[R@ntau-Net] Lapau Mak Kari : Nan Sasuai jo Adaik, Nan Sajalan jo Agamo
Lapau Mak Kari : Nan Sasuai jo Adaik, Nan Sajalan jo Agamo By padangekspresSenin, 14-Juni-2004, 04:27:41 WIB Satiok simpang, lah panuah dek anak-anak ketek, nan ba-main di tangah jalan, ma-manjek-manjek oto urang sambia banyanyi-nyanyi. Kama muko ka awak suruak-an...! Kato-kato nan disampaikan Pudin tadi bak raso bunyi mariam di talingo urang nan sadang duduak di Lapau Mak Kari, sahari nantun. Urang-urang saliang bapandangan jo muko nan sirah-sirah masam. Awak lai nagari baradaik. Dima lataknyo anak dipangku, kamanakan dibimbiang tu. Dima lataknyo Sahino-sa malu sa-samo urang Minang nan awak bangga-banggakan dek niniak mamak tu?, tambah Pudin sambia bakacak pinggang. Mak Kari paham bana jo kakobeh konco palangkinnyo nan mangecek tadi. Adaik nan dipakaikan Pudin, bak adaik Dubalang. Suko bakato mandareh, mahariak mahantam tanah. Tabujua lalu, tabulintang patah. Babeda bana jo adaik nan dipakaikan dek Mak Labai nan gadang di Surau. Jikok bakato mamakaikan ayaik jo hadih, kadang-kadang mangaluakan riwayaik dari Nabi. Samantaro Pudin hiduik di balai, baru duo tahun ko batobaik, sujuik di lapiak sumbayang. Lain pulo kakobeh si Mira, kamanakan di bawah lutuik dek Mak Kari. Walaupun sikola tamaik Paguruan Tinggi, namun mamakaikan taratik Millenium. Bamuluik lancang, indak manenggang. Apo nan taraso dikarajokannyo, apo nan takana dikatokannyo. Indak tantu urang ka tasingguang,to the point keceknyo. Generasi Millenium katonyo. Manga dibao rabah padi sarumpun. Sabatang nan baulek, usah sarumpun nan disabik, kecek Mak Kari mamakaikan kieh. Indak elok manuduah-nuduah sajo. Indak buliah ba-buruak sangko, tambah Mak Labai nan duduak di suduik. Bana tu sanak, sambuang Mak Kari. Tantangan anak kamanakan awak nan di jalan tu indak bisa di latak-an ka kuduak niniak mamak sajo doh. Disinan ado tangguang jawab Pamarentah, sasuai jo undang-undang nan dibuek. Tantu ado pulo tangguang jawab urang kampuang, alim ulama sarato cadiak pandai, tukuaknyo pulo. Mak Labai mamelok-an latak kupiah. Pudin ma-angguak-angguak tando mangarati. Tibo-tibo inyo tagak. Jari tunjuaknyio dilatak-an di kaniang sulahnyo. Tampaknyo ado pangana elok nan sadang baputa di kapalonyo. Haa...aden ado pangana..! katonyo. Urang nan sadang duduak di Lapau madok ka Pudin. Manunggu kato-kato nan ka kalua dari muluik lawehnyo. Den raso iko sasuai jo adaik kito, sajalan jo ugamo, tambahnyo. Capek se lah katokan Angku, buliah nak salasai, hariak si Mira dari dapua. Ruponyo kamanakan Mak Kari nan bijak ko manyimak dari tadi. Pudin indak icak-icak indak mandanga. Si Mira batambah manggaritih. Cubo danga dek sanak elok-elok... Sakironyo satiok ustadz atau ulama di nagari awakko basadio mangumpuakan limo urang nan patuik mambaia zakat di sa-kaliliang tampek tingganyo surang-surang, mako bisa takumpua Duo Puluah Limo Ribu urang nan mamabaia zakat satiok tahunnyo,' kecek Pudin sarupo lakon sandiwara. Urang nan mandanga saliang mamandang, ma-angguak-angguak tando paham. Kalau satiok zakat maal dapek manjadi pokok galeh dek ciek keluarga, mako ustadz jo ulama alah mancarikan jalan untuak mahiduiki Duo Puluah Limo Ribu keluarga dunsanak awak nan miskin. Bara nyao nan tatolong tu sanak, sambuang Mak Labai basumangaik. Mak Kari tagalak sengeang, dalam hatinyo inyo basyukur ka nan Kuaso, dek karano ditunjuak-an jalan nan sasuai jo adaik sarato agamo nan kito pakai. Apolai kalau satiok Niniak Mamak namuah mangarajokannyo di satiok Sukunyo. Kalau baitu, alah bak Siriah pulang ka gagangnyo, bak Pinang baliak ka tampuaknyo, Indak muek dek tapak tangan, jo nyiru kito tampuangkan, kecek Mak Kari mambanakan. Tibo-tibo suaro si Mira malangkiang dari dapua; Sia kiro-kiro nan ka mamulai tu Maaak..! Sia nan ka namuah inyo mangarajokan ? Nan banyak hanyo pandai bacurito sajo. Tapi indak namuah ba-susah payah untuak urang banyak..? Lapau haniang sakutiko, Mak Labai diam pulo, Pudin tangango-ngango, Mak Kari bado'a sajo, arok kok lai ado pambaco nan ka mancubo. Wallahualam bissawaab. (viveri yudi) Padang Ekspres Online : http://www.padangekspres.com/ Versi online: http://www.padangekspres.com/mod.php?mod=publisherop=viewarticleartid=2812 7 Berhenti/mengganti konfigurasi keanggotaan anda, silahkan ke: http://groups.or.id/mailman/options/rantau-net
Re: Tarimokasih, was Re: [R@ntau-Net] Lapau.. kaset
Assalamu'alaikum Wr.Wb. Alhamdulillah, kaba nan alah ambo tarimo, lah sanang hati ambo. Wassalamu'alaikum Wr.Wb. Bandaro Labiahadyan anwar [EMAIL PROTECTED] wrote: Salam lah basamapaikan, salam kumbali pado Tuan. Jadi Tuan Sutan ruponyo nan datang ka rumah rang gaek ambo wukatu itu? Kami mamproduksi dan manjua songket sabanayo, sambie bausaho, ikuik melestarikan budaya tenun Minangkabau. Waktu itu ambo sadang di Bogor-Depok kalau ndak salah, maurus anak masuak sikola. Eniwey, tarimo kasih ateh kunjungannyo.Kironyo sakitu lah dulu dari ambo, wassalamu'alaikum w.w.Adyan St. Rumah Panjang Yahoo! Messenger - Communicate instantly..."Ping" your friends today! Download Messenger Now Berhenti/mengganti konfigurasi keanggotaan anda, silahkan ke: http://groups.or.id/mailman/options/rantau-net
