Assalamua’laikum wr.wb Dunsanak tacinto sapalanta, jo salam maaf di anta, lah lamo rasonyo ndak ma ota, dek ulah wakatu nan ndak bara, lah tapakai jo tasita, sibuik mancari jo manjala, lah latiah ba puta puta, lah layuah ba bega bega, mancari rasaki nan hala, ka di makan jo amak paja, maklumlah hiduik di jakarta, cando urang di kaja ula, utak sakik kapalo nana, pandangan ba tuka2,ba macam macam nan tadanga, kok di baco isi berita, amuah awak hilang aka, dicaliak pejabat negara, dari pusat sampai ka pemda, lah mabuak tebar pesona, Pemimpin ndak lai ba wibawa, mabuak baduto jo ma ota, korupsi marajalela, penindasan semena mena, Hakim jo jaksa lah batangka, polisi batinju jo tantara, Hukum ndak lai dapek basanda, bijaksini ndak bijaksana, kasadonyo lah bajua,lah di kuasoi dek mafia, buliah di ago bara,kok nyampang batamu fakta, sabalun hukuman kalua, nyo lah lari mahinda, ka singapur ka malaysia, ka babagai mancanegara, sambia ba foya foya, kok heboh heboh sabanta, sudahtu hilang dan sirna, samantaro kito rakyat jelata, lah cayie sipatu jo tarompa, kaki sakik tungkai lah lungga, indak tantu ka dikaca, bareh naiak lado maha, dicaliak anak kasikola, ndak tabayie uang pangka, tabayie kurisi ta hutang meja, baa lah anak ka baraja, bilolah nyo ka cangka, buku ndak ado ka di apa, apo lai sikola swasta, hitungannyo ba juta juta, amuah tajua sawah jo banda, akhianyo jadi anak talanta, tuna wisma tuna susila, karajo manyabu jo mang ganja, dek ulah sakik jo kecewa, nan parah batuka aka, badan sehat sakik jiwa,karajo ba tea tea, Musajik banyak ndak ba ulama, gereja sambuah ndak bapandeta, rami nyo dek anak muda, untuak ba hura hura..ibarat sabuah kapa, ndak lai ado nakhoda, tantu disiko pasisie talanta,
Ambo Yan majo basa, manyabuik nan takana, bukan ma upek jo manyasa,jan pulo ambo di dakwa, dituduah mahino jo mahina, atau mancemarkan nama, bantuak kasus si prita, ambo manulih utk si Dilla, anak ibuk ifah, kaganti ganti baraja……………………nan ambo bari judul KECEWA.... *Pasan mamak X* (Kado ULTAH utk kmn Dilla) Kamanakan mamak balahan diri Pawarih pusako lamo Cubolah simak saketek lai Buah tutua mamak nangko Di dalam surek ka sambilan Lah mamak cubo ma urai papa Buah ranuang jo pikiran Nan dimukasuik KAPALO AKA Dalam kasempatan kini nangko Mamak ka cubo ma uraikan Sabait bunyi pantun lamo Manggambarkan tantang kasabaran Pisau sirauik panjang hulu Parauik sangka di barangan Diam di lauik lah dahulu Samaso pulau balarangan Kok dibaco nan tasurek Pantun nan indak ba ujuang Tapi di baco nan tasirek Panjang makna nan takanduang Bak manembak jo badia langsa Sakali latuih piluru manyeba Baiak kasuok maupun ka kida Kok indak ka tapek kanai empa Banyak tajadi dalam hiduik Dalam ba cito jo baniat Balain ujuik jo mukasuik Pupuih harapan hilang sumangat Sakik hati marameh jantuang Kalua sumpah sarapah Bak paneh hilang palinduang Nan ado kaluah jo kasah Iko nan acok tajadi Dalam kahidupan manusia Putuih aso hilang kandali Hanyo karano dek kecewa. K e c e w a……………………………. Itu bahaso caro awak Nelongso kato rang jawo Santano iman didado indak Amuah manjadi urang gilo Anam hurup kok di ijo Sa abih karateh kok di uraikan Kok nyampang di kito tasuo Angek dingin rasonyo badan Lahie jo batin basangketo Litak tulang lapan karek Hati lintuah jantuangpun seso Hilang rono jo sumangek Panyababnyo babagai bagai Nan acok tasuo sa hari hari Sayang putuih kasieh bacarai Jantuang hati nan ingka janji Ulah dek kandak indak lapeh Atau dek pintak indak balaku Hati bak raso di garumeh Bak di sayik jo sambilu Janji nan indak rang tapeki Kanyang di hao angin sarugo Tabaka rasonyo dek emosi Ego mandidieh dalam dado Katiko di muko nyo ma angguak Dibalakang geleangnyo suruakkan Jo tabu lawang awaknyo umbuak Tibarau mudo nannyo barikan. Minyak abih samba ndak lamak Kayu lah tandeh jadi baro Kasieh dek urang lah nyo urak Di awak baru ka bamulo Kandak tak kunjuang nyo bari Paragihan indaknyo tarimo Bak di lembai lembai api Bak di anyang lado mudo Dikana jadi panyakik Dibiakan manyasak dado Duduak tagak kamari sulik Bak makan buah simalakamo Daun mudo sampai masiak Jariah tabuang sio sio Dilindungi sajak dari putiak Lah masak urang nan mancubo Hati kareh niat tak lansuang Badan lah jarieh di panantian Makan hati ba ulam jantuang Bangih kasia di lapehkan Banyak contoh nan kito liek Timbua kecewa dalam hati Panyakik nan sulik dapek ubek Andaikan iman sakulik ari Lah panek babuek baiak Buruak juo ka balehnyo Umua panjang hiduiklah anciak Bunuah diri kasudahannyo Nan ditangan tabang lari Nan di jujai tak kunjuang dapek Dibiyakan nyo dakeki Di kaja nyo bae lorek Kok nyampang manimpo badan diri Indak nan lain ka ubeknyo Sarahkan diri ka Ilahi Taguahkan iman lapangkan dado Ambiak udhuak bao sumbayang Lakokkan kaniang ka sajadah Ambiak tuah ka nan manang Caliaklah contoh ka nan sudah Dek kito hanyo barencana Nan manantukan Tuhan Kuaso Bia dijamua ka langik bana Ratak ka malang basah juo Tapi kok lai ba dado lapang Indak doh nan manyakik hati Dinan rumik pandai batenggang Tando bamain aka jo budi Kok kalah aka jo nafasu Kecewa datang syetanpun tibo Disiko ibilih duduak marayu Lah hilang raso jo pareso….. *12072011.Y.Jambak* -- . * Posting yg berasal dari Palanta RantauNet, dipublikasikan di tempat lain wajib mencantumkan sumber: ~dari Palanta R@ntauNet http://groups.google.com/group/RantauNet/~ * Isi email, menjadi tanggung jawab pengirim email. =========================================================== UNTUK DIPERHATIKAN, melanggar akan dimoderasi: - DILARANG: 1. E-mail besar dari 200KB; 2. E-mail attachment, tawarkan di sini & kirim melalui jalur pribadi; 3. One Liner. - Anggota WAJIB mematuhi peraturan serta mengirim biodata! Lihat di: http://forum.rantaunet.org/showthread.php?tid=1 - Tulis Nama, Umur & Lokasi disetiap posting - Hapus footer & seluruh bagian tdk perlu dlm melakukan reply - Untuk topik/subjek baru buat email baru, tdk mereply email lama & mengganti subjeknya. =========================================================== Berhenti, bergabung kembali, mengubah konfigurasi/setting keanggotaan di: http://groups.google.com/group/RantauNet/
