Sanak palanta Jikolah sanak ado kesempatan malinteh di jalan Juanda Padang, balari-lari ketek bendi nangko. Jalan Juanda dipangkeh dek simpang tigo, sasimpang ka Raden Saleh, sasimpang luruih taruih ka veteran dan disuok ramilah urang di Pasa Pagi. Malakik sampai disimpang tigo nangko, di kida jalan dari arah Pangeran City, sahampia dari Pom Bensin, tagaklah garobak sederhana, basususn langkok sagalo alaik, alaik-alaik untuak minum pagi, katupek pokok galehnyo.
Sanak palanta, batahun bahabih maso, amai ko manungguan galeh, katupek gulai paku jo gulai cubadak, langkok sarato jo katupek mix jo pical. Jo talua abuih bulek ka kawannyo, manyarato goreng sala jo bakwan. Nan saedaran tampek nangko, tampek urang pai minum pagi, mamuta teh talua atau kopi satangah, tapi nan makannyo yo lontong amai nangko. Mulai dari tukang becak, pedagang kaki limo, sampai ka pagawai nagari jo urang nan badasi, singgah di kawasan nangko. Kok katupek amai ko nan ka dibaco, yo katupek gulai paku nan marindu. Susahlah mancari parumpamaan, baa bana raso nan mancugan. Tangiang-ngiang di tanah rantau, bilolah ka babaliak pulang, sangajo maulang mancubo minum pagi teh talu dan katupek amai ko. Sungguahpun iduik bagantuang di garobak katupek nangko, manjadi single parent bahasonyo, tapi disinan kasiah tuhan balaku, disinan kuaso Allah marupo. Jo katupek iduik dihadang, jo itu anak sikolah. Nan sorang alah manjadi guru di Piaman, nan sorang sadang honor di Darmasraya, nan sorang masih sikola, itu curito tadi pagi. Baitu bana tagehnyo amai-amai, perempuan perkasa dari Minangkabau. Baa bana ombak Puruih mahampeh, marentak pulo lauik Rang Piaman, tapi nan awak tetap tagak, tagak tageh demi anak nan alah kehilangan apak. Bialah amai susah, asa iduik anak lai barubah. Baitu bana luhurnyo cito-cito amai nangko. Jikolah sanak balabiah rasaki, mambuek acara barombongan di Pangeran Beach, boronglah katupek amai nangko, suruahlah inyo mandorong garobak ka dalam hotel. Tonggokkan di sampiang meja, jadi bagian dari paket makanan. Sungguah sanak sangaik manolong sambia salero lapeh juo. Salam Andiko Sutan Mancayo -- . Posting yg berasal dari Palanta RantauNet ini, jika dipublikasikan ditempat lain wajib mencantumkan sumbernya: ~dari Palanta r...@ntaunet http://groups.google.com/group/RantauNet/~ =========================================================== UNTUK DIPERHATIKAN, melanggar akan dimoderasi: - DILARANG: 1. Email besar dari 200KB; 2. Email attachment, tawarkan disini & kirim melalui jalur pribadi; 3. One Liner. - Anggota WAJIB mematuhi peraturan serta mengirim biodata! Lihat di: http://groups.google.com/group/RantauNet/web/peraturan-rantaunet - Tulis Nama, Umur & Lokasi pada setiap posting - Hapus footer & seluruh bagian tdk perlu dalam melakukan reply - Untuk topik/subjek baru buat email baru, tidak dengan mereply email lama =========================================================== Berhenti, bergabung kembali serta ingin merubah konfigurasi/settingan keanggotaan di: http://groups.google.com/group/RantauNet/subscribe