Pesbuk jeung Si Kabayan KAREK ge Si Kabayan jol Si Kabayan tas balik ti kota, tas iang cau, mitohana langsung muru. Pedah nempo Si Kabayan ranggem ku kantong. Da geus biasa, minantuna teh mun tas iang ti dayeuh sok nyimpangkeun oleh-oleh. “Maneh mawa pesbuk, Kabayan?” ceuk Abah Ontohod bari moron u karek nolol di lawang panto. “Pesbuk? Nanahaon?” ceuk Si Kabayan mureleng beungeut mitohana nu burial buncelik ti buburanjat satengah ngarontok manehna. Panon mitohana nempo kana bungkusan nu dicekel ku si Kabayan. “Pesbuk, deuleu, pesbukkkk….!” “Ieu mah pindang! Sumpah. Nu ieu keur Abah pindang deles, nu ieu keur Ambu pindang tongkol keureut! Kadaharan naon atuh nu kitu?” Si Kabayan bengong bari diuk satengah ngabeubeutkeun maneh dina golodog imah mitohana. “Tadi dewek ngadengekeun berita di televisi, ulama ngaharamkeun pesbuk deuleu! Haram, cenah!” Si Kabayan ngahuleng. Ceuk dina pikirna, eta meureun nu daharna di restoran baradag, nu daharna enon-enon wungkul. Sigana pacampur jeung daging babi, matak pantes diharamkeun. “Oh, nu kitu! Lah, moal kabedag atuh Abah dahareun nu kitu mah. Kadaharan menak nu kitu mah! Didahar ku Abah mah moal sapeujit, moal sabeuteung, moal saletah, kuriak karacunan didahar ku Abah mah!” “Jadi moal asup ka urang mah kadaharan nu kitu?” Si Kabayan gideug. Sabot kitu, lar Jang Oyot, mahasiswa nu karek balik ti kota ngaliwat ka hareupeun imah Abah Ontohod. Waktu eta pamuda ngaliwat, Si Kabayan nyalukan. “Jang, ka dieu geura!” Gerona rada tarik, da ituna siga nontoyod hare-hare. “Ka abdi!?” ceuk nu dicalukan ngarandeg. “Enya ka didinya….” Celukna deui. Nu dicalukan malik kiri ka lebah imah Abah Ontohod. “Jang, ieu mitoha kasieunan ngadahar pesbuk. Cenah haram! Uing dicuriga mawa pesbuk. Sumpahna ge ieu mah pindang!” Jang Oyot ngabarakatak seuri. “Kang, sanes pesbuk alias pepes bubuk, hahahah…! Tapi, face-bookkk….! Eta teh…. Eu kumaha, nya, nerangkeunanana hese! Face book mah ayana dina internet, di dunya maya, paragi gagaulan, paragi silaturahmi, neangan babaturan nu geus lila teu panggih… Urang bisa chating langsung, bisa ngeusian komentar, bisa ngirim pesen…. Face book mah kalangenan jalma-jalma nu hayang berbagi pangalaman, informasi, curhat, pokona mah mun Akang ngarti. Raos gaduh face book mah!” “Jadi, kadaharan naon atuh? Abah mah lieur? Naha bet di haramkeun?” “Hih, lain kadaharan Abah!” Si Kabayan ngagebes. “Tadi si Ujang nyebut raos?” “Maksad raos teh, nya raos weh! Tiasa manjangkeun silaturahmi ka anu tos lami teu pendak, sareng nepangkeun ka nu karek wawanohan!” “Ke asa ngadenge alam maya? Ngaran nagara eta teh?” Jang Oyot ngarahuh. Sirahna ngadadak bejad. Keur mah tadi tas pajejel-jejel dina elf, katurug-turug meunang pananya siga kitu, puguh wae asa mingkin jangar. “Bingung, Bah, Kang, nerangkeunana! Permios, ah!” cenah kituna teh bari nongtoyod nyingkah. “Geuning budak dikuliahkeun teh teu mungguhan matak jadi pinter, nya! Si Oyot buktina kalah angger bodo…” ceuk Bah Ontohod bari ngaleos ka tengah imah. Si Kabayan garo-garo teu ateul bari nuturkeun mitohana.****
