Sanak Jepe,
Kok Sanak iyo lah balayang-layang darek; nan ambo ko mah balayang-layang daun
dadok juo baru lai. Kok alang-alang darek sanak lah dapek angin nan tangang,
banang lah bacoro sado alahe, tingga puntaran sae lai; kok alang-alang dadok
ambo ko mah manampiak juo baru kanai angin kasek, kok banang dari banang
salisiah, tiok disambuang tiok putuih. Lai badanguang2 alang-alang darek sanak?
Lai rotan nan santiang danguang2nyo? Lai jo kaco dan pisau sirauik nan tajam
barauiknyo? Nak badendang buninyo di ateh langik. Tauik'anlah alang-alang darek
sanak tu sampai bisuak pagi. Alang2 darek Sanak saniah nampak dek ambo.
Kok lapau gak barek dek ota politik mah, Sanak Jepe. Ambo mamatuik2 sajo di
suduik palanta sambia manduduik kuah sate jo karupuak jangek. Mintak minun aia
malade saboto, rang lapau....
Salam,
Suryadi
--- Pada Kam, 4/6/09, Jupardi <jupa...@anugrah-mgt.biz> menulis:
Dari: Jupardi <jupa...@anugrah-mgt.biz>
Topik: [...@ntau-net] Masih Seputar Layang-Layang Darek
Kepada: RantauNet@googlegroups.com
Tanggal: Kamis, 4 Juni, 2009, 4:03 PM
Masih Seputar Layang-Layang Darek
Assalamualaikum Wr Wb
Dunsanak Panatan RN yang Mulia
Khususnya buek Pak Ramadhanil Pitopang (RP) di Dublin
Pak RP ambo lah baco carito dan ulasannyo samalam di rumah melalui akun email
yahu ambo tantang babagi carito seputar layang darek, sebuah bentuk permainan
tradisi di ranah kito nan bukan sajo digemari anak-anak remaja tapi juo urang
mudo dan nan gaek-gaek sampai kini, malah iko lah manjadi gengsi antar kampuang
dari nagari kito katiko ado lomba layang darek tarutama di 17 Agustusan atau
musim alang-alang dikampuang biasonyo sahabih musim panen padi atau musim
kamarau tibo. Molah kito tuntaskan bana caritonyo layang-layang darek ko dan
tarimo kasih lah babagi dari Pak RP pengalamannyo dikampuang jo layang darek.
Bagi ambo yo buliah dikatokan sakatek banyak tahu bana secaro detail tentang
layang-layang darek ko, karano ambo ketek-ketek diantaro baradiak kakak paliang
suko pulang kampuang apokah pulang kampuang ka Bako maupun pulang kampuang ka
rumah mande ambo nan jarak kaduo kampuang ko badakean sajo. Dek badakean
kampuang Ayah Bundo ambo ko nan bajarak sekitar 2 Km , takana lo carito urang
gaek laki-laki ambo saisuak manjadi marapulai, katiko inyo dijapuik keluarga
anak daro bararak ondeh yo tabik karingek papa ambo bajalan kaki pai karumah
anak daro bararak, istilahnyo sabana balambah katiaknyo dek karingek ha,ha,,ha,
tapi disinan lo “heboh”nyo baralek jaman saisuak nan sabana dirasokan bararak
bajalan nan cukuik jauhko sambia diguguah talempong pacik.
Bebeda mah jo jaman kini walau dikampuang juo urang bararak marapulai jo oto
sedan nan rancak ba AC Dingin sabana sanang hati Marapulai kini mah dek kondisi
bantuak iko, paliang kok bararak juo ambo paratikan tapi labuah ka rumah anak
daro baru marapulai diturunkan dari Oto Sedan tu baru bararak agak 50 meter
dampaknyo lai indak balambah bana jo karingek katiak Marapulai masih harum juo
tabaun dek anak daro katiko basandiang ha..ha..ha, tapi nampaknyo kurang
“heboh” yo sanak caro bararak mode ko, baa lai jaman lah serba instant bantuak
nyo, nan jaman kini yo lah serba bergerak cepat dan serba praktis.Jadi lah iyo
bana lo sanang Marapulai basuo anak daro dek indak jauh bana kini ba arak lai,
kok jauh tantu lah habih dulu lo tanago Marapulai ko..ssstttt
Back to layang-layang darek
Dikampuang ambo punyo kakak (jalan bako) ambo maimbaunyo Uwan Piman (kini lah
Almarhum) inyo yo santiang mambuek layang-layang darek, dari inyolah ambo
baraja baa mambuek layang darek nan rancak keseimbangannyo, tapi nampaknyo ndak
turun ilmu dari Uwan Piman ambo tu baa mambuek layang Darek nan rancak tatap
sajo layang darek lakek tangan ambo kok lah salasai “bermasalah” mulai katiko
ditabangkan singik alias barek sabalah tapaso diagiah “subang” disabalah suok
atau kida layang-layang darek nan sadang tabang jo pambarek bia indak singik,
lah kanai cimeeh dek kwan-kawan ambo “layang-layang darek waang anak gadih mah,
basubang bagai.
