Sanak Roni, ko ado nan lamo2 untuak pailang2an suntuak KOk ndak katuju tolong dilewatkan sajo
Tapi ado ralat saketek, Selat mie ko memang perairan Selat Mie bukan Pulau Selat mie Mantun kecek si Tekong pancuang kapatang ko, baru2 ko Wassalam Rina, batam From: rinapermadi [mailto:rinaperm...@gmail.com] Sent: Wednesday, July 22, 2009 3:22 PM To: 'RantauNet@googlegroups.com' Subject: PULAU SELAT MIE Assalamu'alaikum Warahmatullahi Wabarakaatuh, Sadonyo dunsanak palanta nan manyanda di Lapau, Untuak panambah-nambah lamak Ota di lapau gadang ko, ambo bagi pangalaman ambo kutiko adventure ka Selat Mie yang masuak kawasan Kepri ko. Iko ambo lakoni sekitar tahun 2007 nan lapeh. PULAU SELAT MIE By : Rina Hari sabtu adolah hari nan kami piliah untuak barangkek manuju Pulau nan manjanjikan kenikmatan mamapeh Namonyo Pulau Selat Mie. Dipulau ko banyak dipasok ikan, udang sotong jo gonggong fresh untuak Batam ataupun export S'pore. Memang urang Pulau Selat Mie labiah mancandu manjua hasianyo jo ganti dollar sin daripado rupiah lusuah nan tambah hari tambah lusuah L Dari siang hari ambo alah mamparsiapkan goreang ayam penyet kasukoan "my lovely husband" juo sadonyo awak boat pancuang nantinyo. Sa box ayam penyet, nasi angek baru masak sa box pulo samo camilan kulek ka kulek langkok-langkok. Indak pulo lupo mie instan untuak persiapan jikok indak basobok lapau nasi nantinyo di daerah kepulauan ko. Dek pancuang kami adolah pancuang nelayan nan indak bisa Malayan mamasak di atehnyo. Mako sagalo sesuatunyo disiapkan instan sajo sacukuik2nyo. Memang dalam rangka mampasiapkan paragaik pai mamapeh ko sajo, ambo raso ado kesenangan tersendiri nan ndak bisa dilukiskan. Antah lo lah kok di urang lain.. Salasai persiapan barangkeklah ambo jo Mas sarato suami pembantu ambo (Jawa) jo suranglaih OB Mas di kantuanyo nan badarah Kendari (Sulawesi). Si Tekong pancuang bekoh urang Melayu pulau, jadi langkoklah bahaso nan babunyi di ateh kapa nantik. Ado si Padang, Si Jawa, Si Kendari jo Si Melayu. Walaupun kami babeda2 tapi tatap sajo garah ka garah sambuang manyambuang ndak baranti-ranti. Dek anak ambo masih ketek alun bisa diajak sato mangkonyo tingga inyo jo mbaknyo nan badarah jawa di rumah. Sabananya ibo juo maninggakannyo di rumah, tapi ambo juo kasihan ka si Mas nan setelah punyo anak, inyo indak harus kehilangan "strategic partnernyo" kutiko malapeh hobinyo mamapeh di lauik sarupo nan biaso kami karajoan kutiko week end tibo. Supayo ado kaseimbangan untuak hari-hari kami nan sibuk. Makonyo ambo putuihan ikuik pai mangawanan liau ko malapeh hobi mamapeh ka lauik. Dari arah Sekupang kami manuju palabuhan Saguluang di daerah Batu Aji, dek si Tekong Melayu alah manunggu kami di pelabuhan tu. Hari lah mulai sanjo kutiko kami maluncua di kawasan Tanjuang Uncang. Sekitaran sakilo balayia di tapian Tj Uncang tu banyak tumbuah pabirik Kapa nan biaso disabuik urang ; Tongkang. Aia di perairan disekitar situ mahitam kumuah. Mungkin dek gomok-gomok nan banyak digunoan dek urang nan mambuek Kapa Tongkang di sekitaran tampek tu. Mano pulo kesadaran Enviroment managementnyo nan tumpul ndak mangana perairan nan rusak dek pabirik nan sambuah di situ. Tapi bialah, kok lai devisa Negara nan ka batambah perdiarlah dulu. Untuang-untuang ndak kasado wilayah Kepri ko mereka buek cando iko. Pokoknyo masih ado tampek2 tujuan mamapeh bagi pahobi mamapeh, alah jadih juo du. Lapeh dari manyusuri daerah dakek Tj Uncang, kami mulai masuak ka daerah Pulau Pecong (bukan Petong yo sarupo nan alah ambo caritoan tadahulu). Kami baranti disinan untuak basilaturrahmi