Assalaamu'alaikum wa rahmatullaahi wa barakaatuhu Dek ilimu indak banyak, dek pangana indak (acok) sakali tibo, walau dulu panah ambo mambuek carito-carito sarupo judulko, sampai panah lo Reni batanyo, Baa mangko "Pangajian Di Musajik Gurun' judulno, apo di nagari Gurun kampuang Reni. Padohal namo itu basalang baitu sajo, kini alah lamo sangaik, alun lo taulang mangarang carito sambuanganno. Padohal niaik lai juo, ka untuak 'dakwah' caro ketek-ketek. Iko ambo tayangan ulang sajo nan tampak-tampakno masih relevan juo isino.
PANGAJIAN DI MUSAJIK GURUN (5) TANGGUANG JAWAB KA KALUARGA 'Awak sambuanglah kaji awak pakan nan lapeh,' kecek buya Abidin mamuloi kaji patang Satu tu. 'Pakan nan lapeh alah awak kaji nan bahaso sabagian dari istri-istri jo anak-anak ado nan bisa manjadi musuah ka awak. Alah pulo awak kaji nan bahaso manjago anak binyitu dikarajoan sasudah awak talabiah daulu manjago diri awak sandiri dari masuak ka dalam api narako. Iko adolah marupokan kawajiban awak. Awak alah diparingekkan Allah tantang itu. Ambo sambuanglah baliak saubuangan jo tangguang jawab awak taradok anak-anak nan diamanahkan Allah kapado awak untuak dipaliaro. Pamaliaroanno ko sajak dari jolongno lahia sampai no gadang. Urang jaman kini maraso nan tangguang jawab urang tuotu cukuik jo manyakola anno tinggi-tinggi. Sabab kalauno lah basikola tinggi, alah jadi sarjanano, sudah itu alah bakarajono ditampaik nan manjadianno capek kayo, mako maraso barasia gadang urang tuo. Kalau untuak ka ongkoih sikola anakko amuah urang gaek bahabih-habih. Indak kayu janjang dikapiang, indak ameh bungka diasah. Mako sangaiklah sanang hati urang gaek jaman kini, katiko awakno baranak barampek, sarjana kaampekanno, mamacik kaampekanno, ado nan jadi anggota DPR bagai, indak dapek nan kadisabuik lai. Baa tantangan parsiapan akhiraikno? Kok itu nan awak tanyoan bakarunyuik kanyiangno. Apo paralu bana itu, jano. Atau, paliang amuah, dulu katiko paja-paja tu ketek-ketek lai masuak sakola mangaji, lai sampai bakatam kaji, jano. Tapi kini baa? Lai panah juo dikana-kanaan pakaro sumbayangno? Pakaro lai mambayia zakat atau indakno? Pakaro puasono? Lah jarang urang tuo nan maraso alah mangarajoan sarupo itu, manganaan ka anak-anak mareka untuak urusan kamashlahatan agamo. Padohal, tuntunan nabi SAW, anak-anaktu kalau alah baumua tujuah tahunno musti diajaanno sumbayang. Kalau umua sapuluah tahun alun juono mangarajoan sumbayang sacaro batua, lacuik! Itu tuntunan nabi. Itu paringatan baliau ka awak dalam mampasiapkan anak-anak awak supayo isuak ano tainda dari api narako. Aja anak-anak awaktu untuak basungguah-sungguah mangenal Allah sabagai Nan Maha Pancipta. Nan Maha Mangatur sagalo urusan. Nan Maha Kuaso. Caro maajaan pangenalan kapado Allahtu adolah jo shalat, jo sumbayang. Kalau awak indak manyiapkanno sarupo itu, mako hati-hati. Sarupo jo bahati-hatilah awak kalau awak indak mamaliaro razaki nan diagiahan Tuhan Allah ka awak sacaro nan dikatujui dek Tuhan Allah. Diagiah awak arato banyak, diagiah awak anak-anak banyak, santiang-santiang, abih sarjana kasadoanno. Tapi awak indak mampatangguangjawabkan aratotu, anak-anaktu dihadok-an Allah, kiniko, di ateh duniako. Kok arato awak sibuak mangumpua-an sajo sudahtu maetong-etongno. Disinan alah adolo tanah den, disinan alah adolo rumah den, disinan alah adolo toko den. Anak den alah tasubarang kasadoanno, alah santiang-santiang. Alah mamacik posisi nan ebaik-ebaik. Minantu den urang santiang-santiang ka sadono. Mako tunggu. Ambek cah. 