@-! /m
--
Media Activism
(arrecensidura pubricada jai in www.godot.it )
http://www.sardu.net/dir/arrecensiduras/media_activism.htm
Oindi' sa comunigadura, pigada in su sentidu prus mannu ki podit tenni, no esti prus una parti calikisiat de sa vida de sa sotziedadi, ca oindi' sa comunigadura est issa e totu a cumandai sa vida sotziali. Est issa e totu a fai de manera ki sa sotziedadi siat una e no un'atra, est issa e totu a fai de manera ki sa sotziedadi tirit a unu logu e no a un'atru.
Esti po cussu ki is meris de is grandus cumpangias de comunigadura, caliskisìanta, funti sempri prus scrençosus a arrenuntziai a calancuna fitixedda de su poderi insoru. Esti po cussu ki sempri prus genti, in totu su mundu, arrenùntziat a circai de intrai in is grandus mèdius 'e comunigadura, ca tanti funti serraus, e si fait issa e totu is mèdius 'e comunigadura, po dus podi umperai cun fortza e cun libertadi.
Custu libru fuèddat e esti scritu de custa genti, de totu su ki anti fatu e de su ki fàinti, pighendi realidadis de totu su mundu. Ma sa comunigadura autònoma est una cosa manna tropu po nci podi capi in d-unu libru sceti, e insaras innoi anti fueddau a primu 'e totu de is ki umpèranta sa tennologia, finas sa prus adelantada, tanti ki medas bortas funti lòmpius a meda imbentus a primu de sa comunigadura manna e ofitziali puru. E comuncas no esti ki aici su sartu si siat impiticau meda, ca s'agàtant acetotu sperièntzias de donnya arratza: arràdiu, telebisura, Arretza, fueddatesu e fueddateddu, e totu custus mèdius torraus a amesturai, intr''e issus e totu, ma prus ki atru cun s'Arretza, ki fait sa parti prus manna.
Su libru est unu boddeu de sàbius, ki donniunu fuèddat de su ki fait e de su ki ndi scit de prus, e intr''e issus e totu funti diferentis meda puru, ca àndanta de sa semiòtiga (sa scèntzia ki stùdiat is sinnus e is sentidus de is cosas) a is imparamentus po pigai pelìculas, finsas a sa tennologia prus adelantada de sa computadora e de s'Arretza. Unus cantu funti lèbius e simplis, atrus funti prus grais, ca mancai s'arreferint a cosa prus tènniga, prus po genti de su traballu, e un'atrus cantu fuèddanta de polìtiga puru, ma sempri arreferendisi' a su sartu e a su traballu insoru.
Acontu fatu, a tretus sa ligidura esti traballosa puru, e podeus essi di acòrdiu po totu, po una parti, o po nudda cun su ki is iscriidoris nanta (e mancai po cumenti du nanta) e cun su ki iant a bolli, ma su balimentu de su libru abàrrat totu, ca si fait connosci, de manera sèria e pretzisa, totu una filera de mèdius, tènnigas, tennologias e sperièntzias ki de atra manera no emus a connosci. E, ki no abàstat, po donnya argumentu nci funt arreferimentus po kini nd'iat a bolli sciri de prus.
Oindi' ki totus fuèddanta de ICT (est a nai de is Tennologias de Informadura e de Comunigadura, in ingresu Information & Communication Technology ) custu est unu libru ki no podit amancai a totu is ki nci trabàllant e/o nc'iant a bolli traballai cun sentidu. E, torrendi a is iscriidoris sardus, cumenti no pensai a Miali Anjulu Pira e a is librus suus ( Il Villaggio Elettronico e, po una parti, La Rivolta dell'Oggetto puru) ki iant acoitau, candu pagus o nisçunus nci pensat, una parti manna de custas kistionis?
Amos Cardia
___________________________________________ rekombinant .network http://rekombinant.org http://rekombinant.org/media-activism http://urbantv.it
