Assalaamu'alaikum wa rahmatullaahi wa barakaatuhu
Ka panjawab tanyo Tan Ameh ko takana di ambo pangajian Buya Abidin di Musajik
Gurun (nan alah lamo sangaik indak tadanga lai) sarupo di bawah ko......
PANGAJIAN DI MUSAJIK GURUN (13)
ADAIK BASANDI SYARA’
Sakaliko tibo juo pangajian di musajik Gurun di urusan nan agak barek. Nan
manyangkuik pakaro adaik sarato kaduduk-anno jo agamo Islam. Mulo-mulo
pangajianko mambahas hubungan anak jo urang tuo tapi bakasudahan jo diskusi
barek nan cukuik heboh tantang hubungan adaik jo agamo.
Mangko pulo sabagian dari isi kaji baliau tu.
‘Tuhan Allah mamarentahkan awak untuak babuek baiak ka kaduo urang tuo. Firman
Allah dalam surek Luqman, surek ka 31 ayat 14 nan babunyi, ‘Wa washshaynal
insaana bi waalidayHi, hamalatHu ummuHuu waHnan ‘alaa waHnin wa fishaaluHuu fii
‘aamayni anisykurlii wa liwaalidaika…. Nan aratino,‘Dan Kami wasiatkan kapado
manusia untuak babuek baiak kapado kaduo urang tuono. Ibuno manganduangno dalam
kaadaan latiah batambah latiah. Sudahtu manyapiah (baranti manyusuan) sasudah
duo taun. Basyukurlah kapado Aku dan kapado kaduo urang tuo kalian…..’
Wajib hukumno awak babuek baiak ka urang tuo awak. Dan labiah utamu pulo lai ka
ibu awak. Nan alah manganduang awak sambilan bulan sapuluah hari. Jo kaadaan
payah batambah payah. Kan alah samo nampak di awak bara barekno katiko surang
ibu sadang manganduang. Bamacam-macam pandaritaan nan diadok-ino.
Kadang-kadang makan ndak amuah, minun ndak amuah. Tiok sabanta muntah. Batambah
gadang paruik batambah barek baban. Datanglo ari katiko anak ka laia. Kalua
anak dari paruik manimbua-an raso sakik pulo ka bakeh ibu. Sudah itu
disusuanno. Malam dijago jaan sampai rangik sikua sampai manggigik.
Batanggangno manjagoi anak nan baru laia nan alun pandai manga-manga tu. Itu
pulolah sababno katiko ado nan batanyo ka Rasulullah, ka sia horomaik sarato
takzim nan paliang utamu disampai-an, mako jawek baliau, ka ibu angkau. Sudah
itu ka sia lai ? Ka ibu angkau, jawek baliau. Sudah itu ka sia lai ? Ka ibu
angkau, jawek baliau. Sudah itu ka sia lai ? Ka ayah
angkau, jawek baliau. Tigo kali ka ibu baru ka ayah, sarupo itu nan
disampai-an Rasulullah.
Di ayat nan lain, di surek Al Israa’ surek 17 ayat disampaikan pulo dek Tuhan
Allah sarupo iko aratino; ‘Dan Tuhan kalian alah mamarintahkan jaan kalian
manyambah salain ka No (salain Allah), sarato handaklah babuek baiak kapado
kaduo ibu bapak . Kalau salah surang atau kaduono alah lanjuik umua jaan
sakali-kali kalian mangecek-an ‘ah’ kapado mareka. Jaan kalian hariak mareka.
Mangeceklah kalian jo mareka jo kato-kato nan sopan dan mulia.’
Sarupo itu parintah Tuhan ka awak. Horomaik ka urang gaek. Jaan mandurako.
Jaan manyakik-an hatino, jaan mambuek parangai nan ka manyabab-an ibo hatino.
Sabab kalau dikarajoan nan sarupo itu jadi doso gadangno. Baiak katiko urang
tuo awak masih sehaik, tapi dek awak dikacak langan lah bak langan, diresek
batih lah bak batih, lah taraso santiang awak kini, indak paralu katolongan
urang tuo awak lai, barani awak mandurako. Apotah lai kok nyampang alah
batambah tuo no, alah lamah no baliak dek tuono, awak bukan sajo indak
mampadulian tapi sampai barani mahariak, malukoi parasaanno. Ingek-ingek bana!