Re: [R@ntau-Net] Lapau
Afdal. Utk ka US, tantau susah / maha mangirimno, pakai DHL bara lo ka ongkoihno. Mangkon baa no ?? 1 set kaset mak Enggi lah dibao Adrisman, barangkek kapatang 16 Mei. Kaset tu parmintaan mak Ngah Sjamsir Sjarif di Santa Cruza - CA. Kalau bisa minta tolong ka Adrisman atawa mak Ngah SjSj, tolong dikopi kaset tu. Rasono untuak pamakaian sandiri, asa tidak untuak dipajua balikan lai oke-oke sajo. Silahkan kontek-bakontek Ambopun kini sadang mancari / kamambali. Ditampaik biaso di RMP Bungo Setangkai di Blok-M sadang habih mak Ban mak Bandaro -http://photos.yahoo.com/mak_bandaro ~~ MUHAMMAD AFDAL wrote: Yth, Mamak Bandaro Kalau alah ado stock Kaset RATOK MAK ENGGI ambo iyo akan mambali pulo ciek tu mamak, paralu sakali bakek genarasi nan gadang dirantau jauh di nagari si Buih. Wassalam dari jauh. Ditunggu kaba baritonyo. afdal Arlington, USA - Original Message - Berhenti/mengganti konfigurasi keanggotaan anda, silahkan ke: http://groups.or.id/mailman/options/rantau-net
Tarimokasih, was Re: [R@ntau-Net] Lapau.. kaset
=?iso-8859-1?q?Bandaro=20Labiah?= wrote: Assalamu'alaikum Wr.Wb. Wa'alaikum salam w.w. Dek banyak ragu nan datang, karano lamo lupo nan tibo, Gala nan lupo ambo ka maimbaukan. tapi nan Pusako lai takana juo. Insyaallah ! diansua ciek-ciek. Salam ka amai (amak) dirumah PUSAKO, ambo lai lamo bacarito jo baliau, sampai bagalak-bagalak kami, tagah dek hari lah patang, tapaso baparantian. Salam lah basamapaikan, salam kumbali pado Tuan. Jadi Tuan Sutan ruponyo nan datang ka rumah rang gaek ambo wukatu itu? Kami mamproduksi dan manjua songket sabanayo, sambie bausaho, ikuik melestarikan budaya tenun Minangkabau. Waktu itu ambo sadang di Bogor-Depok kalau ndak salah, maurus anak masuak sikola. Eniwey, tarimo kasih ateh kunjungannyo. Alah jadi anak bamasuakkan ka Pesantren ? Alhamdulillah, lai. Disiko ambo mohon maaf juo ka bakeh tuan karano lamo pulo baru mangabakan, nan bahaso anak ambo jadi masuak pesantren, tatapi indak di Al-Mukhlisin Parung tu do, tapi dakek tu juo yaitu Pes. Baitussalam di komplek Inkopad... Bojonggede (dakek ka Parung sabananyo.) Kini lah ampie sa tahun dan alhamdulillah lai betah inyo di sinan walaupun awalnyo barek juo.. maklum anak umue masih 13 tahun. Tapi ambo bakayakinan, pado usia SLTP ko lah wakatu nan labiah elok anak diaja pendidikan model pesantren. Sakali lai kami sekeluarga maucapkan tarimokasih ateh rekomendasi tuan. PS. Ambo lai datang mancaliak-caliak ka Pes. Al-Mukhlisin tu. Rancak sabananyo. Demikian pula Darun Najah nan direkomend oleh Pak Zubir Amin. Tapi akhirnyo anak ambo mamiliah sikolah nan indak terlalu besar. (Kami dapek informasi SLTP Islam Terpadu Baitussalam ko di iklan di majalah Sabili.) Kironyo sakitu lah dulu dari ambo, wassalamu'alaikum w.w. Adyan St. Rumah Panjang Berhenti/mengganti konfigurasi keanggotaan anda, silahkan ke: http://groups.or.id/mailman/options/rantau-net
Re: [R@ntau-Net] Lapau
Buku ?? Lai nan mamasan. Stok kurang. Nampakno RF harus ma stok kaset RATOK MAK ENGGI Kaset tu paralu didanga. Langang ?? Mungkin palapau sadang bapikia-pikia untuak maposting nan sariuh-sariuh n formal-formil. Tadi pagi Akaik 16 Mei pukua 04:30 ambo batamu jo Adrisman (*) di Musajik Raya Bogor, sholat Subuh disinan, lalu singgah karumah ambo. Lalu 05:50 ambo jo rang rumah jo cucu ke Mesjid Sunda kelapa ( arisan rang Bulaan Kamba - Kbg Putih). Adrisman ke Airport to catch China Airlain 13:00 to USA (*) (titipan utk mak Ngah, dan Ad mambali buku RF) Wass mak Ban (53) -http://photos.yahoo.com/mak_bandaro Darul M. St. Parapatiah wrote: Assalamualaikum WW Baa mangko langang bana lapau kini, apo bari pai kasawah atau mungkin sibuk bana dalam persiapan jadi tim sukses dari anam calan terpilih nan sadang bakompetisi? Tukang jago tungku, saba manunggu. Eh mak Ban, baa galeh buku lai laris? Bilo pai kasawah baliak? Wass. WW Darul. Berhenti/mengganti konfigurasi keanggotaan anda, silahkan ke: http://groups.or.id/mailman/options/rantau-net
Re: [R@ntau-Net] Lapau
Yth, Mamak Bandaro Kalau alah ado stock Kaset RATOK MAK ENGGI ambo iyo akan mambali pulo ciek tu mamak, paralu sakali bakek genarasi nan gadang dirantau jauh di nagari si Buih. Wassalam dari jauh. Ditunggu kaba baritonyo. afdal Arlington, USA - Original Message - From: bandaro To: Komunitas MINANGKABAU (Urang Awak) Pertama di Internet (sejak 1993) ; Adrisman Yunus (okt2003) ; Sjamsir Sjarif Sent: Sunday, May 16, 2004 5:46 AM Subject: Re: [EMAIL PROTECTED] Lapau Buku ?? Lai nan mamasan. Stok kurang.Nampakno RF harus ma stok kaset " RATOK MAK ENGGI "Kaset tu paralu didanga.Langang ??Mungkin palapau sadang bapikia-pikia untuak maposting nan sariuh-sariuh n formal-formil.Tadi pagi Akaik 16 Mei pukua 04:30 ambo batamu jo Adrisman (*) di Musajik Raya Bogor, sholat Subuh disinan, lalu singgah karumah ambo. Lalu 05:50 ambo jo rang rumah jo cucu ke Mesjid Sunda kelapa( arisan rang Bulaan Kamba - Kbg Putih).Adrisman ke Airport to catch China Airlain 13:00 to USA(*) (titipan utk mak Ngah, dan Ad mambali buku RF)Wassmak Ban (53)-http://photos.yahoo.com/mak_bandaro"Darul M. St. Parapatiah" wrote: Assalamualaikum WW Baa mangko langang bana lapau kini, apo bari pai kasawah atau mungkin sibuk bana dalam persiapan jadi tim sukses dari anam calan terpilih nan sadang bakompetisi? Tukang jago tungku, saba manunggu. Eh mak Ban, baa galeh buku lai laris? Bilo pai kasawah baliak? Wass. WW Darul.Berhenti/mengganti konfigurasi keanggotaan anda, silahkan ke: http://groups.or.id/mailman/options/rantau-net Berhenti/mengganti konfigurasi keanggotaan anda, silahkan ke: http://groups.or.id/mailman/options/rantau-net
