OKE, DATANGLAH KA JAKARTA. BERES SADONYO TU MAH Sajak urang Minang di rantau nak pulang basamo untuak mambuek kongres kudian barubah manjadi seminar sajo, Atang tapaso pulo baliak ka rantaunyo, Jakarta. Kutiko basobok jo Jila di lobby Basko Hotel, Atang batanyo tantang baa bana Jila kini di kampuang, tarutamo sajak Atang pai marantau. “Kami di kampuang biaso-biaso sajonyo kawan. Memang iduik agak susah, tapi banyak pulo nan marusuah kan urang Minang sapangkek awak ko. Misalnyo, nan mudo-mudo maanggap awak salalu manuduah mereka tak baradat, padohal nan paliang acok malangga adat tu awak,” kato Jila. “E, Jila. Kito bukan melanggar adat. Justru kami pulang ko untuak mampakuat adat tu baliak,” jawek Atang. “Iyo manih tadanganyo mah kawan,” jawek Jila. Alun sudah Jila mangecek, Atang lah manyoroang pulo. “Kini baitulah Jila. Kalau memang awak ka mamikiekan dan ka mambuek gerakan untuak mampakuat adat Minangkabau, datanglah ka Jakarta,” kato Atang. “Ka Jakarta? Untuk mampakuat adat Minangkabau? Lai indak salah waden mandanga kecek waang ko?” tanyo Jila. “Oke, oke. Datanglah ka Jakarta. Beres sadonyo tumah,” baleh Atang. Singkek curito, iyo pulo, datang Jila ka Jakarta. Lah duo hari mancari di ma rumah si Atang, di ma kantua si Atang, alun juo basobok lai. Kudian basobok juo jadinyo. “Jila. Sampai hari Salasa waden rapek pimpinan di Puncak. Jadi berarti hari Kamis baru awak bisa mangecek. Baa gak hati?” tanyo Atang. “Kok baitu baa juo lai,” jawek Jila patah semangat. Lah sampai di hari Kamis, tibo telepon si Atang. “Jila, tanyato urusan pengiriman tenaga kerja ka Tripoli, Iskandariah dan Taif manjadi masalah gadang. Waden tapaso sanjo ko pai ka Bali sudah tu taruih ka Cairo. Kalau den pai kini, hari Sanayan waden lah baliak mah. Kutiko itu sajo awak badiskusi pakaro adat Minangkabau tu yo? Kan lai indak ka gawat bana Minangkabau tu den tinggakan agak 3 hari doh kan?” kato Atang. Jila tatap juo saba manunggu Atang. Lah sampai hari Rabaa, nan Atang indak juo manalepon. Kok ka ditalepon kama, indak jaleh. Atang indak pakai hape. Mungkin manalepon di wartel sajo agaknyo. Lah hari Sabtu baru tibo talepon Atang. “Jila. Maaf den. Ikolah Jakarta! Sibuk. Kerja! Kerja! Kerja! Sahingga talalai waden maurus kampuang. Kok baliak se kanti ka Padang dulu baa nyo. Tiket lah den pasan, balanjo lah den tinggakan saketek ka sekretaris den untuk bali oleh-oleh. Maaf yo kanti,” kato Atang manutuik taleponnyo. Jila maangguak sakali lai. Lah batanyo-tanyo urang di lapau nasi tampek Jila makan salamo di Jakarta. “Dibayar kapan Mang?” tanyo urang kadai itu. Jila tatap juo saba. Inyo bana-bana ingin ka badiskusi tantang Minangkabau jo Atang nan urang rantau tu. Tigo hari sudah tu, tiba padusi rancak manamui Jila. “Bapak. Ini aplop dari Bos Atang untuk Bapak. Tiket untuk Jakarta Padang silahkan ambil di konter Sriwijaya di Cingkareng. Bapak menyampaikan salam pada bapak.” *** Lah sampai pulo Jila di Cingkareng. “Bapak, tiket bapak memang ada. Tapi belum dibayar. Mau dibayar sekarang?” kato paja kamek nan dibaliak kaco konter tu. “Memang barek maurus kebudayaan Minangkabau ko. Waden indak pengemis bagai doh, tapi kawan waden sendiri nan memperlakukan waden sebagai pengemis. Memang Jakarta luar biasa,” bisiak Jila sambia mangaluaan pitih dari dompet keteknyo panabuih tiket pulang.
Sent from my BlackBerry® powered by Sinyal Kuat INDOSAT -- . * Posting yg berasal dari Palanta RantauNet, dipublikasikan di tempat lain wajib mencantumkan sumber: ~dari Palanta R@ntauNet http://groups.google.com/group/RantauNet/~ * Isi email, menjadi tanggung jawab pengirim email. =========================================================== UNTUK DIPERHATIKAN, melanggar akan dimoderasi: - DILARANG: 1. E-mail besar dari 200KB; 2. E-mail attachment, tawarkan di sini & kirim melalui jalur pribadi; 3. One Liner. - Anggota WAJIB mematuhi peraturan serta mengirim biodata! Lihat di: http://forum.rantaunet.org/showthread.php?tid=1 - Tulis Nama, Umur & Lokasi disetiap posting - Hapus footer & seluruh bagian tdk perlu dlm melakukan reply - Untuk topik/subjek baru buat email baru, tdk mereply email lama & mengganti subjeknya. =========================================================== Berhenti, bergabung kembali, mengubah konfigurasi/setting keanggotaan di: http://groups.google.com/group/RantauNet/