Assalaamu'alaikum wa rahmatullahi wa barakaatuhu Lah lamo sangaik mak Marah ndak mancogok. Kok dicogok-an saketek dek lah taragak lo liau jo palanta.
MANONTON URANG MAIN BAL Mak Marah jo konco-konco baliau pai manonton urang batandiang main bal di tanah lapang. Nan batandiang klub nagari Parik Malintang – Pakan Magek (Persipampam) malawan klub dari Tanjuang Alam (Persitalam). Rami di sabalik tanah lapang. Mak Marah jo kanti-kanti dapek tampek duduak di tarbune bana, di palanta batuang di bawah batang kapeh. Di sinan lah duduak pulo Muncak Sapo jo Mantari Labiah, masih taetong kanti juo dek mak Marah, kacuali dalam urusan manonton urang batandiang main bal sarupo ko. Sabab nan Muncak Sapo jo Mantari Labiah ko biasono salalu heboh katiko sadang manonton. Heboh muncuang baliauko, kadang-kadang heboh lo jo kaki bagai sipak sintuang sarupo nan baliau sato lo main. Persipampam jo Persitalam ko iyo sabana lawan kareh sajak dulu. Pueh hati pacandu main bal kalau mancaliak kaduo klub ko nan main. Itu sababno mangko ka rami bana urang manonton. Pamain-pamain no samo-samo santiang. Samo-samo tageh, tuuak taan. Sarupo itu pulolah nan tajadi sapatang ari tu. Muncak Sapo jo Mantari Labiah lah jadi komentator langsuang dari partandiangan tu, sarupo di bawah ko. Mak Marah jo kanti nan lain mauruik dado sajo dek ndak mungkin lo ka mamakok talingo doh. - Kamaa lo baarak di si Kirih ko goah. Tu si Mantirih tagak surang di kida tu ah. Opor nah ka kida tu heei.... + Ano si Joan nan dicari no go. Si Kirih ko kalau ka maopor bal, si Joan nan dicari no...... Ha nampak tu ha...... - Aa indak.... aa indak... lah dipotong lawan lo baliak. Hei yay yay Kirih... Kirih... pabilo jo ka cadiak ang main bal go..... Partandiangan batambah heboh. Pamain Persitam bakaja-kaja jo pamain Persipampam manuju tunggak gol Persitam. Pamain nomor 11, si Man Gadang maarak bal maleba ka suok. Diopor no bal tu ka si Dirih nomor 7. Basarigia jo pamain balakang lawan nomor 13, dapek di lawan. Di sepoh habih no bal tu ka tangah, langsuang ka dakek tunggak gol Persipampam. Di sinan lah ado si Kutak, bek suok. Disambuik no bal tu, di arak no saketek ka tangah. Di opor no ka si Kirih di tapi kida. - Hey alah. Manga lo kian du diopor. Ko sabanta lai dapek di urang baliak du..... Ha... jadilah.... Harak ka muko Kirih.... harak taruih..... He.. yay.... yay..... itu sin indak taadok-i di si Kirih do. + Ligaik nomor 4 ko go Muncak. Ketek renceh tapi ligaik..... ndak talok di si Kirih do.... tu lah dihalauno bal ka muko. Lah mandakek lo ka tunggak gol Persipampam. Nomor 4 maopor ka nomor 6. Maleba ka suok saketek dulu ka nomor 8. Dibaliak-anno baliak ka nomor 4. Di arakno ka muko. Untuang ado si Man Gadang di sinan. Dapek di no bal tu baliak, langsuang dioporno ka tangah. Dapek di Mantirih. Si Mantirih ma-arak saketek, di oporno ka si Joan. Si Joan mampakilik-an pamain nomor 11. Lapeh, dibaono maju baliak. Di opor no ka si Kirih. - Hee, ka si Kirih lo baagiahan bal. Maa ka jaleh dino du.... Si Kirih malampaui duo pamain lawan diopor singkekno bal tu ka si Mantirih di kida. - Hee... baopor lo baliak kian. Cuek-an lah lai ka gol tu... hee alah..... Si Mantirh di kaja tigo pamain lawan. Di pakiliak-anno saketek. Lapeh. Di oporno bal ka si Kirih nan tagak agak di balakang tapi indak ado nan manjago...... + Hee... si Mantirih ko tea lo paja ko gomah. Ka balakang bal di oporno - Iyo tea mah. Ka si Kirih lo bal baagiah-an. Dimaa ka jaleh dipaja ko go.... Si Kirih di kaja bek suok nomor 5. Di pakaliciakanno saketek. Lapeh lo no. Dialauno bal tu surang ka muko. Disipak no langsuang.......... Goooooooollllll. - Haaaa itu iyo du. Itu iyo santiang du..... Muncak Sapo mahonjak-honjak sarupo anak-anak. Ndak tatahan di mak Marah indak ka bakomentar. : Sajak cako tadanga di den indak ciek juo nan elok nan dikarajoan si Kirih nampak di Muncak do. Kini barulah masuak di nak urang bal, alah santiang sin nak urang jano Muncak. - Nan den kecek-an kan nan bana no, Marah. Kalau indak rancak parmainan no tantu iyo den kecek-an ndak rancak. : Kok, sato nan ka tangah lai katalok di Muncak? + Maa lo ka talok di awak nan alah tuo-tuo ko. Muncak ko kan garegak dari tapi ko lo nan labiah no go. Partandiangan tu batambah rami. Ganti baganti sarang manyarang. Heboh Muncak sapo jo Mantari Labiah baitu juo. Alah acok salah sin lo di mareka si Kirih jo kawan-kawan no. Si Mantirih bakaja-kaja jo pamain lawan nomor 10, dapek di si Mantirih bal. Duo pamain lawan nomor 4 jo nomor 7 tibo lo baliak mangapuang. Antah disangajono antah indak, disipak gadanganno bal tu ka arah tarbune. Antah baa mangko kian pai bal tu. Balapak tibo di kapalo Muncak Sapo. Muncak Sapo takuneneang. - Eeeeeeiii kurapaai.... baa mangko ka den ang opor bola, jano Muncak. Urang nan duduak dakek tarbune tu, tamasuak mak Marah galak tasengeang mancaliak Muncak Sapo disapo bal. : Buliah nak jaan heboh juo Muncak jano du mah, kecek mak Marah. Muncak Sapo hampeh mareh sabanta. Tapi sudah itu lai agak bakurang komentar liau stek. Kasudahan partandiangan Persipampam manang 2 – 1. Gol kaduo di cetak si Joan nan manarimo umpan dari si Kirih. ***** --~--~---------~--~----~------------~-------~--~----~ =============================================================== UNTUK DIPERHATIKAN, melanggar akan dimoderasi/dibanned: - Anggota WAJIB mematuhi peraturan serta mengirim biodata! Lihat di: http://groups.google.com/group/RantauNet/web/peraturan-rantaunet - Tulis Nama, Umur & Lokasi di setiap posting - Hapus footer & seluruh bagian tdk perlu dalam melakukan reply - Untuk topik/subjek baru buat email baru, tidak dengan mereply email lama - DILARANG: 1. Email attachment, tawarkan disini & kirim melalui jalur pribadi; 2. Posting email besar dari 200KB; 3. One Liner =============================================================== Berhenti, kirim email kosong ke: rantaunet-unsubscr...@googlegroups.com Daftarkan email anda yg terdaftar disini pada Google Account di: https://www.google.com/accounts/NewAccount?hl=id Untuk melakukan konfigurasi keanggotaan di: http://groups.google.com/group/RantauNet/subscribe =============================================================== -~----------~----~----~----~------~----~------~--~---