Konknni Film Utsov Kuwait-an zatolo?
STANLEY VAZ
V.Ixtt.com
Ponnje: Gõy sorkara koddlean komi duddvanchi mozot apleak mell’li zalear, jea
zagear apunn 14 filmam ghevn poilo Konknni film utsov ghoddun haddpacho asam,
thoim apunn aplea ‘budget’-a pormonnem unnim filmam ghevn, to utsov ghoddun
haddtolom, oxem Kuwaitchea Kala Mogi-cho Xri Domingos Araujo-n V. Ixttak
sanglem.
Ho utsov Kuwait-ant ghoddun haddpa vixim Gõychi maim bhas, sonskrutai ani
porampora porgott korunk Santa-Cruz-cho Xri Domingos Araujo sabar vorsam
pott'tiddken vavurla. Atam kaim hata bhailea karannank lagun, sorkar ami
ghetlelea prostavacher xik'ko marunk fattim-fuddem zata zait, punn Gõycho
sorkaruch ho ontor’raxttrik Konknni filmam utsov yesesvi korunk fuddem astolo,
oxem Xri Araujo-n sanglem. Gõychi bhas Konknni. Tiatr, khell tiatr, Zagor,
Mande, Dulpodam adi. Gõychi sonvskrutay, porompora ani osmitay mhonn veglle
toren sangchi goroz nam. Konknni film Gõyche osmitayecho ek bhag zal'lean,
Gõychea Konknni filma vorvim amchi osmitay konnui sonvsarbhor vistarunk sodta
zalear, ami ani Gõychea sorkaran tenko diunk naka? Kala Mogi Kuwait (KMC) hi
songhottnna Konknni khatir Kuwait vavurta. Tannim hea vorsa nirnnoy ghetla;
Kuweitant Konknni film utsov ghoddun haddunk. Hache adim he songhottnnen
zaiteoch Konknni karyavolleo keleat mhonn Domingos Araujan V. Ixttak sanglem.
Konknnicho ani mhoje osmitayecho mog monant dhorun hanvem Kuwait desant
ontor'raxttrik film utsov korunk yevjilam. Punn he mhoje yevzonnek Gõychea
sorkaracho kosloch adar mellonam tem pollevn khont bhogli', oxem Xri Araujo
sangta. Ho yedo vhoddlo film utsov korunk ek krutt rupyancho khorch asa. Hea
film utsovant 14 filmam dakhovpak tharailam. Hantlim 8 filmam spordhea
(competition) khatir astolim, zalear 6 filmam spordhe bhair asun fokot
kormonnuke khatir astolim mhonn tannem kolloilem.
Tache sangnne pormannem him filmam utsova vellar dakhoitolet, tea sogllea
filmank Inglezint 'Sub Titles' astolet, tea pormannem, hea utsovant bhagidar
zalolea desantlea lokak son'vad sompeponnim kolltolo ani Konknni film
sonvsarbhor pavtolo. Tum Gõychea sorkara koddlean kitlea duddvanchi opekxa
kortai? Oxem V. Ixtt-an taka vicharlem, tedna tannem sanglem ki, Gõychea
sorkarache apnnak 75 lakh mellpachi opekxa asa. Karonn ho ek mukhel ani Konknni
mollar poile pavtt videxi desant zavpi utsov. Gõycho sorkar bhailea rajeantlea
lokak karyavolleo korpak hozaramni duddu monzur korta. Gõychi osmitay fuddem
vhorunk kiteak hat fattim kaddta kai?” oso Xri Araujo udgarlo.
Poilech pavtt Konknni filmancho utsov pordesant zatolo, ti obhimanachi gozal.
Ho utsov ghoddun haddpeank dor eklean vakhann'nni ani ut'tejon diunk zai.
Pordesant Konknni utsov korunk khuxen Gõychea sorkaran duddu diunkuch zai
aslo,
oxem Gõycho 'camera man' Dyanesh Moghe-n V. Ixttak sanglem.
Poilech pavtt zaupi utsovant 14 filmam aspachi goroz nasli. Karonn Konknni
bhaxentlean zanv 'celluloid' ani 'digital' pod'dotin filmam kitlim asat? oxem
Xri Moghe-n mhonnlem.
Gõyant Morathi filmancho utsov zata tedna tin lakh rupyam voir duddvanchi
tortud asona. Punn pordesant oslo utsov ghoddun haddunk sorkarak zaitxem
disonam
mhonn Xri Moghe-n sanglem. Kuwait-chea sorkaran utsov ghoddun haddunk porvangi
dilea. Duddvanchi mozot diunchona. Karonn tea desant sabar bhasancho lok asa.
Aiz eke bhaxechea lokak adar dilo zalear, faleam herui bhasancho lok ap-apli
magnni sorkarak kortolo ani tem magir marekar zanv yeta, oxem Xri Moghe-n V.
Ixttak spoxtt kelem. Halinch toyar zalolem 'Poltoddcho Monis' hea filmacho
direktor Laxmikant Shetgaonkara pormannem Konknni filmanchea utsovak somestamni
yevkar diunk favo. Sorkaran hea utsovak aplem fattboll diunchem.
* * *
Read Selma Carvalho's warmly-received book *Into the Diaspora Wilderness*, a
journey through Goan life in Africa, the Gulf, England and North America ...
gripping and well-told real-life stories. See
http://selmacarvalho.squarespace.com/ Buy in Goa via Broadway Book Centre,
Panjim. Ph 9822488564.
* * *