Re: [R@ntau-Net] Lapau
Assalamu'alaikum Wr.Wb. Bagi sidang RN nan alun punyo kaset Ratok Mak Enggi, sambia mananti dapek kaset tu, bisa mandangakan dulu di RRI Bogor dalam siaran Bagurau Di Udaro Frek 94,25 FM jo 1242 AM tiok hari Jumaik jam 9 malam, nan disiarkan sacaro baseri, dimuloi Jumaik malam tanggal 21 Mei 2004 ko. Jadi diputakan satangah-satangah kaset. Wassalamu'alaikum Wr.Wb. Bandaro Labiagbandaro [EMAIL PROTECTED] wrote: Buku ?? Lai nan mamasan. Stok kurang.Nampakno RF harus ma stok kaset " RATOK MAK ENGGI "Kaset tu paralu didanga. Yahoo! Messenger - Communicate instantly..."Ping" your friends today! Download Messenger Now Berhenti/mengganti konfigurasi keanggotaan anda, silahkan ke: http://groups.or.id/mailman/options/rantau-net
[R@ntau-Net] Lapau
Assalamualaikum WW Baa mangko langang bana lapau kini, apo bari pai kasawah atau mungkin sibuk bana dalam persiapan jadi tim sukses dari anam calan terpilih nan sadang bakompetisi? Tukang jago tungku, saba manunggu. Eh mak Ban, baa galeh buku lai laris? Bilo pai kasawah baliak? Wass. WW Darul. Berhenti/mengganti konfigurasi keanggotaan anda, silahkan ke: http://groups.or.id/mailman/options/rantau-net
[R@ntau-Net] Lapau Mak Kari : Kofi Moning
By padangekspres, Senin, 26-April-2004, 02:28:36 WIB Usah sanak mangiro Kofi Moning samo jo minum kopi di hotel ba-bintang duoatau tigo. Jan pulo dunsanak mangiro Mak Kari tabao rendong pulo jo budayo Barat, sahinggo lupo jo bahaso niniak muyang awak. Tahun buliah batuka, musim buliah baganti, namun nan cupak indak buliah diganti dek urang manggaleh, jalan jan diasak dek urang lalu. Di Lapau Mak Kari lah duduak Mak Etek si Mira, Indra Chatri, asisten duo Sekretariat Daerah Kota Padang. Dari daulu sampai kini, urang mudo nan cengka ko lai alun barubah. Sakali-sakali, baliau singgah juo di Lapau buruak di suduik kampuang tu. Minum kopi, sambia-ma-ota malapeh taragak keceknyo. Kopi satangah Mira, saketek gulo. pasan Pak asisten ka si Mira. Sambia manunggu kopi, tangannyo manjangkau goreng pisang angek di ateh meja. Disembanyo pulo katan di sabalah piriang goreang. Iko nan taragak awak di Lapau Maka Kari ko ha., solonyo. Sadang malatak-an kopi, si Mira batanyo ka Pak asisten nan sadang mangunyah goreang pisang, Kabanyo Pak Walikota awak acok Kofi Moning di kantua Balaikota. Apo se nan diotakan tu Mak Etek? Ba-a kok mamakai istilah urang barat bagai? Pak asisten nan sadang mangulek, ampia tasadak mandanga tanyo baruntun nan diadok-an dek si Mira nan bijak tadi. Ehm.. ehm. Pak asisten manyalisiahkan angok, sabalun manjawek tanyo si Mira nan sarupo pelor kalua dari muncuang Karaben. Mak Kari capek arih jo situasi. Sabalun Pak Insinyur manjawek, Mak Kari mandahului, Kok batanyo lapeh arak, barundiang sudah makan. Caliak wakatu, pandang kutiko. baitu manuruik adaik. Pak Indra Chatri, arih tantang itu. Sambia galak inyo manjawek; Itu gunonyo awak lai ba-mamak. Ado juo nan ka manunjuak ajari. lupo-lupo ma-ingek-an. Lubang hiduang Mak Kari kambang kampih mandanga pujian kawan lamonyo tadi. Sambia mandehem, inyo pa-arek kabek kain saruang di pinggangnyo. Kofi Moning tampek Pak Wali jo Dinas nan takaik, mampaiyokan sagalo karajo nan ka dibuek untuak masyarakaik, jaleh Pak asisten. Kalau baitu, samo jo Lapau ko mah. Tampek awak ma-etong-etong kaji, sabalun di katangahan ka nan rami. baleh si Mira. Tapek bana.. sambuang Pak asisten. Kok dapek, jan hanyo pajabat sajo nan didanga...sanak, solo Mak Kari. Ajak pulo sagalocadiak candokio dari Perguruan Tinggi. Kan lai banyak di kampuang awak ko. Sudah tu, undang pulo niniak mamak, tuo kampuang, urang sumando. Untuan-untuang Pak Wali dapek mandanga laporan nan sabananyo dari rakyaik. Kalau itu nan Mak Kari sampaikan, indak muek jo tapak tangan, jo nyiru ambo tampuang. Itu bana nan kami tunggu. Kota Padang ko punyo awak basamo. Tantu awak uruih basamo, sasuai jo ganggam nan lah ba-untuak, karajo nan lah ba-padok., baitu bana Pak asisten manjawek jo sanang hati. Kalau iyo baitu kecek Mak Etek, sadiokan nomor Hand Phone tampek kami mangirimkan SMS, supayo kami bisa manyampaikan apo nan taraso. Nan takilang-kilang di mato. Nan taraso-raso di hati. Hotline, kecek urang modern. Haa.iyo sabana bijak kamanakan Mak Etek. Iyo baitu.. Jan hanyo mancacek sajo. Agiah jalan kalua. Itu gunonyo awak basamo. Bak kecek urang tuo, duduak basamo ba-lapang-lapang, duduak surang ba-sampik-sampik. Mancaliak angin lai rancak, kutiko lai elok, Mak Kari sato pulo manambahan pandapek; Kalau paralu, Pak Camaik mambuek pulo tapian, tampek baliau-baliau ba-iyo ba-bukan jo masyarakaik, sakurang-kurang jo urang nan patuik dibaok baiyo. Jan di padokan kapado laporan Pak Lurah sajo. Bukannyo kito indak picayo