Jadi sampai kini alun juo bundo basuo dialam nyata jo Jepe ko bundo ka
Pakanbaru nyo pai kaladang karimbo. Mohon maaf karano ari dek bundo liur
taruih lupo ka urang nan bakarajo. Dari carito Jepe ko nampaknyo si Rina ko
indak sakampuang jo Sabai Nan Aluih. So'alnyo si Sabai dapek tulang-tulangnyo
dan Mangkutak dapek dagiang2 jadi Mangkutak Jepe nampaknyo dapek tulang-tulang
sakali nangko.
Wassalam bundo
Nismah Rumzy (71+)
________________________________
From: Jupardi <jupa...@anugrah-mgt.biz>
To: RantauNet@googlegroups.com
Sent: Sat, February 6, 2010 9:55:26 AM
Subject: [...@ntau-net] "Jepe ..Barasian lo waang liak mah".... By : Jepe
“Jepe ..Barasian lo waang liak mah”
(Humor Ringan Kuliner)
By : Jepe
Yo angek ati ambo, ibu mudo baranak duo nan basuami urang jawo nan marantau di
Batam tan sia lai kok ndak si Rina Permadi, kanai hawo bana ambo jo kuliner
pusako kampuangnyo Tilatang Kamang nan banamo “Ayam Patah Lado Mudo” biasonyo
hidangan ko dikatangahkan acara induak-induak manganduang tujuah bulan di
kampuangnyo. Yo sabana dihawo bana ambo co carito dan kodak masakan ko di efbe
ambo, ampun ..!!! mangaranyam lansuang “los lambuang” ambo deknyo
Nan sadiahnyo di acara manujuah bulan jo samba ayam patah lado mudo tu, indak
buliah lo kaum laki-laki ka tangah manyantuang jamba ko, kecek si Rina hanyo
induak-induak sajo nan duduak marapek diacara tu katiko makan jo pusako kuliner
kampuangnyo,
Nan si Jepe mancaraguik tagak di janjang rumah gadang manonton si Rina jo
induak-induak ko sambia maota lamak manyantuang ayam patah lado mudo nan
rasonyo mambuek jakun-jakun si Jepe naik turun dengan gerakan beraturan,
manggarumeh si Jepe mancaliak induak-induak ko bajadi-jadi makan siang diateh
rumah gadang acara manujuah bulanan ko. Caliaklah si Rina sambia inyo jujuik
juo dagiang ayam ko inyo lirik juo si Jepe (nyam..nyam..wek..wekkk keceknyo
mahawo si Jepe nan cigin tagak dijanjang rumah gadang, yo santiang bana
kamanakan, padohal nan di “wek” kannyo tu mamaknyo)
Si Jepe nampaknyo masih saba sajo, urek malunyo masih kuek, tatap tagak
manunggu dijanjang rumah gadang sambia manunggu induak-induak ko salasai makan
, iyo baharok kok lai ndak cangok bana induak-induak nan makan basamo tu tantu
lai ado siso ayam ko untuak si Jepe mamak rumah kaum ibu si Rina. Lah panek
tagak si Jepe dek agak lamo manunggu induak-induak ko, biasolah nan makan lah
salasai, ota ko nan indak tangguang dek induak-induak ko, apo sajo carito jo
kajadian nan angek dikampuang di otakannyo juo, lah jaleh “pungguang sabuik tu
bungkuak” dibahas juo batele-tele dek induak-induak ko.
Datang siRrina mancaliak Mak Jepe nan sadang manciraguik manahan lapa ka
janjang rumah gadang
“Mak..Mak..saba santa lu yo..lai..batinggaan dek Mamak Ayam Patah Lado Mudo tu,
santa lai kami bubar, pai sajo ka dapua disinan sajo mamak makan, sagan awak
nampak dek induak-induak nan lain ambo punyo Mamak gadang salero bana” (hiksss)
Induak-induak lah maicia ciek-ciek dari rumah gadang, acara lah salasai, si
Jepe gadang sakali atinyo, sabalun sampai dijanjang rumah gadang induak-induak
ko turun, si Jepe inyo irik langkahe kadapua pai makan siang jo Ayam patah lado
mudo nan disisokan si Rina dalam piriang, disanduak nasi sapiriang
balambuang..tibo ka di kinyam samba pusako ko
:”Oiiii..jepe..jepe..jago..jago lai..lah subuah hari ko, barasian lo waang
baliak yo”
Si Jepe tagalencek dari dipan dijagokan si Dirih sambia mangalatiakan aia
wuduaknyo nan tasiso ditangan ka muko si Jepe. Di gosoknyo mato dek si Jepe,
dicubiknyo langannyo “ ooo yai yai..barasian waden mah kironyo lalok (si Jepe
mambathin)
“Kalera waang Dirih, alun sempat waden mangicok Ayam Patah Lado Mudo tu, lah
waang jagokan waden., .tunggu dulu waden salasai makan jo ayam patah lado mudo
tu baanyo” Jepe marabo mahariak si Dirih nan manjagokannyo untuak sumbayang
subuah
Si Dirih galak takokah-kokah mancaliak si Jepe nan tagantuang barasian makan
lamak jo masakan pusako ranah minang kampuang si Rina
“Oiii Jepe, patuik lah den caliak katiko waden tasintak ka Sumbayang subuah
manjalang pai ambiak wuduak, muluik waang manitiak aia liua, tu jakun-jakun
waang naik turun, sempat waang manggigau barasian tu, waden tokok waang jo
tangkai sapu…ha..ha Pissss Jepe, tagak lah lai..cuci muko ambiak Wuduak
sumbayang subuah kito lai” Kecek si Dirh
Oke lah kalo begitu Dirih…Pisss Bro
Kota Pinang, 6 Pebruari 2009
Lagi tertahan disini, belum bisa pulang menemuai keluarga tercinta di Pekanbaru
--
.
Posting yg berasal dari Palanta RantauNet ini, jika dipublikasikan ditempat
lain wajib mencantumkan sumbernya: ~dari Palanta r...@ntaunet
http://groups.google.com/group/RantauNet/~
===========================================================
UNTUK DIPERHATIKAN, melanggar akan dimoderasi:
- DILARANG:
1. Email besar dari 200KB;
2. Email attachment, tawarkan disini & kirim melalui jalur pribadi;
3. One Liner.
- Anggota WAJIB mematuhi peraturan serta mengirim biodata! Lihat di:
http://groups.google.com/group/RantauNet/web/peraturan-rantaunet
- Tulis Nama, Umur & Lokasi pada setiap posting
- Hapus footer & seluruh bagian tdk perlu dalam melakukan reply
- Untuk topik/subjek baru buat email baru, tidak dengan mereply email lama
===========================================================
Berhenti, bergabung kembali serta ingin merubah konfigurasi/settingan
keanggotaan di: http://groups.google.com/group/RantauNet/subscribe
