|
Taun ieu getih goib ngamalir ka
cibatu,nurugtug ditutugan nagreg,suat seot dipengkolan cibiuk,ngagilek ngatuhu
palebah sasak beusi, ahirna ngamuara dilengkob pasantren keresek. Meureun
kabeh ge sarua, jampena ngan ukur hiji allohuma maksakeun tea, najan samemehna
kudu dor dar jeung pamajikan, dibaeudan mitoha, getreng jeung
kikindeuwan, kaparengan eusi dompet ge keur rangkebong, nu penting bisa
ngamalirkeun getih goib anu geus ngagolak tianggalna mula.
Anjog ka lengkob pasantren,bleg we nek hajat
rongkah. Tenda biru ti subuh mula geus satia mayungan,korsi korsi geus
ngaderet, semu nu teu sabar hayang geura antel
jeung bujur nu geuliz, nu lenjang,nu kazep, nu huizan, nu
kumizan oge nu gaduh mobil zedan. Nya didinya pisan, dilengkob
pasantren getih goib ngagulung, pagalo, umpal umplan, leber kapipir,
ngagareuwahkeun bentang bentang pasantren anu keur anteng ngaherang. Nu datang
pada pada mawa kasono,awor mangsa paadu dampal.
Sagedengeun ti eta aya nu silih baledog paneuteup, silih sidikeun nya diri,
silih puntangkeun rasa, silih geleberkeun duriat, duka eunteupna
dimana.
Teu weleh heureuy jeung heureuy, galecok silih
tumplekeun ka sono. Katingali husu jeung seurius teh kahiji lamun
keur netepan, kaduana lamun keur nanggeuy sangu sapiring, ditumpangan
gepuk sapotong, goreng jaer nalokom, semur jengkol tilu bebek, ngan hanjakal
bantrok jeung kulub peuteuy, nya kapaksa salasahijina kudu bedo. Bisi sirikeun,
lauk asin diselapkeun dua siki, pangluhurna kurupux udang ucang angge. Geus
ilahar keur hajatan, urutna pasolengkrah dihandap, keun wae da adatna, coba mun
samemehna, panitia ngabewarakeun heula, dahar teh kudu erep jeung piring
piringna, meureun moal cape peperen moal nyusahkeun kukumbah nu boga imah.
Hapunten neda tawakup oge jembar pangampura!
Wareg seuri wareg peujit, halabhab kaubaran ku
bajigur instan, jam 12 peuting panon geus beurat ngiceup, batrena lowbet.
Kiyingking muru ka kobong, anu hareupna aya kandang sipelung jeung bedug.
Goledag ngagoler, aneh samemehna mah pitunduheun teh geus ngagarayot, dak
dumadakan lenglang deui, malah kalahka kumalayang jor jor inget ka si
geheng, beungeut si ai ngongkolak, ngan palebah inget ka USUL, nu ngongkolak teh
geuning kalahka sakadang BEDUG. Jero hate, amit amit ari kudu sagebrug
jeung bedug mah. Wanci beuki jempling, hawa beuki nyilingit, panon teu daek
dipeureumkeun, ingetan kumalayang deui, inget kadongeng JIN keresek. Padahal
make kudu dipikasieun, jin mah pan geus ngarumpul dikota. di CIHAMPELAS
ngaleutak. Tapi tetep teu beunang dibrangbrangkeun, kasieun tetep
napel,pangpangna mah sieun dipindahkeun ku JIN ka jero bedug.
Sora sipelung patembalan jeung sora nu kerek,
teuing timana jebulna, hate langsung suuzdon, boa boa nu kerek teh jin, da beda
ti biasa, rada halimpu ngoncrang kawas ringstone polyponic. Karek ge nek
ngalenyap, beledug beledug sora bedug ditakol ku merebot, rarasaan teh panakol
bedug ninggang kana hulu, korejat hudang da bisi enya aya dina jero bedug,
tapi alhamdulillah masih tetep dikobong, ngan eta we pipi mani nyecep, sihoreng
balas digalentoran ku tembok kobong. Daek benghar lain uing nu ngagalentoran
tembok, tapi tembok nu ngagalentoran uing.
Sabada subuh, langsung amitan kanu aya, oge ka nu
gaduh bumi, kang Deni. Hatur nuhun beuleum ulen kang Den! malihan di tambihan
deui atahna sagebleg kumplit sareng sambel oncomna, teu kapalang diringkid we.
Balik teh badis we santri anu pundung balas
dicarekan, da dua minggu diajar can apal alip bingkeng bingkeng acan.
Cag!
syam ridwan
Komunitas Urang Sunda --> http://www.Urang-Sunda.or.id
SPONSORED LINKS
Your email settings: Individual Email|Traditional
Change settings via the Web (Yahoo! ID required) Change settings via email: Switch delivery to Daily Digest | Switch to Fully Featured Visit Your Group | Yahoo! Groups Terms of Use | Unsubscribe __,_._,___ |
