Assalamu'alaikum. w.w. Dunsanak kasadonyo, mari kito taruihkan... sakali lai, sia nan takanai, atau tasingguang ambo pulangkan ka Allah swt. Sarak mangato, Orang-orang yang makan (mengambil) riba tidak dapat berdiri melainkan seperti berdirinya orang yang kemasukan syaitan lantaran (tekanan) penyakit gila. Keadaan mereka yang demikian itu, adalah disebabkan mereka berkata (berpendapat), sesungguhnya jual beli itu sama dengan riba, padahal Allah telah menghalalkan jual beli dan mengharamkan riba. Orang-orang yang telah sampai kepadanya larangan dari Tuhannya, lalu terus berhenti (dari mengambil riba), maka baginya apa yang telah diambilnya dahulu (sebelum datang larangan); dan urusannya (terserah) kepada Allah. Orang yang kembali (mengambil riba), maka orang itu adalah penghuni-penghuni neraka; mereka kekal di dalamnya.(QS:2:275) Adaik ?,.... mamakai ?. Nan lah teradat, urang awak lah banyak nan indak peduli jo urusan riba ko. Dan memang awak lah diguluang-guluang dek fitnah riba ko. (fitnah bahaso Arab, indak fitnah bahaso awak do -red) Ka disimpan pitih surang di rumah, takuik hilang atau masuak urang maliang beko. Kadisimpan di Bank, babungo. Baa lai... ? aaa ... disimpan juo di Bank. Eh, mak Sutan, apo urusan riba ko jo Bank ?. Nak murah mahami nyo co iko, dalam terjemahan Bahaso Inggeris, riba ko disabuik "interest", interest ko bahaso awak nyo bungo. Di Malaysia labiah parah lo lai, bungo diterjemahkan "faedah". Nah, diurusan ko majoriti urang awak ndak peduli, antah kok lah kini-kini ko sajak ado bang muamalat, padahal ancaman nyo narako. Tapi yo bitu lah, system ekonomi kapitalis, dipakai pulo dek awak, ... lah la taguluang-guluang awak dalam fitnah riba ko. Baa ka kalua ?. Dan hasilnyo, rakyaik marasai juo dek bamacam urusan riba ko. (Cubo bayangkan, bukan ambo manuduah. Kito babisiak sajo. Kalau naiak aji 4 tahun lai, dulu pitih 20 juta lah harus di stor ari kini. Lalu dima disimpannyo ?, di Bank muamalat ?, itu baru ado kini, dulu ?, antah kok lai di situ. Kok indak ?, bayangkan bara bungonyo, bilo saribu urang se manyetor. Bungo dulu memang per tahun, kiniko, jo sistem ekonomi kapitalis ko, bungo per bulan, per minggu, per jam, bahkan per detik. Bayangkan bara gadang bungonyo. Iyo bagadang sia nan bakarajo. Ndak ka sato mandaftar?, baa caro naiak aji ?, awak warga negara Indonesia. Kok sato ?, kok iyo takah itu, itu lah samo jo menganjur kan urang babuek maksiat. Aaaii... naiak aji lah badoso dulu. Di Malaysia, maso manunggu iyo 4 tahun juo, tapi pitih ndak di stor ari kini doh. Eh,... mudah2-an lai indak bisiak Sungai Pua ko aah. heboh urang beko).
Ambo, alhamdulillah sajak tahun 2003, ma-apuih sado account bank konvensional ambo, mamindahkannyo ka Bank Muamalat atau Bank Syari'ah, atau Bank Islam. Ado juo nan manyabuik, eh kan samo se tu nyo mak ?. Kecek ambo, hasil bisa samo, tapi "aqad" nyo lain. Dalam Islam aqad ko nan paralu. Dan saindak-indaknyo lah tajawek tanyo nantik, bahaso awak lai bausao menghindari riba ko dengan mencari Bank-bank yang lah mendeklarasikan dirinyo sebagai Bank Muamalat atau Bank Islam atau Bank Syari'ah. Kok nyo pacampua-campuakan pitih tu di dalam atau nyo kicuah awak misalnyo, kito pulang kan ka Allah swt. Riba ko iyo banyak mudharat nyo. Dek riba ko lah urang indak peduli halal haram, dek riba ko urang namuah tipu tepok. Kok kapasa awak, antah lai bara urang nan mang "kir" timbangannyo sarupo nan dilakukan dek Abak ambo dulu. Dan kini Jawatan "Terra" tu lah indak nampak fungsinyo lai do. Padahal Sarak mangato, Dan sempurnakanlah takaran apabila kamu menakar, dan timbanglah dengan neraca yang benar. Itulah yang lebih utama (bagimu) dan lebih baik akibatnya.