Kok nyampang dikarajoan nan sarupo itu bangih gadang Tuhan Allah ka awak.’
Katiko tibo wakatu tanyo jawab, Sutan Bagindo Rajo nan mulo-mulo batanyo.
‘Nabi manyuruah awak labiah manghoromaik-i ibu. Awak di Minangkabau ko ba suku
jo suku ibu. Dari nan saketekko dapek awak mangecek-an nan bahaso adaik awak
alah sasuai jo agamo, iyo baitu du Buya?’ tanyo baliau.
‘Indak pulo tapek bana sarupo itu hubunganno do. Awak basuku jo suku ibu kan
alah dikarajoan inyiak muyang awak sajak sabalun agamo Islam masuak kamari.
Tapi kalau kudian awak maraso caro kakarabatan nan sarupo awak pakai bak cando
sasuai jo hadits nabi, labiah dakek awak ka ibu daripado ka ayah, itu marupokan
kabatulan nan elok sajo.’
‘Ambo kabatanyo pulo ciek Buya,’ kecek pak Guru Masrul.
‘Laluanlah angku Guru.’
‘Dek alah mampakecek-an pakaro hubungan agamo jo adaik, dek di nagari awak
tasabuik adaik ko basandi syarak, samantaro bak kecek urang pandai ado adaik ko
nan batantangan jo syarak, baa nan sabano du Buya. Ambiak contoh pakaro
panikahan. Sacaro adaik indak buliah urang sasuku kawin. Dima duduakno kaji ko
du Buya?’ tanyo Guru Masrul.
‘Di dalam al Quran, di surek An Nisaa’ ayat 23 Tuhan Allah manjalehan sia-sia
sajo padusi nan indak buliah dinikahi. Sia mareka itu? Nan partamu ibu sandiri.
Nan kaduo anak-anak sandiri. Nan katigo dunsanak kanduang, tamasuak dunsanak
saapak atau dunsanak saibu. Sudah itu dunsanak apak awak. Sudah itu dunsanak
ibu awak. Sampai disiko sangaik jaleh hubungan langsuang awak jo urang-urang
nan indak buliah dinikahi. Sudah itu, anak padusi dari dunsanak awak baiak
dunsanak laki-laki ataupun dunsanak padusi. Sudah itu ibu susu, ibu nan panah
manyusui awak. Sudah itu dunsanak sapasusuan. Sudah itu mintuo awak sandiri.
Sudah itu anak tiri, anak dari binyi awak jo lakino nan daulu. Sudah itu
minantu awak atau binyi anak kanduang awak. Kok misalno anak awak mati, atau
binyino dicarai-anno di anak awak, indak buliah awak mangawini jandono tu do.
Sudah itu mangawini duo urang padusi badunsanak samo-samo dipakai kaduono. Di
ayaik ka 24 ditambah pulo ciek
lai, yoitu padusi nan sadang balaki. Binyi urang, indak buliah dinikahi di
awak. Di lua daripado itu buliah. Itu aturan agamo.
Jadi baa kadudukanno dalam kakarabatan urang Minangkabau nan indak mambuliah-an
kawin sasuku? Manyatoan nan bahaso itu indak buliah jo mangecek-anno haram
hukumno sacaro adat, aa itu salah. Itu kaliru manuruik agamo. Ambo ulang
baliak, manuruik agamo itu salah jo kaliru. Tapi indak katuju di awak
mangarajoanno, aa nan sarupoko buliah-buliah sajo, sabab indak kasadoan nan
buliah dikarajoan tu sasuai di awak untuak mangarajoan. Buliah-buliah sajo awak
mangecek-an pakaro calon pasangan hiduik awak, bagi nan mudo-mudo, di awak iyo
indak katuju urang Cino doh. Atau di awak iyo indak katuju urang bakulik itam
dari Afrika doh. Baa mangko indak katuju? Saribu alasan buliah dibuek dan itu
sah-sah sajo.. Salamo awak indak maharamkan samo sakali. Di awak kok dapek nan
kajadi binyiko iyo urang awak Minangkabauko juo andakno. Lalu bausaho pulo no
untuak mancari dipasakitaran urang awak sajo. Katiko basuo juo no biko jo urang
Cino ka tampek manompangan kasiah, kian
juo ati kanai nan jadi, lalu di kecek-an indak, haram di den ka kawin jo urang
Cino ko. Itu nan indak buliah.