ka Pak Camaik jo Pak Lurah. Tapi, rakyaik taragak pulo mangecek dari hati ka hati jo pajabat nan diagiah picayo untuak mangaturnyo. Jan lupo Mak Etek, sadiokan pulo nomor Ha Pe ciek Mak, solo si Mira ka Pak asisten. Pak asisten ma-angguak-angguak tando suko. Tapi, agiah pulo kami wakatu jo kutiko. Dek kami lai surang baduo, bia nak kami paiyokan basamo. Buliah nak bulek sagolong, pipiah nak salayang. Saba Mak Kari jo kamanakan Mak Etek manantikannyo.Dek karano mancancang tantu indak sakali putuih. Bakarajo indak sakali sudah. Alah manuruik adaik tu Mak Pak Indra Chatri manjawek sarupo urang ba pasambahan jo Mak Kari. Mak Kari indak namuah kalah, inyo manjawek pulo sarupo itu; Alah dalam adaik tu mah. dunsanak. Asa lai pinta ka buliah. Kandak ka balaku. Mananti kami sakutiko. (viveri yudi) Padang Ekspres Online : http://www.padangekspres.com/ Versi online: http://www.padangekspres.com/mod.php?mod=publisherop=viewarticleartid=2567 1 Berhenti/mengganti konfigurasi keanggotaan anda, silahkan ke: http://groups.or.id/mailman/options/rantau-net
[R@ntau-Net] Lapau Mak Kari : Bajalan Sampai Ka Bateh, Balaia Sampai Ka Pulau
By padangekspres Minggu, 18-April-2004, 20:38:47 WIB Agak tarang kiro-kiro mancaliak pasa nan biaso panuah dek tukang sayua jo tukang buah di Pasa Raya Barat. Di Terminal Bingkuang baitu pulo, lah panuah pulo dek one-one nan manggaleh sayua sarato buah-buahan. Pak Wali lah manapek-i janji baliau untuak mambali galeh nan indak laku, tautamo sayua one-one nan busuak dek karano indak tajua. Sayangnyo kutiko hujan turun, one-one nan manggaleh basah kuyuik disiram hujan, dek karano atok tampeknyo balinduang senteang pulo. Aia taganang pulo di tampek lalu urang nan ka mambali, sahinggo sapatu jo tarompanyo bisa barubah warna manjadi coklat kahitaman, panuah dek lacah. Assalamu'alaikum.. tadanga suaro dari halaman. Wa Alaikum salam wa Rahmatullahi wa Barakaatuh., jawek Mak Kari jo si Mira sarantak. Eee.Pak Dotor ko mah kironyo. sambuang Mak Kari. Nan disabuik Pak Dotor tadi banamo Syafruddin Karimi. Baliau Doktor di bidang Ekonomi, dosen pulo di UNAND, Padang. Sairiang Pak Dotor duduak, masuak pulo Mak Labai jo Mak Pudin. Mak Labai mambari salam, Mak Pudin mandudu sajo duduak ka suduik Lapau. Mukonyo bakaruik, bantuak urang takanai baragiah. Ba-a mangko Pamarentah awak ko indak adia Mak. Mak Pudin tibo-tibomamburansang. Baa mungkasuik Pudin? tanyo Pak Dotor. Satiok hari ambo mambaia beo ka urang pasa. Tiok hari kepeang awak ditarimonyo. Kini dipindahan sajo ka Te Er Be. Iyo nan kalamak dek paruiknyo sajo tu mah..! Mak Pudin nampak tarabo. Tampek awak manggaleh tu, dibuek untuak tampek parkir. Indak tampek manggaleh doh. Din, solo Mak Kari. Kalau indak buliah, manga diambiaknyo beo dari kami? Dek kami, kalau alah mambaia, samo jo ma-izinkan kami manggaleh tu nyo? Disinan kalerunyo. Aturan malarang, tapi retribusinyo bamintak juo. Kito dukuang baliau untuak maluruihkan na bengkok. Mambarasiakan nan bakarak salamoko Pak Doktor mulai ba-kato. Jan hanyo ka nan ketek sajo baliau talok bakareh. Tibo di mato jan dipiciangkan, tibo di paruik usah dikampihkan. Baru adia namonyo tu, sambuang Mak Pudin. Untuak mangatur itulah gunonyo Pamarentah. Nan paralu, sagalo aturan itu jaleh barih jo balabehnyo. Harus konsisten caro urang kini. Kalau nampak surang manggaleh di trotoar, jan dipadiakan sampainyo rami, tantu rumik manyalasaikannyo. Bana tu Pak Dotor, caliaklah di jalan Permindo, sampai kini ba salengkang juo, bantuak itu juo di jalan Sandangpangan, sambuang Mak Labai. Tapi ambo raso, labiah rancak baliau ma-mareso Rencana Pembangunan Daerah sabalunnyo. Supayo dapek baliau inok manuangkan basamo jo pejabat nan lain. Kok lai elok, diambiak jo mupakaik, nan buruak buang jo etongan. Kok senteang dibilai, nan kurang ditambah. Asa lai jo niaik nan baiak, jo caro nan elok, tantu lai ditarimo dek urang banyak. Kalau paralu, sagalo rencana pembangunan kota nan manyangkuik urang banyak dilewakan ka nan rami, Mak Kari sato sakaki manambah usulan Pak Dotor tadi. Ba-a mungkasuiknyo tu Mak Kari? tanyo Mak Labai Pak Dotor lansuang manjawek; Sarupo nan diumanaikkan dalam Undang-Undang nomor Duo puluah duo, kito buek pulo Forum Kota. Di Forum tu kito paiyokan basamo jo cadiak candokio dari Perguruan Tinggi nan ado di Padang ko, sarato niniak mamak di kampuang awak ko. Jadi sarupo maota di Lapau Mak Kari .? tanyo Mak Labai. Nan paralu ado tampek awak ba-iyo ba-bukan tantangan pambangunan kota Padang nan kito cinto ko. Kalau paralu disiarkan langsuang dari Radio jo Televisi. Supayo didanga sarato dicaliak dek urang banyak, solo Mak Pudin mulai basumangaik. Kini iyolah sarupo manatiang minyak panuah, mahelo rambuik dalam tapuang. Nan paralu, malantiang manuju tampuak, bakato manuju bana. Bajalan sampai ka bateh, balaia sampai ka Pulau.. (viveri yudi) Padang Ekspres Online : http://www.padangekspres.com/ Versi online: http://www.padangekspres.com/mod.php?mod=publisherop=viewarticleartid=2520 9 Berhenti/mengganti konfigurasi keanggotaan anda, silahkan ke: http://groups.or.id/mailman/options/rantau-net
[R@ntau-Net] Lapau Mak Kari : Di-indang Ditampih Tareh, Dipiliah Atah Ciek-ciek...