(Qs:17:35). Jan lupo, sorang Nabi diturunkan Allah khusus untuak urusan timbangan ko. Nan acok basuo di awak, kok dibali barang sakilo, tibo di rumah tingga 7 ons se lai, antah kama tabang nyo. Dek riba ko ekses nyo mambuek rakyat marasai, rentenir menjamur, tukang palak dan urang bagak manjadi banyak. Kecek ambo ka bini ambo, kalau iduik di Padang, jadi pegawai negeri, luruih, kuruih. (Buliah ditanyo ka urang-urang nan jadi pegawai negeri di Padang ko, kok jo gaji nan ado tu, lai katabali oto pribadi tu eh ?, jan kan oto, minyak nyo se indak tabalian doh). Kok ka jadi pedagang, eh, banyak lo urang bagak nyo, Iklim bausao tu nan indak elok. Ndak usah kito sabuik baa mangko Sony mamindahkan perusahannyo ka Vietnam, caliak se lah tampek awak. Rentenir. Nyo baonda, dan biasonyo Urang Sumatera Utara. Nan susahnyo awak, rakyaik badarai antah dek pitih indak ado, baambiak lo barang rentenir tu. Katiko mambianyo, kok lai adoh pitih, babaia, kalau indak, main mancik-mancik-an jo "lai" "lai" dari SU tu. Kebanyakan induak-induak nan manyalang ka rentenir ko nan basuo di ambo di Padang. Rentenir kelas kakap ndak usah kito sabuik. Sia nan tajarek, sansai. Di kampuang rang rumah ambo, babaia jo padi hasil panen, dan harus dijua lo ka inyo dan harago inyo manantukan. Tapi tu lah, susah mereka menghindar. Paralu peran urang gadang-gadang nan mamacik kuaso di siko untuak memberantas. Tukang palak. Dulu katiko sadang menjamur nyo "wartel" sabalun abih dek hp, banyak bana urang nan mambuek wartel ko sampai ka suduik-suduik kampuang. Ciek nan terkesan diambo, satiok wartel tu pasti malatakkan gambar Perwira tentara atau polisi di wartelnyo dan itu bisa dicaliak dek sia sajo nan datang. Gunonyo adolah supayo tukang palak, atau urang bagak indak balanteh angan. Co itu ruponyo iklim usao nan adoh di nagari awak. Carito tukang masak pulo, lapau nasi kalau lah gadang saketek, urang bagak pasti tibo. Uang keamanan. Nan manggaleh tapaso manyadiokan pitih rutin ma-agiah urang-urang tertentu, yakni urang-urang bagak ko, disinyalir kalau ndak pareman, anggota kepolisian atau tentara. Diambo ndak jaleh antah nan ma, kalau pareman, bisa picayo awak, kalau anggota polisi atau tentara, bisa jadi, tapi alun nampak dek mato kapalo ambo lai doh. Tapi nan paralu di siko, urang bagak mempengaruhi perekonomian rakyaik badarai nan sadang bausao (alun PDAM, PLN, CP dan lain-lain lai, antah sia lo mamalak). Tengkulak. Namo kerennyo distributor, harago lado di darek katiko di bali dari petani sangaik murah, tibo di pasa Padang lah malambuang sekian kali lipek. Urang-urang ko main tembak ateh kudo sen. Petani nan panek mananam, dapek labiah sangenek dari jariah, kadang-kadang marugi. Baa lo rakyaik ka maju ?. Nan untuang urang-urang nan jadi distributor tu lah. Jan pulo cubo-cubo jadi distributor ko kok ndak kenal si anu si anu, tibo urang gilo baladiang mandabiah beko. Seharusnyo petani lah nan manantukan harago di pasaran takah di Japang. Di Malaysia kini lah takah itu pulo, harago di ladang jo harago di pasa samo, Iko nan mambuek petani makmur dan rakyaik iduik