Assalamualaikum wr wb Angku, mamak, bundo sarato dunsanak sapalanta nan ambo hormati,
Orgen tunggal ko memang ado di ranah minang & memang ado nan indak patuik manuruik ABS SBK nan kito pakai di salingka nagari. Tarutamo pado acara-acara seremonial saroman perayaan 17 Agustus & tahun baru masehi. Salaruik salamo nan ko, banyak pulo artis-artis di ranah minang nan mambuek lagu dengan iringan tari nan mamakai istilah saroman disabuikan Inyiak Malako Nan Putiah "tarian baruak dipantak salimbado". Pado acara baralek kegiatan ko balansuang pado wakatu mulai baranjak tangah malam hinggo parak siang. Selain itu, pado acara baralek mantun, kadang disertai judi kartu QQ (kartu domino nan karateh) jo kartu Song sarato minuman khamar mulai dari nan ringan saroman bir sampai nan kareh saroman manson & vodka. Ambo sebagai rang mudo matah, mancaliak hal iko paratamo sakali bapulang kapado nan punyo alek. Jadi pabilo nan punyo alek indak maundang orgen tunggal nan mambao penyanyi & penari nan siap tempur bajoget bantuak baruak dipantak salimbado nan ko, biasonyo indak tajadi alek saroman mantun. Nan kaduo angku, mamak, bundo sarato dunsanak sapalanta RN nan ambo hormati, bapulang kapado sikap lingkungan disekitar alek diadokan. Takadang nan punyo alek indak namuah, namun pemuda atau pareman di lingkungan sekitar manyasak pulo dengan alasan indak satiok wakatu hal iko dilakukan. Untuak melakukan antisipasi sajak dini, ambo caliak di wilayah perkotaan (Padang, Pariaman, Padangpanjang, Bukittinggi, Payakumbuah, Solok jo Sawahlunto) alun dapek caro di ambo lai doh. Sabab walaupun ado pemkot basarato LKAAM kota, MUI kota, polsek, polisi pamong praja, lalu lurah/ desa taruih ka RW jo RT sarato dewan pengurus masjid di sekitar lingkungan memang alun ado sinergi nan jaleh dilakukan untuak mengantisipasi hal iko. Alasannyo indak pulo jaleh dek ambo, antah perda nan indak ado, atau dana operasional nan kurang atau alasan nan lain. Namun angku, mamak, bundo sarato adi dunsanak sapalanta RN nan ambo muliakan, untuak di wilayah 11 kabupaten hal iko bisa dilakukan walaupun pemkab, LKAAM kabupaten, MUI kabupaten, polsek di kecamatan sarato polisi pamong praja nan bantuak di 7 kota mantun indak manggarik.... hal iko bisa dipinteh oleh masyarakat di nagari-nagari dengan caro nan badunsanak ba minang-minang. Baa kok mangko baitu? Sabab di nagari sabananyo ado limbago adat nagari nan isinyo adolah niniak mamak pangulu kaum, urang nan cadiak pandai, alim ulamo sarato dubalang nagari. Limbago adat nagari ko sistemnyo indak samo jo pamarentahan di kabupaten ataupun di kota-kota di ranah minang nan polanyo manitiak dari ateh. Namun berdasarkan sistem nan mambasuik dari bumi, mulai dari keluarga lalu ka paruik taruih ka kaum hinggo ka suku sampai ka nagari. Nan manjadi permasalahan adolah, takadang limbago adat nagari ado namun indak bafungsi. Nan tabedo diawak, limbago ko indak pulo jaleh atau disabuik antara ado dan tiado. Baa kok mangko baitu angku, mamak, bundo sarato dunsanak sapalanta RN nan ambo muliakan? Kini cubo kito tanyo baliak kadiri masiang-masiang, apokah inyo diri kito ko jaleh siapo urang nan ado di limbago adat nagari asa kito masiang-masiang? Kok lai ado apokah lai bajalan fungsinyo dalam masyarakat nagari? Sabab limbago adat di nagari ko inyo bajalan sasuai kainginan nan dari bawah.... mulai dari keluarga, paruik, kaum, suku hinggo malimbago di nagari. Salaruik salamo nan ko, nan ambo tahu dari 543 nagari adat nan ado di ranah minang (11 kabupaten jo 7 kota) indak sabara limbago adat nan bafungsi. Ado lai ado, tapi indak banyak bana. Baa caronyo mak bisa bajalan baliak? Nan bisa kito lakukan adolah bakumpua baliak marundiangkan hal iko. Nan di rantau bisa mamusyawarahkannyo pado IKM (organisasi rantau nan berbasis nagari/kecamatan) masing-masing. Mulailah kito sigi baliak apokah KAN nan ado di nagari asa kito lai bafungsi atau bajalan. Mak jaleh pulo contoh nan ado di nagari bisa ambo sabuikan di kanagarian Sumpur Kudus, sabab disinan alek urang kampuang hanyo mambuliahkan orgen tunggal balansuang hinggo jam 18.00 wib sajo & indak pakai joget bantuak baruak dipantak salimbado. Kok kurang yakin, pabilo angku, mamak, bundo sarato adi dunsanak sapalanta RN nan namuah mancaliak insya Allah ambo bisa dihubungi bilo sajo untuak maantakan manamui pemerintahan nagari sarato KAN di Sumpur Kudus. Mungkin itu sajo dari ambo, kok ado nan kurang patuik, salah jo jangga ambo mohon dimaafkan. wasalam AZ/lk/33th/Padang asa nagari Kubang, 50 Koto babako ka Canduang Koto Laweh, Agam -- . * Posting yg berasal dari Palanta RantauNet, dipublikasikan di tempat lain wajib mencantumkan sumber: ~dari Palanta R@ntauNet http://groups.google.com/group/RantauNet/~ * Isi email, menjadi tanggung jawab pengirim email. =========================================================== UNTUK DIPERHATIKAN, melanggar akan dimoderasi: - DILARANG: 1. E-mail besar dari 200KB; 2. E-mail attachment, tawarkan di sini & kirim melalui jalur pribadi; 3. One Liner. - Anggota WAJIB mematuhi peraturan serta mengirim biodata! Lihat di: http://forum.rantaunet.org/showthread.php?tid=1 - Tulis Nama, Umur & Lokasi disetiap posting - Hapus footer & seluruh bagian tdk perlu dlm melakukan reply - Untuk topik/subjek baru buat email baru, tdk mereply email lama & mengganti subjeknya. =========================================================== Berhenti, bergabung kembali, mengubah konfigurasi/setting keanggotaan di: http://groups.google.com/group/RantauNet/
