[mediacare] bole bantoe toendjoek pohon jang boesoek
angin kentjang ataoe angin riboet jang sering moentjoel acheer2 ini dilaporken petoegas kantor tjoeatja, ija moengkin aken mingkin kerep moentjoel. soepaja poeblik moesti waspada kalaoe maoe meliwati satoe djalan jang banjak pohon kerna angin jang koeat tentoe bisa roeboehken satoe pohon jang besar sekalipoen. angin riboet jang seperti poeting belijoeng diperkiraken aken melanda di doea daerah di sepoetar kota, persisnja di kantor toean mentri sekretaris negara dan kantor mentri hoekoem dan hak azazi. * * * boeat koerangi bahaja dari pohon jang roeboeh kena angin riboet, pemerintah ada petoegas jang tebang pokok-pokok pohon jang soeda toea di djalan-djalan se antero. poeblik poen bole bantoe toendjoek dan laporken pohon2 jang boesoek. tjoema jangan kita arep poenja laporan boeroe2 diperatiken. kemaren doeloe di satoe pertemoean toean goes doer ija itoe ex presiden djoega. toean goes doer itoe berkata pemerentah soeda siasat politik tebang pilih. * * * di satoe tempat laen ada satoe pohon jang dikabarken itoe pohon tida bole ditebang. laloe satoe lasjkar jang anti kemoesriken datang ke mana itoe pohon berdiri. lasjkar itoe soeda ada rentjana oentoek menebang itoe pohon lantaran ija bisa di keramat2ken oleh orang jang koerang loeas pengetahoean agamanja. waktoe lasjkar itoe sampe di sana marika bertemoe dengen seorang botjah jang beringoes, ija berdiri di deket pohon itoe. tjoba menjingkirla dari sitoe, kata orang jang pimpin lasjkar kepada itoe botjah,kita maoe tebang pohon itoe. botjah itoe dengen gaga brani dan ija berkatjak pinggang, ta seorang poen bole tebang ini pohon. sahoetnja lantang. lasjkar itoe semoea-moeanja mendjadi marah. oentoeng ija dipimpin oleh satoe oestadz jang soeda agak toea, jang ija poenja kebijakan dan ija tida anarchee poela. laloe ija ampiri itoe botjah, ija tanja botjah itoe dengen aloes. tentoe ada sebabnja kenapa entjep melarang oestad jang maoe tebang pohon. botjah itoe keliatannja seneng lantaran oestad itoe soeda panggil dia dengan entjep. pak oestad, tida ada jang bole tebang pohon ini, saja poenja abang ada di atas pohon, ija maoe ambil satoe lajangan jang tersangkoet. ---djinawi
[mediacare] terimakasi toean2 jang soeda kasi komentar
soeda boekan rahasija lagi poeblik bole kira siapa jang soeda boenoe toean moenir. ija mistilah poenja koeasa jang koeat jang petoegas hoekoem tida bisa sentoe ataoe priksa perboeatannja. tentoe sadja itoe 'pr' boeat hamba hoekoem soepaja bisa oengkap kasoesnja. * * * selaen dibantoe oleh menteri2 jang soeda ada. presiden ditoeloeng oleh satoe commision baroe jaitoe wantimpres, jang beroepa singkat kata dari dewan pertimbangan presiden. ataoe kalao maoe jij bole djoega artiken kawan intim presiden. * * * boeat ganti directeur dari pt kereta api, toean menteri soeda wawantjara satoe tjalon jang tampa ija mampoe dan achli. sodara tjalon, saja maoe kasi test. siapken alat toelis sodara. kata toean menteri. sekiranja ada satoe kereta dengen ketjepatan 70 mil dari arah stasioen gambir ija ta ada rem. dan satoe lagi kereta dengen ketjepatan 80 mil dari arah stasioen djatinegara ija djoega ta ada rem. sebagai directuur apa jang tjoba saodara kerdjaken? tjalon itoe mengkalkoelasi di atas kertas dengan serioes, ta lama ija selesai laloe ia sampaiken ia poenja jawaban. toean menteri jang terhormat, jang aken saja kerdjaken ijalah saja aken telepon ajah saja dan soeroeh ija sgera datang ke manggarai. menteri itoe mendjadi bingoeng laloe ija bertanja lagi kepada itoe tjalon. oentoek apa kamoe soeroeh bapak kamoe ke manggarai? toean menteri, ajah saja oemoernja soeda 80 taoen. seoemoer idoepnja ija beloem perna liat kereta api tabrakan. ija ada peloeang itoe sekarang.
