Assalamualaikum wr wb….. Ondeh… awalnyo ambo indak barencana mambuek catatan perjalanan ko di RN… dek mbo raso iko kan curito nan indak adoh relevansinyo jo kampuang. Tapi indak apolah, mbo cubo juo manulih agak saketek..
Baru sajo ambo tibo di rumah sapulang dari yogyakarta maikuti pelatihan ‘TOT on Emergency and Disaster Managament’ katiko hp dipinggang babunyi nan langsung mbo angkek. Di subarang adoh suaro nan maminta mbo untuk langsung bagabuang jo Tim Kesehatan nan di barangkek an ka Chino. Belakangan mbo baru tau kalau nan manalipon tuh adolah sekretaris di IGD RSCM. Mbo langsuang manjawek okey tando satuju dibarangkek an. Dalam hati mbo subananyo bakato paliang2 indak jadi barangkek sarupo pangalaman duo minggu sabalunnyo katiko mbo diminta untuk barangkek ka Myanmar juo untuk misi bantuan kesehatan badai Nargis. Dibutuhkan waktu kurang labih satu minggu mampasiapkan dokumen, konsep bantuan, dan berbagai strategi sebagai antisipasi masalah nan ka di adok I di Chino. Memang bantuan kesehatan untuk gampo samo sakali babeda jo bantuan kesehatan untuk badai ataupun tsunami. Akhirnyo berbagai bargaining antaro pemerintah RI jo Chino dan antaro tim nan barangkek pun dicapai suatu kesepakatan bahaso dibaragkek an 20 tenaga medis dengan latar belakang terutama bedah. Setelah disetujui oleh kaduo pemerintah mako ditetapkanlah tim kesehatan dibarangkek an tanggal 27 Mei 2008 dengan rencana awal untuk salamo 1 bulan (akhirnyo misi cuma 2 minggu). Pagi itu puku 06.00 selasa tanggal 27 Mei 2008 dua puluh anggota tim kesehatan nan terdiri dari 3 orang TNI dan 17 orang sipil alah basiap di tarimo sakali gus di lapeh wakil pemerintah RI (ketua PPK Depkes) dan wakil pemerintah Chino (wakil dubes Chino di Jakarta). Menjelang pukul 08.00 seluruh anggota tim kesehatan boarding untuk kemudian dibaok dek kapa tabang garuda Indonesia dari Jakarta manuju Guangzhou. Kurang dari 5 jam duduak2 jo makan2 sambi mangana ilimu masiang2 nan ka palanggakan ka urang chiono dan adoh juo nan bagurau, rombongan lah sampai di Guangzhou. Di siko pun rombongan ditarimo oleh petugas dari KJRI untuk di antakan ka panginapan di dakek bandara Baiyun. Novotel bandara tampek kami singgah memang sangajo dipilih untuk mampamudah pambarangkek an bisuak ka Lanzhou jo kapatabang southern China. Puku 19 malam jam satampek rombongan dijamu makan malam dek konjen Guangzhou di resto Vietnam indak jauh dari Beijing Lu. Sambi mandanga laporan ketua tim dan sambutan sarato wejangan pak Konjen tantang nagari Chino kami nan alah lapa tanpa basa basi langsuang manyantap makanan lauik nan dihidangkan. Puku 22 wakatu Guangzhou kami baliak ka hotel untuk baistirahat sambi mancari informasi tantang Wenxian County Gansu Province daerah nan ka dituju. Hari kaduo pajalanan puku 15.00 kami lah basiap2 ka Baiyun airport nan indak jauh dari novotel untuk pambarangkek an rombongan dari Guangzhou ka Lanzhou. Dek karena cuaca hari tu turun hujan labek jo angin kancang kapa tabang nan seharuihnyo barangkek puku 17.00 ditundo manjadi puku 19.00. Di Lanzhou kami mandaraik pukua 21.00 sasudah kapa tabang southern China mambuang wakatu kurang labih 2 ½ jam. Kembali rombongan dijampuik dek tim advanced nan alah barangkek duluan. Dari bandara Lanzhou ko kamipun langsuang dibaok ka tampek penginapan nan mamaralu an 2 jam pajalanan bus mancapai hotel Ningwozhuang tampek kami ka mangaso. Mbo caliak jam alah manunjuak puku 12.00 malam katiko makan laruik malam disadiok dek restoran hotel. Walaupun paruik lapa, namun dek karano paruik ko alah tabiaso jo randang iyo indak managih nyo katiko hidangan ala chino tu basuguhan. Urang makan awak malulua. Nan diambo iyo ai liyui se nan balulu ditambah jo makanan ketek nan lai basiso dibaok dari Jakarta. Satangah jam lah bakucantang makan laruik malam, kemudian rombongan baliak ka kamar hotel untuk baistirahat. Mandi sabalun lalok, kemudian marabahan badan di tampek tidua….. e eh… tampek tiduanyo indak pakai per, namun pakai papan kareh nan baaleh jo kasu tipih. Iyo agak manulak badan raso tidu di ateh tampek tidu ‘jet li’ ko. Hari katigo, pagi kami alah basiap untuk pambarangke an rombongan ka Wenxian County, dari Lanzhou diinformasikan kami akan menempuh perjalanan 2 hari samalam