BK (8) : Saputangan Moyang Maleh bana nampak dari wajah Buyuang Koboy, kaniang laweh saketek mangarunyuik, mato mamiciang-mamerah sarupo urang abih batanggang. Rambuik bagombak kusuik, abih arih dek pitih lalu, bajalan kenek co urang tasapik. Jam Mido 'ameh' nan baru dibali dek Buyuang Koboy dari Ujang Lala malakek 'lungga saketek' di tangan suoknyo, sambia maliek jam di lap jo saputangan oranye paragiahan si Ujang Lala. Dek tasarobok jo Upiak Leba di muko Janjang Gudang, langsuang di senga dek si Upiak. Upiak Leba Ep...Tuan Buyuang....baa kaba..lai mantap Tuan kinitu... Buyuang Koboy Baa nampak di kau Piak..., mantap-mantap a ko ah, co urang ta makan iklan men kau ko mah.. Upiak Leba Manga la Tuan ko go ah, jan manyaringik se, capek tuo Tuan, ilang ingek lupo darek, tatuncik dek pinjangek. Buyuang Koboy Ebaik-ebaik.... kau kini yoh, alah pandai kau bapantun kini, dima kau baraja Piak. Coiko Piak, paniang Uadennyo Piak, alah batuka-tuka men dunia ko kini, dek alah banyak pintu rasaki, maraso banyak pintunya, dek anyo lai banamo dikakok men sadonyo. Upiak Leba A nan Tuan mukasuik, co pupuik, balapuik, bekoh tamakan cipuik pulo Tuan. Buyuang Koboy.. Aaa.. Uaden 'cuek' kan bekoh kau lai he, mantang diagiah aia, mintak limun puloh. Upiak Leba Maaf-maaf Tuan, bagarahnyo, tapi Ambo baru baraja bapantun baa co kicek Tuan, taruihkanlah caito Tuan tuh.. Buyuang Koboy Upiak ingek kan, si Kuniang, tukang saluang nan suko malepok dimuko Tek Pai mangaleh pinukuik, sambilan baleh tahun nan lalu kan anyo marantau ka pasa usang, sampai macik pulo anyo disitu, punyo sanggar tari bagai, jadi senimannyo cek urang kini, alah masuak pita genyo, alah duo pulo album saluangnyo. Upiak Leba Taruih.., a lo masalahnyo sampai Tuan pulo nan bakarunyuik.. Buyuang Koboy. Kini dek anyo alah macik alah banyak urang nan tahu , anyo ka manjadi wakia pasa pulo, dek di pasa usang banyak lawan, painyo kamarih, nan malawak di kau Piak, namonyo Kuniang, kini baganti pulo jadi Kuniang Pamenan, tau Upiak sia Pamenan tu, Pamenan tu urang badagok dipasa ko dulu, sia nan indak tahu jo Liau tu, jan di pasa ko, pasa nan lain ge sagan jo anyo, mantang-mantang si Kuniang ko bakaturunan dari Pamenan ko, bapakai pulo Pamenan di balakang namonyo, liek pulo lah di kau batempel dima-dima karateh tempel Kuniang Pamenan ko, indak malunyo tu-ah dipakai nyo namo moyangnya untuk kepentingannyo ka manjadi wakia pasa tu Upiak Leba Baa lo Tuan nan bingik, namo, namo moyangnyo, indak lo maminjam anyo doh, Tuan sagalo ka masalah men mah, kicek-an selah Tuan ka ikuik pulo tapi moyang Tuan indak ado na bisa kadipakudo-i namanyo doh Buyuang Koboy Piak, piak, baa ko babusa bana muluik ko Piak, bacirapuih co ula cincuai, tau di kau ndak bukan masalah Moyang nan Uaden salahkan, nan tapikia di Uaden bilo pulo den ka macik co si Kuniang tu heh, buliah banyak lo pintu rasaki Uaden Upaik Leba O..Co itu, kan Tuan alah macik tu, mamacik jam Mido palasu du, kalau Tuan ka macik, bausaho sungguah-sungguah lah Tuan, jan urang pulo Tuan suruak-suruakkan. Buyuang Koboy Oii alai, babiso kau mah...Piak Wassalam DYEK - 111108
--~--~---------~--~----~------------~-------~--~----~ =============================================================== UNTUK DIPERHATIKAN: - Wajib mematuhi Peraturan Palanta RantauNet, mohon dibaca & dipahami! Lihat di http://groups.google.com/group/RantauNet/web/peraturan-rantaunet - Tulis Nama, Umur & Lokasi anda pada setiap posting - Dilarang mengirim email attachment! Tawarkan kepada yg berminat & kirim melalui jalur pribadi - Dilarang posting email besar dari >200KB. Jika melanggar akan dimoderasi atau dibanned - Hapus footer & bagian tdk perlu dalam melakukan reply - Jangan menggunakan reply utk topik/subjek baru =============================================================== Berhenti, kirim email kosong ke: [EMAIL PROTECTED] Daftarkan email anda yg terdaftar pada Google Account di: https://www.google.com/accounts/NewAccount?hl=id Untuk dpt melakukan konfigurasi keanggotaan di: http://groups.google.com/group/RantauNet/subscribe =============================================================== -~----------~----~----~----~------~----~------~--~---
