*“TALUNGGUAK” DI MUARO* * *
Assalamua’laikum dunsanak basamo………… Mambaco isi curito Pak Syamsir--kadir kirim barito “Talungguak” di muaro Jadi terdakwa jo tasangko Takana pulo dek ambo Mandanga kato kato MUARO Ado nan tangiang di talingo Sampai kini ta ijo ijo Gurindam adat nan mangato Dek rang tuo lah jadi pameo Nan kajadi misa jo umpamo Mangaji suatu parkaro Kok karuah ayie di muaro Nambek salahkan hulunyo Banyak sabab jo karano Antaronyo ado babarapo Ulah dek tabiang runtuah sanjo Atau dek hujan gampo rayo Karano gajah nan malendo Atau rang kampuang nan lah lato (jorok) Hulu sungai kok dibaco Putiah baniang bak ayie mato Kadang rasonyo bak ayie niro Palapeh hauih jo dahago Tapi lah kalua dari talago Lah banyak sajo ma ambiak guno Kok ndak kamandi basuah muko Mambuang cacek jo ceno Kadang pamandian kudo Pambasuah bendi jo oto Sahinggo ayie kok di cubo Mungkin labiah bak tubo Ujuang gurindam ujuik carito Manuruik ambo nan fakir nangko Nan kini talungguak di muaro Ibarat sampah ba umpamo Itu dek ulah kito basamo Punyo andil saham jo sero Kito ndak pandai mamaliharo Bahkan mangaruahi banyak nan sato Santano banda kito jago Ndak kurang tagua jo sapo Ayie barasiah dari hulunyo Tatap putiah bak lantai kaco Kini apo ka di baco Lah kumuah ayie di kualo Sagalo sampah nan nyo bao Percuma kito ba turo turo Ayie ndak dapek bacamin muko Nyampang di ambiak di pakaco Haram bantuak ka basuo Nan tampak biawak jo buayo Manuruik buya jo ulamo Cegah kejahatan jo bicaro Kok indak cegah jo tanago Kok indak juo jo sanjato Di ajak bana ba pakaro Nyampang tabukti salah tasuo Kok masuak bana ka pordeo Masuak cako kalua beko Tingga awak nan mangango Mandapek indak mancaliak sato Namo talanjua kanai cemo Dek baliau urang awak juo……. Mudah2an salanjuiknyo Dek kito ka jadi conto Babueklah apo nan suko Namo kampuang toloang di jago…. Urang lain jan sampai seso Kok indak bana takuik jo doso Keluarga agak I pulo Anak jo bini taniayo Sambah sujuik salam dianjo Disimpuahkan lutuik nan duo Bukan manyumpah mancaraco Tapi manyampaikan nan taraso. Kok kurang padeh ibarat lado Kurang asam ibarat cuko Itu hanyo soal salero Lain koki babeda raso…. Wssalamualaikum Wr..br… 23062011.Y.Jambak. -- . * Posting yg berasal dari Palanta RantauNet, dipublikasikan di tempat lain wajib mencantumkan sumber: ~dari Palanta R@ntauNet http://groups.google.com/group/RantauNet/~ * Isi email, menjadi tanggung jawab pengirim email. =========================================================== UNTUK DIPERHATIKAN, melanggar akan dimoderasi: - DILARANG: 1. E-mail besar dari 200KB; 2. E-mail attachment, tawarkan di sini & kirim melalui jalur pribadi; 3. One Liner. - Anggota WAJIB mematuhi peraturan serta mengirim biodata! Lihat di: http://forum.rantaunet.org/showthread.php?tid=1 - Tulis Nama, Umur & Lokasi disetiap posting - Hapus footer & seluruh bagian tdk perlu dlm melakukan reply - Untuk topik/subjek baru buat email baru, tdk mereply email lama & mengganti subjeknya. =========================================================== Berhenti, bergabung kembali, mengubah konfigurasi/setting keanggotaan di: http://groups.google.com/group/RantauNet/
