Maca artikel dihandap, aya anu teu ngartos maksadna Prung padungdung Maung Bandung naon-nya ? bilih aya anu terang. Terutama arti kata PADUNGDUNG sareng arti kata DARIA. -------------------------------------------------------------------------
Persib jeung Realitas Kesundaan O l e h D J A S É P U D I N Persib nu aing Maung nu aing Persib Maung Bandung *** Persatuan Sepak Bola Indonesia Bandung (Persib) lain waé riungan pamaén jeung réngréngan manajemén nu ngaugulung kaulinan bola buleud. Kalayan rojongan ti pamaréntah, bobotoh, sarta media Persib ngajanggélék jadi salah sahiji kareueus urang Sunda. Sok sanajan Persib kiwari keur mojéjrét, tapi Persib tetep ngajanggélék jadi salah sahiji ikon urang Sunda, sabab realitas nasib urang Sunda kiwari matak pimelangeun. Survei Badan Pusat Statistik (BPS) Jawa Barat kana karakteristik penduduk di Jawa Barat tepi ka Agustus 2006, upamana, némbongkeun warga nu ngumbara nu digawé di sektor jasa nitih 34,38%, ari urang Sundana sorangan ngan 18,00%. Dina séktor industri, sémah nu digawé jumlahna 22,97%, ari pribumi mah ukur 10,20%. Nya kitu ogé dina dunya niaga, 15,92% mangrupa warga nu ngumbara ka tatar Sunda, 15,68% deui warga pribumi. Boa paribasa jati kasislih ku junti téh mémang geus nincak kana ugana. Boa urang gé, kana kasundaan téh kakara semet kana susundaan wungkul. Alias artifisial téa. Sunda ngan pupulasan. Ngan abang-abang lambé. Cocorowokan ngaraharjakeun jeung némbongkeun Sunda umumna ngan bati romantik jeung melankolik. Kacida barina, mitos Siliwangi nu jadi pamianganana téh. Sunda ngan jadi panineungan. Nya kacida kahartina, upama Persib kiwari jadi kareueus saréréa. Lain waé urang Bandung, warga Jawa Barat gé ngilu agul. Manakomo barisan punggawa Persib teu wungkul diwewegan pituin Kota Bandung. Ngeunaan aubna pamaén asing dina kakuatan Persib ayeuna, nu baheula mah kungsi dipamalikeun, lain hiji pasualan. Sabab sepak bola kiwari mah sepak bola industri. Sepak bola geus jadi barang dagangan. Prestasi jeung prestise kudu réréndéngan. Dina ieu tataran Persib geus ngigelan jeung ngigelkeun jaman. Sangkan prestasi Persib beuki ngajaul sarta tetep jadi kareueus urang Sunda rupaning tarékah kudu disorang kalayan daria. Salah sahiji carana bobotoh kudu dijadikeun batur pakumaha. Bobotoh teu wungkul dianggap tukang cocorowokan nu bisa nyumangetan para pamaén nu makalangan di lapang. Samalah, upama dikokolakeun kalayan daria mah mangrébu bobotoh bisa dijieun modal geusan ngumpulkeun waragad. Tangtu baé, hadé-goréngna Persib gumantung ogé kana mahér tur motékarna réngréngan manajemen. Geus ninggang ka waktuna Persib kiwari teu kamalinaan jajaluk kana kas APBD. Profesional atuh. Nya léngkah kacida merenah upama Persib dikokolakeun ku pihak swasta.. Disagédéngeun éta, Persib gé kudu leuwih daria dina mikiran regenerasi. Sabab maranéhna pisan ahli waris nu syah nu engkéna nampa tongkat estafet ti Yaris Riyadi, Cecep Supriatna, jeung Suwita Patha saparankanca. Kompetisi di lingkungan Persib kudu dihangkeutkeun deui. Montong kajadian deui klub nu aub dina kompetisi di lingkungan Persib dicoret alatan éta klub bangkrut atawa kakurangan pamaén, kawas nu karandapan ku klub Turangga. Akhirul kalam, dalah dikumaha gé mulang deui ka pamaén. Sakumaha jeniusna pelatih dina ngagulanggapér strategi, saprofesional kawas kumaha gé rojongan tim manajemen, sarta sakumaha eundeurna rojongan ti bobotoh, taya hartina upama pamaénna haré-haré. Sabab, anjeun tihothat téh lain baé keur publik sepak bola. Aranjeun ngeprot késang di lapang gé keur merjoangkeun darajat masarakat Sunda. Prung padungdung Maung Bandung. Mugia jaya di buana. Hurip Persib waras Sunda.