Andiko, Sanak Suryadi dan sanak Palanta, iko kucindan minang ambo arsip lamo, tapi versi baru, untuak ka dikulek2 diakhir pakan ko
Salamaik mambaco semoga berkenan, kok ado namo nan samo jo pelaku kucindan ko hanyo kebetulan belaka Wass-Jepe ##### "MANGAPIK KAPALO HARIMAU" By : Jepe Katiko jam istirahat karajo di kantua Camaik, si Dirih jo Tan Baro salasai makan di lapau si Lena, baliak ka kantua, dek kanai razia petugas PP (Pamong Praja) main domino jam karajo di lapau si Lena iyo indak talok lai dek si Dirih jo Tan Baro mangkia dari jam karajo, inyolah kanai peringatan partamo dek Pak Camaik, lah meneken surek pernyataan lo indak kababuek cando itu lai. Sabananyo Pak Camaik lah maagiah paringatan kareh secaro lisan ka si Dirih jo Tan Baro, katiko Pak Camaik sadang batugeh mandata panduduak nan kadapek BLT (Bantuan Tunai Lansung) nan di canangkan pemerintah sahubungan ka naiknyo BBM, Pak Camaik mamarogok lansuang si Dirih jo Tan baro main Domino di lapau si Lena katiko jam karajo Sambia manunggu jam karajo siang baliak pukua satangah duo , Dirih jo Tan Baro maota di meja karajo si Gadih nan sadang mampeloi mukonyo jo badak sambia manggincu bibianyo jo lepongsitik. Ota ko di bukak deh si Dirih “Oi Gadih alah tu babadak juo, lah kamek mah Uda caliak” sapo si Dirih ka si Gadih “Eh…da Dirih jo Tan Baro..apo kaba da” si Gadih agak takajuik dek sibuk mamencong-mencongkan bibianyo katiko malepoh lepongsitik nan bawarna sirah pakek. “Gadih kan lai tahukan jo kawan Gadih si Pudin nan samo-samo luluih jadi PNS ampek tahun lalu, kini inyo batugeh di Kantua Bupati” solo si Tan Baro “Ooo si Pudin baa lo ndak kenal jo ambo Da, kawan samo kuliah dulu jo ambo di APDN Jati Nangor-Sumedang, baa inyo Da Tan Baro” “Nan si Pudin kawan Gadih tu kini di Kantua Bupati yo capek bana naik karirnyo Uda caliak, lah mamaciknyo tu ditampek nan “basah” lo posisinyo di Kantua Bupati” Tan Baro mangabakan baa kini si Pudin kawan si Gadih nan bakarajo di Kantua Bupati. Alun sampaik si Gadih manyambuang kecek Tan Baro, si Dirih lah manyolo lo, saroman urang binguang batanyo apo makasuik tampek nan “basah” ko, padohal inyo lah jaleh apo nan dimukasuik bakarajo di tampek nan basah ko, atau bisa jadi si Dirih salamo ko agak frustasi dek bakucatak sajo di tampek nan “kariang” manjadi pagawai di kantua camaik, maklumlah hari-harinyo si Dirih tukang buek surek se karajonyo. “Tampek nan “basah ‘ ko baa makasuiknyo Tan Baro ?” Si Dirih mancubo mamanciang si Tan Baro sambia galak ketek batanyo “Waang saruman indak tahu lo, dari jaman saisuk katiko Apak awak jadi Pagawai, istilah ko indak asiang lai…bantuak itu kan Lena” Jawek Tan Baro “Iyo Da Tan Baro, lah kuro-kuro dalam parahu lo nampaknyo da Dirih” si Gadih mambaleh tanyo Tan baro sambia maatur keceknyo, takuik beko baleyak liak lepongsitiknyo kok mangecek bajadi-jadi bana “He..he…ko kecek bagarah sajo, kan indak ka mambayia bana ambo jiko batanyo bantuak itu, yo jalehkan bana dek Tan Baro apo makasuik tampek nan “basah” ko bakarajo” lanjuik si Dirih “Bantuak iko se lah panjalasan ambo Dirih, kok Waang taragak bakarajo di tampek nan basah bisuak pagi Waang baok baskom nan gadang ka kantua…..” “Apo lo hubungannyo Baskom jo tampek nan basah Tan Baro ?! “ si Dirih mamotong kecek Tan Baro “Ang simak lu kecek den sampai abih, tibo dikantua baskom tadi waang isi aia jaan panuah bana latakan di meja karajo waang, sudah tu Waang bae duduak di sinan sambia mangetik surek di muko komputer. Mulai dari pagi sampai jam pulang kantua” Si Tan Baro manjalehkannyo ka si Dirih “Ha..ha..ha..batua bana Da Tan Baro…lah tapek mah kok taragak Da Dirih karajo di tampek nan basah, manjalang ka pulang kok lansuang mandi jo aia nan di baskom tu, lah basah bana Da Dirih tu” Gurau si Gadih Dirih ndak dapek kecek lai, lah saroman lo cando inyo bamain domino lah” balak anam” inyo bana nan takapik, manunggu etongan sajo lai dek gurau urang baduo ko. “Gadih danga lo Da Dirih, nan si Pudin tu kecek urang capek naik karirnyo tu diposisi basah lo…bajaleh se lah awak lain arati “basah” ko baa kecek urang banyak can kepeang, tu urang banyak maistilahkan PM nan kapanjangannyo Pitih Masuak” “Gadih..Gadih abeh juo dek Gadih yo istilah urang pasa kini” si Dirih manyolo “Jadi Da, urang