamo indak basuo. Ibu nan manjapuik ambo sacaro pribadi ka Airport Tabiang tu iyolah Uni Juz Azwar Anas. Sekian, sekitar sejenak kenangan di Airport Tabing. Salam, -- Sjamsir Sjarif July 20, 2008 Santa Cruz, CA, USA --- In [EMAIL PROTECTED], jupardi andi <[EMAIL PROTECTED]> wrote: > > Pak Zul > > Mokasih atas kirimannyo tentang asal usul bandara tabiang > nan Bandara ko ndak asiang lai dek ambo sajak ketek > sekitar awal 70 an sampai ambo manamatkan SMA dikota Padang 83 > nan rumah ambo cukuik dakek dari Bandara ko Aia Tawa Barat > mengenai nan berkesan di Bandara Tabiang tu.. > > Salam-Jepe (43+, Pku) > ___________________________________________________________________________ Coba emoticon dan skin keren baru, dan area teman yang luas. Coba Y! Messenger 9 Indonesia sekarang. http://id.messenger.yahoo.com --~--~---------~--~----~------------~-------~--~----~ =============================================================== UNTUK DIPERHATIKAN: - Wajib mematuhi Peraturan Palanta RantauNet, mohon dibaca & dipahami! Lihat di http://groups.google.com/group/RantauNet/web/peraturan-rantaunet - Tulis Nama, Umur & Lokasi anda pada setiap posting - Dilarang mengirim email attachment! Tawarkan kepada yg berminat & kirim melalui jalur pribadi - Dilarang posting email besar dari >200KB. Jika melanggar akan dimoderasi atau dibanned - Hapus footer & bagian tdk perlu dalam melakukan reply - Jangan menggunakan reply utk topik/subjek baru =============================================================== Berhenti, kirim email kosong ke: [EMAIL PROTECTED] Daftarkan email anda yg terdaftar pada Google Account di: https://www.google.com/accounts/NewAccount?hl=id Untuk dpt melakukan konfigurasi keanggotaan di: http://groups.google.com/group/RantauNet/subscribe =============================================================== -~----------~----~----~----~------~----~------~--~---