Lapau Mak Kari : Di-indang Ditampih Tareh, Dipiliah Atah Ciek-ciek... By padangekspres, Minggu, 04-April-2004, 04:51:47 WIB Sorak sorai kampanye nan biaso tadanga dad Lapau Mak Kari lah hilang lanyok dad talingo. Goyang dangdut massal salamo duo puluah satu had di palosok nagari alah baranti. Duo puluah ampek Partai nan sato Pemilu ditambah duo puluah ampek pulo calon anggota Legislatif utusan daerah alah salasai ba-kampanye. Dindiang Lapau Mak Kari nan panuah jo tando gambar partai sarato potret caleg DePeDe alah barasiah pulo. Di jalan kampuang, indak tampak lai sagalo macam warna bandera, sarato kain spanduk nan tapasang sumbarang kanai, ba-salengkangan di tangah jalan. Sasudah sumbayang Jumaik kapatang, Mak Labai jo Mak Pudin duduak maota di Lapau Mak Kari. Kopi paik tampak dihadoaknyo surang-surang. Goreng angek talatak pulo di meja panjang ba-aleh plastik hijau babungo-bungo. Di sucluik Lapau, Udin Kirun sadang manulih di karateh. Indak sadar, kadang-kadang digigiknyo pena pilot hitam, sakali-sakali inyo maningadah bantuak urang bapikia kareh. Sakali-sakali dikaluakannyo amplop sakabek dad dalam sakunyo. Inyo tapana, mancaliak ka urang nan duduak di Lapau. Mukonyo nampak takuik jo bimbang, dimasuak-annyo amplop tadi ka dalam sakunyo baliak. Mak Kari sibuk di dapua, si Mira nan mantiak baitu pulo. Amplop apo to Din..? sapo Mak Kari. Muko Udin pucek; E-e-i-inddak ado doh Mak..lko hanyo surek..untuak ka dikirim... inyo manjawek tagagok. Mandanga amplop, si Mira sato pulo manyolo, Kalau barisi pitih, bagi-bagi lah ka Mira untuak pambali badak bagai. I..i..indak pitih bagai doh... sambuang Udin. Bara kasadonyo Mira, ambo tagageh.. Saribu limo ratuih... jawek Mira sasudah mahetong apo nan dimakan Udin Kirun. Udin barangkek, urang tagalak, mancaliak tingkahnyo nan sarupo tadi. Hati-hati jo urang sarupo Ru. Minggu tanang ko biasonyo inyo bagerilya, maumbuak urang jo pitih supayo manuruik kandaknyo, Mak Kari maingek-an. Alah kuno to mah, biaselah, inyo se karugi tunyo, uleh Mak Labai. Tarimo pitihnyo, piliah nan awak suko, sambuang Mak Pudin. Urang hanok sakutiko, Indak lamo antaronyo Mak Labai mamulai kato. Lapeh sasak angok awak... Baa bantuak itu kecek Mak Labai... solo Mak Kari. Mak Labai mahelo angok sambia basanda ka bangku panjang. Kakinyo dilipek bantuak urang ba-selo. Tangannyo dirantangan di sanclaran bangku, sahinggo katiak bajunyo clan cabiak tampek jaleh. Baa ka-Indak dek Mak Kari Lameh pulo awak mandanga janji janji nan itu ka itu sajo. Sajak tahun katumba, kampanye indak labiah dari pado obral janji, samo jo toko Matahad nan ma-obral barang sambia mancuci gudang sakali sa-tahun. Nan awak batambah parah juo, Indak barasak lenggang dari kabak,sambuang Mak Pudin Indak namuah tingga. Ba-a manuruik Mak Kari? Itu indak paralu disabuik lai doh. Alah basuluah Matohari, bagalanggang mato rang banyak. Tapi sabananyo, salamo kampanye awak bisa mancaliak sia nan patuik dipiliah, sia nan indak. Nan ditanyo manjawek sambia malatak-an goreng angek di ateh meja. lyo to Mak Kari. Usah awak hondong aia, hondong dadak. Kama urang kasitu pulo awak. Onjak urang, onjak awak. Galak urang galak pulo awak, nan digalak-an urang awak. Ota urang, ota pulo awak, nan diota urang awak. Sansai badan kasudahannyo, si Mira manyorong dari dapua. Mak Labai tagalak sengeang mandanga kecek si Mira nan bijak tadi. Mak Kari baitu pulo, Mak Pudin mandehem sambia mahiruik kopi. Tantu nan sasuai jo awak. Sajalan jo Adaik nan basandi Syara'. Syara' basandi Kitabullah. Baitu bana Mak Kari maingek-an ka urang banyak. Nan paralu di-kana, Jalan Jan sampai di-asak dek rang lalu, cupak dituka dek urang manggaleh, Adaik dialiah dek urang manang,Mak Pudin indak namuah kalah. Jadi apo nan kajadi padoman awak untuak mamiliah bisuak Mak Kari.. ? uleh si Mira. Mak Kari lansuang manjawek; Yo bana bak kato urang, Di-indang ditampih tareh, Dipiliah atah ciek-ciek. Dipiliah partai jo caleg nan ka-paguno. Baokan ka raso, pikiakan jo pariso. Raso dibaok naiak, padso dibaok turun. Gantuangan bana ka nan tinggi, sandakan bana ka nan gadang. Sabalun masuak ka biliak suaro baco Bismillahi tawakkaltu Allallaah, Laa hawla wa laa quwwata illa billahil 'aliyyul `adziim. Baru dipiliah namo urang sarato partai nan sasuai jo awak. (viveri yudi) Padang Ekspres Online : http://www.padangekspres.com/ Versi online: http://www.padangekspres.com/mod.php?mod=publisherop=viewarticleartid=2429 6 Berhenti/mengganti konfigurasi keanggotaan anda, silahkan ke: http://groups.or.id/mailman/options/rantau-net
[R@ntau-Net] Lapau Mak Kari : Baliak-an Siriah Ka Gagangnyo, Pinang Ka Tampuaknyo...
