Assalamualaikum!
Rang Dapua, Bundo . Niniak Mamak, jo Dunsanak palanta kasadonyo ....
Sabananyo nan diri amboko yo indak suko bana manulih atau bacarito, sabab
amboko urang nan suko praktis sajo, (mancubo banyak berbuat ,terhadap segala
sesuatunya/ilmu, daripado baciloteh). Tapi dek nasihaik Buya Suheimi (ambo
sabuik buya dek komitmen Baliau ka Tuhan malabihi profesi sbg dr.) pado ukatu
kopi darek/silaturrahim nan lalu di Kualalumpur, ambo cubo manulih
pengalaman/kisah benar ko. Itupun dek ambo sadang sakik (asam urat lah kumat
lo) Gout kecek urang, jadi lai sadang di rumah sajo.
Diawali kutiko pulang kampuang babarapo tahun nan lalu, dek ado alek anak/cucu
Mamak Rajo, kami lai pulang sakaluarga dari subarang(Malaysia). Wakatu itu yo
sasudah Hari Rayo, sambia pulang Rayo sakali.
Sahari sabalun alek, dek ambo lai mambaok Bendi Tuo (ko maambiak istilah Da
Jepe)nan memang tasadiao di Pakanbaru nan dibali untuak kaparaluan urang Gaek
disinan dan untuak awak sakali2 pulang, Mamak mamintak ka ambo untuak maantakan
Baliau ka Pasa,
"Pai maambiak dagiang nan alah bapasan"kecek Liau tu.
"Jadih Mak", nan baleh ambo ka Mamak Rajo tu nan lah baumua ko, lah 80 thn
agaknyo.
Sadang kami barancana tu, datang pulo anak Mamak Datuak nan lain, babarapo
tahun diateh ambo,
"Soto den ciek poi manjopuik dagiang tu sanak" keceknyo ka ambo dek lai
tadanga dek inyo ciloteh kami..
"Jadih molah kito poi"jawaik ambo pulo. Mako basiap-siaplah kami sudahtu.
Disapanjang jalan bacuritolah anak Mamak Datuak nan lain ko,
"Ondeh iyo paik iduik di kampuang ko, lai dicubo bausaho ajak urang, indak ado
hasilnyo doh, lah dicubo bataranak ayam, abih dek ayam sajo pitihnyo, olun kok
timbua ayam abih sakik kasadonyo, dicubo pulo batobek, ikan banyak nan hilang,
ndeh iyo sabana padiah" keluhnyo sapanjang jalan.
"Cubolah kanda mamintak ka nan Kayo, nan manjadikan diri awakko jo sagalo
rasoki nan ka diagiahnyo, sumbayang baa?, basidakah baa pulo, jo amal-amal nan
lainnyo, "Ambo cubo maagiah nasihaik.
"Kok amal tu yo labiah kurangnyo, kadang-kadang lai" keceknyo.
"Sabab nan Rasaki ko yo hak mutlak Allah sabananyo, kok indak nan karasaki,
nasi dimulik pun bisa kalua baliak"Sambuang ambo.
"Kok pitih iyo indak ado kini lai" keceknyo maibo baliak.
"Eiit... jan disabuik indak ado pitih, beko iyo bona hilang nyo"garah ambo ka
inyo pulo.
"Iyo bona indak ado "keceknyo juo.
Nan mamak Rajo ko mungkin dek duduak di bulakang yo mandanga sajo ciloteh kami
baduo, dek anak Mamak Datuak nan lain ko duduak disubalah ambo nan manjadi
kusia.
Mungkin liau tu sadang mauji kami baduo tarutamo ambo nan kamanakan kontannyo.
Dek lamak maota, akhianyo tibolah kami di Pasa tu. Nan Mamak Rajo ko yo cigin
sajo nyo ka dalam pasa,
"Den Poi maambiak dagiang sabonta, nantilah dek kalian disiko dih"kecek baliau
sambia kalua jo bajalan.
Duduaklah kami baduo di dalam bendi tu, dan basambuang ota baliak.
Sadang lamak maota lah taraso kasungai/sak pipis ambo.
"Ka Musajik awak sabanta Da, ko tasasak mah"kecek ambo dek lai mancaliak
Musajik/Mushola dakek situ, nan anggapan ambo, biasonyo wc lai barasiah.
Kironyo Musajik ko bakunci pulo, mailak lah kami kadalam pasa ka wc nan lai
babayia dan lai barasiah dan ado ayianyo.
Kalua dari sinan kami babaliak ka bendi nan sadang parkir, duduaklah kami
baliak didalam sambia manyambuang ciloteh jo ota tadi. Tibo-tibo tapakiak anak
Mamak Datuak nan lain tadi,
"Ondeh olah hilang nyo!, mati den!, dak dapek aka lai!," Nan pakiaknyo
baulang-ulang.
"Apo tu Kanda nan bajadi bona pokiak tu, kanai gigik lipan?" Tanyo ambo indak
tau.
"Pitih! Pitih lah hilang! Dalam saku-saku sarowa ko tadi ha! Keceknyo panuah
emosi.