[mediacare] kasoedahannja koetjing disoeroe mendjaga iwa
overste penjidik jang priksa orang jang disangkaken soeda mengimpor sapi fiktief itoe diwawantjarai wartawan. bole ceritaken begimana orang itoe mengimpor sapi fiktief? tanja wartawan. itoe moelanja impor tiada palsoe. laloe waktoe sapi-sapi itoe tiba di pelaboehan, sapi sapi itoe kena priksa dan ada ketaoean cheiwan- cheiwan itoe soeda terdjangkit penjakit sapi gila. soepaja tida menoelar djadi sapi sapi itoe dipoelangken lagi ke negara jang kirim cheiwan itoe. overste penjidik itoe mendjelasken. toean, tapi begimana orang itoe masi kloearken oeang djoega oentoek bajar sapi itoe? tanja si wartawan lagi. saja rasa ija soeda tertoelar sakit gila djoega. jawab si overste. * * * orang itoe doeloenja directeur badan pemerentah jang oeroesken logistik. jang ra'jat soenggoe maoe oesaha itoe dikelola dengen betoel soepaja kaboetoehan pokok slaloe lantjar dan tjoekoep. sajang sekali ija soeda ada gelapken ataoe koroepsi. ija bole menjesel di dalem pendjara, lagi poela ija tjelaka kerna soeda libatken djoega ija poenja satoe keloearga, ija poenja bini, ia poenja anak, ija poenja mantoe, ija poenja adik. keloearga itoe soeda hoeboengi satoe penasehat hoekoem jang bekend. satoe keloearga saja soeda disangkaken koroepsi, soedi la toean toeloeng jadi pembela kita poenja kasoes. kata wakil keloearga itoe. apa soeami-istri itoe disangka? tanja si pengatjara. ja, djawab si wakil. begimana dengan anak dan mantoenja. apa marika djoega disangka? tanjanja lagi. marika djoega disangka. djawab si wakil mengijakan. baiklah. laloe begimana dengen adiknja? tanja pengatjara lagi. ija djoega bole djadi tersangka. kata si wakil. adoeh sial betoel, laloe siapa jang maoe bajar onkostnja!? sahoet si pengatjara. * * * kedjaksaan soeda tetepken roemah2 milik `ngarso kalitan' itoe tida' boleh didjoeal ataoe dipindahtanganken. ija poenja roemah-roemah itoe kamar-kamarnja banjak lagi loeas loeas. sedeng sekarang ija ada kamar di pendjara --moengkin tjoema satoe oekoeran ia poenja tempat boeang hajat di roemahnja. ---djinawi
[mediacare] djinawi sekali-sekali menoelis
soenggoe menjeselken ati kerna ada mahasiswa di akademij pemerenta itoe jang mati dipoekoeli lagi. djoestroe ija mati di satoe sekola jang loeloesannja kita bole arepken marika nanti djadi prijagoeng. oentoeng sadja kita djoega bole arep kita poenja presiden teges oentoek ambil satoe kepoetoesan jaitoe membekoeken itoe kampoes. tapi lantaran itoe poela tadi pagi sekonjong-konjong banjak orang jang dateng ke itoe akademij dengen maksoed oentoek maen ski di itoe kampoes. * * * ada orang doedoek batja soerat kabar di stasion manggarai. laloe ija berdiri seperti terkedjoet dan ija tjelingak-tjelingoek liat samping kanan dan liat samping kirinja. soeda itoe ija mendongak ke atas dan tengok ke blakang. jang sebelanja djadi penasaran sama itoe orang teroes dia tegoer itoe orang, boeng sepertinja ada sasoeatoe!? katanja. laloe orang itoe djawab, tida tahoe djoega,djawabnja sambil ija gelengken kepalanja,tapi, ada di toelis di soerat kabar satoe kedjadian loear biasa. jang menegoer itoe mereboet orang poenja soerat kabar, laloe ia ada batja, --kedjadian loear biasa demam berdara.- * * * toean presiden soeda teken satoe peratoeran jang sjahken commission baroe boewat ditoegasi oeroes loempoer. commission itoe ada anggota toejoe orang jang pasti aken poesing toejoe keliling kerna ija poenja toegas bikin brenti loempoer kloear dari peroet boemi. tapi moengkin djoega ija aken dapet gadji dengen toedjoe nol. jadi boeat apa ija poesing? ---djinawi