'Sasungguahno arato angkau, anak-anak angkau itu adolah fitnah, samantaro disisi Allah ado pahalo nan gadang,' dalam surek At Taghabun ayat 15. Arato banyaktu hanyolah fitnah bagi angkau. Indak saketek juo kamanyalamaik-an angkau doh kalau angkau pakai untuak babangga-bangga sajo di ateh dunia ko. Anak-anak angkau itu hanyolah fitnah kalau angkau indak mampasiapkan mareka untuak manjadi hamba-hamba Allah nan mangarati jo kakuasoan Allah. Mako adolah suatu carito tantangan saurang apak-apak baranak baranam, laki-laki kaanamanno. Sarjana kaanamanno. Alah bakarajo ditampek nan santiang kaanamanno. Samo-samo rajin dinas kalua nagari. Ado nan ka Amerika dinas anakno tu. Ado ka Jaruman, ado nan ka Japang. Indak dapek nan kadisabuik sanang hati sarato banggano urang tuoko. Kok basuo sakali-sakali kaanaman anak-anaknoko di rumahno misalno di ari rayo sabana nampak bahaso marekako iyo urang santiang-santiang. Sasamo dunsanaktu kadang-kadang mangecekno sin alah jo bahaso inggirih. Sabana hebaik. Sabana santiang. Bangga sangaik apak marekako mancaliak. Tuhan Allah bakahandak, dek alah baransua tuo juo, jatuah sakik urang gaekko. Mulo-mulo lai baganti-ganti anak-anak maunyian di rumah sakiktu. Namun sakik urang gaektu agak lamo rupono. Baransua-ansua bakurang sajo kasampatan anak-anakno mangawani, sabab mareka sibuak. Dek Allah Nan Maha Kuaso, rupono alah samakin dakek tibono aja. Katiko manjalang sakratul mauik, maimbau-imbaulah urang tuoko ka anak-anakno nan baranam tu baganti-ganti. Baduo lai sato hadir manjalang mauik tibo manjapuik tapi nan barampek indak bisa, dek sadang sibuak bana jo karajono masiang-masiang. Katiko alah malapeh baliauko baru abih datang anak-anak tu kaanamno. Barundianglah mareka baa caro mauruih jasad ayah mareka nan alah kakutu. Kecek nan tuo, kito imbaukan sajo ka Yayasan Bungo Sarugo. Sudahtu awak imbau ustad surang, kan alah ka salasai urusan tu, kecekno. Dimbaulah yayasan cakotu sarato ustad nan badakekan tampek tingga jo urang gaek marekako surang. Batanyolah ustad tadi, indak ka sato angku-angku mamandian ayah angku-angku, Aa jawek mareka, tolong se lah dek ustad. Alah sudah dimadikan janazah, alah dikafani, ka disumbayangkan mangecek pulo ustad ka anak-anak nan baranam ko. Nan paliang afdal manjadi imam manyalatkan urang tuoko adolah salah surang dari angku-angkuko. Aa jawek mareka, tolong se lah dek ustad. Sudah itu biko, ado nan indak sato sumbayang dari nan anam urangtu. Ikolah conto anak-anak nan manjadi fitnah taradok urang tuono. Indak saketek juo bamanfaat ka ano anak-anak nan alah disakolaanno tinggi-tinggi, nan salamoko jadi kabanggaanno, nan salamoko kajadi palamak-an ota dino kalau bacarito ka urang lain. Basuolah paringatan Tuhan Allah tu, 'Innamaa amwaalukum wa aulaadukum fitnattun, wallahu 'indahuu ajrun 'azhiim.' Sasungguahno arato angkau dan anak-anak angkau adalah cobaan (fitnah). Sadangkan di sisi Allah ado pahalo nan gadang.' Cubo kalau daulu anak diaja agamo sacaro patuik. Diaja mangenal Allah sacaro sungguah-sungguah, diajak caro-caro baibadaik kapado Allah. Cubo kalau daulu banyak-banyak badoa kapado Allah untuak mintak pitunjuak. Untuak diri sandiri sudahtu untuak anak-anak awak. Mamintak kapado Allah supayo istri, anak-anak awak dijadikan Allah untuak panyajuak mato awak, supayo awak dijadikan urang-urang nan takamuko di antaro urang-urang nan bataqwa kapado Allah. Cubo daulu acok-acok