Sekedar berbagi carito se da Jepe... Ambo mulai marokok katiko kelas 5 SD sekitar th 1985, katiko masih sanang-sanang nyo baranang jo kawan kawan di Duri... Biasonyo kami pai dari rumah basepeda barami-rami mamba'o nasi nan lah dibungkuih dek rang gaek masiang2. Di tangah jalan kalua iuran untuak mambali rokok. Itu lah awal nyo ambo kenal jo rokok. Biasonyo rokok nan kami isok katiko tu adolah Filtra, Ardath dll... Antah kini merek ko ndak ado lai tadangan, disamping rokok produksi dari gudang garam dan djarum.... Walau mancilok bana marokok ko dari Ibu, namun baliau sabananyo lah tahu... Mungkin dalam pikiran baliau, ambo sadang mancari jati diri... maklum anak laik-laki surang dalam keluarg, lah ditingga "apa" ketiko masih kelas 1 SD, th 1981... jadi ka bara bana lah nan tahisok...
Sampai nan taraso parahnyo dek ambo marokok ko katiko Study tour akhir th 1988. Study tour dari SMPN 1 Duri, ambo dakek jo kawan2 nan tukang makan jo tukang hisok. Jadi jiko lah sudah makan, nan rokok tu indak tingga. Nan dek guru pun bai tu pulo, indak bisa lo managahan do. Maklum, guru Geography kami, nan urang batak adolah perokok berat... Jadi baliau maraso lah dapek kawan jo kami.. Kami barangkek sore jo bis gadang (kalo ndak salah ggak hitam) dari sikolah, dan sampai di Kandis oto baranti untuak makan malam,dan ambo mambali rokok sabungkuih. Katiko tu adolah rokok Bentoel nan ado raso mentholnyo... Sabalun Rantau Barangin, Bangkinang nan rokok tadi habis, tandas, dek ambo. Hanyo beberapa batang se nan babagi jo kawan nyo.... Namun sasudah tu, iyo taraso agak sasak dado ambo sampai pagi. Antah dek kurang lalok, atau dek rokok ko antah lah.... Namun dek hati sanang, awak lah tibo di Pagaruyuang, nan sakik di dado ko lai indak taraso bana lai. Nan rokok pun lai juo tetap jalan, namun indak sarupo malam barangkek tu lai... Sasudah jalan2 tu, ambo bacarito ka Ibu, apo nan ambo alami. Dan dek Ibu ko indak lo nyo berang do.. Hanya dengan penjelasan bahwa "apa" ambo, maningga dek sakik kanker paru-paru. Lamo Ibu bolak baliak ka padang, ma'anta an apa untuak dirawat. Maklum adiak apa ko lai dokter dan dosen di Padang, suami istri, Dr Sadial B dan Zulmadiar Ilyas. Jadi salamo perawatan hinggo akhir hayatnyo, ado labiah kurang tigo tahun Ibu nan mangawani "apa" barubek kai Padang. Dengan penuturan nan elok ko lah, tagarik di hati ambo untuak mulai baranti marokok... Walau sudah tu, lai juo diminta kawan untuak marokok, kadang-kadang agak susah juo untuak manulaknyo. Namun secara keseluruhan, nan ambo iyo indak pernah lah mambali rokok, atau pun ma'ambiak rokok dari kadai Ibu.... Alhamduillah dek indak ado mambali rokok ko, lai takumpua juo pitih dek ambo. Sahinggo untuak hal baju jo sarawa nan ambo pakai, lai bamerek saketek dibandingkan kawan-kawan nan samo gadang. Katiko SMA tu, th 90-92 ambo lah bisa mambali Lee Cooper, Levis nan originil (501), bajunyo CF jo Hammer ka pakan baru. Maklum katiko tu, urang nan dari Duri jiko nio mambali baju nan rancak iyo harus ka Pekanbaru. Kalo pun ado harago nyo lah maha. Bai tu pulo katiko kuliah, sakali-sakali lai juo ta'isok, namun lai tetap indak pernah mambali rokok walau sabatang. Alhamdulillah sejak th 3 kuliah hinggo hinggo kini, iyo lah baranti total. Jadi nan mambuek ambo sadar adalah berkat kasih dan sayang alm Ibu. Beliau indak BERANG, indak pulo MALARANG katiko ambo jujur bacarito ambo lah marakok. Namun dengan nasehat nan bijak, beliau sanggup merubah pola pikir seorang anak yang sedang dalam maa pencarian jati diri..... Alhamdulillah, ambo sangat bangga dengan baliau. Andaikata waktu itu beliau MARAH atau keluar kata LARANGAN, MAKIAN, pasti akan keluar "pembangkangan" dari dalam diri ambo... Demikian sajo da Jepe, tambahan dari ambo, mudah2an ado manfaatnyo bagi awak basamo. -- Wassalammu'alaikum wr. wb Aryandi, 37th+, ciledug, tangerang Tingkatkan Integritas Diri, Jalin Silahturrahim, Mari Bersinergi, Ayo Jemput Rezeki, Bantu Anak Negeri -- . * Posting yg berasal dari Palanta RantauNet, dipublikasikan di tempat lain wajib mencantumkan sumber: ~dari Palanta r...@ntaunet http://groups.google.com/group/RantauNet/~ * Isi email, menjadi tanggung jawab pengirim email. =========================================================== UNTUK DIPERHATIKAN, melanggar akan dimoderasi: - DILARANG: 1. E-mail besar dari 200KB; 2. E-mail attachment, tawarkan di sini & kirim melalui jalur pribadi; 3. One Liner. - Anggota WAJIB mematuhi peraturan serta mengirim biodata! Lihat di: http://groups.google.com/group/RantauNet/web/peraturan-rantaunet - Tulis Nama, Umur & Lokasi disetiap posting - Hapus footer & seluruh bagian tdk perlu dlm melakukan reply - Untuk topik/subjek baru buat email baru, tdk mereply email lama & mengganti subjeknya. =========================================================== Berhenti, bergabung kembali, mengubah konfigurasi/setting keanggotaan di: http://groups.google.com/group/RantauNet/subscribe.