KULILIANG SUMATERA BARAT Kriiiing.... Kriiing.... Kriiing..... Ondeh siapo pulo ko nan manelpon malam-malam, hari hujan gadang ha... Ka diangkek telpon mato barayun dibukak, Indak ka diangkek telpon tu, dariangnyo sabana mamakak. Bialah bangkik juo dari tampek tidua agak sabanta. "Hallo.... iko sia?"
"Hei Rita...., Namasthe....iko ambo.... Akshanska.... Acha...? apo kaba, lah lamo ndak jumpa....". (Takajuik...) "Ha....?????, Akshanska ko? ondeh.... baa kaba India. Kini dima"... "Iyo Rita ha, kini ambo sadang di Indonesia, dapek libur sabulan dari India, sekalian ado meeting pulo di Sulawesi jo di Jawa. Minggu kapatang ambo masih di Makassar, tapi kini lah di Surabaya". "Indak jalan-jalan ka Minangkabau..., kan dulu lah ambo kecekkan, nagari ambo sabana rancak. Indak ka manyasa bagai doh Akshanska manyempatkan waktu ka Padang sabalun babaliak ka India tu. Beko ambo bao jalan-jalan kuliliang Sumatera Barat, tanang tu. Apo nan indak ado di siko, danau, hutan, lauik, aie tajun, gunuang nan permai, sadonyo diberikan Tuhan ka nagari kami ko.." "Iyo..., ambo sabana ingek jo carito Rita tantang semarak alam Minangkabau tu mah Ta. Danau Maninjau tu kan nan fotonyo jadi background laptop merah Ita nan banamo si mawar tu kan? Makonyo kapatang di Sulawesi ambo pai ka "West Sumatera House". "Ha iyo tu, Akshanska, Kami memang punyo banyak West Sumatera House di berbagai tampek. Di Jakarta, di Bandung, di Yogya, di Denpasar, di Makassar, sampai di Ambon pun kami punyo Rumah Minang. Bahkan kami punyo Minang House di negara tetangga sarupo Singapore, Malaysia, Thailand, sampai Australia dan Amerika. Rumah-rumah Minang nan baserak di seantero bumi tu adolah gate terdepan kami dalam mempromosikan pariwisata Sumatera Barat. Di rumah-rumah Minang nan tersebar di seluruh dunia tu, nan terwujud berkat kerjasama kami urang-urang Minang, swasta dan pemerintah, urang-urang nan ingin pai ka Sumatera Barat bisa mandapekkan informasi ..apo sajo... sabalun mereka bakunjung ka Sumatera Barat. WHAT TO SEE, WHAT TO DO, WHAT TO LEARN, WHAT TO GET, WHAT TO BUY, dan pertanyaan what-what lainnyo salamo nantik berada di Sumatera Barat, bisa ditanyokan di kantua situ. Kalau masih alun juo dapek gambaran lengkap, mintak pulo brosur-brosur nan memang disadiokan Rumah Minang tu. Nak ka mambooking tiket pesawat, paket-paket wisata nan ka dipiliah, atau hotel tampek tingga salamo di Sumatera Barat, apopun hotelnyo, baik hotel melati sampai bintang limo , juo bisa sadonyo di booking di Rumah Minang tu. Jadi katiko lah tibo di Sumatera Barat, turis mode kalian indak repot lai mancari ini itu, sadonyo sabana well-planned dan well-organized, sajak manjajakkan kaki di Minang sampai baliak maninggakan Minang. Masuak ka Sumatera Barat pun juo buliah pulo kalian piliah, lewat jalur darat, laut, atau udara, semua bisa... nyaman dan lancar...." "Iyo Rita, iyo.... lai takana di ambo pasan you dulu tu mah. Takana ndak wakatu Rita nio jalan-jalan kuliliang Himalaya di negara bagian Himachal Padesh dulu, satalah mancari info ka Central Government Indian tourism, ambo kawankan you pai ka Himachal Tourism Office atau "Himalaya