Assalamu'alaikum WW Mamak-mamak, angku-angku dunsanak Palanta RN nan berbahagia.
Izinkan ambo sato saketek soal baa mangko banyak urang awak nan alah pansiun indak namuah tingga di kampuang. 1. Ambo yakin kabanyakan dari urang tuo-tuo kito nan alah pansiun (nan alah baranti mancari pitih ???) 80 % sangaik ado kainginan untuak tingga / baliak kakampuang halaman, karano alah majadi papatah dek urang Minang : "Satinggi-tinggi tabang bangau suruiknyo ka kubangan juo" "Hujan ameh di nagari urang hujan batu di kampuang awak nan elok kampuang awak juo". 2. Bagi pensiunan nan lai bapitih atau nan financial no problem bagi baliau, nan manjadi masala adolah sia nan kamauruihnyo tingga dikampuang, binilah lamah anak pun jauh kamnakan lah marantau pulo, sakik jo sia kabatenggang damam ndak sia kamambao tatumpah kadiri badan surang hati ibo pangana jauah jo aie mato manyudahi anaklah juo kadapek doso. Dek anak-anak baliau tantu baitu pulo, sabuang salapeh hari patang indak mungkin babaliak lai, kutiko kini pulolah awak dapek mauruih, manyanangkan jo mambahagiakan urang tuo, dari ketek awak nyo paliharo kniko kito mamaliharonyo, dek mancaliak ayah jomandeh nan alah tuo indak basuo agak sahari pangana risau, baa kolah ayah mandeh den, jankan katingga liau dikampuang indak nampak sajo awaklah risau, mandanga baliau manyabuik sakik kapalo awaklah damam labiah dulu, nan urang tuo kareh kakampuang nan anak malarang kareh, dek anak kadi turuik-an ka kampuang iduik awak dirantau pulo. 3. Bagi pensiunan nan agak bakurang-kurang nan bak maeto kainsaruang dielo kaateh kaki tabukak dielo kabawah dado tabukan nan rangik mamggigik juo, rumah lapuak janjang tagajai sawah diolah kamanakan parak nan ado lah tagadai, kok dipaso juo pulang kakampuang tapaso lalok di surau tingga makan paragiah jo sidakah, baa kaindak kamaeso kakamnakan untuaknyo sajolah ndak cukuik anak banyak sawah saketek upah karajo bakurang-kurang, alah basuo bak papatah "disawah pangkua balabiah dirumah pinggan tak sadang" akiaenyo gatang-gatang tali ijuak, lai patang indak untuak bisuak. Deksabab karano itu indak mungkin iduik dikampuang mako tapaso juolah hiduik dirantau mandakek-dakek-i tampek tingga anak, kurang kaok lai katukuaknyo senteang kaok lai kabilainyo manunggu-nunggu hari patang mananti aja kasampai walaupun dalam hati kampuang halaman tabayang juo ditampek umua bamulo diisnan mandi partamo ditampek bundo malaiekan diranah ayah mangadangkan. 4. Sabananyo dalam kekerabatan Minangkabau tempo dulu urang laki-laki kalaulah tuo babaliak ka pangka, inyo diurus kamanakan anak tingga manyilau, mungkin iko agak babeda jo ajaran Islam nan seharusnyo maurus adolah anak, namun disiko pulolah lataknyo seni jo adat Minangkabau, sabuang salapeh hari patang sibunsu indak kabaradiak lai manunggu aja manjapuik disikolah taunyo seorang laki minang adolah rajo dalam kaumnyo, pado saat ikolah seorang laki-laki Minang dapek menikmati harato pusako tinggi nan salamoko di Ulayatnyo untuak kamanakan, kamanakan rela maurus anakpun sato mangiloi. Namun laki-laki nan mano nan dapek bantuak itu ?, tantu laki-laki nan lai manjalankan tugasnyo sebagai laki-laki Minang sejati nan bak papatah dalam adat : "Kaluak paku kacang balimbiang tampuruang lenggang lenggokkan dibaok uran kasaruaso, anak dipangku kamanakan dibimbiang urang kampuang dipatenggangkan tenggang nagari jan binaso" Anak dipanku jo pancarian Kamanakan dibimbiang jo pusako Urang kampuang dipatenggangkan jo salang tenggang, tolong manolong dll Tenggang nagari jan binaso jo piie kurenah. Sakian dari ambo mohon maaf kalu kurang berkenan. Tks Afrijon Ponggok KBB 43,L,Pekanbaru -- . * Posting yg berasal dari Palanta RantauNet, dipublikasikan di tempat lain wajib mencantumkan sumber: ~dari Palanta r...@ntaunet http://groups.google.com/group/RantauNet/~ * Isi email, menjadi tanggung jawab pengirim email. =========================================================== UNTUK DIPERHATIKAN, melanggar akan dimoderasi: - DILARANG: 1. E-mail besar dari 200KB; 2. E-mail attachment, tawarkan di sini & kirim melalui jalur pribadi; 3. One Liner. - Anggota WAJIB mematuhi peraturan serta mengirim biodata! Lihat di: http://groups.google.com/group/RantauNet/web/peraturan-rantaunet - Tulis Nama, Umur & Lokasi disetiap posting - Hapus footer & seluruh bagian tdk perlu dlm melakukan reply - Untuk topik/subjek baru buat email baru, tdk mereply email lama & mengganti subjeknya. =========================================================== Berhenti, bergabung kembali, mengubah konfigurasi/setting keanggotaan di: http://groups.google.com/group/RantauNet/subscribe.
