*MAHITUANG HARI* Puaso abih rayolah ungkai
Tahun baganti baru juo Di hituang umua nan tapakai Lah ragu badan mamikienyo Di cubo cubo bacamin Tasirok darah bak katabang Lah kasek pipi nan licin Lah banyak baju nan lapang Mato cakuang pipilah kampih Jangek nan tagang lah balipek Di caliek gigi baransua abih Lah muloi umpang ciek ciek Lah tuo rasonyo umua Nan tingga hanyo sumangek Bak hari tagelek luhua Tando mugarik lah hampie dakek Dipandang rambuik di kapalo Jangguik jo sunguik kok di liek Kasadonyo barubah rono Nan hitam tingga saketek Pandangan mato baransua kabua Nan talingo samakin tipih Di dapua urang nan kuhua Nasi sa suok indak abih Hati taraso pa ibo ibo Kok badan acok pangajuik Mandanga urang ba turo turo Kopi sagaleh indak ta hiruik Nan salero sulik di tahan Muluik nak minta goyang juo Tapi baalah mangatokan Lah suntua muluik babicaro Kadang kadang tabik tangih Muluik urang kok didangakan Di sapo elok anak gadih Gaek agogo rang imbaukan Katiko di hari rayo Maliek kalio randang itiek Tabik baliek salero mudo Ayie liyua jatuah manitiak Jakun manggarik garik Tapi baalah ka manyabuik Usah lai ka tagigik Galeme sajo haram tanyunyuik Tapi dek salero sulik ditahan Dek bibie kulek kulek i Dagiang bialah urang nan makan Kuahnyo sajo den jilek i Takana mason an lalu Katiko umua sadang mudo Kok taragak makan tabu Abih bakunyah jo bukunyo Tabujua lalu tabalintang patah Nan ma ambek abih balando Pantang baburu indak mamatah Bara bana satinyo rimbo Lupo sara’ lupo agamo Adat budaya indak jaleh Pahalo jo doso indak babeso Hala jo haram ndak babateh Ba utak ka ampu kaki Ba banak ka buku tangan Indak mangana hiduik kamati Barulah kini tarasokan Kini harilah mugarik Wakatu pagi ta buang buang Ka hiduik dunie lah sampik Ka mati amalan kurang Dahulu badan camieh kayo Ulah takabua dalam hati Kinlah tingga namo sajo Urang nan indak acuah lai Kok nyampang malam capek tibo Mato kok rabun rabun ayam Tangan kok lesek manggarik juo Punyo urang kok taganggam Hari sanjo karajo kok tangguang Kakok kok jadi bangkalai Sialah urang nan kamanyambuang Tukang pangganti kok kurang pandai Sio sio kain sabidang Baju kok indak talakekkan Pinjaik baru masin kok usang Sikoci tuo ka ma idokkan Bapasan denai bakeh kanduang Usah baniek nak mangganti Santano putuih ka basambuang Kubuakan denai dari kini………… *KRI.Tanjung Nusanive,04092011.* *Y.Jambak* -- . * Posting yg berasal dari Palanta RantauNet, dipublikasikan di tempat lain wajib mencantumkan sumber: ~dari Palanta R@ntauNet http://groups.google.com/group/RantauNet/~ * Isi email, menjadi tanggung jawab pengirim email. =========================================================== UNTUK DIPERHATIKAN, melanggar akan dimoderasi: - DILARANG: 1. E-mail besar dari 200KB; 2. E-mail attachment, tawarkan di sini & kirim melalui jalur pribadi; 3. One Liner. - Anggota WAJIB mematuhi peraturan serta mengirim biodata! Lihat di: http://forum.rantaunet.org/showthread.php?tid=1 - Tulis Nama, Umur & Lokasi disetiap posting - Hapus footer & seluruh bagian tdk perlu dlm melakukan reply - Untuk topik/subjek baru buat email baru, tdk mereply email lama & mengganti subjeknya. =========================================================== Berhenti, bergabung kembali, mengubah konfigurasi/setting keanggotaan di: http://groups.google.com/group/RantauNet/