Catatan Perjalanan Pulang 1 : Dantiang Deretan Boto Minuman Sanak Palanta
Tinggi kapaknyo si Garudo, tabang manyisia-nyisia awan, taguncang-guncang saisi kapa. Sungguahpun alah di tambah katinggian, ma atok awan siburuang basi, namun nan angin dating mangusau, bagalombang mahampeh badan, abih di lilih dek sayok nan kambang. Kasudahannyo, sapanjang Jakarta-Padang, indak ado nan tanang kappa ko do. Tapi sungguahpun baitu sanak dek Rahman jo Rahimnyo nan satu, salamaik badan sampai di ranah bundo. Hinggoklah buruang dilandasan, basitumpu elok di tampatan, disinan santiangnyo si nan mamacik stiur, alah tapampang Bandara Internasional Minangkabau. Indak lamo sasudah itu, marentak kudo mahelo bendi, bendi manuju ka panginapan. Sajak marentak lauik rang Piaman sanak, banyaklah gaduang sato rarak, rarak baserai ka halaman, nan asanyo pasia kumbali manjadi kasiak, bacarailah dindiang nan jo rangko, nan jariau antah kama, baitu pulo si tonggak tuo, sato di dalamnyo bangunan Hotel. Samanjak marentak lauik rang Piaman, tabanlah Gunuang Tigo, bagaduru datang patolongan, antahko dunsanak dakek dari parantauan, ataukah dunsunak jauah dari banua lain. Mambubuang sakali harago panginapan, bantuaknyo hari rancak kutiko tibo, ari manjalang siang, lado sadang gantuang, disinan makan bana lakek tangan nan punyo galeh, nyo naiakkan harago hotel nan biaso tingga, hinggo indak tajangkau dek dagang kini. Tingga mancaliak-caliak sajo nan nyo bias. Yo bana tagak tali bana nan sorang nangko. Tapi untuanglah sanak, sakali bancano tibo, disinan hikmah jo pintu rasaki tabukak, tingga di kito mama’nai. Etan di daerah Puruih, dimungko SD tapeknyo, tagaklah hotel baru, mewah indak, sederhana talampau, maha indak, murahpun tido, kasinan badan pai manapek. Dek tampek rancak, harago manenggang, banyaklah urang dating singgah, sahinggo jiko sanak ka mancubo, elok di booking dulu malakik ampia. Ndak lamo sasudah itu, taragak pulo kaki nak diayun, maukua jalan dari pasaraya, pai ka Minang, tugu salamaik dating. Di setop angkot nan lalu, nak mancubo pangalaman lamo baliak. Sakatiko angkot baranti, raso ka pacah sagalo cat rononyo, manggaga, sagalo bangku, dek aguang gadang di bangku balakang. Badangkang-dangkang bunyi music, lagu Keong Racun malah ruponyo. Alah manggigia sajo situkang dendang, sato pulo jo lagu Si Ombak Puruih, kama kadicari, suaro si Tiar Ramon, Eli Kasim jo Asben, alah pampeh dimakan zaman, antah ka Musium Adityawarman. Alun salasai duduk di bangku, angkot mahambuah mode tabang, nan sisupir mudo tangguang, darah nan sadang paneh-panehnyo, manggulasau di tangah jalan, buranti sumbarang katuju. Manggigia jantuang dek karanonyo. Dilayangkan pulo pandangan ka bulakang, diateh speaker gadang tatonggok rancak rak fiber. Dia giah pulo aksen cahayo, yo sabana rancak hiasannyo. Tapi bukan itu nan manyangek sanak, di ateh rak nangko, basusun pulo boto minuman, air kata-kata kato urang timur, air api kato Ikang Fauzi. Basusunlah Jhoni Walker jo Vodca, badampingan jo Wine dari Parancih, ikuik manyalo Si Topi Miring. Kutiko rak iko bakawan jo boto minuman, yo raso didalam Diskotik Dangdut awak rasonyo, atau paliang kareh, nan angkot ko, bausaho bana mamindahkan suasana Diskotik Stadium di Daerah Gajah Mada Jakarta. Namun bedanyo sanak, nan iko balanteh angan lalu lalang mambalah kota Padang, kota Tacinto motonyo. Nan Stadium yo tagak sajo didaerah itu, bapiliah bana urang nan datang. Ondeh sanak…..dilapehlah tanyo ka Marapi jo Singgalang, bakalauh kasah ka Tandikek jo Talak Mau. Ambo bana nan jadul atau angkot ko nan sasuai jo salero jaman kini. Jikoklah iko salero di ranah bundo kini, indak ado kato nan bisa mewakili salain “NORAK”. Hoi……ombak Puruih………..manga kok buiah Globalisasi nan diambiak anak nagari, buiah nan rancak sakatiko, mananti abih dilamun ombak. Kok nak tagak manghadang zaman, usah tagak rancak di labuah, usahlah….indak ka cukuik ameh sikundi-kundio, untuak ma ambiak kuliknyo sajo. Oi Talang jo Tandikek, kasia badan ka batenggang, kama badan batanyo kutiko pai, kama badan babarito kutiko pulang. Dimalah kini karih si Ganjo Erah, karih sati pamupuih miang, jo itu bana malu ka di apuih. Baitulah sanak, agak rusak salero babuko, meskipun alah manggalimpang tamusu jo limpo, sato pulo asam padeh lauak ambu-ambu. Ndak taubek dek ayia aka, hati bana nan alah paneh, mancaliak perkembangan salero sebagian dunsanak kito. Malakik tangan di basuah, dilapeh tanyo terakhir ka Gunung Sago. Hai Gunuang, sialah kini nan ka jadi contoh, muluik masin, parentah sati, tampek bacamin badan diri. Jatuah manitiak si ayia mato, takana kasiah niniak jo buya nan lamo. Di Tapi Ombak Puruih, 08 September 2010 Andiko Sutan Mancayo -- . Posting yang berasal dari Palanta RantauNet ini, jika dipublikasikan di tempat lain wajib mencantumkan sumbernya: ~dari Palanta r...@ntaunet http://groups.google.com/group/RantauNet/~ =========================================================== UNTUK DIPERHATIKAN, melanggar akan dimoderasi: - DILARANG: 1. E-mail besar dari 200KB; 2. E-mail attachment, tawarkan di sini dan kirim melalui jalur pribadi; 3. One Liner. - Anggota WAJIB mematuhi peraturan serta mengirim biodata! Lihat di: http://groups.google.com/group/RantauNet/web/peraturan-rantaunet - Tulis Nama, Umur dan Lokasi pada setiap posting - Hapus footer dan seluruh bagian tidak perlu dalam melakukan reply - Untuk topik/subjek baru buat e-mail baru, tidak me-reply e-mail lama dan mengganti subjeknya. =========================================================== Berhenti, bergabung kembali serta ingin mengubah konfigurasi/setting-an keanggotaan di: http://groups.google.com/group/RantauNet/subscribe.