lewat darat. Rute nan kadi tampuah melewati 3 kabupaten (Chenxian, Tianshui dan Longnan) baru kemudian sampai di kota tampek kami ka maadohan karajo untuk misi kesehatan. Dalam perjalanan ko rombongan Indonesia digabuang jo rombongan Pakistan nan juo akan maadohan misi kesehatan di daerah Longnan. Kota Longnan ko di dakek pasa nan rami dan banyak urang muslim. Tanago medis Pakistan ko kebanyakan tidu di hotel walaupun mereka mambauek rumah sakik lapangan untuk melayani korban gampo di Longnan. Salain itu satiok rombongan dikawanan oleh satu grup kesehatan local yang pada umumnyo dokter dan paramedic rumah sakik di Lanzhou. Rombongan dari Indonesia di kawanan dek 5 urang tanago medis salah surangnyo professor Lew ahli paru. Professor ko di kota Lanzhou sangaik disagani dan kecek nyo badanga baitu informasi salah seorang volunteer nan bagabuang dengan rombongan tim kesehatan Indonesia. Tapek puku 0900 pagi kota Lanzhou sasudah acara sambuik manyambuik, puji mamuji kelebihan masing2 negara mulai dari tuan rumah pemerintah Chino nan diwakili wakil gubernur Gansu Province, dari pemerintah Indonesia diwakili oleh wakil dubes Indonesia untuk Chino Beijin pak Umar dan dari pemerintah Pakistan diwakili oleh Dubes nyo pulo mako iring2an 6 buah bus mulai dibarangkek an. Pagi nan bakabuik dek karano masih dingin, mulai ditinggakan dek iring2 an oto manuju Wenxian. Matahari nan lindok pun mulai pulo mancogok agak tenggih. Langik nan indak biru nampak buram seolah ikuik sadih jo gampo chino. Indak adoh tadanga buruang pipik mamakik2 sarupo di kampuang awak ndak mamakan padi. Samantaro itu Professor Lew nan kabatulan duduak disampiang ambo mulai baciloteh jo inggirihnyo nan baaksen chino (mirip singapur juo). Nan awak like disampiang ko adolah Yellow River nan terkenal tu keceknyo. Aie nyo kuniang masih panuah. Diujuang subalah utara jalan memang nampak pembangunan jembatan panjang sarupo di kota Palembang. Sakileh memang mengagumkan. Oto nan balari rato2 jo kecepatan diateh 100 km/jam bajalan taraso lambek barangkali dek karano lebanyo jalan highway nan dilalui (4 jalur ). Professor Lew manambahkan baso kito akan melewati 18 terowongan nan manambuih pagunungan Gau Lou dan jalan highway sapanjang kurang labih 600 km ko baujung di kota Tianshui. Terowongan nan paling panjang diantara nan 18 ko adolah 1,5 km. Iko dikarajoan jo teknologi chino dan urang chino indak paralu bantuan urang lain doh kecek e bangga. Disampiang kiri kanan jalan kito akan menemui banyak ladang sayue dan ladang buah2an nan leba. Usaho iko indak dikelola dek pamerentah doh tapi di kelola oleh rakyat nan di dukung oleh pemerintah. Di Gansu province memang sadang musim summer sahinggo di sapanjang jalan taraso bana suhu udaro nan angek, salain itu pun gunuang2 tampak tandus. Lahan pertanian nampak di semprot jo air pipa. Puku 1500 rombongan sampai di Tiangshui untuk kemudian makan siang di restoran muslim di hotel Tiangshui, kamipun menyempatkan diri untuk shalat jama qashar Zuhur dan Asyar. Bamacam hidangan kami nikmati ala muslim china. Makan jo chopstick indak banasi… he iyo agak lari salero dek inyo. Nan indak lupo adolah mereka selalu memperkenal kan kehebatan teh dan tradisi minum tehnya. Puku 1600 pajalanan dilanjuik an manuju kota Longnan melewati kota Chengxian. Jalan mulai sampik cukuik dilewati duo sampai 3 kendaraan untuk basalisih. Medannyo pun mulai manaiki gunuang jo manuruni lambah nan gersang, namun disela2 itu kita banyak melihat ladang sayur dan buah yang terawatt dengan baik. Sungguh suatu pemandangan yang menabik an salero. Longnan akhirnya kami capai pada pukul 2200, lalu kami menginap satu malam, beristirahat melepas lelah, dan melaksanakan ibadah sambil memohon semoga perjalanan ini mendapat ridhoNya. Hari ka ampek….Pagi nan masih bakabuik salasai sumbayang subuh dan sarapan pagi di hotel Wudhu Longnan, rombongan kembali basiap naik bus. Sajak samalam kami alah bapisah jo rombongan dari Pakistan dek karano inyo langsuang ka lokasi nan Cuma 3 km dari hotel tampek kami manginap. Samantaro kami masih malanjuik an pajalanan ka Wenxian nan ka ditampuah sakitar 7 jam perjalanan bus. Dapek kaba medannyo pun labih barek namun jalan lai indak adoh nan rusak. Iriang2an mulai