House" nan di Jan Path, New Delhi tu, di situ Rita pasan pulo sadonyo tiket untuak rombongan salamo di negara bagian himalaya, hotel untuak di kota Dharamshala, di kota Manali, jo di Shimla. Lalu you booking pulo sakali paket-paket tur untuak acara di kota-kota nan dituju. Babali pulo sakali tiket pesawat, bis, atau kereta apinyo, sabana praktis. Baitu juo katiko awak ka pai ekshibisi Technical di Gujarat, atau Rita ka pai meeting di Mumbai. Atau wakatu kalian ka pai ka Goa, maupun ka Tajmahal, Agra di Uttar Pradesh. Lalu you kecekkan, baraso di Sumatera Barat model itu pulo mah. Kalau nak pai wisata ka Sumatera Barat, pasan sajo sagalo urusan di Rumah Sumatera Barat di kota nan tadakek. Makonyo di Makassar kapatang ambo lah pai ka West Sumatera house cabang Makassar". "Iyo, Akshanska.... takana pulo ndak katiko awak ka Barangkek ka Bangalore dulu, karano konferens hanyo 4 hari, jadi panitia hanyo manyadiokan hotel awak di Electronic City 4 hari pulo, samantaro rencana awak di Karnataka agak saminggu, kito pai pulo ka Rumah Karnataka (Karnataka Tourim Office) nan ado di New Delhi, awak cari pulo info tantang Karnataka dan Bangalore tourism di kantua tu, sekalian pasan hotel 3 hari lai di Bangalore city, jo paket tournyo. Lalu dek ambo sudahtu jo si Neda barencana taruih ka Kerala, awak pai pulo ka Kerala House di Jalan Ashoka New Delhi, ambo pasan pulo hotel jo paket tour nan ka di ikuti di sinan, sekalian batanyo ini itu tantang Kerala tu". "Iyo mah Ta, tapi kan sudah konferensi di Bangalore dulu tu ambo langsuang baliak ka New Delhi, sadangkan you karano ado perubahan jadwal nan lain, tapaso bageser pulo jadwal ka Kerala. Lai ndak jadi masalah?" "Indak masalah, Akshanska...., dek ado perubahan jadwal meeting, sasudah you pulang ka Delhi, ambo pai mancari Kerala House di Bangalore, ambo reschedule ulang sadonyo rencana jalan-jalan di Kerala, aman, jadwal check in hotel, jadwal paket tour, ambo uruih baliak di Kerala House nan di Bangalore tu. Ambo ndak tabayie dando atau apo-apo. Hal nan samo juo berlaku bagi petugas-petugas kami di rumah minang dimano sajo. Mereka sabana helpful ka calon wisatawan." "Iyo Ta, ambo kapatang memang model tu pulo, di Makassar 3 hari nan lalu ambo lah pai ka West Sumatera House, alah ambo pasan tiket pesawat ka Padang, hotel di Bukittinggi sekalian paket jalan-jalan city tour nyo untuak minggu muko. Sayang kironyo habis meeting di Surabaya tadi pagi karajo ado tabangkalai saketek, jadi tapaso barubah jadwal rencana sadonyo. Tapi indak masalah lai doh Ta, sabanta ko ambo lah pai pulo ka West Sumatera House nan di Surabaya ko. Lah ambo reschedule ulang pulo jadwal ambo salamo di kampuang you di Sumatera Barat nantik." "Ha... rancak tu, jadi bilo Akshanska tibo di Padang?" "Kalau ndak ado perubahan, mingggu muko ambo lah di Padang. Di kota Padang ambo ndak pasan hotel doh, sabab berang Rita beko." "Di Padang ndak usah pasan hotel lah Akshanska, di dangau ambo se laloknyo. kebetulan minggu muko mahasiswa ambo lah salasai pulo ujian semester, jadi ambo banyak wakatu luang. Bia ambo ajak you kuliliang-kuliliang Padang. Temple memang ndak banyak