Padri Vigarak Ugti ChittBhov Manest Padr Vigar,Amche firgojent, tumkam maye mogacho yevkar!Horxim zalear, hi mhoji poili ‘ugti chitt’ nhoy. Amche firgojent vavrunk ail’lea sogott adlea Padri-babank, tea-tea lagu zatolea prosnancher ganvchea lokachio oddchonnio adim hanvem ugti chitt borovn kollit keliat. Amcho avaz oronneantlo sad, ten’nanchea pativ-babamni zavunk dilo nam. He khepek, tumi amche atmik nove guru zal’lean, amche prosn tumche somor dovortanv. Ani somzotam, amcho avaz……Fattle eke ugtie chitticher dhanvti nodor ghaltam. Ten’nanchea dor eka vaddeant ek-ek klub aslo. Nnov vadde mhonntoch nnov klub zale. Ten’nam ami pollelem. Eka vaddeantlo klub dusrea vaddeantlea klubacher zolltalo. Tornatteam modim dusmankay disunk lagli. Antrea-poiryan Kaitu-Jakichim kestanvam zoddar poddlim. Borele ixtt dusman zale. Avoy-bapayank ani ganvchea vhoddilank vhodd huskeachi gozal zali. Poristhiti hata bhair vochunk lagli. Tea vellar, osleach somoyar festa nimitan firgoz potrar hanvem ‘ugti chitt’ boroyloli. Hea soglle nnov klub semprak dissolved korunk ani ekuch ekvottacho klub sthapunk Pativ baba thaim nomrutayen maglolem. Amcho pattimbo asa oxem sangun taka fuddem sorunk agro kel’lo. Tannem ten’nam amchem magnnem kanar ghetlem. To fuddem sorlo. Ami tachea fattlean. Eka disa ami otrektale tench ghoddlem. Ek zomat ghetli ani ek klub ghoddlo. Vhoy!!! Ek okhondd klub ghoddlo. Ani to az Gõybhor fankarta. Hoch to UNITED CLUB Gel’lea mhoineant, Dhakttem Bhatt vaddeantlea eka soireanger hanv pavun sorlom. Thoim mhaka tanchim sezarim dhoddlim. Hanstea mukhamollan tim gozali kori. Mhojea soireanchim borim sezarim ani mhojeo ganv-bhoinnim mhonntoch, hanvem tankam maye-mogan zap keli, bhurgeanchi khobor ghevunk visrunk nam.Thoddea disanim soireanger vaddea-vaddeanim bhonvtoli Saibinn asli. Mhojea kuttumba soit mhaka amontronn aslem. Sanglolea vellar Saibinnik pavlim. Zaito lok distalo, punn gel’lea mhoineant mhaka dhoddlolim soireamgelim xezarim dislim nant. Nhoy mhonn tanche ghorkar vo bhurgim. Saibinnichem orasanv vo gayon choltanam bolkanvant yeun sezarianchea ghorakoddlean pollelem. Bizlecho uzvadd ghorak ani ghorant aslolo lok dislo. Ghoddie him borim xezarim khoim tori gel’lim asot, oxem mhojem gonnit aslem. Mhojem chintop chukichem zalem. Mhojea soiriager Saibinnik nam yeunchem karonn vicharlem -“Tim dusrea zomeantlim”, mhojem soirem uloylem.“Dusrea zomeantlim? Hanv somzunk nam!”“Kristi bhavart soddun tim dusrea zomeamni bhitor sorleant. Ek ghorabo Protestant ani dusro Believers”Borea ani bhokti kuttumbantlim bhurgim tim. Tanchea avoy-bapayk bhurgeponnim thavn hanv vollkhotam. Dev-bhirantichim mon’xam tim. Saibinnichem devosanv tankam khubuch aslem. Bhurgeanchem kazar amchi ganvchi Askarinn altaraxim zal’lem. Tanchea natrancho batizad amchie igorjent zal’lo. Punn atam okosmat dusrea zomeant vochpacho kiddo koso laglo?Amchea ganvant dusrea zomeachem adim nanvuch naslem. Lokvosti vaddlea ani bhailo lok amchea ganvant rabito korunk yetanam tannim dusre zome bhitor haddleat. He zome duddu divun lokak bonaytat. Piddek ani oddchonnink sampoddloleank duddvancho adar ditat. Ek Kristi ghorabo tanchea zomeant bhitor kaddlo mhonntoch lhou-lhou korun dusre ghorabe tabeant ghevunk hat ghaltat.Pativ-bab, sanddlolea xelliancho poromus korunk, tumchea oslea borea gonvllianchem kam’. Ganvchie firgojent boro vavr vistarunk ani atmik ghottay divunk tumkam patthovn dileat. Duddvancie axen Kristi dhorm’ soddun dusrea zomeanim bhitor sortoleank tumchea margdoxonnan bori bud’dh melltoli hem ami nixchit sotmantanv. Oxem tumi korchem, hem ami tumche lagim nomrutayen magtanv.Atam mhozo husko vaddla. Mhojem borelem soirem dusrea zomeantlea lokachea bhulovnneak bhulun Kristi dhorm’ soddit mhonn mhaka husko zala. Vell komi asa. Upkaran tumchem atmik xikovnnen, unnem bhavartachim zatoleank Jezu Kristacho ani amche sorgest mogall avoycho nitt rosto dakhoi.Tumchea thaim ganvchea nanvan khaltikayen magpi,Lino B. DouradoAni Nimnnem: Bhavam-bhoinniamno, jim konn tumche modem futti ghaltat ani tumi ghetlole xikvonneche vatter addkholli ghalun tumkam bhavartha thaun koddsoraunk sodtat, tanche vixim chotur ravat ani tankam pois dovrat mhonn hanv tumche lagim magtam. Romans-16:17linobdour...@gmail.com