bajalan maninggaan kota Longnan puku 0830. Oto memang bajalan lambek dek karano medannyo nan naik turun sarupo bajalan di danau ateh danau bawah. Kiri kanan masih gunuang jo lambah nan gersang nan di selingi dek ladang petani nan disirim jo aie kran. Professor Lew nan Chino tulen lulusan amerika ko mulai baciloteh tantang medan barek nan dilewati. Di sepanjang jalan nampak banyak tenda masyarakat nan indak namuh tingga dirumahnyo takuik jadi korban runtuhan bangunan. Bangunan rumah penduduk di sepanjang jalan dari Longnan ka Wenxian memang tampak rapuh, sebagian gadang penduduk nan tingga di daerah ko memang petani nan kebanyakan indak bisa mambangun rumah nan kokoh. Pada umumnyo masyarakat siko membangun rumah dari batu indak pakai simin tapi pakai tanah liek. Dari kejauhan tampak nan rubuh tu memang rumah nan dibangun jo tanah liek ko, samantaro bangunan nan dibangun jo simin nampak masih kokoh. Prof Lew manambah an memang iko kelemahan system di siko nan indak mambuek standar bangunan rumah nan anti gampo. Barangkali dek karano kajadian saroman iko baru kali iko tajadi di Gansu province ko kecek nyo manambahan. Alah paneh katepoang dek duduk, alah pulo abih ota nan ka diotaan, tapek puku 1600 rombongan kami sampai dilokasi perkemahan dilembah Gau Lou Mountain Desa Wenxian di tapi sungai naga putih. Kedatangan indak adoh lai acara protokoler namun adoh babarapo media local nan meliput. Rombongan kemudian langsung merapikan tenda dan mengatur dan menempatkan barang2 bawaan di tenda masing2. Tidak ada spanduk selamat datang atau sejenisnya di sini. Ada kesan bahwa tenda ini barusaja dibuat pagi hari ini…. Setelah merapikan barang bawaan kurang lebih ½ jam rombongan nan dipimpin letkol CKM Ben Rimba lalu meadoan rapek kilat, mendiskusian konsep dan strategi kegiatan yang akan dilakukan salamo di Wenxian. Kami dari dokter spesialis mausulkan supayo sore itu juo langsuang ka lokasi tampek pasien nan tabariang nan mamaraluan tanago kesehatan untuk mambuek assessment sahinggo malamnyo bisa mambuek strategi macam apo nan sasuai untuk dikarajoan bisuak. Baruntuang nan dikirim adolah dokter2 spesialis nan alah punyo banyak pengalaman di gampo Iran, Tsunami Aceh, Gampo Yogyakarta, dan Afrika Selatan, sahinggo keputusan maninjau lokasi untuk assessment masalah dapek capek diputuihan. Sore itu juo rombongan malakukan kunjungan ka lokasi untuk mambuek assessment. Keputusan iko memang saketek mengajuik an pihak local dek karano inyo labih manyarankan untuk bisuak pagi. Dilapangan sarupo nan alah kami duga sabalunnyo fase akut bencana alah salasai. Korban alah mandapek pelanyanan emergency. Dengan kato lain tingga fase perawatan krban. Nan diparaluan kini adolah penanggulangan second disaster karana penyakit yang tidak berhubungan dengan gampo tapi bekaitan dengan kesehatan lingkungan, penurunan daya tahan tubuh, gangguan psikis atau depresi dsb. Assessment singkat ini kemudian kami utarakan pado rapek malam harinyo jo pemda dan pihak rumah sakik satampek. Kemudian kami mambuek action plan harian nan salalu dilakukan perbaikan bilo ditamukan hal baru dilapangan pada malam harinyo. Basambuang (hari partamo di Wenxian…….) --~--~---------~--~----~------------~-------~--~----~ =============================================================== UNTUK DIPERHATIKAN: - Wajib mematuhi Peraturan Palanta RantauNet, mohon dibaca & dipahami! Lihat di http://groups.google.com/group/RantauNet/web/peraturan-rantaunet - Tulis Nama, Umur & Lokasi anda pada setiap posting - Dilarang mengirim email attachment! Tawarkan kepada yg berminat & kirim melalui jalur pribadi - Dilarang posting email besar dari >200KB. Jika melanggar akan dimoderasi atau dibanned - Hapus footer & bagian tdk perlu dalam melakukan reply - Jangan menggunakan reply utk topik/subjek baru =============================================================== Berhenti, kirim email kosong ke: [EMAIL PROTECTED] Daftarkan email anda yg terdaftar pada Google Account di: https://www.google.com/accounts/NewAccount?hl=id Untuk dpt melakukan konfigurasi keanggotaan di: http://groups.google.com/group/RantauNet/subscribe =============================================================== -~----------~----~----~----~------~----~------~--~---
