Bertahun lalu, katiko masih ketek-ketek, ambo diajak almarhum kakek jo almarhumah nenek ambo pai Basapa ka Ulakan Pariaman. Pagi-pagi sekali, peserta ba-Sapa alah bakumpua di mungko surau kaum kami. Banyak yang mambao makanan, buah-buahan dan sebagainyo. Anak-anak yang sagadang ambo, mamakai baju rayo, bergembira. Nan ado dalam pikiran wakatu itu hanyolah kami ka pai jalan-jalan ka Pariaman yang pada saat itu, ambo indak tahu dima, tapi manuruik nenek, awak sakalian mancaliak aia gilo (ombak). Di Pariaman, kito pai ka sebuah musajik tuo, meskipun ambo masih anak-anak, taraso juo kekhusukan kakek jo nenek dan rombongan disinan. Ambo pun mancaliak, bukan kami sajo nan pai kasinan. Banyak pulo rombongan dari nagari-nagari lain yang ambo indak tahu. Setelah sampai dan beristirahat, nenek jo kakek ambo, alah sibuk berzikir, baitu juo rombongan nan lain. Ambo sibuk pulo mangincar pisang kaliang nan dibao rombongan dan maincar lamang nan ikuik sato.
Ambo indak tahu dan alum berfikir, kenapa untuak berzikir, harus pai jauah-jauah ka Pariaman. Cukuiklah tiok subuah di surau kaum kami, nenek jo kakek ambo zikir lamo-lamo beserta jo makmumnyo, sampai matoari tabek manjilek masuak disela papan dindiang surau. Suaronyo bergema, manyajuakkan pagi hari sabalun pai turun ka sawah jo manukak ka ladang. Biasonyo, kalau mereka alah salasai zikir, kakek ambo akan batanyo satu dua, kalau ambo bisa manjawek, inyo akan mambuekkan kudo-kudo dari daun anau "pesok"nyo. Atau sakali-sakali inyo buekkan ambo, pesok daun anau, tapi indak buliah di baka, masih anak-anak katonyo. Samantaro kakek ambo, alah manggabubu asok tambakau nomor 9 nan dilinting jo daun anaunyo. Pada bulan-bulan tertentu, surau ambo dikunjungi dek Angku dari nagari Bukik Sangok. Pada saat Angku datang, biasonyo rombongan nenek ambo akan semakin lamo disurau kaum kami, bahkan ado yang indak pulang. Urang sangai hormat ka Angku ko. Tapi yang mambuek ambo sanang, bukan itunyo, tapi tiok batamu ambo acok diagiah pitih saratuih rupiah untuak balanjo...he...he...Sampai kini, ambo indak tahu sia sabananyo namo angku ko. Baliak ka Ba-Sapa. Sajak Angku Bukik Sangok maningga, indak ado lai angku-angku lain yang datang ka surau kaum kami. Sairiang jo itu, maningga pulo kakek ambo. Wakatu inyo maningga, kakek ambo didampingi dek nenek ambo ko dan ado yang babisiak, bahwa nenek jo kakek ambo ko, satu guru. Ambo pun indak mangarati apo mukasuiknyo. Sajak angku jo kakek ambo maningga, nenek ambo tingga sorang dan ndak bisa lai mengorganisir urang Ba Sapa. Sampai kemudian beberapa tahun yang lalu nenek ambo maningga pulo, ambo alun sempat batanyo, ado apo kito basapa dulu itu. penjelasan nenek hanyo, kito baziarah ka makam Syeh Burhanuddin nan kiramaik. Pada sebuah kesempatan, ambo sampai di Surau Buya Sasak di tapi batang Kapa di Nagari Kapa, Pasaman. Pada saat itu, banyak ambo mancaliak urang mudo, tuo-tuo dan setengah baya tekun mengaji dalam surau. Surau itu disekat-sekat jo kain yang jadi pambateh antar mereka. Merekapun mambao segala perlengkapan, mulai dari kasua sampai alat masak memasak. Mereka mengaji dan berzikir, indak sajo pada waktu sholad wajib, tapi juo sapanjang wakatu. Ambo mancaliak, mereka hanyo baranti katiko makan sekedarnyo dan katiko pai ka Batang Kapa untuak mandi atau keperluan lain. Ambo danga dari masyarakat, itu namonyo Ba-Suluak. Pada lain kesempatan, ambo pernah berkunjung pulo ka seorang tuo di nagari Gasan Gadang. Rumahnyo di tapi pantai, salo manyalo karambia jo nipah, tahampa saketek labuang tampek bakau tumbuah. Ambo mancaliak dimato kapalo dan manungguan baliau berzikir hampiah 2,5 jam. Manuruik urang yang kasinan, baliau ko mempelajari ajaran Syeh Burhanuddin dari Ulakan tampek ambo Ba-Sapa samo nenek dulu. Minggu lalu, ambo pai ka toko buku. Panek mancaliak-caliak buku umum, buku agamo dan buku lainnyo, pandangan ambo tatumbuak ka sebuah buku nan bagambar surau yang arsitekturnyo gaya koto piliang. Jatuah ka dalam aia mato, takana maso ketek-ketek, tangiang kaji alih ba ta nan diajakan kakek ambo, tabayang mamak-mamak mangaji malam dan lalok di dapua surau. Tabayang nenek nan manyuruah makan sabalun pai mangaji ka surau Nenggek. Talinteh pulo surau kaum ambo nan alah dirobohkan dan diganti manjadi bangunan tembok tampek ibadah nan bajudul Musholla beserta lengkap jo papan namo. Tibo-tibo tagarak hati nak ma ambiak buku yang berjudul " Tarekat Syattariyah di Minangkabau" karangan Oman Faturrahman nan ditabikkan dek KITLV Jakarta 2009. Ternyata, buku ko, cukuik mambari jalan, untuk mencari jawaban lebih jauh tentang ketidakpahaman ambo manga nenek jo kakek ambo maajak Ba-Sapa ka Ulakan Piaman, jo manga Angku Bukik Sangok rutin datang ka surau kayu kaum ambo dan manga nenek, kakek jo kawan-kawannyo berzikir lamo bana. Buku ko bercerita tentang sejarah jo sedikit gambaran ajaran tarekat syattariyah di Minangkabau. Sangat baik bagi anak-anak mudo untuak mengantarkannyo pado pencarian yang lebih jauh dan lebih dalam. Salam Andiko Sutan Mancayo --~--~---------~--~----~------------~-------~--~----~ . Posting yg berasal dari Palanta RantauNet ini, jika dipublikasikan ditempat lain harap mencantumkan sumbernya: ~dari Palanta r...@ntaunet http://groups.google.com/group/RantauNet/~ =========================================================== UNTUK DIPERHATIKAN, melanggar akan dimoderasi/dibanned: - Anggota WAJIB mematuhi peraturan serta mengirim biodata! Lihat di: http://groups.google.com/group/RantauNet/web/peraturan-rantaunet - Tulis Nama, Umur & Lokasi pada setiap posting - Hapus footer & seluruh bagian tdk perlu dalam melakukan reply - Untuk topik/subjek baru buat email baru, tidak dengan mereply email lama - DILARANG: 1. Email attachment, tawarkan disini & kirim melalui jalur pribadi; 2. Posting email besar dari 200KB; 3. One Liner =========================================================== Berhenti, kirim email kosong ke: rantaunet-unsubscr...@googlegroups.com Untuk melakukan konfigurasi keanggotaan di: http://groups.google.com/group/RantauNet/subscribe -~----------~----~----~----~------~----~------~--~---