manyabuiknyo si Pudin tu dek karirnyo mambubuang, iko Gadih mandanga kecek urang lo nyo Da “si Pudin Mangapik Kapalo Harimau” “Haahh..tadi baok baskom karajo Waden disuruah si Tan Baro bia basah, apo si Pudin tu mangapik-ngapik kapalo harimau paikarajo ka kantua Bupati, apolo tu makasuiknyo, kok itu yo indak mangarati ambo mah, ah tu mukasuiknyo Tan Baro ? Si Dirih iyo indak manyambuang jo kalimaik nan basayok ko “Mangapik Kapalo Harimau” “Dirih..Dirih..iyo lah lamah bana Waang manjadi “Urang Minang” kok badomino yo den akui putuih paretongan dek Waang, Waang tahu kan jo Inyiak Balang tu, baa kiro-kiro Waang Kapik Inyiak Balang katiko hari Pakan Waang baok Inyiak Balang bajalan-jalan di Pakan nan Rami..apo nan tajadi..cubo lah jawek tanyo den tu dulu “ Si Tan Baro mauji kincia2 si Dirih nan agak lamah jo kato-kato malereang urang Minang. “Tantunyo , urang rami nan di Pakan tu tabang hambua dek takuik, lari tabirik-birik mancaliak Inyiak Balang ko” jawek si Dirih “Kiro-kiro bantuak itulah artinyo, jaleh kan Gadih, apo mukasuik “Mangapik Kapalo Harimau” tu..kan Gadih nan punyo istilah tadi baa kok malambuang karir si Pudin bakarajo di Kantua Bupati” “Da Dirih. aratinyo “Mangapik Kapalo Harimau” tu, si Pudin …..tapi kok kecek urang Da, indak kecek Gadih do yo, Si Pudin tu punyo beking, urang kuek istilahnyo, dunsanaknyo banyak manjadi “Urang Hebat” di Pamarintahan jo Militer di Nagari awak ko, tapi si Pudin tu manuruik Gadih nan utaknyo yo lo santiang lo, lulusan 10 terbaik di APDN katiko kami samo-samo kuliah dulu” Si Gadih manjalehkan kato basayok ko “Lah jaleh tu Dirih apo nan dimukasuik “Mangapik Kapalo Harimau” si Tan Baro manguekan apo nan di jalehkan si Gadih “Oooo..co itu mah aratinyo, kalau bantuak itu, Gadih punyo “Kapalo Harimau” ndak untuak ka Uda Kapik, bia capek lo maju karir Da Dirih, caliak dek Gadih ha, paruik Uda nan Buncik ko capek bana maju dari pado karir’ Gurau si Dirih sambia mambusuangkan paruiknyo nan buncik ka si Gadih Si Gadih jo Tan Baro galak kekeh dek gurua si Dirih ko, nan si Gadih lah lupo maatur galaknyo indak inyo pikiakan bana lai ko baleyak lo baliak lepongsitik di bibianyo “Oi Dirih…kapik se lah punyo masiang-masiang..”Kapalo Harimau” lo nan Waang tanyo ka si Gadih tu” Tan Baro mangecek sambia galak juo Nampaknyo si Tan Baro lah mulai lo “baulah” ka si Dirih, nan tadi “balak anam” mandannyo inyo bunuah kini lah inyo sumbek lo “Balak Limo” si Dirih . Yo indak dapek kecek lai si Dirih dek inyo paulahan dek si Gadih jo Tan Baro. “Da..da…Pak Camaik lah masuak itu, pailah ka meja surang-surang lai bakarajo” si Gadih maingekan Si Dirih jo Tan Baro, katiko Pak Camaik masuak kantua lapeh jam istirahat siang. Si Dirih jo Tan Baro lah miirik langkah ka meja karajo masiang-masiang, sambia bajalan baduo si Dirih batanyo ka si Tan Baro” “Tan Baro..apo mukasuik Waang mangecek “kapik se lah punyo surang-surang” ka Waang bunuah lo “Balak Ampek” den lai, marasai bana Waden mah, Waang tu Mandan Waden atau lawan Den, si Dirih lah mulai cadiak mangecek jo kato2 basayok. Tan Baro indak inyo jawek lai kecek si Dirih, galak ketek se lai, inyo jadi ingek katiko main domino acok salah paretongan nan mambuek si Tan Baro kanai sangak. **** Pekanbaru, 20 Mei 2008 Sent from my BlackBerry® smartphone from Sinyal Bagus XL, Nyambung Teruuusss...! -- . Posting yg berasal dari Palanta RantauNet ini, jika dipublikasikan ditempat lain wajib mencantumkan sumbernya: ~dari Palanta r...@ntaunet http://groups.google.com/group/RantauNet/~ =========================================================== UNTUK DIPERHATIKAN, melanggar akan dimoderasi: - DILARANG: 1. Email besar dari 200KB; 2. Email attachment, tawarkan disini & kirim melalui jalur pribadi; 3. One Liner. - Anggota WAJIB mematuhi peraturan serta mengirim biodata! Lihat di: http://groups.google.com/group/RantauNet/web/peraturan-rantaunet - Tulis Nama, Umur & Lokasi pada setiap posting - Hapus footer & seluruh bagian tdk perlu dalam melakukan reply - Untuk topik/subjek baru buat email baru, tidak dengan mereply email lama =========================================================== Berhenti, bergabung kembali serta ingin merubah konfigurasi/settingan keanggotaan di: http://groups.google.com/group/RantauNet/subscribe