sanang. Peran pemerintah lah nan manjago ko, mangikih abih tengkulak dan tukang palak, maupun rentenir, mandukuang petani untuak dapek harago nan sasuai. Bahkan di Malysia kontrol terhadap harago bisa dilakukan, sahinggo pembeli pun indak takicuah. Di awak, iko bana nan indak bisa. Baa ekonomi ka maju, dek alah kanai fitnah sistem perekonomian kapitalis. Mungkin iko salah satu nan disabuik dek Nabi saw. "Nanti kamu akan dilanda oleh fitnah yang bergulung-gulung, seperti gelap malam, susah untuk keluar.... ..". (Al hadits) Sistem ekonomi model kapitalis ko iyo indak bisa ditarimo lai do. Nah, apo nan kabisa awak pabuek ?. Jalan satu-satu nyo baliak ka kitabullah, pelajari baa sabananyo sistem ekonomi nan diturunkan dek Allah swt. Sangat disayangkan dunsanak kito nan sadang bakucatak kini di GM untuak SKM atau KKM malandaskan idea perekonomiannyo hanya ka pasal 33 UUD 45, dengan kebanggan nan punyo ide Bung Hatta, lalu dalam pembahasan nyo mengadopsi babarapo teori asing dan urang-urang asing nan kasadonyo tu basumber dari manusia juo. Manga ndak dicubo malandaskan azas perekonomian tu ka Qur-an dan sunnah. (Pak Asmun Syueb, kajian apak mungkin rancak, tapi diurusan ko latak kurang nyo pak dan fatal sabab indak mencerminkan ABS SBK. Dalam koperasi tu ado riba juo tu pak). Cubo digali ilimu nan diturunkan Allah ta'ala ko, sampai kalua sistem perekonomian nan memang sasuai jo Sarak dan diredhai dek Allah swt. (Gagasan Mahathir jo Dinar emas nyo). Apakah namonyo nantik sistem ekonomi ABS SBK atau sistem ekonomi Islam. Memang indak ado satu kitab bantuak kitab Fiqih yang total-total secara gamblang manjalehkan baa sistem perekonomian Islam. Tapi iko justru ujian dan tantangan bagi awak. Cuma ambo pernah mandanga dari pak Miftah Faridl (dulu dosen agama Islam ITB 1979/80) bahaso alah ado nan pernah manyusun dan banamo sitem ekonomi Bani Sadr (Presiden Iran dulu). Apokah kini Iran mamakai sistem tu atau indak, wallahu'alam. Dan iko rancak untuak bahan diskusi bapanjang-panjang di awak, mancari, mempelajari dan mengamalkan baa sabananyo sistem ekonomi nan ado dalam Qur-an secara tersirat yang diredhai Allah swt. Kalau sukses bisa jadi buku pegangan ummat Islam sedunia, .....ndeh bara gadang pahalonyo tu, bisa tajun bebas ka sarugo, Insya Allah, Aaamiiin. Hmmm.... takah kapatang, ciek ayat lah panjang. Banyak maaf. Wabillahil hidayah wat taufiq. Wassalam St. Sinaro -- . * Posting yg berasal dari Palanta RantauNet, dipublikasikan di tempat lain wajib mencantumkan sumber: ~dari Palanta r...@ntaunet http://groups.google.com/group/RantauNet/~ * Isi email, menjadi tanggung jawab pengirim email. =========================================================== UNTUK DIPERHATIKAN, melanggar akan dimoderasi: - DILARANG: 1. E-mail besar dari 200KB; 2. E-mail attachment, tawarkan di sini & kirim melalui jalur pribadi; 3. One Liner. - Anggota WAJIB mematuhi peraturan serta mengirim biodata! Lihat di: http://groups.google.com/group/RantauNet/web/peraturan-rantaunet - Tulis Nama, Umur & Lokasi disetiap posting - Hapus footer & seluruh bagian tdk perlu dlm melakukan reply - Untuk topik/subjek baru buat email baru, tdk mereply email lama & mengganti subjeknya. =========================================================== Berhenti, bergabung kembali, mengubah konfigurasi/setting keanggotaan di: http://groups.google.com/group/RantauNet/subscribe.