di siko doh, tapi kami punyo batu malin kundang." "Jadih lah... ambo nio ka danau Maninjau bagai mah, katonyo sabana rancak..." "Tanang lah Akshanska, ambo bao ka danau-danau nan ado di Sumatera Barat tu beko. Maninjau, Singkarak, danau kembar, aie tajun,.. Tapi dek you lah mambooking kegiatan untuak di Bukittinggi, nan urusan di Bukittinggi bialah you jo kawan-kawan se yo." "Ka Maninjau nyo bilo?" "Ka Maninjau tu paling dulu lah, kan itu kampuang ambo. Oh iyo, di sinan banyak pulo makanan khas nan indak ka talupo. Di India awak tiok hari manyudu dahi, makan abuih alu, jo sapiriang dosa. Kalau di Maninjau, rinuak goreng nan alah you cubo wakatu ambo masak di asrama awak di Mukherjee Nagar tu kan. Tapi ado pulo nan lain, khas pulo. Namonyo abuih pesi. Beko ambo aja kan sekalian caro mamasak jo mamakannyo" "Pesi tu apo tu Ta" "Oohh. Pesi tu makanan sejenis lokan atau kerang, ketek-ketek. Rasonyo sabana kamek, manih, dan proteinnyo sabana tinggi. Baitu you tibo di Padang nantik, dan pas awak ka Maninjau, bia ambo telpon pulo dulu adiak ambo, awak ajak nyo jalan-jalan sekalian, inyo ingin tahu pulo dima Maninjau tu. Namonyo Reni, tingganyo di Ancol. Inyo suko pulo jo pesi tu mah, kini inyo masih di Jakarta. Dulu inyo agak takuik-takuik kalau makan pesi, takuik kalau bibia bisa taba dek mada, padohal indak, kalau tahu caro makannyo" "Oh iyo lah... tunggu ambo di Padang minggu muko yo Ta? Tolong japuik ambo di Bandara, yuk... alah dulu nelponnyo yo.... sampai basuo...daaaaahhhh" "Jadih... eh... Tapi...tunggu dulu sabanta... Akshanska, You kan gadih manih rang India, baru pertamo kali pulo ka Indonesia, manjajakkan kaki ka Padang alun pernah sakali jua. Baa kok dari tadi you jo ambo asyik ba minang ria??????" "ha...???...@#$%^&*( Aie Tawa, Padang, 30 Januari 2010 Wassalam, Rita Desfitri Lukman (Terinspirasi dari carito imaginary mamak Zul Tan, tapi ambo pakai 'namo' asli, sabab ambo kombinasikan jo pengalaman jalan-jalan selama setahun tinggal di India, dimana tourism office nya sangat 'asyik', membuat saya selalu tergoda untuk mengambil jatah off dari kantor. Ada atau tidak tugas kantor, setiap bulan saya selalu kabur keluar kota New Delhi dan berkelana, hehehe). -- . Posting yg berasal dari Palanta RantauNet ini, jika dipublikasikan ditempat lain wajib mencantumkan sumbernya: ~dari Palanta r...@ntaunet http://groups.google.com/group/RantauNet/~ =========================================================== UNTUK DIPERHATIKAN, melanggar akan dimoderasi: - DILARANG: 1. Email besar dari 200KB; 2. Email attachment, tawarkan disini & kirim melalui jalur pribadi; 3. One Liner. - Anggota WAJIB mematuhi peraturan serta mengirim biodata! Lihat di: http://groups.google.com/group/RantauNet/web/peraturan-rantaunet - Tulis Nama, Umur & Lokasi pada setiap posting - Hapus footer & seluruh bagian tdk perlu dalam melakukan reply - Untuk topik/subjek baru buat email baru, tidak dengan mereply email lama =========================================================== Berhenti, bergabung kembali serta ingin merubah konfigurasi/settingan keanggotaan di: http://groups.google.com/group/RantauNet/subscribe