Sanak Palanta
Alhamdulillah, dek rasaki dikirim nan kuaso, tapinteh juo ranah bundo.
Siang malakik matahari naiak tagak tali, diracak bendi manuruni ngarai.
Di pinteh jalan, dituruik malah batang Sianok, di suok tagak gagah
ngarai tanamo. Katiko basuo jalan mandaki, bendi masuak Nagari Sungai
Jariang, baliku jalan ka Matua, ndak lamo alah sampai pulo di kelok,
etongan ka 44, disinan badan sabana tapukau. Jauah mato dilayangkan,
tatumbuak pandangan ka pinggang bukik, ba sangsako awan nan putiah,
batapak di tapi danau, batang kapeh manyalo nyiua, aia tanang mambiru
hati. Itulah Maninjau sanak, danau Maninjau. Antah baalah tasansamnyo
hati, balinang sakali si ayia mato. Batahun batinggakan, barulah kini ta
datangi. Raso syukur mamanjek ka kaki langik, bakirimkan do'a ka nan
satu, Ya Allah Ya Rabbi, mode iko bana Nagari di lukih, indak cacek
satitiak tido, buah rasian didalam mimpi. Tapi baa mangkonyo rindu
bacampua risau, baa kok katiko uweh-uweh lapeh dado badabok.
Hari kaduo sanak, babelok pulo bendi ka Tanah Data, baturuik jalan
baliku, parak jo kabun batimba jalan. Baralah ka santiangnyo binus
baririk, tagak ba abad manjago Tabek Patah. Baitu pulo Rao-Rao, ba
Lumbuang Bapereang ka Koto Baru. Lintuah sakali raso hati, jauh tacampak
ka maso lalu. Baitu pulo kaki malangkah, yo ka Tanjuang Barulak Ba Pintu
Rayo, ujuang tanah namo tampeknyo. Padi manguniang di labuah luruih, ka
ujuang simpang jalan babalah, ka kida ka Atar jo Sitangkai, ka suok ka
Padang Gantiang, disinan kasiah anggan manyatu. Tanjuang barulak bapintu
rayo, balabuah ketek mambalah nagari. Badampiang pasa jo musajiknyo,
bakapuang bukik, tagak manjago. Tapi mangapo rindu basarato rusuah.
Tasansam dek lukisan, luruah dek kenangan, tapi kini kok rusuah jadi
buah angan.
Bukannyo denai mandurakoi pamiliak alam, bukannyo denai kufur ni'mat,
tapi mangalah raso badan diri, samakin dalam cinto ka ranah bundo, raso
damam maningkek ka panyakik, panyakik nan alun tantu ado ubeknyo.
Agak lamo badan tacanuang, di inok jo dimanuangkan sagalo lukisan,
batamulah apo nan manyansam, batamu jo induaknyo damam. Ado ciek tanyo
nan jadi uweh-uweh, manga kok nagari salangang nagari di alah Garudo.
Saratuih lari kudo, raso ka indak malendo urang. Haniang mancakam alam
rayo, antahlah apo nan tajadi. Kok lai rasaki elok, basuo jo urang nan
gaek-gaek, kok indak jo jenis nangko, badan basuo jo anak sikola.
Langang, sabana langang. Kok indah bana nagari nangko, langang bakatuik
labuah gadang. Antahlah kama nan mudu-mudo, salendang dunia sumarak
nagari. Apolah guno sagalo kaindahan, kalau hanyo tampek lahia jo tampek
bakubua, itupun kalau bawasiat malakik mati, batamu baliak jo ranah
bundo, pado akhia maso pajalanan di dunia.
Batanyo badan diri, apolah ndak ado janjian untuak barasaki, maju
handaknyo iduik di nagari. Mangalah pulo basonsong rantau sati, kok
rasaki lai elok, sakali satahun basilau juo, kok indak, mangkonyo rantau
di pajauah, marantau cino kajadinyo. Nan nagari tacinto, lukisan Allah
di mungko bumi, cukuik ka jadi curito, kenang-kenangan ka anak bini.
Baitukah sumpah sati katiko mamancang nagari, pambayia luko katiko
taratak di taruko.
Langang yo sabana langang sanak !. Kasialah risau ka disampaikan,
kasialah badan babarito kutiko pulang. Nagari panuah rumah tingga,
janjang lapuak, pintulah sompong, taraso ngilu tonggak tuo tagak,
bahabih hari mananti rantau pulang.
Sakitu dulu reportase singkek ambo, baputa dari Bukiktinggi, ngarai,
mandaki ka Matua, manurun ka Maninjau. Baitu pulo, star dari jam gadang,
luruih ka arah Baso, manyimpang ka Suok ka Batusangka, tatumbuak langkah
di Tanjuang Barulak ba Pintu Rayo.
Salam
Andiko Sutan Mancayo
--
.
Posting yg berasal dari Palanta RantauNet ini, jika dipublikasikan ditempat
lain wajib mencantumkan sumbernya: ~dari Palanta r...@ntaunet
http://groups.google.com/group/RantauNet/~
===========================================================
UNTUK DIPERHATIKAN, melanggar akan dimoderasi:
- DILARANG:
1. Email besar dari 200KB;
2. Email attachment, tawarkan disini & kirim melalui jalur pribadi;
3. One Liner.
- Anggota WAJIB mematuhi peraturan serta mengirim biodata! Lihat di:
http://groups.google.com/group/RantauNet/web/peraturan-rantaunet
- Tulis Nama, Umur & Lokasi pada setiap posting
- Hapus footer & seluruh bagian tdk perlu dalam melakukan reply
- Untuk topik/subjek baru buat email baru, tidak dengan mereply email lama
===========================================================
Berhenti, bergabung kembali serta ingin merubah konfigurasi/settingan
keanggotaan di: http://groups.google.com/group/RantauNet/subscribe