mandoa, Rabbanaa hablanaa min azwaajinaa wa tzurriyatinaa qurrata a'yun, waja'alnaa lil muttaqiina imaama. Atau bahkan mandoa kapado Allah agar diagiah dek Tuhan Allah anak katurunan nan shaliah. Sarupo doa nabi Ibrahim a.s., Rabii hablii mishshaalihiin. Tuhanku, anugerahilah aku dengan anak-anak yang shalih. Kalau pakaro arato nan manjadi fitnah kan alah kasamo tampak juo di awak. Arato nan hanyo sakadar dikumpua-kumpuan sajo, nan sakadar dietong-etong sajo. Samo tampak di awak indak saketek juo katolonganno doh. A nan tajadi sasudah itu, biapun alah urang-urang santiang bana anak-anak, tatap juo basarigia mampasarabuik-an arato. Indak jarang baketek-ketek-an ati antaro nan surang jo nan lain. Aliah-aliah kamanjadi pahalo untuak urang gaek nan alah indak ado, antah kok manjadi tambah doso nan lai. Sabab arato nan tinggaanno tu hanyo manjadi bahan patangkaran di anak-anakno. Arato itu hanyolah fitnah, hanyolah cobaan sajo. Cubo kok dulu banyak basidakah. Banyak bainfak. Cubo kok dulu sabalun mati alah dijalehan caro mambagi-bagi arato warihtu ka anak-anak. Barulah ado manfaatno. Tapi dek indak ado mako nan tajadi hanyolah kasusahan sajo sasudah itu. Fitnah sajo sasudah itu. Pacakak-an di antaro anak-anak mampasarabuik-an arato. Jadi intino bana pandai-pandailah awak mamaliaro arato jo caro nan disukoi Tuhan Allah. Buliah awak kayo, kalau iyo santiang bana awak mancari pitih, tapi ingek bahaso didalam aratoko ado bagian-bagian nan musti dikaluaan. Pandai-pandailah awak baranak. Pandai-pandai mandidik anak. Buliah kok ka disakolaan no tinggi-tinggi tapi bakali pulo anak-anaktu jo pangatahuan agamo. Ajai pulo anak-anaktu faham jo agamoko. Supayo isuak tauno mauruih awak paliang indak katiko awak alah tabujua jadi mayik. Supayo isuak pandaino manjadi imam manyalatkan awak. Sabab kecek nabi SAW, 'apobilo mati anak Adam mako putuihlah sagalo amalanno, kacuali tigo pakaro. Sadakah jariah, ilimu nan bamanfaaik, anak nan shaliah nan mandoakan kaduo urang tuono.' Jadi paralu adono anak nan shaliahko. Anak nan awak bana manyiapkan supayo awakno manjadi urang shaliah cako. Sabab co caro sarupo itulah ka taraso dino ikatan bathin no jo awak sabagai urang gaekno. Singgo iko pulolah dulu kaji awak. Insya Allah bisuak-bisuak disambuang pulo kalau lai juo umua.' Sampai disinanlah kaji buya Abidin nan sakaliko. ***** Wassalamu'alaikum Muhammad Dafiq Saib Sutan Lembang Alam Suku : Koto, Nagari asal : Koto Tuo - Balai Gurah, Bukit Tinggi Lahir : Zulqaidah 1370H, Jatibening - Bekasi -- . * Posting yg berasal dari Palanta RantauNet, dipublikasikan di tempat lain wajib mencantumkan sumber: ~dari Palanta R@ntauNet http://groups.google.com/group/RantauNet/~ * Isi email, menjadi tanggung jawab pengirim email. =========================================================== UNTUK DIPERHATIKAN, melanggar akan dimoderasi: - DILARANG: 1. E-mail besar dari 200KB; 2. E-mail attachment, tawarkan di sini & kirim melalui jalur pribadi; 3. One Liner. - Anggota WAJIB mematuhi peraturan serta mengirim biodata! Lihat di: http://forum.rantaunet.org/showthread.php?tid=1 - Tulis Nama, Umur & Lokasi disetiap posting - Hapus footer & seluruh bagian tdk perlu dlm melakukan reply - Untuk topik/subjek baru buat email baru, tdk mereply email lama & mengganti subjeknya. =========================================================== Berhenti, bergabung kembali, mengubah konfigurasi/setting keanggotaan di: http://groups.google.com/group/RantauNet/
