Assalamu'alaykum Warahmatullaahi Wabarokaatuhu,
Manolah Mak Madahar, mohon izin tulisan Mak Madahar kami forwardkan ka
kawan-kawan nan jadi petugas tiket/parkir di Puncak Lawang, siapo tahu
makin termotivasi kawan-kawan tu.
Salam hangat,
Afda Rizki (Lk-37), Basrah,
*
Pada Selasa, 06 Oktober 2015 08.22.24 UTC+3, Madahar (madahar) menulis:
>
> Assalamu’alaikum ww
>
> Bapak/ibu, dunsanak di Palanta. Pakan lapeh (sasudah rayo aji) kami
> (kawan-kawan kantua) dari Pakanbaru pai mancari pambarasiah paru-paru agak
> sari duo. Piliahan jatuah ka Lawang Park di Puncak Lawang. Alhamdulillah
> lai dapek samalam walau dari sudah asa sampai sudah mugarik di toyong ujan
> salabek-labek ujan. Tapi baitulah ati lai sanang karano lai sasuai jo
> tujuan mancari udaro barasih.
>
>
>
> Kami barangkek dari Pakan indak sairiang tapi samo tujuan, ado nan
> barangkek jumaik pagi, siang sarato awak jo anak barangkek sasudah mugarik.
> Kami sampai di pondok nan paranah di singgahi uda Nanang babarapo taun
> lapeh sakiro pukua 3 subuah. Pukua 11 satu siang kami (kompoi) dari
> Kiktinggi manuju Puncak lawang, samulo niaik lalu ka Palupuah tapi di
> tangah jalan manuruik panduduak dakek sinan jalannyo alun aspal rancak,
> masih ba batu-batu. Dek awak mambao oto ketek diputuihan baliak arah lalu
> ka Ngarai nan kalua di Panta Sungai Landia. Tibo manjalang Matua kami
> singgah di Pondok Labu untuak malapeh angah sambia mancaliak ancaknyo
> pamandangan dari bulakang pondok labu. Io lapeh mato, barasiah pandangan
> dek karancak an nagari nan tabantang.
>
> Kawan-kawan nan jarang ka sinan io badacak kagum jo karancak an daerah
> kito, apo lai udaro iyo sabana barasiah talapeh dari asok nan tiok ari kami
> rasoan di Pakan babarapo ari balakangan go. Lah lapeh pandangan barasih
> mato kami pasan cindua ka labu ka urang pondok, io sabana mancaduak
> rasonyo. Mudah-mudahan di lain maso, dunasanak nan sadang dalam pajalanan
> Kiktinggi – Matua bisa pulo singgah di sinan untuk mancaliak pamandangan
> sarato makan kolak atau cindua labu.
>
>
>
> Sasudah tu pajalanan di taruihan ka Puncak Lawang sabalun ka tampek kami
> bakemah di Lawang Park. Untuak sakileh kaba; Puncak Lawan jo Lawang Park
> adolah duo tampek nan balain tapi basabalahan di duo bukik badakek an.
> Puncak Lawang di kelola (mungkin) nagari sadangan Lawang Park dikelola dek
> dunsanak kito di Palanta yaitu pak Zuhrizul. Baitu masuak kaporo Puncak
> lawang kami di sambuik dek babarapo urang Pemuda nan gagah-gagah babaju
> coga sainggonyo takasan ndak paralu cameh jo sia nan batanyo. Ditanyo ka
> wak bara kendaraan jo bara panumpang, masiang-masiang kanai Rp 5rb sainggo
> tabaia 50rb, tapi dek salah etong tatambah 5rb lai. Alhamdulillah lanca
> urusan, kami taruih ka puncak ka tampek tujuan. Ruponyo di puncak tampek
> parkir sampik jadi babaliak arah untuk mancari parkir di tapi jalan. Datang
> tukang parkir mamandu parkir supayo rapi jo taratur tasusun kandaraan.
> Baitu salasai kami ka puncak untuak makan siang talabiah daulu sabalun
> bajalan-jalan manikmati pamandangan rancaknyo Danau Maninjau. Kami makan
> nasi bungkuih Kapau nan babali di Kiktinggi (kecek kawan indak pulo maha
> do, sabungkuih nasi cukuik untuak 2 urang) Sadang kami makan datang 2 urang
> nak bujang gagah nan ba pasan, “ bapak/ibu, beko sudah makan tolong
> sampahnyo di kumpuaan yo pak/buk”, lah kami jawek “iyo” nyo taruih bajalan
> sambia sapanjang pajalanan kok dapek sarok nyo ambiak sudah di masuak an ka
> tong sampah nan lah di sadioan di sinan. Ado ciek nan lupo, kutiko baru
> tibo masih ado nan main paralayang di ateh langik Danau Maninjau. Sudah
> makan baru pai bajalan-jalan, nan anak-anak lah main siluncuran (flying
> Fox) di arena pamainan. Iyo sanang mato mancaliak pamandangan rancaknyo
> Danau Maninjau, tapi indak baitu lamo karano kabuik lah datang manjalang.
> Lah salasai anak main pajalanan di taruihan ka Lawang Park karano kawan
> sarombongan nan lain lah tibo disinan. Ukatu pulang/kalua parkir sampai ka
> pintu kaporo puncak lawang *lai indak ado nan mamintak pitih tambahan do,
> baiak itu parkir maupun kaamanan*. Malah dipintu kaporo kami di lapeh jo
> sanang ati pamuda sinan sambia bapasan, datang baliak yo pak, sudah tu nyo
> sampaian ta rimo kasih ateh kadatangan kami ka sinan.
>
>
>
> Sasampai nyo kami di pintu kaporo Lawang Park kami ditanyo pulo dek anak
> gadih manih mambari kaba kalo masuak area ado kuricihnyo, dek awak juo nan
> di muko mako basampaian kalo kami rombongan nan ka bakemah beko malam. Ndak
> banyak tanyo kami disuruah malanjuik an pajalanan. Dipasingke carito lah
> tagak 6 tenda untuak kami lalok beko malam. Lah salasai tagak tenda lah
> pulo makan goreangan nan dimasak ibuk-ibuk rombongan tibolah ujan labek nan
> sabana labek bak istilah ukatu ketek “ujan labek-labek timpo gado-gado”
> sampai sabalun sumbayang isa. sasudah agak rinai diansuak mangariangan
> tampek api unggun nan lah disadioan dek