Baitu juo urusan kawin sasuku ko. Awak iyo indak katuju kawin jo urang sasuku
ko doh. Apo alasan no bialah awak sajo nan tau. Tapi jaan dikecek-an haram
hukumno sabab itu indak ado dalam agamo nan sarupo itu doh. Kok tumbuah no, iyo
basuo urang ka tampek manyangkuik-an tali kasiah cako kirono sasuku jo awak.
Ati alah talanjua kanai, lalu indak jadi dek adat maharamkan. Alasan ndak
jadino dek ‘haram’ jano adaik, aa itu kaliru namono.
Baa kiro-kiro, lai jaleh bedono du ndak? Antaro indak katuju lalu indak amuah
mangarajoan jo maindak-an dan mangecek-an itu ‘haram’ hukumno ?’
‘Kalau baitu sacaro agamo, bialah antaro awak sakaum, sapayuang dibawah ciek
pangulu bana asa indak tamasuak nan dijalehan ayat taditu buliah juo du kawin
mangawini Buya?’ tanyo Guru Masrul ciek lai.
‘Manuruik agamo buliah. Indak haram bagai hukumno doh. Tapi sakali lai, jaan
disamoan ‘buliah’ ko jo ‘wajib’. Aa, disinan bedono. Jadi jaan dipasoan buliah
ko manjadi saolah-olah wajib. Dek buliah di agamo, alah pakawin-kawinan sin lah
anak-anak awak walau awak sakaum sakalipun. Padohal di mareka ko ado raso
kaakraban badunsanak. Sainggo indak katuju dino untuak saliang manikah do. Jaan
dipasoan. Di lingkuangan kabanyak-an urang Minang tapaliharo raso ba dunsanak
cako tu sainggo anggan no untuak sampai jatuah ka panikahan kalau alah maraso
sabagai dunsanak ko. Indak buliah pulo dipasoan. Kadang-kadang bahkan jo urang
lain bana, tapi taraso ado tali kaakraban sarupo badunsanak, sainggo indak
tapikia di urang untuak manikah, mako itu kan buliah sajo.’
‘Alun juo jaleh bana lai di ambo do. Jadi walaupun adaik mangecekan kawin
sasuku itu indak buliah samantaro agamo mangecek-an buliah, dapek juo awak
mangecek-an bahaso adaik ko basandi syara’ du Buya?’ tambah Guru Masrul pulo.
‘Kalau di ambo kan alah ambo sampai-an. Saandaino adaik mangecek-an bahaso
kawin sasuku tu ‘haram’ hukumno, mako bararati adaik balawanan jo agamo. Tapi
katiko masyarakaik atau pangulu mangecek-an indak katuju mangarajoan, indak
jadi masalah bagai no do. Akibaikno pulo, saandaino tajadi urang kawin
sapasukuan, sacaro agamo indak ado sangsino. Tapi kalau adaik maagiah sangsi,
indak basangkuik pauik bagai sangsi tu jo agamo lai. Sarupo juo jo carito ado
urang tuo nan maagiah saraik ka anak-anak no. Indak buliah kalian kawin jo
urang nan bukan urang Minang. Baa mangko indak buliah? Saribu satu alasan urang
gaek. Tapi kasudahanno anak cako dapek juo dino aka sainggo jadi juono kawin jo
urang bukan Minang. Nan kecek urang gaekno pulo baranti, jadi anak den. Aa iko
kan kajadi sabuik-an sajo dan indak mungkin pulo kadiparantian anak jadi anak.
Anak ka tatap juo anak. Hanyo ado anak nan kalau alah sarupo itu urang gaek
mangecek-an indak katuju, lai amuah
pulono manyarumpuni, indak katuju pulo dino urang nan bukan Minang tu.’
‘Dialiah pulo kaji buya. Dek awak alah mangecek pakaro adaik Minangkabau jo
agamo Islam. Ado pulo ciek lai urusan nan barek, pakaro mambagi arato warih.
Sabab warih di urang Minang dari mamak turun ka kamanakan, baa pulo duduakno
manuruik agamo manuruik pandangan Buya?’ giliran Sutan Sulaiman pulo batanyo.
‘Ambo pelok-i dulu saketek bahaso di urang Minang ado duo macam arato pusako.