Topics / Ciloteh Minang Lapau Mak Kari : Baliak-an Siriah Ka Gagangnyo, Pinang Ka Tampuaknyo... By padangekspres Minggu, 22-Februari-2004, 04:44:02 WIB Bara bana ka lamak samba, kalau Janang indak pandai mangatangahkan, kuahnyo bisa tatunggang ka baju urang. Tamu baliak pulang jo muko bakaruik, sarato hati nan indak sanang, makan indak jadi, gunjiang tibo, sipangka malu indak takiro. Janang kato rang awak, HUMAS nan biaso disabuik, Public Relations (PR) kato rang kini. Babeda namo, ampia samo fungsi karajo. Janang, HUMAS jo PR, samo-samo mangatangahkan samba nan ka dihidangkan ka urang banyak. Mungkin nan indak samo pakaiannyo sajo. Kalau Janang ba baju ganiah, ma makai sarawa jao, kopiah BeKa, kadang-kadang manyandang kain saruang. HUMAS lah gaeh bajunyo ba lambang pemerintah, uniform kato urang. Public Relations perusahaan, biasonyo ma makai dasi, basipatu maha sarato banyak jo tasanyum suok kida. Tantangan itu bana nan sadang dicilotehkan di Lapau Mak Kari manjalang Ashar kapatang nangko. Lah duduak pulo si Mira sambia mangamek, manggantikan tek Mar nan sadang barubek. Mak Kari duduak di suduik jo kurisi karajaannyo, mahadok ka pintu masuak. Indak tatingga kain saruang tagantuang dilihia. Kapalonyo basongkok jo kopiah kusia bendi, nan jadi kopiah kabasaran dek Mak Kari. Dakek pintu masuak, duduak pulo Udo Wahyu Iramana Putra, rang mudo nan cengka di nagari awak ko. Di sampiang nyo duduak surang anak mudo talampau, tuo alun, pinang sirah ikua kato urang. Bantuaknyo sarupo urang Arab. Rambuik karitiang dicukua sarupo tantara Irak. Sisunguik ba uban ciek-ciek, manuruik kaba inyo urang basangek, apolai kini manjadi caleg. Doktoranduih Abdullah namonyo, murah untuak di ingek. Sambia mangaliek, inyo mintak, Mak Karii...AMIA ciek..! Mak Kari tagalenjek, sambia mahariak si Mira nan sadang mangulek, Hei Miraaa capek saketek..! Mato Udo Wahyu mangalelek sambia mangecek, indak buliah sarupo tu Mak Kari ...kalau jadi urang kadai tu harus bamuluik manih, kucindan murah. Kalau bantuak itu indak laku galeh Mak Kari... Haa iyo minta mo'o (maaf) ambo. Ambo tagalenjek dek hariak si Badul, eh..maaf...mungkasuik ambo Mak Badul tadi,..eh pak dotoranduih Abdullah tadi, Mak Kari manjawek sumbarang kanai. Jan ambo pulo dijadikan alasan lai Mak Kari, sorong pak dotoranduih, nan maraso dapek angin. Mak Kari nan ka manjawek indak jadi mangecek, karano pak dotoranduih lah dulu manyolo, Apolai Sumatera Barat ka jadi tuan rumah Konvensi Nasional PERHUMAS nan partamokali diadokan di lua pulau Jawa jo Bali. Kok dapek awak jan hanyo bangga jo gadang alek sajo. Nan paralu, baa maambiak manfaatnyo untuak awak basamo. Mungkin awak dapek ba bagi pangalaman sarato manimbo ilmu urang-urang tu. Kalau paralu jua pulo galeh awak ka inyo. Iko kasempatan bagi kito, untuk mancaliak-an sagalo kalabiahan nagari awak ko. Awak harok, kok lai ado di antaro urang-urang perusahaan gadang to nan namuah mananam saham di siko, sambuang pak dotoranduih basumangaik. Apo pulo hubuangannyo jo mananam saham, inyo kan hanyo Public Relations samo jo HUMAS, lai cancang ka mamutuih to sanak?, si Mira basorak dari balakang. Kalau HUMAS di kantua-kantua Pamarentah tantu yo indak manantukan bana doh. Dek karano inyo pejabat eselon ka sakian. Babeda jo Public Relations, nan punyo wewenang tantangan kabijakan di perusahaan. Sabab Public Relations itu satingkek manejer, punyo pangaruah langsuang ka pucuak pimpinan. Lai badanga dek induak samang nyo sorong Udo Wahyu sambia maminum AMIA. Ooo...indak samo jo urang nan mang-klipping koran di kantua-kantua tuh do? si Mira manyorong pulo. Itu nan ka awak pelok-an basamo. sambuik Mak Kari. Iko kasempatan bagi kito basamo untuak batuka pangalaman jo urang-urang nan lah banyak makan asam garam di karajonyo. Jan malu pulo batanyo. Jikok sasek awak di ujuang, baliak ka pangka. Baitu tabiat urang nan di dunia Public Relations nantun, Udo Wahyu manambahkan. Manuruik Ketua Pelaksana daerah Konvensi Nasional PERHUMAS 2004, dotoranduih nan basisunguik tadi, HUMAS paralu punyo akses langsuang ka atasannyo. Kok dapek, nan pucuak pimpinan namuah pulo mandanga jo talingo nan nyariang, manarimo jo lapang hati. Kok dapek iyo baliak-an Siriah ka gagangnyo, Pinang ka tampuaknyo. Di sinan nagari mangko ka saleso, Mak Kari mangaluakan pituah. Indak itu sajo do sanak. Panitia pun sabana sungguah-sungguah. Apolai Mak Kari danga biayanyo lah ditangguang pulo dek Panitia dari Jakarta, sambuang Mak Kari, sambia mamuta kupiah kusia bendi nan jadi kabangga-annyo. (Yudi) Tulisan ini hasil rangkuman dari Talkshow Lapau. Mak Kari setiap Jum'at di Favorite 101, 8 FM. (Organized by. Pro Organizer) Padang Ekspres Online : http://www.padangekspres.com/ Versi online: http://www.padangekspres.com/mod.php?mod=publisherop=viewarticleartid=2186 2 Berhenti/mengganti konfigurasi keanggotaan anda, silahkan ke: http://groups.or.id/mailman/options/rantau-net
[R@ntau-Net] Lapau Mak Kari : Udin Kirun jadi Caleg