"Batananglah dulu Kanda, tapi tadi manyabuik indak bapitih doh, kok salah
latak, atau kok lai jatuah diateh bendi ko"baleh ambo tanang.
"Indak ! Lah Joleh disaku muko subalah kida ko cako! Baguluang bakobek jo
kojai, Limo juta!" nan keceknyo samakin paniang.
"Indak baitu doh, kok iyo indak ado siko kito cari ditampek kito bajalan ka wc
tadi, kok lai rasaki awak indak kama tu doh"ambo cubo mananangkannyo.
Mako bajalanlah kami manyalusuri jalan nan kami tampuah tadi, ka Musajik, ka wc
baulang-ulang sambia batanyo ka urang pasa kok lai ado nan nampak.
Sampai lah pueh rasonyo mancari jo batanyo jo urang pasa akhianyo ambo cubo
sakali lai mananangkan sanak tadi tu.
"Kanda istirahatlah kito daulu, kok rasaki indak kama tu doh, atau kok lai ka
diganti dek Tuhan nan labiah elok" kecek ambo lunak.
"Mailah kito ka kadai lontong tu minum ayia, sambia istirahat sabanta sambia
manunggu Mamak Rajo" tambah ambo.
Sampai sajo di kadai lontong tu, kami pasanlah teh manih duo, jo lontong
sapiriang surang. Sambia manyadiokan lontong, Uni Lontong tu batanyo,
"Manga adiak bakuliliang, baputa-puta tadi?" Tanyo Uni tu lunak
"Apo mah Ni, Pitih Uda ko hilang, tacicia mungkin tadi" langsuang ambo jujur
manjawek.
Sekonyong-konyong langsuang Uni Lontong tu maambiak sasuatu diateh piriang
lontong nan basusun di ateh etalase sambia mangecek,
"Iko inyo ndak? pitih nan bacari tu?!" kecek Uni tu lunak juo.
Ambo taruih maambiak pitih nan dilatakan uni tu diateh meja dan maagiah ka
sanak ambo tadi, alun sempat ambo mangecek, manyalo Uni Lontong tadi,
"Etonglah daulu kok kurang bagai"
"Ndeeh ! Indak parolu doh Ni, ajak itu juo kobek kojainyo nyo!" Kecek sanak
ambo tadi sanang.
"Tarimo kasih banyak Ni,"ambo manimpali.
Akhianyo kami tambah pasan lontong, bungkuih agak sapuluah lai sabagai tando
tarimo kasih.
Lah salasai makan lontong kami ka pai lai, ambo bisiakkan ka sanak ambo tadi,
"Agiahlah Uni tu pitih agak saketek"
Lai diambiak dek sanakko duo ratuih ribu, disuruahnyo ambo maagiahkan.
Ambo agiah lah ka Uni tu pitih tu sabagai raso tarimo kasih, tapi langsuang
ditulak dek Uni tu sambia mengecek lunak,
"Ondeeh ! Diak! Rusak ke -ikhlasan Uni beko, bialah Tuhan sajo nan ka
mambalehnyo"
Asli tamanuang kami mandanga jawaban dari Uni tu nan indak disangko-sangko.
Lamo kami baru bisa mengecek,
"Kalau baitu Ni, anggaplah kitoko badunsanak, kok ado Uni nan paralu dari kami
agiah taulah yo!" kecek ambo sambia kaheran-heranan juo.
Sudahtu kami batuka-tuka alamat jo no hp.
Peristiwako yo bana bakesan ka diri ambo jo sanak ambo tu, dan mulailah
basangko baiak kapado Qodho' dan Qadar Tuhan.
Mamak Rajo pun tibo, kamipun pulang ka kampuang dari Pasa mambaok dagiang
untuak alek anak cucu Mamak Rajo ko dengan sebuah pengajaran nan lua biaso.
Sakitu nan lai takana dek ambo manulihkannyo, sasuai jo pasan Buya Suheimi.
Wassalamualaikum,
alhaqirwalfaqir,
anwarjambak42-,KL
New Email addresses available on Yahoo!
Get the Email name you've always wanted on the new @ymail and @rocketmail.
Hurry before someone else does!
http://mail.promotions.yahoo.com/newdomains/aa/
--
.
Posting yg berasal dari Palanta RantauNet ini, jika dipublikasikan ditempat
lain wajib mencantumkan sumbernya: ~dari Palanta r...@ntaunet
http://groups.google.com/group/RantauNet/~
===========================================================
UNTUK DIPERHATIKAN, melanggar akan dimoderasi:
- DILARANG:
1. Email besar dari 200KB;
2. Email attachment, tawarkan disini & kirim melalui jalur pribadi;
3. One Liner.
- Anggota WAJIB mematuhi peraturan serta mengirim biodata! Lihat di:
http://groups.google.com/group/RantauNet/web/peraturan-rantaunet
- Tulis Nama, Umur & Lokasi pada setiap posting
- Hapus footer & seluruh bagian tdk perlu dalam melakukan reply
- Untuk topik/subjek baru buat email baru, tidak dengan mereply email lama
===========================================================
Berhenti, bergabung kembali serta ingin merubah konfigurasi/settingan
keanggotaan di: http://groups.google.com/group/RantauNet/subscribe