jo keluarga SI Tekong pancuang. Inyo babini kaleh urang Pecong ko jadinyo ado keluarga mintuo no di Pulau tu. Masuak di pelantar Pecong, hari lah lapeh mugarik, manompang sumbayang disinan, kami lansuang manjama' jo ukatu Isha. Ambo paratian kehidupan di pulau ko jauah dari sejahtera. Indak ado kendaraan ciek juo. Rato2 rumah tabuek dari kayu jo hiasan kain warna-warni untuak jendelanyo. Katiko kami tibo, banyak tetangga2 si Melayu nan ikuik kalua rumah manyapo kami. Herannyo rato2 alah tau jo namo kami.. ambo tanyo si Tekong ko, katonyo alah nyo sms kakaknyo disiko kalau kami ka datang ka situ. Tapi nan salut ambo, mode a.. pun rumah urang disitu, nan bungo di dalam pot di lua rumahnyo tatap juo ado dan rapi. Sanang hati mancaliak, tarutamo ambo nan suko pabungo ko. Di dalam rumah lah bakumpua saluruah keluarga si Tekong Melayu ko. Sampai Apak2 gaek jo nenek-nenek adoh disitu, kami marasoan kekeluargaan yang tinggi di dalam rumah tu juo raso sanang mereka manarimo kami sebagai tamu, walaupun kami hanyo sabanta disitu. Kalua juo biscuit jo teh manih angek. Sabanta sasudah tu kami bacarito-carito, banyak ota nan kalua, tapi dek lah malam kami minta ijin untuak manaruihan pajalanan ka Pulau Selat Mie sambia mamapeh di jalan nantinyo. Banyak memang pulau-pulau ketek nan kami lalui sapanjang jalan tu, bakau-bakau nan sarupo kerajaan malam bagi panghuninyo. Baiak nan nampak ataupun nan indak awak nampak. Mampaluruih niaik jo mintak perlindungan nan DIateh, ambo raso wajib kito lakukan terutamo untuak kondisi sarupo nan kami karajoan ko. Masin kapa indak dipacu kancang dek aia sadang pasang, takuik kalo ado pancang-pancang nan tabanam di bawah aia mangangkuik ka masin boat ko. Sabanta-sabanta kami baranti juo manciboan mamapeh di daerah tu. Tapi indak ado nan sampai naiak. Ado bara kali dilarian tapi indak berasil manaikkan do, dek taputuih. Kato si Tekong mungkin ikan Jahan(catfish) atau Pari nan ukuran gadang nan mancatuih papeh kami tu. Katu pai sakali laih memang dapek pariukuran salaweh pintu disitu, pas ditimbang di pasa 40 kg, juo ado ikan Jahan ukuran 5 kg babarapo ikua. Kami alun tau dima lubuak ikan di daerah tu, makonyo hasil kurang memuaskan. Si Tekong Melayu kurang tau daerah tu dek, jarang mamanciang disitu, hanyo ado beberapo kali marawai disitu. Rawai jenis untuak hasil ikan-ikan malam nan ukuran gadang memang beda jo rawai untuak ikan jenis selar, kembung, tamban, ataupun selikur. Rawai untuak ikan gadang ko tabuek dari tali jamuran sekitar 100 m jarak sameter dipasang senar kasa jo ujuang nan diagiah mato kaia nan ukuran gadang pulo. Sagadang tunjuak awak kalau dibengkokkan. Biasonyo ikan nan tarawai adolah hiu, pari, jahan, alu-alu ataupun kerapu ukuran gadang. Nelayan pulau acok mamakai rawai ko di bulan-bulan tertentu katiko pas untuak marawai. Ado terawang antah tu bulan ka naiak atah bulan katurun, ado ilmu tarawang mereka. Jadi indak Mama Loreng sajo nan pakai ilmu tarawang-manarawang doh hehe. Pas hari lah tangah malam kiro2 pukua 2 malam kami makan perbekalan ayam penyet tadi nan lah mulai lali (dingin) cando iduang kuciang. Tapi tatap juo lamak sarupo garah-garah diantaro awak boat nan Bhineka Tunggal Ika ko. Baru salasai makan, turun hujan rinai. Barulah agak taraso mandingin udaro kutiko tu. Ambo lansuang mamakai jas hujan nan lah sadio, baru bakurang raso sajuak tangah malam tu. Ambo caliak nan lain juo kadinginan. Dek kami mambaok taromoih aia angek, agak tabantu jo kopi angek plus paisok untuak mereka tu. Nan ambo labiah suko the angek. Sabanta antaronyo ambo takalok-kalok dek