Topics / Ciloteh Minang Lapau Mak Kari : Udin Kirun jadi Caleg By padangekspres Sabtu, 06-Maret-2004, 05:47:11 WIB Sapakan lai, lah mulai urang kampanye. Dunsanak-dunsanak kito nan manjadi -caleg kini sadang basitungkin, basamo jo tim suksesnyo surang-surang. Udin Kirun baitu pulo. Satiok harinyo latihan pidato di muko camin. Kadang-kadang inyo galak surang. Sakali-sakali nyo basorak manyabuik nama partai nan ditompanginyo untuak jadi anggota de-pe-er- de. Kalau visi jo misi, usah ditanyo, lah pasti takana di lua kapalo. Mungkasuik nyo, alah bisa disabuiknyo sakutiko. Sagalo janji alah disusun rapi. Kapatangko Udin Kirun manamui Mak Sati, dukun nan tamasahua di kampuang-nyo. Udin mamintak paga diri sarato pamanih. Manuruik Udin itu paralu, walaupun awak yakin pada Allah. Mamintak ka urang pandai to tamasuak usaho. Indak siriak bagai doh. Tangguang barandam, keceknyo. Kabanyo, Udin Kirun lah bahabih-habih untuak jadi Caleg. Duo ikua Kabau mintuonyo lah tajua, sawah nan di balakang rumah tagadai pulo. Manuruik curitonyo, di tahun baru kapatangko inyo mancetak kalender sarato karatu namo. Di kalender tu ta-pampang foto dirinyo surang. Kalau dicaliak bana, foto Udin Kirun ado nan jangga dipandang mato rang banyak. Kalau caleg nan lain bafoto mentereang pakai jas sarato dasi. Sakurang-kurangnyo pakai kameja nan balidah atau dasi, sarato kupiah Beka. Udin Kirun bakodak sabatang badan. Destar tatonggok di kapalo, teleang ka-kida. Sunguiknyo jarang sabalah, dek karano dicabuik tiok sabanta. Bibia galak tasengeang, mancaliak-an gigi platina nan mangkilek kanai lampu kilek tustel. Jikok dicaliak ka baju nan dikanak-an, sarupo jo baju anak randai, sarawa galembong tagantuang dipinggua, kain saruang ta salempang dibahu. Indak ba tarompa alias ba-kaki ayam sajo. Kutiko ditanyo tantang kodaknyo nan ta-pampang gadang di kalender tadi, Udin Kirun mulai ma-ota basumangaik, manjaleh-an ka urang banyak nan sadang duduak di Lapau Mak Kari. Iko kodak indak sumbarang kodak doh Mak Kari. Cubo simak dek awak basamo. Dari ujuang rambuik sampai ka ampu kaki alah mancaliak-an baso ambo urang Minangkabau. Udin Kirun bacurito sambia mancaliak-an gambar di kalender nan biaso tagantuang di suduik Lapau Mak Kari. Iko gambar indak sumbarang gambar. Iko contoh urang nan kamanjadi wakia awak di de-pe-er-de isuak, sambuangnyo, sarupo urang manggaleh ubek. Manuruik ambo, caleg nan ka dipiliah ma-wakili suaro awak isuak tantu urang nan mangarati jo awak. Paham jo adaik istiadaik di nagari-ko. Supayo sagalo tingkah laku jo parangainyo sasuai jo nilai-nilai nan tapakai di siko. Jan tapangaruah dek otanyo sajo, Udin Kirun malanjuik-an otanyo. Tibo-tibo, Mak Labai nan dari tadi manyimak curito Udin, sato basuaro, Jadi nan ka awak piliah, tantu urang nan mamakaikan adat urang Minang yo Din. Haa tapek bana... sambuik Udin maniru iklan AMIA di radio. Tambahannyo, nan paralu ka-dipiliah urang nan tau jo malu. Tau jo ereang sarato gendeang, tau di rantiang ka mancucuak, dahan nan ka-maimpok, sambuang Udin tambah basumangaik. Mak Labai indak namuah kalah, disambuiknyo kecek Udin tadi, Jan lupo awak, satiok fi'ia jo kurenah calon awak tu, lai maetong nan lamak dek awak katuju dek urang. Raso dibaok naiak, pariso dibaok turun. Baa to Mak Kari..! Yoo. laah.. jawek Mak Kari sambia mahiruik kopi pahik dihadok-annyo. Dari tadi Mak Kari sadang tapana mancaliak Udin Kirun nan bakampanye kecek-ketek di lapaunyo. Alun hilang dari kapalo Mak Kari, ulah tingkah Udin Kirun, kutiko jadi calo daulu. Kok maota jo manggadele, Udin sabana santiang. Nan paralu dek Udin galehnyo laku tajua. Indak paduli kalau urang kasansaro sasudah tu. Dek karano otanyo indak sasuai jo bukti nan diraso. Janji sarato jaminannyo hanyo dimu!uik sajo, indak sampai ka hati. Satiok hari ado sajo punyo urang nan digalehannyo. Mulai dari honda sampai vespa. Kabau sarato taranak. Sampai ka tanah jo rumah gadang. Kutiko urang sibuk mamiliah Pak Lurah di kampuangnyo, Udin lansuang mamasang tarif duo puluah limo ribu untuak ciek suaro. Itu mangkonyo Udin Kirun bagala Udin calo, walaupun urang indak barani manyabuik di pangka talingo-nyo. Kini Udin lah manjadi caleg. Urang banyak tantu manunggu, apokoUdin lai ka manjadi wakia rakyaik, atau nyo indak barubah bantuak karajonyo samulo. Jadi calo..! Tibo-tibo Udin basuaro sambia mangaruak saku. Mak Kari.!, bara sadonyo ko, capeklah...ambo tagageh, ado rapek caleg di kantua partai. Mak Kari tagalenjek, sikunyo tibo di galeh kopi. Kopi taserak, urang basorak! Jan panjang bana pangana lai Mak Kari. Tarimo sajolah apo nan katajadi. Samo awak caliak, pasti nan bungkuak juo nan ka dimakan saruang. Nan bautang juo nan ka-mambaianyo, sorak Mak Labai dari suduik. Udin Kirun nan salamoko biaso barutang tasingguang barek. Mukonyo sirah padam, sambia mangaruak saku, inyo mangecek Sado utang den baia kini. Kepeang ko ka den bagi-bagikan ka awak basumo. Lai bara kasadonyo Mak Kari. Nak den baia! Urang banyak tapurangah, Mak Kari
[R@ntau-Net] Lapau Mak Kari : Anak Jalanan Sia.. Nan Paduli?