Pusako tinggi, nan turun malalui urang-urang padusi, jadi bukan dari mamak
turun ka kamanakan. Dari nenek awak, ka biyai awak, ka dunsanak padusi awak
sudah itu ka kamanakan padusi. Biasono arato sawah ladang tamasuak rumah
gadang. Sudah itu ado nan disabuik sabagai pusako randah, hasia usaho urang tuo
nan diturunkan ayah ka anak-anakno.
Nanpartamu, nan disabuik pusako tinggi, memang iyo alah salah caro mawarihan
kalau dicaliak sacaro syara’, tapi indak pulo amuah dipaelok-i lai. Baa mangko
dikecek-an indak amuah dipelok-i lai. Arato barupo sawah ladang tu alah indak
tau awak lai sia dauluno bana nan mambuek, nan manaruko. Jadi kok kini ka
dibagi sacaro faraidh, sacaro agamo indak pulo mungkin dikarajoan. Sia nan ka
mambagi? Nenek awak bukanlah nan punyo sabab kalau kini baliau nan ka mambagi,
baliau dulu mawarisi indak pulo sacaro faraidh do. Baitu juo amak awak, atau
dunsanak padusi awak. Buliah dikecek-an arato itu indak jaleh bana pamiliakno,
nan mampunyoi hak untuak maitam mamutiahanno. Dunsanak padusi awak hanyolah
sakadar manarimo padi pulang, mamasuak-an ka dalam kapuak, mangaluaanno untuak
ka dimakan. Atau manjua hasia padino sakiro kaparalu. Indak bagai dapek di no
manjua kalau no ingin nak manjua sawah atau tanah tu. Ikolah bukti bahaso
kapamilikanno tu sakadar ka tando
sajo lai. Kapamilikan sarupo itu saroman jo kapamilikan gunuang Marapi atau
danau Maninjau. Sia nan sabana pamiliak gunuang Marapi atau danau? Indak dapek
awak manyabuik. Kalau hasiano pagunoanlah. Hasia sawahno makanlah, sarupo awak
buliah pulo mamakan ikan nan dijalo di danau. Tapi nan danau indak buliah awak
jua. Jadi sarupo itulah kadudukan pusako tinggi tu. Baitu pamahaman ambo.
Wallahu a’lam.
Namun baitu ado juo buliahno sawah ladang tu dijua kalau alah tasasak bana
sapanjang adaik. Pabilo gadih gadang alun balaki, atau rumah gadang katirihan,
atau mayik tabujua ateh rumah. Aratino kalau alah sabana tasasak parang ka
rimbo barulah buliah arato pusako tinggi tu di jua. Jo samupakaik niniak mamak
nan ka manjua. Iyo pulo ado sajo urang nan alah manjua sawah. Disiko nan paralu
bana awak pajaleh kaji. Kalau aratotu alah dijua, bagi nan mambali sawah tu
samustino manjadi pusako randah no lai. Sabab kini kapamiliakanno alah jaleh.
Nan mambalino alah jaleh, mako katiko ka diwarihan, warihno musti malalui anak
lai. Baa kiro-kiro, lai jaleh dek Sutan Sulaiman?’
‘Jadi kalau baitu apokoh bisa awak mangecek-an bahaso kapamiliakan pusako
tinggi tu indak jaleh sainggo syubahat hukumno kok ka dimakan Buya?’
‘Kalau di ambo indak sarupo itu bana do. Indak amuah ambo mangecek-an arato tu
syubahat. Hasiano buliah awak makan sarupo awak mamakan hasia danau. Iko
pandapek ambo paribadi. Sabab saandaino ka dicampak-an bagai arato tu indak lo
ka mungkin do. Ka diwarihan di awak indak mungkin sabab bukan awak nan sabana
pamiliak. Jadi ka dipangaan lai? Ka dicampak-an baa pulo ka manyampak-an sawah?’
‘Saandaino nenek awak amuah mangarajoan mambagi sacaro faraidh, sah indak du
pambagian tu Buya?’ tanyo Guru Masrul pulo.
‘Baa jano baliau mambagi? Dibagi ka anak-anak baliau sajo?’
‘Kecek-an sarupo itu Buya. Lai sah no du?’