boat tatap jalan manuju arah Selat Mie nan baliku-liku malewati gugusan pulau-pulau antah barantah. Manjalang subuah sunrice nampak di Timur samar2 sampai tarang, tapi boat iyo dipacu kancang dek si Tekong pancuang. Pulau Selat Mie alah nampak dari jauah. Pulau ko adolah Pulau terakhir dari gugusan pulau dakek daerah seputaran Batam manjalang ka pulau Moro di Karimun. Lapeh dari selat Mie ko lauik lapeh nan baombak gadang, sahinggo kurang cocok untuak boat2 ketek cando nan kami pakai. Aia lauik nampak janiah, angin sadang taduah sabana mambuek mangantuak. Ditangah lauik nan tanang tu boat dipacu lumayan kancang supayo lakeh sampai di Selat Mie untuak mamapeh sekaligus silaturrahmi jo nelayan situ nan kebetulan acok mangirim ikan ka kami di Batam. Di tangah-tangah lauik nan tanang tu, sunrice masih rancak bana dicaliak mambuek pangana manjadi jauah. Kutiko tulah tibo-tibo kami sadonyo talempar dari boat. Sabalun talempar sadonyo tu, ambo caliak sadonyo sadang mangantuak2 tangguang tasepona jo sunrise. Nan Si Tekong manyuruah luruih nan Mas manyuruah ka suok, nan si Mas suami pembantu kami nan baraja mamacik kemudi binguang. Tapi dek inyo yakin si Tekong labiah tau jalan daripado si Mas makonyo inyo paluruih jalan sampai takandas kami malantak pulau pasia di tangah lauik tu. Pulau pasia ko yo indak nampak doh, dek saluruh pulau pasia putiah nan panjang ko indak mancogok ka ateh aia doh. Nan paliang tinggi kiro2 sajangka dari permukaan aia, sahinggo susah nampak apolai dari jauah atau boat sadang kancang. Alhamdulillah kami indak ado nan luko doh, sasudah tasadar jo situasi, sadonyo mangucap tapi ndak lamo sudah tu, tagalak-galak surang2 sambia maolok2 sang kapten payah ( Si Tekong) masak ndak tau jo pulau pasia nan laweh di tangah lauik tu. Tapi dalam hati ambo yo garik juo, ambo taingek kato-kato : Lautan Sati Rantau Batuah Manusia ko iyo bana ketek indak badayo Jikok indak linduangan Allah Kama laih ka balinduang Subhanallah. Katiko sunrise mulai mamerah tarang, kami sampai di Pulau Selat Mie jo paruik keroncongan. Ampia samo jo diPulau Pecong, kamipun disambuik angek di rumah kawan nelayan di siko ko. Bahaso Melayu mereka ampia indak bisa ambo simak. Sakiang Melayu bana hehe. Kalo agak tacapek mereka mangecek ndak tantu apo kadijawek doh. Tingga dijawek ; "Iye ka Iye sae hehe...(huruh "y" nyo ditakankan nadanyo). Tantu dipaluruih sen mah, wak di kampuang urang mah. Cuman keramahan mereka kalah jauah dari urang kota. Iko nan indak kito dapek jiko di kota. Kearifan kehidupan di Pulau tapancia nan masih kolot, namun tinggi nilai persaudaraannyo. Kami dianta untuak mamakai aia tawa nan bagi urang pulau bernilai tinggi dek mereka dikaliliangi lauik, nan daratan indak pulo laweh doh. Kebanyakan rumah mereka talatak diateh aia, bajalan di ateh palantar nan kutiko aia lauik pasang tarandam tiang-tiangnyo. Salasai sumbayang subuah, kami disuguhi tiwul (ubi diabuih trus dipinyak diagiah gulo jo karambia), ambo lupo namo awaknyo, rasonyo Mama dulu acok mambalian kalau ka pakan tarutamo pakan Ba'a di Kiktenggi. Kanyang paruik jo aia teh angek plus tiwul bakarambia mudo, kami pai mamapeh ka seputaran pulau Selat Mie ko. Tekong baraliah tangan ka Nelayan Selat Mie ko. Turun ka lauik mangitari pulau nan masih dingin udaronyo. Aia nyo janiah, kiro2 10-15 meter nampak terumbu karangnyo ka arah bawah lauik. Nampak ikan-ikan karang nan bawarna-warni. Kami mulai mamapeh di tapi karang nan lumayan dangka. Indak manunggu ukatu lamo, lah basorak-sorak manaikkan bamacam-macam ikan karang. Sarupo ikan Timun2, kerapu merah jo