Batang Apo Nan Ka Waang Bangkik an? Senin, 25/05/2009 13:44 WIB “Tang. Manga musti sajak kini bana waang basiap untuk dicalonan,” kato si Jila ka si Atang kutiko basobok di lapau Nan Ayang. Kutiko tu si Atang sadang bedebat jo urang-urang, mampacaliak an kapandaian bahaso inyo santiang, supayo urang sato pulo mamiliah inyo isuak.
“Lai tahu waden tumah. Iyo lamo lai, tapi kan aden paralu latihan badebat sajak kini. Nantik akan ado debat calon persiden di radio jo tipi. Saroman di Amerika tenha!” jawek si Atang maraso tagaduah dek solo si Jila tu. “Kalau baitu, waang juo harus mambuek rencana, apo bana keinginan waang nanti kalau lah jadi persiden tu. Iyo lai punyo rencana waang untuk mambangun nagariko? Iyo lai punyo caro-caro nan jitu? Atau, waang nak sato jadi calon persiden cuma untuk lagak-lagak se. Untuk uru-uru. Parami-ramian alek.” “Lagak-lagak baa! Uru-uru apo! Waden serius.” “Kok iyo serius, apo plening waang kalau lah jadi persiden. Lai ado visi jo misi waang untuk kemajuan bangsa Indonesia ko indak? Kok cuma persiden-persiden se, lah banyak persiden awak nan saroman waang komah.” “E, Jila agak-agak mangecek saketek kawan. Waang kecek an persiden awak nan dulu-dulu indak punyo plening? Ado pleningnyo, ado. Cuma waang nan indak mangarati.” “Jadilah. Kini baliak ka persiapan waang jadi calon. Sia nan ka mancalonan waang? Partai? Urang kampuang waang se? Urang di lapau ko sajo? Sia?” “Sudahlah Jila. Agiah kesempatan lah waden ko manyiap an diri manjadi calon baa?” “Silahkan, silahkan, go ehed! Tapi takana di den Tang. Iyo lai bantuak waang ko nan kamanakah jadi persiden ko? Waang nan pandai kan cuma debat kusie di lapau-lapau. Ota iyo balapie lapie, tapi nan waang karajoan indak tampak. Kok ka jadi persiden tu lai tahu waang ndak. Sajak dulu lah tampak bahaso urang tu iyo sabana pemimpin, iyo sabana ka jadi contoh dek rakyatnyo. Urang pandai, arif bijaksano, tahu ereang jo gendeang.” “Itu kalau awak ka jadi pangulu tumah kawan. Kalau nak jadi persiden lain. Lain.” “Kok baitu baa Tang. Kito cari se karajo lain. Indak babaun tunjuak den bahaso urang ka namuah mancalonan waang jadi persiden.” “Baa baitu? Indak ado hak den sebagai warga negara mancalonan diri nak jadi persiden?” “Untuk calon persiden tu lai tahu waang ndak? Partamo, waang musti tingga di Jakarta. Sapanjang sajarah Indonesia ko, alun ado calon persiden dari daerah lai doh. Musti urang pusat. Alun pulo ado urang Minang ko nan talok mancalonan diri manjadi persiden lai.” “Baa mangko urang awak ko indak panah jadi persiden.” “Gadang ota! Saroman waang. Ota balapie-lapie, saroman dunia ko salasai diurusnyo. Padohal nan diotakannyo aie matah se sadonyo. Co caliak dek waang, maa urang awak nan lai agak santiang? Maa? Kelas urang awak kelas urang manggaleh kaki limo. Bajua pagi, etong untuang patang-patang. Mana bisa jadi persiden, ya kan?” “Baato sinis bana waang ka urang Minang ko ha? Waang indak urang Minang?” “Kok saroman waang nan kadicalonan untuk calon persiden tu, iyo bedo tumah. Kualitas waang tu masih di bawah. Malu sagalo urang Minang dek waang beko.” “Aden nio jadi persiden tu, baa?” “Soal nio tu kan soal salero. Bukan berdasarkan paretongan rasional. Elok cari karajo lain se awak lai.” “Apo karajo nan rancak kiniko?” “Manulak ombak.” “Waden ko calon persiden, Jila! Kini waang suruah manulak ombak! Itu samo jo menghina bangsa Indonesia waang tumah!” “Tang. Jago lah lai. Basuak muko. Jaan barasian juo lai.” “Barasian baa den? Ah jaleh waden jago komah.” “Nan ka jadi calon alah bapiliah. Tigo pasang. Indak tamasuak waang doh, kawan. Alun ado dalam sejarah, urang Minang ko bisa dicalonan jadi persiden doh.” “Kok indak bisa jadi persiden, jadi mentri bagai molah.” “Lah panuah urang nan ka diusulkan jadi mentri. Dalam daftar tunggu indak namo waang doh.” “Tapi waden lah payah bajuang. Kini waden ka mambangkik an batang tarandam mah.” “Batang apo nan ka waang bangkik an? Batang pisang? Batang pisang tu samakin dibanaman samakin mancogok juo inyo kateh.” (Wisran Hadi) -- http://www.cimbuak.net Kampuang nan jauah dimato dakek dijari http://urangminang.wordpress.com http://palantaminang.wordpress.com --~--~---------~--~----~------------~-------~--~----~ . Posting yg berasal dari Palanta RantauNet ini, jika dipublikasikan ditempat lain harap mencantumkan sumbernya: ~dari Palanta r...@ntaunet http://groups.google.com/group/RantauNet/~ =========================================================== UNTUK DIPERHATIKAN, melanggar akan dimoderasi/dibanned: - Anggota WAJIB mematuhi peraturan serta mengirim biodata! Lihat di: http://groups.google.com/group/RantauNet/web/peraturan-rantaunet - Tulis Nama, Umur & Lokasi pada setiap posting - Hapus footer & seluruh bagian tdk perlu dalam melakukan reply - Untuk topik/subjek baru buat email baru, tidak dengan mereply email lama - DILARANG: 1. Email attachment, tawarkan disini & kirim melalui jalur pribadi; 2. Posting email besar dari 200KB; 3. One Liner =========================================================== Berhenti, kirim email kosong ke: rantaunet-unsubscr...@googlegroups.com Untuk melakukan konfigurasi keanggotaan di: http://groups.google.com/group/RantauNet/subscribe -~----------~----~----~----~------~----~------~--~---