‘Indak juo tapek. Kalau baliau ba dunsanak laki-laki, tantu mustino baliau bagi
jo dunsanak laki-laki baliau dulu. Tapi itu pulo baliak. Baa mangko kini baru
ka dibagi di antaro baliau ba dunsanak sajo. Kan labiah elok pulo, baliau
caliak pulo ka ateh, ka dunsanak dari amak baliau, baiak nan laki-laki atau nan
padusi. Baitu sataruihno kaateh. Indak tau awak dimaa bana asa usuano arato tu
lai. Jadi disinanlah kasulik-anno. Sainggo ambo bakasimpulan, sudah sajolah.
Bia sajolah arato tu disinan, jo caro pambagianno nan sarupo itu kini. Indak
ado nan sabana pamiliak arato adaik tu.’
‘Baa pulo carono kok ado di satu kaum urang tu indak ado nan padusi lai.
Biasono di awak disabuik ‘punah’ dek karano nan tingga laki-laki sajo lai.
Buliah urang laki-laki dari kaluarga nan punahko manjua atau mawarihan ka
anakno Buya?’ tanyo Sutan Sulaiman pulo baliak.
‘Punah ka sakaumanno? Sabana abih indak ado nan padusi lai?’
‘Dalam sakaum atau sapayuang masih ado nan padusi, tapi nan saparuik bana indak
ado lai, Buya.’
‘Iko sabanano alah manyangkuik urusan adaik tu bana gomah. Tapi jadih juolah.
Kalau nan pandapek ambo, ado duo kamungkinan nan dapek dikarajoan dek urang
laki-laki nan ‘punah’ tu. Nan partamu, sabab asa usua arato tinggitu dulu dari
nenek-nenek nan ciek, bialah nak talatak no di ciek tu baliak. Bialah nak
dunsanak sapasukuan, nan padusi nan mauruih no baliak. Sabab ka mambagi ka anak
no, sarupo nan awak kaji sabalunko, urang laki-lakitu bukanlah urang nan punyo.
Atau caro nan kaduo, bamupakaik baliak di dalam kaum, untuak mawaqafkan aratotu
ateh namo inyiak muyang awak nan daulu. Bukan ateh namo urang laki-laki ko
surang. Sakali lai, iko pandapek ambo sajo. Antah batua antah salah wallahu
a’lam.’
Sainggo itu pulo kaji sa sanjo ko.
*****
Wassalamu'alaikum,
Muhammad Dafiq Saib Sutan Lembang Alam
Suku : Koto, Nagari asal : Koto Tuo - Balai Gurah, Bukit Tinggi
Lahir : Zulqaidah 1370H,
Jatibening - Bekasi
________________________________
From: Tasril Moeis <tasrilmo...@banuacitra.com>
To: rantaunet@googlegroups.com
Sent: Wed, March 17, 2010 9:39:38 AM
Subject: Re: [...@ntau-net] kawin batambua jo nikah bawah tangan-kawin
sapasukuan
Angku Ridha, Mak Taufik jo dunsanak sapalanta,
Satantangan kawin batambuah jo nikah siri nan di buliahkan agamo tapi banyak
nan manantang ko takana pulo carito lamo nan lah acok pulo dibahas di palanta
ko yaitu larangan kawin sasuku di adaik awak padahal dalam agamo awak indak ado
larangan alias di buliahkan pulo, iko baa pulo lah caro no.
Apakah awak akan basipaik manduo dalam hal iko??
Wassalam
Tan Ameh (51+)
--
.
Posting yg berasal dari Palanta RantauNet ini, jika dipublikasikan ditempat
lain wajib mencantumkan sumbernya: ~dari Palanta r...@ntaunet
http://groups.google.com/group/RantauNet/~
===========================================================
UNTUK DIPERHATIKAN, melanggar akan dimoderasi:
- DILARANG:
1. Email besar dari 200KB;
2. Email attachment, tawarkan disini & kirim melalui jalur pribadi;
3. One Liner.
- Anggota WAJIB mematuhi peraturan serta mengirim biodata! Lihat di:
http://groups.google.com/group/RantauNet/web/peraturan-rantaunet
- Tulis Nama, Umur & Lokasi pada setiap posting
- Hapus footer & seluruh bagian tdk perlu dalam melakukan reply
- Untuk topik/subjek baru buat email baru, tidak dengan mereply email lama
===========================================================
Berhenti, bergabung kembali serta ingin merubah konfigurasi/settingan
keanggotaan di: http://groups.google.com/group/RantauNet/subscribe