hitam, amoi, kakap, ikan kuniang (tapi nan batulang yo J). Sampai bapindah-pindah ikannyo sabana sambuah, ampia panuah ikan sabox, kami pulang ka Selat Mie baliak untuak manjapuik Ikan nan dapek dek Nelayan pas manjariang malam harinyo. Kebetulan memang kami kasitu sekaligus nio survey baa bana kehidupan nelayan di Selat Mie tu nan acok mangirimkan ikan nan rancak-rancak ka kami. Nampak jaleh profesi sebagi nelayan tradisional adolah sebuah profesi nan sungguah barek, apolai kalo alah barutang pulo ka Tengkulak nan memang ado ditiok pulau-pulau tapancia tu. Tiok dapek hasia lansuang disetor ka Tengkulak. Sambia manyicia utang, jariang nan dipakai kuyak juo, batambah juo utang nan ka lai. Dek Tengkulak ko ikan-ikan, udang, sotong jo gonggong segar ko bukan masuak ka dalam nagari kito supayo sehat anak bangsa ko, tapi lansuang diangkuik ka S'Pore nan jaraknyo memang lumayan dakek dari perairan kami disiko ko. Dan iko rato-rato Tengkulak nan ado adolah Chinese. Lai indak ado si Padang doh. Syukurlah.. Matohari lah mulai naiak mandakek siang, kami pulang laih dari Pulau Selat Mie ko jo sagudang carito nan dicaritokan dek urang-urang di Pulau ko, juo 2 box fiber bamacam-macam ikan segar nan masih manggalatiak, hasil Nelayan situ jo hasia papeh kami nan lumayan baruntuang di Pulau tapancia ko. Tangiang carito dari muluik-muluik polos mereka tantang pulau pasia nan mamanjang di tangah lauik nan ampia mancilakoi kami tu , dipicayoi sebagai tampek mambanamnyo Ula gadang nan siap maisok urang nan takabua. Bagi kami carito ko diambiak hikmah sajo, nan tatap apopun dari Lautan Sati Rantau Batuah ko nan jaleh awak indak cocok untuak sombong jo takabur doh, sabana Allah SWT nan Maha Mangatahui jo Maha Manguasoi, hanyo ka talinyo sajo kito bagantuang supayo salamaik dunia akhirat, amin. Dari kajauahan ukatu di dermaga palantar kami caliak Pulau Moro di daerah Karimun diseberang lauik laweh mambantang. Nantilah tiko ado ukatu jo kesempatan di lalui lo Pulau tu, InsyaAllah.. Kini ukatunyo baliak pulang jo kecepatan maksimum dek alah mulai jaleh baa kondisi jalan ka pulang. BUkankah alam takambang jadi guru. Makonyo indak sampai sore hari, kami lah tibo baliak di dermaga Saguluang, Batu Aji nan aianyo karuah jo pemandangan Tongkang2 nan satangah jadi di tapi2 aia di Tj Uncang tu. 22jul09batam Sakian dulu adidunsanak lapau gadang ko, talabiah takurang mohon ambo dibari mauh. Kalo indak punyo jiwa adventure, ijan ditiru. Di osok urang kaniang bekoh. hehehe Wassalam Rina, 32, batam --~--~---------~--~----~------------~-------~--~----~ . Posting yg berasal dari Palanta RantauNet ini, jika dipublikasikan ditempat lain wajib mencantumkan sumbernya: ~dari Palanta r...@ntaunet http://groups.google.com/group/RantauNet/~ =========================================================== UNTUK DIPERHATIKAN, melanggar akan dimoderasi: - DILARANG: 1. Email besar dari 200KB; 2. Email attachment, tawarkan disini & kirim melalui jalur pribadi; 3. One Liner. - Anggota WAJIB mematuhi peraturan serta mengirim biodata! Lihat di: http://groups.google.com/group/RantauNet/web/peraturan-rantaunet - Tulis Nama, Umur & Lokasi pada setiap posting - Hapus footer & seluruh bagian tdk perlu dalam melakukan reply - Untuk topik/subjek baru buat email baru, tidak dengan mereply email lama =========================================================== Berhenti, kirim email kosong ke: rantaunet-unsubscr...@googlegroups.com Untuk melakukan konfigurasi keanggotaan di: http://groups.google.com/group/RantauNet/subscribe -~----------~----~----~----~------~----~------~--~---