Ado juo layang darek buetan ambo ko kadang-kadang barek ka Tandan/Ikua, alah
maenggak-enggak sajo dibawah, jaan kan ka tagak tali naik agak tinggi sajo
payah dek barek ka ikua ko, iko samo jo “Fat Bottom Girls” ha..ha..ha bagarah
ambo mah dek ingek sajo judul lagu Rock kenamaan Inggris Queen, Jadi
bamacam-macam masalah nan ambo hadoi jo layang-layang darek lakek tangan ambo
ko jauh dari perfect, tapi bagi ambo lah naik bisa malenggang lenggok diudaro
lah sanang hati, kok ikuik lomba yo alun lai, ambo hanya bisa menikmati dan
maagiah apresiasi layang-layang darek nan batua-batua dibuek jo kehalusan hati
dan jiwa dengan seni yang halus.
Nah Uwan Piman ambo ko banalah nan mambuek layang-layang darek dengan hati dan
jiwa seni yang halus dan tinggi, mulai dari pemilihan batuang nan tuo lalu
dibalahnyo dibarasiahkan buku bagian dalam sasudah tu dikabeknyo batuang nan
dibalahko dirandamnyo ka luluak dalam tobek atau boncah bagabuang jo batuang
nan dibalah untuak mambuek dindiang nan dijalin lalu disemen namonyo Sasak
Bugi. Sakiro lah cukuik lamo dirandam di angkeknyo batuang nan lah dibalah ko
disampiang inyo mambuek sasak bugi untuak dindiang rumah dikampuang, inyo
manyambia mambuek layang-layang darek ko, bilah bambu nan lah dirandam tadi
dikariang anginkan dulu, lah dapek kariang nan pas mulailah inyo marauik bilah
bambu ko untuak bingkai layang darek-darek, duo horizontal, ciek vertical
tambah cieklai untuak tandan bilah horizontal nan pendek tampek ikua
layang-layang darek dirakekan.
Uwn Piman ambo ko marauik bambu ko yo dengan tingkat presisi yang mumpuni, yo
taraso bana ambo caliak galatiak tangannyo nan berseni, mulai dirauik jo pisau
dapua nan tajam sampai finishing dirauik atau dihaluikan jo pecahan kaco, lalu
ditimbang samo barek, kok gadang ukuran layang-layang ko labiah dari sarueh
(jarak antar buku) kiro-kiro lebanyo ado sekitar 1,5 Meter. Lah pas dan
proporsional bilah horizontal dan vertical baru dikabek jo banang cap jaguang,
inyo mangabek indak lo sumbarang kabek sabana tagok buhua2nyo satiok ujuang
bilah atau rangka layang darek ko, dima nan paralu inyo takuak bilah ko inyo
tahu persis. Tibo di marekek jo karate minyak bantuak itu lo pas bana
ukuran/pola karate minyak ko, bara labiah nan ka dirakekan ko
kabingkai/kerangka layang-layang.
Ado duo mode marakek karate layang-layang jo karate minyak ko, nan partamo
kareta nan baru licin tu lansuang dirakekan tu ado juo nan dikarimuakan dulu,
sarupo carito Pak RP iyo diagiah variasi atau paduan warna, satahu ambo karate
minyak ko hanyo ado warna Merah, Putiah, Biru, Kuniang jo Hijau tapi ado juo
salain karate Minyak namonyo karate KREP nan acok juo digunokan wakatu
acara-acara pesta baralek dikampuang buek hiasan. Jadi sasuai jo pola warnanyo
mako apo nan dikecekan Pak RP ado baagiah namo layang-layang darek ko sarupo
Bondo iko kalau ndak salah merah putiah, Salempang karateh aneka warna tu
dimiriangkan pola rakek karatenyo, ado juo Murai nah dek karate Minyak indak
ado nan hitam biasonyo karate karbon.
Parakeknyo dek Uwan Piman ambo iyo tapuang kanji nan dimasak dicampua senek jo
parakek jangek, itu ha nan acok digunokan tukang-tukang kayu dikampuang untuak
marakek bilah-bilah pintu, inyo babantuak lempengan coklat kok diabuih mancaia
lai tabayang tu sanak. Uwan piman ko marakek layang-layang ko yo sabana
hati-hati jaan sampai baleak parakek ko dibingkai layang-layang nan barakibaik
bisa jadi beko lah siap dirakek indak saimbang layang-layang ko katiko
mangudaro alias Singik..mmm tapaso lo dapek namo jadinyo “layang-layang darek
anak gadih dek basubang supayo jaan Singik”.
