Hi Ixttagot Chukichi? Mahes mhageli maya korpi, Tumchea lagim kxoma magchea adim, ani; mhagelea chuki koddlean tumgelo axirvadd aslear, hanvem somzuchem; mhagelea zoitak, zoy mell’llem mhunn. Aiz hanv, sontosachea anondan ubetam. Nigtoch voizacho riport, mhojea hatant poddla. Ani tinnem (dotorin) riportar ‘positive’, mhonnchem, hanv avoyponnachea besar asam. Daklo dila. Ixttagot ek mothvache hatiar amchea chalte jinnent. Ixttagoti vinnem hea jogant jiyepak chodduch kothinn. Ixttagot sukhachea vellar vapurtana dukhachea vogtar ek adar zata. Ixttagot eksurponna velar mozot korta ani hench mhajea monantleant soglem niyallun, aiz, Agostachea 4 tarik, Ixttagoticho Dis-a somoyar tumchea lagim, ek lhanxi vinonti korchea khatir, hem potr liktam. Tumi mhagelea jivitan, shalechea bankar thavn ail’le. Amgelo prem-rog kolelji meren pavil’lo. Amgelem prem agttem zonttam-zonttam, mhagelea bapaychea ixttacho cholo mhajer sarkoch mortalo. Tageli dixtt mhagelea sobit rupar asull’li zalear, tumchi mat, mhagelea sobhavacher ani gunacher bosill’li. Fuddlem xikop korunk tumi Bengllur ghele. Tumgelea xikpachi huxarki pollevn tumkamscholarship mellun, tumi Bharota bhair pavil’le. Mhagealea bapain tagelea ixttachea cholea lagin zobordosten logn kelem. Hea lognacher hanv khuxal naslim mhunn, tumkam kolit korunk ten’na mhajea lagim pott’to nhi mhunn tumkam sompork korunk fon naslo. Mhagelea ghorkaracho bapui ek vhodd rajkarnni. Ani tachea panvllancher mhozo ghorkar choltalo. Bapaicho politik rajkharbar toch polletalo. Ken’na ken’na mhoinanche mhoinne Pokxachea vavra khatir Delhi-che vorixtt odhikarache paim duddale ani broxttar duddvancho mal haddun ghorantleo tizori bhortale. Punn mhojea tizoren vo utten mogachi nixannim divnk, mhagelea ghorkar sapuch visorle. Hanv ek khellnni vo dolly koxim ghorant jiyetam. Ghorkaracho lign sombond (sexual desires)dusrea ostoream sovem nichistponnim vhodd-vhodd rajkarnni ostoream sovem, tanchea mobilar ail’lea SMS sondex kollit kortale. Hea sombondi vichar korunk zai naslem. Ani chukun vichar kelear hanvem taptancho mar khanvcho poddtalo. Mhajea lagim, tangelem logn fokt; amche dovloti khatir axill’lem. Mhozo bapui mina dhondo korpi. Him tumkam bhes bori mahiti asa. Gõychea bekaidexir mina dhondenchea prokorannan mhagelo rajkarnni sasu misoll zal’lean,Anti Corruption Bureau-chi (ACB) amchea offisak ani ghorak dhadd poddchi asli. Bapui ani put underground ghele. Ani tanchea sangata komponiche kamdar khoim lipun gop marun asle, Isvorak khobor. Dogam ghorantlea bail-nokrani soddlear, hanv ghorant ektim aslim. Ani tea disa darachi gantti vazli. Gantticho avaz kannar bostam, kallzantle dobb-dobb bizlechea mitera porim dhanvunk lagle. Ani teach khinnant mhagelo mobile vazlo. Mhajea bap’pa-cho fon aslo. Tannem mhonnlem. “pora, tufanank fuddo kor…tujea adarachi goroz” Mhagelea kallzantli birant pois udoun tufanank fuddo korchi gottai mhagelea bap’pachea utrancher mhajea rogt xiramni bhorli. Darachea burakantlean mhageli nodor tumcher poddtam, hanv thodde khinn bexuddh zalim. Tumi kitlo vell darar kottkottailem hi zanniv mhaka nam, punn konnem tori mottea avazar dar thoddun bhitor sortam mhunn dhomki dili tea vogtar, bhanar ailim. Tumche dolle mhojea dolleank melltanch tumchea dolleantlean ekach khinnant adlea mogache ubav ajun jive bhoril’le asat te kollun ailem. Hanv ek logn zal’li ostori hem visrun, tumkam mhagele vengent ghott dorle. Uprant kitem ghoddlem tem tumchea ani mhajea bhitor ek ghutt koso urtolo. Agostachi 4 tarik ixttagoticho dis mhonntat. Khori ani niz ixttagot chalu urchi, hi sogleanchi itsa zaun asa. Punn mhajea sovem tumche ixttagotiche sombond chalu dovorchem dista. Tugelem ani mhagelem ixttagotichem natem aiz thavn portean suru korumya. Kiteak? Mhagelea kusvean ubzovta tea bhurgeache tumi bapui zaun asat. Tumgelem nanv balkak mellom di. | Dekun, hanvem divorce paper toyar keleat. Tumche sodanch zaunk sodtolem…….. Priya
