Assalamu'alaikum Wr, Wb. Mak Ngah Hambo, Nyiak Sunguik Sjamsir Sjarif, kalau lah tasingguang 'per' nyo, pasti taburai habih kalua, :). Bacarito minum kawa di hari puaso ko kironyo lain pulo seronyo :)
Mak ngah, awal 2009 kapatang, ambo lai sempat minum 'kawa' tu, hanyo kurang syarat, karano daun kopinya baru dipatiak di parak., nan kebetulan batang kopi tu sangat subur. Tapi dek hanyo langsung basiram jo aie angek, sahinggo kurang afdhal yo mak ngah :) Mamasuki usia pensuin dulu , dibalinyo di (almarhum) abak ambo 3 piriang sawah nan cukuik laweh dakek rumah. Karano kami indak maizinkan beliau batanam padi, dijadikannyo sawah tu jadi parak. Kato beliau wakatu tu, parak ko Insya Allah juo ka jadi tampek kuburan awak nantiknyo. Sagalo macam di tanamnyo di situ, sajak dari kopi, cangkeh, kulik manih, jati, pinang, palo, pisang, dll. Masing-masingnyo cuma beberapo batang, sagalo saketek bantuak nasi ramas. Katiko ibu pulo nan pensiun, lah batambah nan batanam, dek ibu ambo ditambahnyo mananam durian batawi, paraweh, langkueh, supadeh, kunyik, limau puruik, limau kapeh, khas induak-induak. Ambo pun manamokannyo "Abak's Botanical Garden" :) Baduo dulu mereka asik tiok hari ka parak. Pai pulang dari parak mirip jo jam sikola katiko kaduonyo masih maaja. Kami anak-anaknyo cuma bisa geleng-geleng kapalo. Kadang-kadang kalau ambo pulang dari Padang, ambo sato ka parak tu, bingung surang. Sabab tibo di ladang indak ado lai nan nyo karajokan, dek ladang tu barasiah tarang. Karano ka ladang tiok hari, tantu iyo rumpuik indak sempat tumbuah. Ambo tanyo, "Ibu jo abak manga ka ladang juo, kan indak ado doh lai nan ka dikarajokan?" Jawab beliau sarantak sambia galak-galak dek memang kompak; "Kami pai duduak-duduak di dangau, sambia makan baka" :) (Dimaninjau apo sajo makanan ketek-ketek, baiak kariang, basah, atau ba kuah namonyo baka). Lagipulo kecek beliau baduo, beliau masih segar bugar ko, ka ladang tu ka ganti olah raga sajo nyoh. Sampai-sampai jadi kucikak di kampuang wakatu tu, kok ado pertandingan parak sia nan paling barasiah, dari Kukuban kito ogokkan sajo parak angku datuak Radjo Basa. Karano bisa bacamin awak di tanahnyo :) Dulu pernah juo abak ambo di tanyo urang, baa kok rajin bana angku datuak ba tanam ini itu, awak kan lah ba umua 60 -an, antah ka lai sempat awak manikmati antah indak. Kato abak ambo dengan bijak: " Batang paraweh nan ambo panjek wakatu ketek dulu juo bukan ambo nan mananam, batang karambia nan kini ambo ambiak buahnyo juo bukan hasil tanaman ambo, tapi tananam urang-urang tuo sabalun ambo. Nan kini ambo mananam, dengan mengucapkan Bismillah, dengan niat nan ikhlas jo hati nan sanang, apokah ambo sempat menikmati/ maliek hasilnyo ataupun siapo nan barasaki kamudian, it rahasio Tuhan". (Alhamdulillah, Tuhan memang penyayang, sempat juo beliau sanang hati maliek sadonyo tanaman kesayangannyo, cangkeh, palo, kopi, pinang mulai babuah sabalun akhirnyo beliau berpulang, dan kini kuburan beliau pun di tanam di sinan....). Dan kini ... katiko urang mancaritokan daun kopi, ondeh, nampak-nampak di ambo suburnyo kopi nan ditanam almarhum abak di parak tu. Batambah bagageh nak pulang ambo jadinyo, Nampak-nampak pulo nan ingin ka ambo karajokan satu tibo di Maninjau nantik. Mamatiak daun kopi, kalau paralu mambuek tungku baliak di suduik lua dapua sebagai pendamping kompor gas, lalu dibuek salayannyo sekaligus untuak manyangai daun kopi. Galuak (sayak tampuruang) di ampaleh barasiah-barasiah supayo bisa dijadikan tampek minum kawa :) Ondeh... Lah raso di bibia tapi cawan. Bara lah kalamaknyo minum kawa tu. Wakatu ketek dulu, urang minum kawa, kami minum kawa pulo, tapi dek abak ambo, kawa nan untuak kami dari daun teh, sabab kato beliau kami ketek-ketek, jadi alun buliah minum kopi. Tapi lamo lambek, karano kami minum teh, akhirnyo beliau pun jadi minum teh kawa pulo, indak dari kopi lai doh :) Jadi kok sempat taparogok pulo mak ngah ka Kukuban baliak nantik, bia ambo sadiokan daun kawa kasayangan mak ngah tu :) Kalau paralu jo sayak (tampuruangnyo) sekalian. hehe. Apolai