Aparat pamarentah (kaasup polisi) anu ngatur angkutan arus mudik Lebaran, geus
biasa make istilah H-2, H-1, H+1, H+2 jeung saterusna, lamun keur nyebut
poe-poe di saputeran poe Lebaran. Poe tanggal hiji Sawal disebutna poe H,
dimana H = 22 Oktober atawa 23 Oktober 2006.
Naha tanggal 1 Sawal kudu diganti ku variabel H? Ngaranna oge variabel, hartina
can pasti sabaraha angkana. Alasannana : lantaran pamarentah ngadagoan heula
ruyat. Ari ruyat dipigawena tanggal 29 Ramadan. Jadi iraha-irahana tanggal 1
Sawal, naha isuk naha pageto, ditangtukeunana teh ngan ukur sapoe atawa dua
poe saencanna.
Sugan dina ieu milis aya anu kungsi nitenan, kumaha carana jelema nyieun
pananggalan di nagara Arab, atawa di nagara bae anu make kalender hijriyah?
Naha maranehannana nyitak pananggalan satauneun-satauneun? Atawa
sabulaneun-sabulaneun ?
Oge, kumaha carana di nagara anu make kalender hijriyah, jelema nyieun jangji
rapat, undangan kawin, jadwal produksi jeung sajabana.
Lamun Senen tanggal 22 Oktober katukang, urang nyetir mobil terus asup ka jalan
Thamrin (Jakarta) anu aya katangtuan 3in1, naha pulisi meunang nilang? Maenya
urang kudu ngangles :Pa Pulisi, kuring Lebaranna poe ieu, jadi 3in1 teu
berlaku sabab keur kuring mah poe ieu teh poe pere.
Terus, maenya kudu aya undangan kawinan anu unina siga kieu :
Diantos kasumpingannana :
Dinten : Saptu
Kaping : 5 Sawal 1427 H (upami 1 Sawal = 23
Oktober 2006).
atanapi
6 Sawal 1427 H (upami 1 Sawal
= 22 Oktober 2006)
Eta masalah praktisna lamun kalender Hijriyah rek dipake sapopoe. Geus puguh
ari masalah dina urusan ibadah mah. Minggu tukang pasti loba jelema jadi
was-was : naha kuring teh bener kitu puasa keneh dina poe Senen.
Kajadian beda poe tanggal 1 Sawal sumberna tina metode. Pamarentah (oge NU)
make metode ruyat (nempo hilal), sedengkeun Muhammadiyah make metode hisab
(diitung, make elmu astronomi meureun). Euweuh jaminan eta dua metode hasilna
sarua. Memang can pernah aya kajadian ekstrim siga anu dirandapan ku urang
Akhmadiyah anu diusir dimana-mana ku lantaran beda poe Lebaran. Paling jauh,
ngan ukur jadi bahan geuhgeuyan basa keur halal bi halal. Teu bisa henteu, dina
kulawarga gede, aya anu milu Lebaran Senen aya oge anu milu Lebaran Salasa.
Tapi ari kudu narima yen beda poe tanggal 1 Sawal teh hiji rakhmat, asana teh
acan bisa. Asana the ieu mah alasan apologetik. Jadi kumaha atuh?
Dina hal ibadah, kuring geus nempo sababaraha hasil ijtihad (inovasi) anu
ngaheulakeun kebersamaan. Misalna : sanajan sawareh urang Islam aya nu maca
usholi (niat sholat), sawareh deui henteu usholi, tapi ari sholat berjamaah mah
duannana bisa bareng.
Lamun keu jumaahan, sanggeus adzan, memeh khutbah sok aya nu sholat sunat
heula, tapi aya oge anu henteu. Tapi teu matak pasea. Kabeh bareng solat jumat.
Sholat taraweh, aya nu 11 rakaat, aya oge anu 23 rakaat. Kuring kungsi miluan
taraweh di hiji masjid anu ngagabungkeun duanana. Jadi, sanggeus rengse sholat
taraweh 8 rakaat, kelompok pro-11 solat witir 3 rakaat, sedengkeun anu pro-23
ngaso. Beres witir kelompok pro-11 terus balik, sedengkeun kelompok pro-23
neruskeun 15 rakaat sesana.
Aya oge cenah (di masjid sejen) anu migawe witirna the di imah masing-masing.
Balik deui kana soal ruyat jeung hisab. Kudu aya inovasi di hal ieu. Tangtu
kudu jalma nu akhli nu mikirannana. Inovasi di dieu arahna leuwih alus lamun
ngupayakeun dipakena hiji metoda keur kabeh umat. Aya dua nu kudu diperhatikeun.
1. Mana nu kudu otentik, mana nu henteu
Aya mangsana baheula umat Islam pinunjul dina soal teknologi jeung elmu
pangaweruh. Ayeuna geus mangsana umat Islam make deui teknologi jeung elmu
pangaweruh keur kaperluan praktis jeung kaperluan ibadah. Aya hal-hal anu ku
urang ayeuna dipigawe demi alasan otentisitas (kudu sarua jeung zaman Kanjeng
Nabi), saperti ruyat misalna, geus meujeuhna ditinggalkeun, diganti ku hisab.
2. Ngaheulakeun kebersamaan
Aya katangtuan yen haram hukumna lamun urang tetep puasa dina poe Lebaran.
Kuring boga pamadegan yen ieu teh parentah Gusti Allah supaya kabeh umat Islam
anu sawewengkon, kudu bareng galumbira (ku jalan dalahar di antarana), teu
meunang aya nu kaliwat. Nu poe eta teu boga dahareun oge kudu bisa sukan-sukan.
Carana, jelema nu boga kudu mayar zakat fitrah anu hasilna tuluy dibagikeun ka
anu mustahak samemeh sholat Ied. Jadi lamun aya keneh jalma anu teu miluan
sukan-sukan (ku cara tetep puasa), eta tandana teu kompak, atawa bisa disebut
bedegong ka Gusti Allah.
Lamun para ulama henteu ngusahakeun ayana poe Lebaran tunggal, sarua bae jeung
maranehanana ngajalanan ayana umat Islam bedegong. Atawa, meureun si ulamana
sorangan anu bedegong.
Lenyepaneun.
[Non-text portions of this message have been removed]
http://groups.yahoo.com/group/baraya_sunda/
http://barayasunda.servertalk.in/index.php?mforum=barayasunda
[Ti urang, nu urang, ku urang jeung keur urang balarea]
Yahoo! Groups Links
<*> To visit your group on the web, go to:
http://groups.yahoo.com/group/Baraya_Sunda/
<*> Your email settings:
Individual Email | Traditional
<*> To change settings online go to:
http://groups.yahoo.com/group/Baraya_Sunda/join
(Yahoo! ID required)
<*> To change settings via email:
mailto:[EMAIL PROTECTED]
mailto:[EMAIL PROTECTED]
<*> To unsubscribe from this group, send an email to:
[EMAIL PROTECTED]
<*> Your use of Yahoo! Groups is subject to:
http://docs.yahoo.com/info/terms/