Topics / Ciloteh Minang Lapau Mak Kari : Anak Jalanan Sia.. Nan Paduli? By padangekspres Minggu, 15-Februari-2004, 05:19:43 WIB Makin hari, Lapau Mak Kari samakin rami. Ado-ado sajo nan datang ka situ. Indak hanyo urang kampuang nan biaso balanjo, tapi juo urang-urang dari baragam karajo. Sasudah Jum'atan kapatang, di lapau tu ado duo urang tamu istimewa.Ciek padusi, ciek laki-laki. Nan padusi banamo Imiarti Fuad. Baliau tu, salain wartawati, aktif juo di Yayasan Limpapeh. Yayasan tu, labiah banyak mauruih padusi jo anak-anak. Nan laki-laki banamo Ir Yuhirman, aktif di LSM Perhimpunan Peningkatan Pemberdayaan Masyarakat. Mak Kari, Mira jo kaduo urang tu bacarito lamak masalah anak jalanan nan balakangan ko bantuak cindawan tumbuah dimusim hujan. ''Sia nan paduli jo anak-anak tu, ni?'' tanyo Mira. ''Sabananyo, awak basamo!'' jawek Ni Im. Tapi, lanjuiknyo, sajak departemen sosial indak ado lai, anak-anak tu tampak indak ado nan mauruih. Nampaknyo, anak jalanan diparatian kalau ado proyek sajo. Kalau indak, inyo lah dilupokan. Kalau urang sibuk jo Pamilu bantuak kini, inyo lah manangguang parasaian surang sajo solo Mak kari. ''Kabanyo ado pulo urang nan mamproyekan anak-anak tu. Ado pulo Bos-nyo nan manarimo setoran dari anak jalanan sampai Limo baleh ribu sa hari. Kalau indak cukuik, inyo bisa kanai berang,'' sambuang Imiarti. Nan dikecek-an Imiarti tu indak sakadar curito sajo. Inyo batanyo lansuang, tanyato ado urang nan manunggu di tapi jalan, mangawasi anak-anak tu. Sia nan pamaleh kanai bulancik dek induak samang nyo 'ntun. ''Rasonyo indak ta kamehan dek Pamarintah sajo. Awak basamo paralu bausaho mengurangi anak jalanan tu. Anak-anak tu paralu dibina,'' lanjuiknyo. Baa kalau awak ajak pulo caleg-caleg nan ado kini sato mamikiakannyo. Ambo caliak urang-urang tu lai balabiah pitihnyo sorong Mak Kari. Dima pulo Mak Kari tau..., sulo si Mira. Caliak se lah dek Mira, bara banyak pitihnyo nan abih untuk bapromosi. Mulai dari mambuek kartu namo nan pakai foto, kalender. Alun lai sumbangan ka Partai sarato biaya kampanye jawek Mak Kari. Batua bana, itu iyo paralu kito sampaikan ka baliau-baliau nan ka mawakili awak tu. Kalau inyo indak paduli, jan dipiliah, ba-a gak ati tibo-tibo Udin nan duduak disuduik manyorong. Setujuuu. Mira basorak bantuak kampaye. Huss..jan sumbarang satuju sajo, kalau alun mangarati kecek Mak Kari. Assalamu'alaikum Tibo-tibo ado suaro anak gadih tadanga dari lua lapau. Udin tangango, Mira baitu pulo. Samantaro. Maka Kari indak jadinyo manaruihkan keceknyo. Lapau nan sabalunnyo bagaleboh, tibo-tibo haniang, mambisu. Sado mato tatuju ka anak gadih manih nan datang surang sambia marosok-rosok, karano inyo indak bisa mancaliak alias tuna netra. ''Tadi awak lai mandanga carito uni-uni jo uda-uda,'' Reni mamulai kecek. ''Kini awak bagabuang di PERTUNI, Persatuan Tuna Netra Indonesia, sambuang anak gadih tu, sambia basiensuik ka dalam lapau. Sabalunnyo, banyak nan mamintak sadakah di Pasa Padang. Tapi, sajak kami dilatiah mauruik dek Pamarentah dulu, alah banyak diantaro kami nan jadi tukang uruik, massage kato urang subarang katonyo manjalehan. Tapi itu sajo tantu indak cukuik, tapasolah sabagian baliak ka jalan, mamintak-mintak ka rumah-rumah urang, tamasuak ka pasa Padang kato Reni manarangkan. Walau depsos kini indak ado, pamarintah harus mancari caro lain untuk manolong kami sarato anak jalanan..'' ''Mungkin bisa dari suku, dari adat. Satiok mamak musti mamparatian kamanakan. Kalau dimulai dari siko, mungkin bisa dikurangi. Bisa juo dikumpuan zakat maal, sudah tu disumbangkan ka urang-urang nan indak mampu tu.'' Mak Kari maagiah sumbang saran. ''Payah tu mah, Mak Kari,'' potong Udin. ''Kini banyak mamak nan indak paduli jo kamanakan. Apo lai kalau kamanakan tu indak punyo pusako dari urang gaeknyo. Pamimpin awak juo banyak nan indak batua. Lupo jo urang nan dipimpinnyo. Akibaiknyo, anak-anak nan bansaik tatap bansaik, hiduik takatuang-katuang. Anak-anak jo urang miskin banyak nan diproyek-an. '' Udin mulai indak saba. ''Jadi ba-a caro mambina anak-anak tu..?'' Baliak-an ka masyarakaik... kecek Angku In nan dari tadi hanok sajo. Manuruik ambo, rancak anak-anak tu dibina dilingkungan tampek tingganyo. Agiah usaha ekonomi produktif. Pitihnyo bisa dikumpuakan dari masyarakaik. Sadangkan untuak mambangun musajik baratuih juta awak bisa. Jan sampai awak jadi urang nan mandutoi agamo. Manyio-nyiokan anak yatim dan indak mampadulikan fakir miskin pituah Mak Kari. Indak masonyo lai ma-agiah 'ikan', tapi agiah panciang sarato umpan, sahinggo inyo bisa bausaho untuak hiduik nanti. Imiarti jo Yuhirman ma-angguak. Reni tamanuang, matonyo manarawang, arok kok kandak lai kabuliah, pintak kok lai ka dapek. Reni batanyo dalam hati, Lai juo ado urang nan punyo hati, nan paduli nasib kami.. (Fir/Yudi) Padang Ekspres Online : http://www.padangekspres.com/ Versi online: http://www.padangekspres.com/mod.php?mod=publisherop=viewarticleartid=2141 8