Lah rakek jo karate minyak bodi layang darek-darek ko mulai lah lai mambuek
ikua nan warnanyo diserasikan jo warna karate minyak bodi layang-layang, ikua
papek ditandan tu bisa 6 buah atau 8 buah tagantuang gadang layang-layang lalu
diantaronyo 2 buah ikua panjang nan bajelo2 (aha..bantuak postingan nan acok
kanai berang dek urang dapua, kapalo sangeneknyo tapi ikua
berjela-jela..begitu).
Salasai itu dikariang-kariangkan dulu, disigi juo dulu dek Uwan ambo ko kok
ado raso2 nan kurang pas, lalu dirakekan ikuanyo. Sabalun “ Test Drive ” tantu
dibuek taraju dulu dari banang tetoran/katun nan tagok, iko pun dibueknyo jo
seni juo, dima nan harus dijalin, baa caro mambuhuanyo, dima lataknyo di bodi
layang-layang yo harus tapek dan seimbang. Ado dua terajunyo, nan ciek taraju
ketek sagi tigo dibingkai ateh, nan ciek lai taraju gadang nan mahubuangkan
taraju ketek jo bagian bawah bingkai horizontal, lah lakek sacaro pas taraju ko
ditimbang-timbangnyo layang-layang ko dek Uwan ambo dima kesimbangan nan pas
untuak dibuhua nantinyo di sambuang jo banang layang-layang.
Mulai ambo pai katangah lapang atau sawah kariang pai test drive layang-layang
ko, ambo dek ketek nan Uwan ambo ko lah remaja tangguang tapaso ambo jadi
sitokar juo, onde mande dicarito opelet CB satokar juo, tibo carito layang
darek masih aja gue jadi Sitokar..nasib…nasib..nasib..bilo ka barubah ko yo
ha..ha..ha. Jadi ambo Sitokar ko tantu nan manjuangkan layang-layang ko. Lah
ambo pacik tandan layang-layang ko nan ikua bajelo-jelo lah dilatakan ditanah
rancak-rancak bia ndak manyangkuik. Yo ilang badan diri ambo dek layang-layang
nan cukuik gadang ko katiko maanjuangkannyo.
Wan Piman ambo inyo egang lai banang layang-layang ko, banangnyo adolah banang
tetoron kecek urang kampuang ado warnanyo putiah kakuningan (broken white) ado
nan coklat bagai ukuran sasuai jo gadang layang-layang dipakai banangko, tantu
babeda jo banang-banang layang-layang bulek ambo nan dibuek jo karate buku
bingkai lidi, iko banang masin jaik sajo, Dek ulah bamain layang-layang bulek
di pasia wakatu ketek kalene acok tapakiak mama ambo, apo pasal dek acok ilang
banang tetoron didalam kotak masin jaiknyo, banang ko dulu klosnyo dari kayu
rancak pulo,,tabayang sanak baa banang untuak manjaik mande awak saisuak nan
diguluang jo klos kayu, Sabananyo taragak ambo ka mambali aneka warna banang
nan pangguluang (klos) dari kayu ko, lai dijua urang juo yo di toko-toko nan
mayadiokan peralatan manjaik..agiah info senek sanak, raso-raso menarik lo
dikumpuakan dalam stoples bakaco transparan banang warna warni dari klos kayu
ko.
Sato diegang ndak do lai malenggang lengkok sakali layang-layang ko mambubuang
ka langit, kok dapek angina atau angin sadang rancak iyo minta lomba taruih
banang ko, jaan sampai ditahan kok layang-layang minta banang, bisa putuih dek
sakiang bareknyo elo layang-layang ko, lah mulai stabil ndak minta angin lai
baru ditahan, wawww iyo lah cogah bana nyo malenggang lenggok di angkasa,
kadang-kadang sadang dapek angina mulai tagak tali bisa-bisa sampai diateh
ubun-ubun awak, tapi kok sempat lewat ubun-ubun bahayo juo dek satantang angin
(indak dapek angin) manampiaknyo, tapi kok layang-layang nan “perfect” biasonyo
“mundur” baliak. Disikolah nan dikecek Pak RP nan layang-layang iyo harus
manantang angin jiko ka naik, angin nan ditantangnyo tulah “ditangkok” dek bodi
layang-layang sahinggo inyo ambuangkan tabang. Kito bisa saksikan juo kok
tibo-tibo angin barubah arah mako layang-layang ndak dapek angin bisa
manampiak, tabang randah
maenggak-enggak bantuak “Fat Bottom Girls” he he..he,
Disikolah layang-layang darek nan “perfect” pandai bamain indak manampiak
katiko “mati angin” inyo manyasuaikan kama angin ko barubah, samantaro “pilot”
pandai lo maagak banang mulai maangguluangnyo, maloronyo sambia maarahkan
layang-layang nan sadang “mati angin” ko kaarah dima angin barubah sacaro
mandadak (he he..iko bisa juo mah jadi pilosopi politikus), biasonyo yo sore
hari angin nan bahambuih stabil, makonyo urang bamain layang-layang kondisi nan
paliang idel mulai dari Jam 2 an sampai jam 6 Sore.