mak ngah dulu penasaran dek indak sempat mahambua - i danau Maninjau di tapian Kukuban tu, karano hari lah sore, hahaha. Ondeh... Topik Makanan di hari puaso. Kalau awak sadang jauah, manyimpan makanan dari kampuang ko memang sero nak mak ngah. Baa, masih ado jaghiang mak ngah tu di Kulkas? Takana wakatu puaso jo ba hari rayo di tampek ni Ben di Knoxville, Tennesse dulu. Pas ambo mambuka kulkas nyo, takajuik gadang, durian bulek lengkap jo kuliknyo galak manih ka ambo dari dalam freezer :). Kato Ralph suami ni Ben, durian itu memang manunggu Rita datang dari Wyoming mah, kini kubaklah untuak pabukoan, hehehe. Wassalam, Rita Pada 24 Agustus 2009 12:37, sjamsir_sjarif <hamboc...@yahoo.com> menulis: > > Assalaamu'alaikum wa rahmatullahi wa barakaatuhu, > > ..................................... > Padanan tradisi Minum Kopi Daun, atau Minun Kawa adolah Sayak Tampuruang. > Jadi katigono, "tabuang kawa" "sariangan kawa" (dari ijyuak nan bafungsi juo > sabagai panutuik tabuang kawa tu, saroman nan dicaritoan Angku Lembang > cako), dan "Sayak Tampuruang" adolah satu unit, tigo ciri-ciri Minun Kawa > nan indak dapek dipisahkan. Aroma kawa angek jo Sayak Tampuruang tu > kato-mangatoan dalam lingkuanganno. Bairuik sairuik-sairuik jo > sungguah-sungguah manikmatino. Indak untuak diminum surang doh, tapi diminum > jo kawan arek, atau tamu nan sanang sasalero jo raso kawa tu. Punyo > tata-cara tertib sandiri, agak babunyi mairuikno. > > Mungkin dahulu Minum Kawa ko agak seremonial, saroman Urang Japang dengan > Tea Ceremony mareka. Itu lah barangkali istilah "Minun Kawa" adolah unik di > awak dari pado minun kopi. Kok Minun Kopi pai ka Lapau, tapi Minun Kawa ko > pai ka pondok-pondok urang gaek nan tahu lamakno mambuek dan minun kawa tu. > Itulah sababno kalau ambo saisuak pai ka Dangau Nyiak Kuruih (lah lamo > almarhum) ambo batanyo di laman, "Lai kawa Nyiak?" Jawab baliau, "Lai, kumah > lah buliah den tuangi angek-angek." sambia galak... :) Inyiak Kuruih ko > sabana Urang Gaek nan unik dalam kahidupan ambo, itu lah ambo sanang > manamokan Rantau Uajuah ambo di Santa Cruz, "California, jo namo julukan > "Santa Kuruih"..:) Kalau ambo pulang dari Jauah, urang batanyo, kama salamo > ko toh indak tampak? Jawab ambo sambia galak, Pai ka Dangau Nyiak Kuruih ... > > Tahun 1985 ambo pulang dari Jauah sasudah duopuluah tahun indak mancaliak > kampuang. Nyiak Kuruih indak ado lai. Pak Adang Ambo (anak Nyiak Kuruih) nan > Guru ambo tampek maota-ota dan mancak-mancak di halaman dangau Nyiak Kuruih > maso ketek pun indak ado lai. Dangau nyiak kuruih indak ado lai. Ambo sabana > taragak Minun Kawa. > > ................................................. > Oh Ciek lai, untuak kenangan. Di Kampuang kami ado ungkapan. Urang nan > Paliang Tahu jo Aturan adolah Urang Lasi. Karano "Atuaran Kawa" Urang Lasi > tu sabana rapi ... > > Sakitulah dahulu Nostalgia jo Daun Kawa. > > Salam, > --MakNgah > Sjamsir Sjarif > <http://www.santacruzsentinel.com/localnews/ci_12030675> --~--~---------~--~----~------------~-------~--~----~ . Posting yg berasal dari Palanta RantauNet ini, jika dipublikasikan ditempat lain wajib mencantumkan sumbernya: ~dari Palanta r...@ntaunet http://groups.google.com/group/RantauNet/~ =========================================================== UNTUK DIPERHATIKAN, melanggar akan dimoderasi: - DILARANG: 1. Email besar dari 200KB; 2. Email attachment, tawarkan disini & kirim melalui jalur pribadi; 3. One Liner. - Anggota WAJIB mematuhi peraturan serta mengirim biodata! Lihat di: http://groups.google.com/group/RantauNet/web/peraturan-rantaunet - Tulis Nama, Umur & Lokasi pada setiap posting - Hapus footer & seluruh bagian tdk perlu dalam melakukan reply - Untuk topik/subjek baru buat email baru, tidak dengan mereply email lama =========================================================== Berhenti, kirim email kosong ke: rantaunet-unsubscr...@googlegroups.com Untuk melakukan konfigurasi keanggotaan di: http://groups.google.com/group/RantauNet/subscribe -~----------~----~----~----~------~----~------~--~---
