Lah sampai sagaek ko, Sabai Nan Aluih baduo jo adiaknyo nan banamo Mangkutak Alam tu tatap se suko main sipaktekong. Dulu, kutiko ketek-ketek, tekong nan barisi kareke tu, dicampak an jauah-jauah dek si Sabai. Samantaro Mangkutak maambiak tekong tu, Sabai pai manyuruak ka dalam samak. "Tando aniang tando alah!" sorak Mangkutak sambia mancari-cari di ma Sabai manyuruak.
Kini, panyakik main sipaktekoang bangkik puo baliak.. Sipaktekong gaya reformasi. Sabai Nan Aluih indak mancampak an tekong barisi kareke lai doh, tapi manyebar isyu. Buni tekong barisi kareke nan kareh tu, kini diganti dek Sabai jo isyu nan diserak an ka saluruah nagari. Kutiko Mangkutak lansia ka ilie ka mudiak mancek kabaranan isyu nan dipaserak-serak an tu, aniang-aniang Sabai pai bajalan-bajalan ka lua nagari. Baitu pulo kutiko ado pakaro. Mangkutak dituntuik dan disidangkan di pengadilan. Kutiko hakim mamutuih an hukuman, Mangkutak mancari Sabai ka ilie ka mudiak. Mangkutak ruponyo indak namuah pulo pai mamanuhi panggilan pengadilan. Inyo ilang. Saroman dulu pulo, kutiko giliran Sabai mancari-cari Mangkutak di dalam samak, tanyato Mangkutak bakaruah di bawah kandang rumah gadang. Kutiko Mangkutak disuruah pai ka lua nagari mancari urang nan namuah mampautangan pitih, ciluih Mangkutak kanampak an. Pitih nan diparaluan kutiko tu cuma limo juta tapi Mangkutak manyalang pitih urang limopuluah juta. Labiah pitih tu nyo bagi-bagian dek Mangkutak ka dunsanak-dunsanaknyo. Sabai heboh dek karano banyak bana pitih nan nyo salang tapi nan dipaguan tu cuma saketek. Sabai samakin heboh, dek karano inyo indak mandapek apo-apo doh. Malapeh hao. Indak dapek pambagian sarimih juo dari Mangkutak. "Mang. Bila awak ka baranti main sipaktekong saroman ko ha?" tanyo Sabai. "Baranti? Maa bisa! Indak usye ye! Ondeh ciak oi. Kini lah sado urang main sipaktekong. Manga awak musti baranti?" umbuak Mangkutak. "Banyak pulo urang nan main sipaktekong saroman awak yo? Sia sia tu urang nan main sipaktekong kini ko?" tanyo Sabai icak-icak urang handia. "Persoalan kapeka. Persoaan bank senturi. Persoalan urang baradiak kakak Anggoro jo Anggodo. Cubo pikie dek aciak. Lai ka mungkin sagalo persoalan tu indak bisa disalaiana. Manuruik pepatah muyang awak, kalau persoalan kusuik diujuang, dicari baliak ka pangkanyo. Kan baitu ndak?" jawek Sabai. "Agak hati den, persoalan ko sangajo dipagaang-gadang hanyo untuak mailak dari tangguang jawab kama painyo pitih nan dipakai salamo ko," kato Mangkutak. "Bisa jadi. Urang kini kan canggih. Cangok, gigiah!" solo Sabai. "Iyo baitu. Kini ko kwitansi nan hanyo karateh salai tu, bisa pulo maubah angko-angko pitih bak kato hatinyo surang. Apo lai urang," baleh Mangkutak. "Antahlah diak oi. Indak tahu den lai apo nan musti kadipabuek. Sabab, antaro bana jo indak, untuang jo rugi, nan ka manangguangan kan rakyaik badarai roman kito ko juo," kato Sabai. "Nan main sipaktekong inyo, nan kanai bae dek tekong barisi kareke tu awak." "Tapi kini indak baitu urang main sipaktekang lai doh, Mang," kato Sabai. "Baa caronyo lai?" tanyo Mangkutak. "Kini indak ciek tekoang dipakai untuak main sipak tekoang doh Mang. Banyak. Ai baeoan tekoang nan partamo ka dalam samak. Waang pai mancari. Beko Ai baeon pulo tekoang nan kaduo. Waang pai pulo mancari. Sudah tu Ai baean pulo tekoang nan ka tigo. Waang binguang. Tantu timbua pikiran waang, nan ma nan sabana tekoang nan dipagunoan untuk main sipak tekoang tu?" kato Sabai. "Iyo galie aciak mah. Kecek urang kini, memang pandai aciak mamalusuan persoalan. Nan ma persoalan sabananyo dan nan ma nan indak. (Wisran Hadi) http://padang-today.com/index.php?today=kakobeh&id=109 --~--~---------~--~----~------------~-------~--~----~ . Posting yg berasal dari Palanta RantauNet ini, jika dipublikasikan ditempat lain wajib mencantumkan sumbernya: ~dari Palanta r...@ntaunet http://groups.google.com/group/RantauNet/~ =========================================================== UNTUK DIPERHATIKAN, melanggar akan dimoderasi: - DILARANG: 1. Email besar dari 200KB; 2. Email attachment, tawarkan disini & kirim melalui jalur pribadi; 3. One Liner. - Anggota WAJIB mematuhi peraturan serta mengirim biodata! Lihat di: http://groups.google.com/group/RantauNet/web/peraturan-rantaunet - Tulis Nama, Umur & Lokasi pada setiap posting - Hapus footer & seluruh bagian tdk perlu dalam melakukan reply - Untuk topik/subjek baru buat email baru, tidak dengan mereply email lama =========================================================== Berhenti, kirim email kosong ke: rantaunet-unsubscr...@googlegroups.com Untuk melakukan konfigurasi keanggotaan di: http://groups.google.com/group/RantauNet/subscribe -~----------~----~----~----~------~----~------~--~---