Wan Piman ambo yo lah asik Mamiuah-miuah” banang ko dan manjago irama layang
darek tatap tabang gagah diudaro, mulai dari lenggang lenggok nan berirama yo
elegan lah lenggang lenggoknyo lalu ko ditahan banangnyo layang darek ko tagak
luruih badan jo ikuanyo sambia ikua panjang nan bajelo-jelo tu malambai
“syahdu” digoyang angina..pelan-pelan gitu lo goyangan ekornya (ado juo nan
gilo malenggang lenggok sajo atau goyangannyo manjadi bana iko indak rancak juo
mah layang-layangnyo)
Ado cieklah nan tingga jenis layang darek namonyo layang-layang darek patah
siku, iko bingkai horizontalnyo bagian ujuang sakiro jarak 20 Cm (tagantuang
gadang layang-layang) dibengkokan bingkainyo, caro mambengkokannyo, bingkai tu
dipapah satantang nan ka dibengkokan ko diagiak minyak manih lalu diangekan
diateh cimporong lampu togok tantu nan sadang manyalo, jadi katiko bingkai ko
dikangkang kan yo ndak bulek oval bantuaknyo tapi dibagian ujuang basagi mode
trapezium.
Kok pulang ambo dari kampuang, lah mambaok oleh-oleh dari Uwan ambo ko
layang-layang darek nan ketek tantu sasuai lo jo ukuran badan ambo nan ketek
masih SD sakiro kelas 4, dari kampuang bako ambo Koto Tangah naik bendi taruih
ka Saruaso masuak Bukik Gombak masuak ka terminal Sangka Lamo, naik oto APD ka
Padang. Bisuak dilapangan bola Aia Tawa (kini muko rektorat UNP) tampek fovori
ambo bamain layang-layang jadul jo anak-anak kampuang aia tawa jo kawan samo
sikolah ambo, lah naik lo layang darek lakek tangan Uwan Piman ambo, yo lah
malenggang lenggok tinggi lo diangkasa lai indak “Layang Darek Anak Gadih jo
Layang Darek Fat Bottom Girls” kategorinyo…yo sanang hati dan bahagia katiko
dulu manikmati maso anak-anak.
Wass-Jepe
Pku, 4/06/09
Lanjuiklah Pak RP dan Dunsanak Palanta kok ado juo nan taraso seputar
Layang-Layang Darek ko, bisa juo ado hal-hal “magis’ atau legenda seputar
layang-layang ko ndak di ranah kito, carito nan ba genre “Konon Katanya”
Cepat, Bebas Iklan, Kapasitas Tanpa Batas - Dengan Yahoo! Mail Anda bisa
mendapatkan semuanya. http://id.mail.yahoo.com
--~--~---------~--~----~------------~-------~--~----~
.
Posting yg berasal dari Palanta RantauNet ini, jika dipublikasikan ditempat
lain harap mencantumkan sumbernya: ~dari Palanta r...@ntaunet
http://groups.google.com/group/RantauNet/~
===========================================================
UNTUK DIPERHATIKAN, melanggar akan dimoderasi/dibanned:
- Anggota WAJIB mematuhi peraturan serta mengirim biodata! Lihat di:
http://groups.google.com/group/RantauNet/web/peraturan-rantaunet
- Tulis Nama, Umur & Lokasi pada setiap posting
- Hapus footer & seluruh bagian tdk perlu dalam melakukan reply
- Untuk topik/subjek baru buat email baru, tidak dengan mereply email lama
- DILARANG: 1. Email attachment, tawarkan disini & kirim melalui jalur pribadi;
2. Posting email besar dari 200KB; 3. One Liner
===========================================================
Berhenti, kirim email kosong ke: rantaunet-unsubscr...@googlegroups.com
Untuk melakukan konfigurasi keanggotaan di:
http://groups.google.com/group/RantauNet/subscribe
-~----------~----~----~----~------~----~------~--~---
